ديوان الشاعر أحمد ابو حج

احمد ابوحج

احمد أبوحج شاعر صحفى أخصائى ثقافى وأعلامى مصري عضو بالعديد من المؤسسات الثقافيه المسؤل الأعلامى بنادى الأدب بالعريش شاعر عاميه 000

بلاش العناد


آهات العند تسقينى كاسات المر
وطول الهجر شتتنى
وليش البعد .. ماتعنديش
بشوف عشقك هيمقتنى
أنا مهموم ملان أوجاع
وضاع أملى وموتنى
محزش فيا غير انك
قتلتينى .
وضيعتى سنين عمرى
وبعتينى ..
ومش بامرك ولا بأمرى
تحبينى ..
بأمر الحب كان غدرك
ومين امرك تعاندينى
وكيف حبيتى من قلبك
أيا قلبك
ملان قسوه
وايش تسوا
فى لحظه تكونى مش أنتى
ولا أنتى اللى حبيتى..
كتمتى الجرح فى قلبك وداريتى
وكنتى فى يوم قصيده شعر
تتغنى على لسانى
وكنتى معاى رقم واحد
وانا التانى
ولا مصدق بأنك صرتى جباره
فى لحظه بقيتى غداره
فى ثانيه انسيتى عشرتنا
وخنتى الملح والعيشه
بلاها الدنيا من غيرك
ومين تانى هيقتلنى بأهات البعد ؟
خلاص تقلك بقا غيه
وصرتى عنيده يا وليه
بتفتكرينى تحت ايدك
تبيعى وتشترى فيا
خلاص ياروحى أنسينى
وانسى الحب والعشره
وأبصملك وبالعشره
بأنك مدرسه فى العند
وانا زيك بقيت أعند
وقلت ابعد خلاص وارتاح
لقيت طيفك محاوطنى
مكتفنى ورابطنى
برباط محكوم
انا ملزوم أكون صابر
ولا أيوب.....
بشوف عندك بقا مكتوب
وهاتحمل بلاويكى
سيبيكى من تخاريفك
لأن العند مش فيكى ..

خناجر تدبح

لملمت خيوط الوهم
وربط القلب المتشعلق بحبال الصبر.
وجمعت الخوف المدارى
فى حوارى الهجر
وكتمت الجرح فى قلبى سنين
ونسيت العمر
وزرعت بدال الضحك آهات
وجنيت علات
أهو مات القلب عشانك مات
معرفتش أحب ولايوم حبيت
ولا هاعرف ألم الجرح
المتوزع جوا التجاويف
ولا قادر أحدد أيامى
اذا كانت برد أو كانت صيف
أنا قلبى ضعيف الريح هزه
وملاك الشعر قوام وزه
كتب الأشعار
أوقفت - ندهت - أطلعت
ع باب الدار......
أنا قلت ادارى على الاوهام
ودخلت أنام
أحلم بالصوره المنسيه
ولا نسمة صيف معديه
أوحتى كلام تخاريف يونستى
ويحسسنى بحبك ليا...
ملقيش فيا الا آهاتى
وخناجر تدبح بالراحه
وتوزع روحى على المساكين
سكاكين وتقطعنا ياقلبى
أتوزع حبى المتخبى
لو كان مدفون.....
ومهما يكون..
أنا برضوا مدارى الوهم
.. فى قلبى سنين
وحنين الشوق مزروع فينا
ومكفينا وملينا هموم..

صلاة الموت




ياساقيه تلف ع الفاضى
منيش راضى اوقفها
سيبها تلف على كيفها
سيبها تلف ماتوقف
لحد متنتهى وتتلف
وتعزف لحن احزانى
وتاخد منى عنوانى
وتدينى سنين فاضيه
مهيش راضيه
على حالى اكلمها
الملمها ادورها
الاقى العمر ضاع منى
واستنى يلف الدور
يوصلنى لعند المنتهى
بدرى
اقول بدرى سبقتينا
ياساقيه لفى واسقيتا
الامل صافى
يخللى الروح تجمعنا
وكلمه اه ماتوجعنا
ولاحتى تطفى النور فى ننى العين
وفى دموعنا
ياساقيه تلف لفتها ماتوقفشى
ومين يقدر يسابقها
وحتى لو سبقناها ماينفعشى
ومين يقدر يوقفها
ياساقيه تدور ماتسقينا
ولا تسقى اللى جنبينا
وحتى لو هتسقينا
كلام فاضى
منيش راضى
اقول توقف
لحد متنتهى وتتلف
وتبقى فى خبر مدفون
ومتكفن واصلى عليه
صلاة الموت

لقاء الروح

دا لو نصبوا
جدار الصين
وسور برلين
ولو حطوا
قناة بنما
وماجينو ومليون سيف
ولا بارليف هيمنعنى
أفوت وأخش
ولا الأسلاك ودوريه
تفوت هناك
ولا رشاش ولا مدفع
يخلونى أنا أرجع
عن القرارات
ولا العازل ولاالفاصل
ولا التفتيش .....
ولو البس حزام النسف
راح أمرق ..
خلاص ياروحى
أنا جايلك..

نقشت اسمك على قلبى

نقشت اسمك على قلبى
كتبته ع حجر مرمر
وسجلتو تلات حروف
تلات حروف مهوش اكتر
بحرف السين
سنين جايه باستنا الامل منها
وحرف الميم محبتنا اللى شربنها.
وحرف الرا رمانى الحب فى أحضنها.
قمر انت - ضحى انتى - سمر انتى ...
وانتى بحرى وسفنتى
وانتى المد وانتى الجد وانتى عد انفاسى
تعديها عليا عد
وانتى مركبى وشراع محبتنا
وانتى الحب نورتى قصاد بتنا
وانتى الكل وانتى الورد والياسمين
وانتى الفل
وانتى النور عليا يطل
يا يا سمينا رحتها تفوح
ترد الروح
تعطرنى بروح ماتروح
وانتى النبض فى الشريان
وانتى وقتى فى التسابيح
يريحنى ولا التراويح
وانتى وردى فى فجرى
وانتى نورى من بدرى
وانتى الدم فى الشريان هناك يجرى
وانتى الضحكه ع شفافى
وانتى بلسمى الشافى وانتى روح سكنتينى
قدر مكتوب على جبينى
ياوردايه فى بستانى
ونواره ع اغصانى
انى ليكى هكون مرهون
وانتى النور لعنوانى
ياضليله تدارينى
وتحمينى من الشمسه
تدفينى فى وقت البرد
تخافى عليا م الهمسه
وانا ليكى وانا بيكى انا شاعر
وعمرى يوم ما راح أنسا
وانتى أيامى ياعمرى
وانتى العشق
يلهلب فى صميم أمرى
وامرى خلاص م سلمتوا
عشان قلبك يحب أكتر
وحبك فى صميم قلبى
مع الايام أهو بيكبر

آه يا وطن


دق الوتر
يوم على الربابه
وقال أنا
وبدندنه الحزن
خيم على البيوت
ساد السكوت
من غير كلام
قسم صبا
عزف البياتي
شد أوتار الندم
هو الألم
مين يحمله ويتحمله
الحمل أصبح شى تقيل
العمر مشواره طويل
كام ألف عام
دكر الحمام زام
ع البناني والعشش
ريش وانتفش
عمال يهدوا
فى الصوامع والجوامع
عمال بيبنوا فى الجدار
فرضوا الحصار غصبن عن اللي
واللي عللي
ع الكراسي والدكك
عيني بكت لما اشتكت
مين يمسحك يادمعه
نازله على الخدود
مين يسمعك يا صوت
بنادي ع الحدود
صوت البرود فى أيد الولاد
فكوا القيود
خلوا الولاد تعرف
طريق المعركه
وتحن تانى للربابه والغنا
والدندنه ..

أنى مش هقدر أنساكى




انى مش هقر انساكى
ولا أنتى هتنسينى
هعيش العمر ياعمرى
ابكيكى وتبكينى
ودمعى يجف من عينى
ودمعك نهر يغسلنا
دا بدد كل آملنا
هعيش مجروح بقيت عمرى
وأهاتى تسلينى
أنى مش هقدر أنساكى
ولا أنتى هتنسينى
يا منقوشه على دمى
يا وشمه فى تجاويفى
يا نسمة صيف ترد الروح
وساعة الشوق تواسينى
تحسسنى بأن الدنيا دى ملكى
وان انتى بقيتى خلاص
فى تكوينى
وصرنا اتنين جسد واحد
ندوب فى كاس
وروح دابت مع الاحساس
وروحك صافيه شفافه
تدوب فيا تدوبنى
واقول وقتيش فى احضانك
هتخدينى
وبستنا هداك اليوم
عشان يجى
بشوف اليوم هداك
ماجاش
لأنه خلاص بقا أوهام
وصار زكرى مع الأيام
وطيف شفته ولا الأحلام
وشعر كتبته ع الاوراق
بيتغنى مع الأشواق
عذاب العشق للعشاق
ولهف الشوق يشوقنى
ونار البعد تحرقنى
يامين يقدر يطببنى
مفيشش غيرك يداوينى
انى مش قادر أنساكى
ما أنتى صرتى تكوينى
ولا عمرك هتنسينى..

تعود ريما




يا سايقه فى الدلال أكتر
دالقتى الملح ع السكر
وغيرتى ملامحك نظرتك فيا
قنابل غيظ بتتفجر
قتلتينى دبحتينى بنار
غيرتك
وحيرتينى مع حرتك
رشقتينى بسهم الخوف
طعنتينى بمية خنجر
أنى صابر على مرك
على قرك
على خيرك على شرك
وصبرى من الصبر مرر
ساعات ابكى على عمرى
واسلم للألأه أمرى
ساعات أسكر
مكنتش فاكر أن انتى
قدر مكتوب على جبينى
ومتقدر .
ولا عارف بانك يوم
ما جيتينى عرفتينى سرقتى
عمرى وسنينى
أنى شايف من الممكن
تبيعينى
فى يوم أغبر
سنين عمرى سرقتيها
تبيعى وتشترى فيها
اقول يمكن ملامح نظرتك فيكى
هتتغير .
آلاقيكى
تحطى العقده فى المنشار
تخلى الدار تشعلل نار
تقيد أكتر
اطفيها آلاقيها
بتتلون بلون الطيف
فى عز الصيف
أيشى اسود أيشى أحمر
ياهمى اكبير
ملوش اخر
وطافح كيل على الآخر
وفى الآخر ألآقى الحلم يتفسر
أقول ياريت
تعود ريما لعادتها
وتبقا أميره فى بيتعها
قالتلى ريما سيب ريما
دا من قبليك
دا كان أشطر ..

صياد الهوى




طب القلب طبه
والطبه جت مليان
حبه عليه حبه
ضميه بأدب وحنان
يمكن بيتعلم
جايز مهوش فهمان.
القلب لمايطب
اعمى ما بشفشى
مش فارقه لو يوم حب
الحب بكدبشى
القلب لحم ودم
فاهم مبغلطشى.
مين اللى كان السبب
فى الحب معرفشى
انتى ياأما انا
معايا متفرشى
مادام ع الجبين انكتب
سيبى الامور تمشى.
سيبى الامور للقدر
حكم القدر يمشى
الحب لو كان عفيف
صادق بزعلشى
الحب لو كان صريح
مبنى على عله
تبقى المحبه رضا
محناش بنتسلا
القلب طب وحب
حدد خلاص واختار
دقاتو ذى الجرس
تضرب تولع نار
الحب هو كده
مرات يكون غدار
ياقلبى انتى السبب
فى اللى بيحصللى
ماكنت ناسى وخلاص
ايش اللى حاصللى
أوقعت فى المصيده
واللا صادوك قوللى
قوللى جرالك ايش
لو كان حدا صادك
طرح عليك الشبك
شبك الهوى صادك
اللى قصادك محترف
عرف الميعاد صادك ..