ديـــــوان الامـــير عبدالعزيز بن سعود(السامر)

(ســــــلام الـــحب)



سنة سلام الحب و الـرد واجـب
سلمت ابي غالي سلامـي تـرده
حبك مهوب إحساس بالحب كاذب
أنـا محـبٍ وسـم حبـك بخـده
القلب لك من غيمة الشوق عاشب
زرعتني في روضة الصبر مـده
يا مترف الإحساس بالكبر حاسـب
لا يشتعل شوقٍ وصل منـك حـده
حبك و أنا و الشعر مجداف قارب
لا ترخي الخيط الحريـر وتشـده
جيش الحسن بعيونك السود غالب
لا ترفع أعلامك على مـن تـوده
و أنا لكاس الهم و الحب شـارب
رأسي عنيـدٍ فيـك محـدٍ يصـده
بالحب لك يجذب خفا الروح جاذب
لا تستثير الشـوق بالصـد هـده

(يـــفداك من شـــــــافك)



يفداك من شافك علـى مـرّ الايـام
ياتاج راسـي فـي ليـال الشدايـد
إن رحت زارتني هواجيس وأوهـام
وإن جيت راح الهـم عنِّـيْ بدايـد
وإن زرتني بالطيف والاّ بالأحـلام
كتبت فيك أجمل حـروف وقصايـد
في حرب حب عيونك السود من عام
ماعـاد للغاليـن قبـلـك شـرايـد
فيك أنت قلبٍ منك ياصاحبـي هـام
لأجل الغلا ياطا علـى كـلّ كايـد
ولا يبيع الشوق لعيـون مـن سـام
من غيـر حبّـك مايريـد الفوايـد
حبٍّ عظيـم بالغـلا يلـزم إلـزام
الخافق اللِّـي بالهـوى لـه عوايـد
إهـدْ المنـام لعاشـق ٍ مابعـد نـام
روس الأصابع له فـراش ووسايـد

متى تجيني؟





وشلون أمِّلْ بالوصل وأرجي بخيـل
والبخل في شرع الهوى راس ماله
نور القمر غطّى على الجدي وسهيل
هـذا وتـو اليـوم عاشـر هلالـه
إن اكتمل في صورته جاني الويـل
من زاعمـه بالزيـن قـرَّرْ هبالـه
شفته وشفت عيون سـودٍ مظاليـل
وهامت عيوني فـي بهـاه ودلالـه
لا واعذابي مـن همـوم المقابيـل
إمّا تحقـق فـي حياتـي وصالـه
ومالي عليه اليـوم قـوّه ولا حيـل
لاشـك ابعلـن بالوفـاء والغلالـه
أنـا حياتـي كلـهـا للمواصـيـل
رهنتهـا لـو كـان عسـرٍ منالـه
متى تجينـي صادقـات المراسيـل
من راس وإلاّ ردهـا فـي رسالـه

لا تعاتبني





لا تعاتبني ولا ترجـي خضوعـي
إنتهى بي حبـك الكـاذب بـلاش
الهنا ما تستحـي منـه الدموعـي
والأسى لعيونـك الخجلـه فـراش
تحسب إنِّكْ بالوصل طَمّنْتْ روعي
في فـؤادي بالغـلا لـك مابقـاش
كيف تطلبني وفا وأنتـه قطوعـي
والزهور اللِّي لك بقلبـي عطـاش
كلّ بال ٍ بالغـلا يرمـع رموعـي
وكن عند اللِّـي حضـر مابيننـاش
دام شمسك ما أشرقت لي بالطلوعي
كيف تبغى النور في درب العتـاش
موعد الشوفه على رأس السبوعـي
وتكثر أعـذار المخالـف بالنقـاش

تــدلّـــل





كثير الظلـم فـي حبـك عدالـه
تعوّدنـا علـى ظلـم الحبـايـب
على الهجـران والتعذيـب دالـه
وانا ما أرضى على النفس الغلايب
ورضيت بجرح قلبـي وانشغالـه
على شان الهوى نعمـل عجايـب
بمال الحب من يرخـص حلالـه
ولـو كثـرت بغاليـه الطلايـب
لصوتك والسوالـف منـك والـه
تعاتبنـي غلـط واقـول صايـب
ذكر قلبي بحبـه مـا جـرى لـه
وهبَّـتْ بالمحبـه لـه هبـايِـبْ
يا روح الروح حالي منـك حالـه
أقول بخير وجروحـي عطايـب
جمال الحـب فـي كثـرة دلالـه
تدلَّـلْ والعـب بشقـر الذوايـب

(ســـــبحان خــــــلاقك)






خوفي على الحب وإيماني بواقعنـا
والناس وإحساسي المجروح بفراقك
خلاّني أبعـد بعيـدٍ عـن مرابعنـا
كلّه على شان حفظ متيّـه اشواقـك
باقي صدى كلمةٍ لك فـي مسامعنـا
طيفك اسر ناظري سبحـان خلاّقـك
يكفيك طيفٍ على الحرمـان يجمعنـا
وذكرىً بقت للوفاء منِّي على أوراقك
يا جرح قلبي ويـا غايـة مطامعنـا
متى تبـرِّدْ لهيـب الشـوق بعناقـك
الهجر يا مجـدِّدْ الأشـواق لايعنـا
وظلام ياسي يزيحـه نـور برّاقـك
علـى الوفـاء والمحبـه ماينازعنـا
إلاّ سوى الموت سراقـي وسرّاقـك
وادعت راحات روحي في موادعنـا
سبحان ربٍ جمع صورتك وأخلاقك

(نـــــــــويت الـــنكايــــف)




العام الأوّل عندي أغـلا الولايـف
واليوم أنا عفتك ولا تبحث أقصـاي
لا لا تذكّرنـي وأنـا منـك عايـف
ما فلّتَـهْ يسـراي تطويـه يمنـاي
والله لا راجـي ولا منـك خايـف
الياس دونك حطّم حْصون رجـواي
يامرحبـا بدمـوع عينـي ذرايـف
ولا تشوفك وانقـل الـداي بـرداي
بينـي وبينـك ماتفيـد الحسـايـف
عفتك عيافٍ منه لاتنشـد ارضـاي
يلوفني مـن فرحـة البعـد لايـف
في البعد عنك القا من همومي ادواي
ما شفت في صدّتْ عيوني كلايـف
تقرر بغيرك على الحـب مغـزاي
عنك الصحيح إنِّي نويـت النكايـف
جزاك يوم إنِّـكْ تغاليـت مشـراي

(بــــيني وبيــــنك)




بينـي وبينـك ماتفيـد المراسيـل
ولا يبرر غايـة الحـب مرسـال
أما حيا عمر الهـوى بالمواصيـل
وإلاّ تفارقنـا وليـل الشقـا طـال
يابـو عيـون ٍ فاتنـاتٍ مظاليـل
ودِّي عليّ بنظـرة الكبـر تختـال
اذكرك ذكرى كلّ مـاروّح الليـل
تجيب طيفك لي على عرش الآمال
ارحم شفوق ٍ حار يانافـل الجيـل
منك وعليك من الضنى ضايق البال
على صبر فرقاك ماعاد بي حيـل
الله يبدِّلْ حالـة الهجـر بوصـال

(قـــصة الـــحب)





يا هاجسي مـع طيفهـا لا تغامـر
البعد همه جـور والشـوق فتـاك
ما شفتني مع قصة الحـب سامـر
في دفتر احلامي على كيفي أقـراك
يا بهجة ايامي على عمـري آمـر
عسى الاوامر كلهـا مـن فدايـاك
يم الوصل في تالي الوقت ضامـر
اسباب والاسباب ما ظـن تخفـاك
قصر الغلا لك في خفا الروح عامر
حدايقه تزهر بهـا احـلام دنيـاك
زينك لزين اللـي بهالكـون قامـر
كن القمر في حضرتك من رعايـاك
اضف الرموش السود فوق المجامر
والورده اللي حدرهن في طرف فاك
في رمشك الساهي نواهي ووآمـر
تغري اللـي نـور دنيـاه رويـاك

(ودي بــــشوفك)




ودَّي بشوفك مثـل مـا ودَّكْ بشوفـي
لاشك خوفي عليـك ومنـك حادينـي
مادمت يا صاحبي تدري عن ظروفي
ما أبيك تزعل . . تسَامَح يا نظر عيني
ما غير أصفَّق على فرقاكـم كْفوفـي
ما ودَّي أبعد وحظَّي عنـك قاصينـي
من شاف عيني يقول الطرف مخطوفي
من كثر ما أبكي وامش الدمع بيدينـي
تهشّمَتْ والبلا من جرحـك بجوفـي
جعل الشقا ينقسم مـن بينـك وبينـي
شوفتك من بينهم ما طمّنَـتْ خوفـي
أخاف يـدرون ربعـك وش معنينـي
الصاحب لصاحبه مهما جفـا يوفـي
مـا هـوب حـقٍ تبعدنـي وتدنينـي