ديوان الشاعرة/همسة عنا

محتاجة لعيون النهار
على ليل الجفاء تنهار

أشوفك تمسح الدمعه
تغازل للحظة الجمعه

تواعدها بشروق الشمس
مابين الحاضر ومابين الأمس

على وهم الخيال تختار
أنا نفسي تحب أعلى الأمكان

مكاني فوق في أعلى المساكن
على حد الجدي يسري خيالي

وشفتك بعيني في الليالي
يا موهم خاطرك بعض الأفكار ؟

أشوفك في النظر إنسان عادي
ولا لك شف في لهفة مرادي

ترى حدك انجوم في عيونك
تلالا وأنا قمرا في خيالك

اجيلك كل لحظه بين الأفكار
تصدق خالي إحساسي ولا لك

مكانه ولأحد ماخذ بدالك
نهايه في بدايات التجافي

وجو العمر على فرقاك صافي
ولا يخفى عليك اليوم خافي

ابترك قصتك في ثغر الأقدار

يا خالد الوقت يمضي بين مر وحلاة
هذا حاضر وهذا في زمانه غياب

الليالي تمر عيوننا مظلمات
بعض الأحيان فيها تلقى غامض جواب

وإنت شاعر تجيد المعرفه والصفات
تدري البخت لمن قام له استجاب

في عذاب المعاني مايفيد السكات
نبرة الحزن تظهر ما تهاب وتهاب

الحقيقه تماري فوق صدر الحياة
للمولع بلحظه هجت ألفين باب

قلتها لك على ذكرى وله أمس فات
اتذكر غلاها فوق مثنى السحاب

هذي الحياة وسنة إللي يبونك
تنشال فوق الراس مدام يغليك

تشوف عزه واضح في عيونك
مهما حصل في العمر حولك يداريك

همه الأول كيف يعلق بكونك
ويكسب رضاك ويهتني في أراضيك

مهوب مثل إللي يفكر يخونك
يضحك معك زيف وقلبه مجافيك

يدور الفرصه بناس يجونك
يأخذ مسار مختلف من يحاكيك

والناس أجناس وأنا فدا جفونك
من خلقت الدنيا تقلب مواطيك

فكرت بدنيا على ناقص وزود
واحترت أنا مابين خافي علمها

نوب تجي بيض ونوب تجي سود
أيامي إللي صايبات سهمها

الحب في قلوب المحبين محمود
يبين في عيون الخلايق ألمها

كلن شكى من لهفته ياهوى النود
إنت وأنا والغير ضاع ابحلمها

خل الندم والحب يبقى لنا اشهود
رمز يعانق ليلنا في سلمها

يافرحة إحساسي ترى العمر محدود
أغنم زمانك واستفد من قدمها

صحيح أحبك وأعترف فيك مشدود
بالي وروحي وإنت قمة قممها

هذي الحقيقه بين حاسد ومحسود
الله يعدلها لنا في حكمها

للعز والأمجاد في العمر ميدان
أقولها لك والبشر دوم تفخر

ما كل مافي الخاطر نشوفه بالأعيان
الخافي أعظم من شعيب تحدر

لي نظرة فيها المعزه والإحسان
لا إنت به ولا غيرك بقلبي تأمر

كرامتي ماهي تقدر بالأثمان
نفسي عزيزه في المواقف تأثر

ترى العنب ما طاله أطول إنسان
من طاح ما سمى تراه يتعور

أفهم كلامي يا جريح بالأحزان
خذ ذكرياتك وسط ليل تعثر

قبل الوداع إللي على عيون سهران
ترى الصغير بمر الأيام يكبر

أنا يا رفيق العمر حزني ثناه النور
شبيهك وليلي شدني في عذاريبه

أحاول قدر ما أقدر أروض فرح مقهور
وأرده على قلب يبس في مشاريبه

تصدق خذاني الليل في غربته بسرور
على تنهيده أظمه بترحيبه

أخايل غدير وأطرده مكتمل بالدور
أبي شربة تروي لواهيبه

مضت لي إسنين أرتجي من وراها شهور
وثرها سراب نابعه تحمل الخيبه

حبيبي ليالي الحزن معها ترانا ندور
أنا وإنت وإحساس الغلا سر نسريبه

أحبك نعم مانكرت وإنته بعد مجبور
غلانا مابين الناس بصدق نحكي به

أنا وإنت مثل الطير في غربته مكسور
جناحه يعيقه ماوصل منثني في مطاليبه

وعلى رغم ذاك الغلا في الحشى منثور
مابيني وبينك مرتبط بينناالطيبه

ابعلن لكل الناس بصوت يفوق ابحور
أنا لك في طول العمر حبيبه على الغيبه

ملكت المشاعر كلها والمحبه شعور
أحبك أحبك والملاء الحب تدريبه

تعال ابغلا قلبي تصرف بليا شور
وقدم بقايا العمر كله بترحيبه

الجرح ينزف والغلا حوله الشوق
والحب في هامة شعور المفارق

شمس تلوح بناظري حزت الشروق
غاب القمر منها على ليل شارق

وده يعاتبني على الود ابذوق
ووده يقول ما بيننا أية فوارق

ما يدري إني بين الأحلام مسروق
أشبه أنا المزاح إلا شاف سارق

أشوف نفسي في السما دايمه فوق
أمشي على عز ابمجد ومشارق

أعرف مواطي نظرتي وأكره البوق
فيني الذكا في درب الشوق خارق

أقولها لك والفعل خير منطوق
ترى الهوى يا ولد الأجواد حارق

إنت وأنا وغيري من الناس محروق
والله يعين إللي يحب ويفارق

رد القصيده عنها ما تخلى

أدور المعنى الجزل في طروقي

أختار كل إللي على البال يحلى

أجاري إللي بالمعاني يسوقي

خالد مهندس كل معنى تغلى

عبره وحكمه والخواطر تروقي

الشعر هبه من عظيم تعلى

إللي خلق شمس تبث الشروقي

أقولها إللي بصبره تحلى

راز القوافي في جميع الطروقي

وإللي تغلى في المحبه يخلى

حيث الظماير من شقاها تعوقي

نصيحتي لك لافي الهوى لا تسلى

الحب ينبض في جميع العروقي

عسى الهموم إللي بقلبك تجلى

وتعيش في نعمة ارعود وبروقي

واختم قصيدي فوق نجم تعلى

وكل المعاني في قصيدي تفوقي

راعي الهوى مولع مثل ما تولعت

وسود الليالي إللي خذنه خذاني

أسرح معها كلما غبت أو بنت

أسمر معها مشغله كل ظني

تمرني دقايق العمر لا هنت

وابكي عليها كل ما تمتحني

وجاذب الهاجوس حتى تمكنت

من جرحي إللي في الأماني يوني

أرمي سواليفي على الليل ما نمت

وأشوف همي يأخذ القلب مني

ذي حالتي ياجرح الاشواق ياليت

تفهم خفايا حب عمر فتني

ياشاكي ليل الهوى ما تراجعت

عن فزعتي لك لو تخليت عني

إبتدى عمري من الليله معك
قبل أعرف إسمك ولا أدري من تكون

صوتك الدافي جبرني أسمعك
واعتبرت إنك على نفسي تمون

ياغريب السالفه كيف أقنعك
كيف أعبر لك عن إحساس حنون

كيف أردك قبل تسري وأمنعك
وخافقي شفته على نور العيون

يرجف بلهفة عيونك واتبعك
من غلا قلبي وصل حد الجنون

من تكون أرجوك قلي وارفعك
إنت منهو إنت قلي من تكون