لذة هطول

يالّلي تظنّ الشِّعِر دلّـه وخيمـة شَعَـر
وينك عن غيومه اللي خيّمت في سماي

فاتتك وقت السّحر لذّة هطـول المطـر
لو شفتني حينها ما اخترت خلٍ سـواي

فاتتك لحظة عناق الدمع كيـف انهمـر
يحضن بنات الغيوم بكل قطـره معـاي

لو شفت حفلة زفاف الفجر حين انتثـر
أنفس من الدّرّ لاستحضرت معنى صفاي

تعال عش في كنف جوّي طقوس البشر
لو تعلم ابعاد فكري لاذهلـك محتـواي

تواضعي سمتي وصمتي وبعـد النظـر
جوهر شموخي وعزي واستماتة قـواي

كم لي وانا انصحك لاترمي الثمر بالحجر
أنت اوّل الخاسرين ولا استمعت لْنـداي

ياعازف الناي لايحزنك مـوت الشجـر
مادمت في كل ليله تزفـر الهـمّ نـاي

واللي يظنّ الشّعِر دلّـه وخيمـة شَعَـر
ماشاهد غيومه الّلي خيّمت في سمـاي

*
*
*
علي الحسني