ياشين قهر الرجال الله يكافينا

ياشين قهر الرجال الله يكافينا

يالله طلبناك بالمقسوم ترضينا
ياعالم الحادثات وغيب الأيامي

نعوذ بالله من كيد الشياطينا

والكبر والجبروت وزيف الأوهامي

ياباقي أيامنا عدي ليالينا

كم في محيط العروبه من تسونامي

حنا شعوب العرب ياكم تلقينا

من صفعةٍ فالوجيه وكفها حامي

عن كل مايردع أعدانا تراخينا

نرجع وراء مانسوق الركب قدامي

نشرب وناكل ولارحنا ولاجينا

من غير تفكير عشنا مثل الأنعامي

الذيب يأكل من اولنا وتالينا

عز الله إنا غدينا مثل الأغنامي

مانختلف عن غنمنا إلا بأسامينا

ومهايطات الهروج وطول الأجسامي

مليار واكثر لكن الله دعا فينا

وعدونا لو بطش ماعاد ينلامي

اليوم كلٍ بسكينه يذكينا

وضحية العيد منا رأس صدامي

ياشين قهر الرجال الله يكافينا

ياشين بطش الطغاه وحكم الإعدامي

وياويلنا من عدوٍ باطشٍ فينا

ياويل الإسلام من عدوان الإسلامي

إن ماخذينا زمام النصر بيدينا

ونادى لنا الله بيومٍ يبر الأسقامي

والله مايبقى لنا ساحل ولامينا

ولاشعوبٍ ولاقاده وحكامي

ولامساجد ولاقرآن يهدينا

ولامنابر ولارايات وأعلامي

تنتف لحانا ونوخذ من كراسينا

إلى المشانق ولاللقوم رحّامي

ممنوع حتى المعزي مايعزينا

آوامر الجور من عباد الأصنامي

تبت يدا بوش وبلير الملاعينا

وتبت يدا حضنا اللي طاح ماقامي



الشاعر :: فيصل بن منصورالرياحي