لحظات غريبة بين اثنين ...خلقت الحب في قلبين "

الحلقة الخامسه ...
دخل نايف للغرفه كانت دانه مو قادره تمسك دموعها ...
نايف ــ خلاص دانه ...
دانه ــ طلعت يتيمه ... يتيمه مع انه عندي اربع اخوان ..
نايف ــ صدقينني يالدانه مصلحتج تستقلين في حياتج ..
دانه ـ قصدك مصلحة زوجاتكم ...خلاص يا نايف ..اللي تبونه سووه ..
نايف ــ دانه ..لا تزعلين ..
لكن قلب الدانه كان يقول
((خلاص وش يفيد الزعل ؟؟ والورد اللي في قلبي ذبل ..
وروحي كانت معلقه بأمل ..للأسف تخلى عنها ورحل ...))

*********

ناصر ــ خلاص ملجناج على ضاحي ..
دانه ـ شلون؟؟ بهالسرعه ؟؟ توك من ساعتين بس عطيته الموافقه متى صارت ملجه؟؟
ناصر ــ الريال كان وقته فاضي ..وخير البر عاجله ..
دانه ــ شلون؟؟
ناصر ــ شنطتج كانت بره ؟؟هناء خذت البطاقه منها ..مبروك ..
طلع خمسمية ريال من جيبه وحطاها على الطاولة كهدية زواج ..
انهارت دانه ..وقف شعر جسمها من الخبر ..سالت دموعها ..بس ابتسمت..خلاص ..تزوجت ..ماعندها اي حل ثاني ..خلاص ..اتصل في حمد ابشره ..
اتصل على جوال حمد ..
حمد ــ هلا ..
دانه ــ هلا حمود ..
حمد ــ حمود في عينج ...يا دوين ..
دانه والعبره خانقتها ــ لو سمحت ..أنت تكلم مدام ضاحي بن محمد ..
حمد ــ بايخه ...نكته بايخه ..
دانه ــ ومن قال لك اني أنكت؟؟ (حاولت تشيل نبرة الحزن من صوتها وخذت نفس) ابوك توه دخل علي وقال لي اني خلاص ..صرت مدام ضاحي ..
حمد عصب وايد ...
ــ أنا مو قلت لج يالخبله لا تخليهم يستفردون فيج؟؟ شلون رضيتي بهالسرعه ؟ توج من ثلاث ساعات كنتي معاي ..وما كنتي تبين ؟؟
دانه ــ خلاص حمد ..خلاص ..خذوا بطاقتي ..وملجوا ..
حمد ــ من هم ابوي بس؟؟
دانه ــ ناصر وثامر وسعود ..حتى نايف ..
حمد ـــ زين ليش ما اتصلتي في ولد عمج خليفه ؟؟هو قاضي ..
دانه ــ حمد ..خلاص ملجوني عليه خلاص ..مافي فكه منه ..خلاص ..
وبدت تصيح . صكت التلفون ... وحطت راسها تنام...يمكن ييها النوم ..
********
الممرضه ــ مافيش اليوم حد ..
خالد ــ معليش ..بقى لي ساعه من دوامي واروح ...
طالع الساعه ..كانت وحده في الليل ..
طلع يشوف اذا حد محتاج مساعده ..
شاف شخص ساند بنت ..استغرب ..هالويهه يعرفه ..
ــ دانه ؟؟
كانت غايبه عن الوعي ..
حمد ــ انت مين؟؟
خالد ـ انت مين ..وشفيها الدانه؟؟ هاتها ..هاتها ..حطها على سرير الفحص ..
حمد قرا اسم خالد ..فعرف انه انه ابن خال ابوه ..
خالد ــ نهاد ..نهاد ...
المرضه ــ ايوه ..
***************
خالد ــ شصار لها؟؟
حمد ــ انت الدكتور ..عمتي شفيها ..
خالد ــ انهيار عصبي ..وارهاق وعدم تغذيه ..
حمد ــ ما شي خطير؟
خالد ــ اتمنى لاء ..امس ماكانت جي ..شصار لها؟
حمد ــ استفرد فيها ابوي وعمامي وزوجوها ..
خالد ــ زواج؟؟ كنت أظنه خطبه بس ..
حمد ــ وانا بعد ..لين رجعت من الدوام ..كان على بالي انها نايمه ..لين هالساعه ..حاولت اصحيها ..ماصحت ..ويهها مختفي منه اللون ..وشفايفها بيض ..خفت لايصير فيها شي ..
خالد حس بتأنيب ضمير ..شكلها مو راضيه بهالزواج ..
حمد ــ خالد..الحين شلون حالها ؟؟
خالد ـ تعرف مهدئات ومغذي ..انشالله بكره تكون احسن ..خلاص انت روح وانا معاها ..
حمد ــ بس ..
خالد ــ لا ..لا تقول بس ..الظاهر عندك دوام بكره ..روح .أنا طبيب وولد خالها ..لا تخاف عليها ..
حمد ــ خلاص ..بكره بآخذ اجازه وايي ..
خالد ــ الله معاك ..
نهاد ــ بس دوامك خلص يا دكتور ..
خالد ــ انتي روحي ..وأنا بس بكون مشرف عليها ..
دق على عبير ..
عبير ــ الو ..
خالد ــ صاحيه؟؟؟
عبير ـ وعليكم السلام ..صاحيه ..
خالد ــ تعالي المستشفى ..
عبير ــ ليش؟؟
خالد ــ بتعرفين بعد شوي تعالي مع الدريول ..
عبير ــ محلاني طالعه هالحزه مع الدريول شيقولون الناس عني؟
خالد ـ تعالي لاتكثرين حجي ..تعالي ..
***
ماقدر خالد يجلس في مكتبه ..فقام وخذ جوله في الممر ..ساعد كم طبيب ..مع انه ماكانت في زحمه ..
رجع لمكتبه بعد ساعه ..وكانت عبير مختبصه ..
عبير ــ وين رحت خرعتني ..
خالد ـ ليش اخرعج؟ توج وصلتي ..تعالي اقولج ليش ناديتج .
**********
صحت دانه ..وكان الكل حولها ...قمر وخالد وعبير و حمد ..ونايف ..
الكل ــ حمدالله على السلامه ..
هز راسها وهي غير مستوعبه ..
خالد ــ كنتي تعانين من انهيار عصبي ..مع سوء تغذية وارهاق ...شلونج الحين تحسين بأي تعب او شي؟؟
دانه ــ ابي امي ...يبوا لي امي ..أبي امي خالد ..نايف .أبي أمي ..
قالتها وهي تعبانه ودموعها مع كل حرف ....الكل نصدموا ...حس خالد ان اللي قدامه هي طفله ..
قمر وعبير ما كتموا دمعتهم ..نايف تهرب من نظرات الدانه ...الوحيد اللي تكلم كان حمد .
حمد ــ عن العياره ..ولعب اليهال .. من وين ييب أمج؟؟
الدانه ــ حمد ...بموت ان ما يبتوا لي امي ...
نايف ـ لو نقدر نييبها لج ..كان يببناها ..
حمد ــ شوف الدلع بس..عمتي لاتصيرين دلوعه جي مو لايق لج ..أبي أمي..بعد شوي ابيي امي ابي ابوي ابي زوجي ..امبيه ما اقدر ...
ابتسمت الدانه ..
دخل ريال فجأة للغرفه ..
انصدمت الدانه ...من هذا؟؟
نايف ــ هلا ضاحي ..ادخل حياك ...
بطلت دانه حلجها وما اكتمت شهقه ..وصرخت..ــ آآآآآآآآه ...آآآآآآآآآآآآآآآآآلالالالالل لللللللللللللل لللللللللا ...
************
خالد ــ انهيار عصبي حاد ..كم يوم وتصير زينه ..
البنات ذبحوا عمرهم من الصياح ..الموقف اللي صار كان اكبر من اي كلام ..
خالد ــ أنا بروح مع اختي الحين من امس وانا مداوم ..عن اذنكم ..
خالد نفسه ماكان على طبيعته .. منتفض ...
في السيارة
عبير ــ شكنت تقول ؟؟ يمكن أحسن منك؟؟ كله بسببك يا خالد كله بسببك ..
خالد ــ عبير الي فيني كافيني ..حلي عني ..
عبير ــ يمه ..والله الدانه ماتستاهل ..والله ماتستاهل ...حرام عليك ..
خالد ــ خلاص صارت زوجته ..شتقدر تسوي؟؟ محد يقدر يسوي شي ..
عبير ــ يا ويلي عليج يا دانه ..يا ويلي عليج وعلى حظج ..
خالد ــ شفيه حظها ؟؟ الريال ما يعيبه الا جيبه....
عبير ـ انت من صجك؟؟ ماشفته؟؟
خالد ــ مافيه شي..
عبير ـ الا يخرع يخرع ...يخــــــــــــــــر ع ...
عبير افقدت اعصابها ..وخالد حاس بتأنيب ضمير فظيع ...
************
دخل خالد غرفته .. ومارد على ابوه وامه اللي مستغربين عدم رجوعه واختفاء عبير من البيت في هاحزه ..
قفل الباب ..وانسدح على السرير ...آه يالدانه ..ياني متلوم علشان اللي صار لج .
طقات الباب القوية وصرخات ابوه وعصبيته خلته يخمن ان عبير قالت لهم كل شي ..
تذكر ضاحي ..ماينسى رده الفعل عند الكل ..حتى هو اخترع ..كان ضخم ..ويهه خالي من كل وسامه ..خشمه كبير.. وعيونه كبار لدرجه الجحوظ ..وأسمر ..من الوهله الاولى تخترع من ويهه ....المسكين شكله انحرج وراح.. بعد المسرحيه اللي صارت ..
كان خالد بهالتصرف يحاول يشغل نفسه عن غضب ابوه ...غمض عيونه ومن الارهاق نام ..