03-13-2009
|
#51
|
حكاية
نحكي لك أجمل حكاية ،، عن قصة حب وقلبين
صارت بك دنياهم أجمل ،، يا أغلى من ضي العين
جيتي وصرتي ،، انتي الابدا
انتي الدنيا والأيام ،، انتي الحاضر
انتي باكر
انتي العذب من الأحلام
ربي يخلي ،، هذي الضحكة
تملا عمرك فرحة ،، ونور
ربي يخلي ،، ربي يسلّم
ويحميكِ من كل شرور
بكرة لما ،، الحلوة تكبر
والقامة تطول شبرين ،، لما تمسك قلم ودفتر
وتدرس علم وعربي ،، ودين
ولما تكبر ،، اكثر واكثر
ويتمّم ربي بالخير
ولما نشوف الأم الحلوة
تحكي حكاية ،، عن قلبين
|
|
|
|
|
03-13-2009
|
#52
|
لي صاحب
لي صاحب ٍ مرة وأنا جالس معه
كان في بالي بداية فكرة لمطلع قصيدة
وكنت أحاول قد ماقدر .. شتات فكري أجمعه
أتذكر أنه قاللي في وقتها .. رغم اني ما كنت اسمعه
هالدنيا ذي مافيها شي مبهج
كل شي ممل .. أيامنا مثل الجرايد ..
كلها سواسيه
أتذكر اني وقتها تمتمت وقلت .. دونما تركيز
فعلا .. معاك حق .. هذي حقيقة قاسية
أتذكر انه قاللي .. رغم اني ماكنت اسمعه
حبيبتي مادري قست .. والا نست
أو انها متناسيه
أتذكر اني قلت له .. أيضا دونما تركيز
فعلا .. أكيد .. معاك حق .. فعلا ظروفك قاسية
أتذكر أنه قاللي وقاللي وقاللي
لين الشعر فيني تلاشى .. وقتها صرت اسمعه
كان يتأملني ويقول :
ليه الفرح دايم لأيامي يتحاشى
تبغوا الخلاصة القاسية ؟
صاحبي في يومها كم كان مزعج .. حيل مزعج
مثلما رنين الهاتف الجوال .. وسط هذي الأمسية
|
|
|
|
|
03-13-2009
|
#53
|
لاجل أوصلك
بفــارق فراقــك وبخنق عبرتي
واجرّح اضمادي واسافرلك معك
باشدّ للماضي واقدم ساعتي
واعـــاند عـــنادي واقودك واتبعك
بجامل احزاني واجافي فرحتي
واعادي خلاني واحبك واخدعك
باصير انا طبعك و أنتي طيبتي
وبـيحزنك ضحكي واهلّّي بمدمعك
باسامر دموعي واعزّي ضحكتي
وباهدي انا ضلالي ضلالٍ ياسعك
بلبــس انا ذلك وقيسي عـــــزتي
وبـتصيري ذنوبي وخيري بيطبعك
بحارب في ضعفي وافرّ في قوتي
وإلى رضختي لي لموتي بدفعك
ولاجل اللقاء بارحل وتمضي رحلتي
وإلى حصل شوفك باكون مودعك
اببعد واوصـــلك وباســبق خطوتي
وبانـثـــرك فيني وانســى اجمــــعك
باضم أنا هجرك في قربك وحدتي
وتدلك عيوني وقلبي مضيّعك
واذا اظلمت دنياي باطفي شمعتي
واذا كثر زادي باجوع وباشبعك
شردتي رقادي وسمعتي نضرتي
وغمضت أنا عيوني لاجل ما اسمعك
صرخت في سكوتي ولمستي صرختي
.... وقربتي وجهك لي لاجل ما اصفعك
عند الحزن تثقل خطاكي دنيتي
وعند الفرح قالت خطاكي ماسرعك
قصيدتي يكفي غبية كذبتي
حبيبتي آسف بخونك ،، بس معك
|
|
|
|
|
03-13-2009
|
#54
|
السفينة ،،
ماقد سمعتوا عن سفينة في بحر ؟
والبحر موج متلاطم !
والخطر فيه متعاظم
ماسلم منه أحد ،، ماترك شيٍ ابد
كودالسفينة وحدها
ماهزها موج البحر
وان هزها
امسك بها ربانها
وابعد عن حماها الخطر
بدينها وقرآنها
ماقد سمعتوا عن سفينة قويةٍ دايم عظيمة ؟
بحرها هو الحياة والسفينة هي بلدنا
والفهد ربانها
ماقد سمعتوا من بنى هذي السفينة ،، وكيف؟؟
كانت غبار ،، كانت جروح متناثره في كل صوب
ورغم الجروح جمّع شظاياها بيده
بامر العزيز
وافنى العمر ليل ونهار
وارخصلها قلبٍ وروح
عبدالعزيز
عبدالعزيز اللي بنى هذي السفينة
تعبت منه الدروب
واشتكت منه الحروب
بالسيف أرسى شراعها
وبالحب قوى حبالها
ومن يومها ! رغم السنين ،، تمضي السفينة في دربها
ماقد سمعتوا عن سفينة
قويةٍ دايم عظيمه
بحرها هو الحياة والسفينة هي بلدنا
والفهد ربانها
ماقد سمعتوا عن أهل هذي السفينة
عن كرم اهل السفينه
عن وفاء اهل السفينه
وماقد سمعتوا عن قهر حسادها
وكيف انها للي نواها بالغدر ماتمهله
تجعله ذرٍ هشيم ،، مايمهله طوفانها
ماقد سمعتو عن سفينة
رفعت قدر البحر
ماقد سمعتوا عن سفينة
قويةٍ دايم عظيمه
بحرها هو الحياة والسفينة هي بلدنا
والفهد ربانها
|
|
|
|
|
03-13-2009
|
#55
|
كبريه !!
فرقة موسيقية
كمنجة بثلاث أوتار ،، قيتار ،، ثلاث طبالين
اورق ،، ناي ،، شاي
فٌرقة موسيقية
يجون !!
كل ليلة يجون ومع أول الصبح يسرون
لاجل ثاني ليلة يجون
هم يعزفون ،، وما يعزفون في مكان تسمع فيه الناي قانون
ازعاج ،، صجة ،، دجة
ايقاع خليجي غالبا مقلوب
ايقاع خليجي دائما مطلوب
شباب ،، بنات ترقص ،، والعطر في اول الرقصة حلو
وفي آخر الرقصة هبوب
غناء وطرب ، عرض وطلب
واحد يغني بدلته تلمع ،، يفترض فنان
ياليلة دانة لدان
قرقعة كيسان ،، دخان
ما اسعد الشيطان
ضوء خافت ،، كل شي حلو والضوء خافت
كل شي كذب والضوء خافت
وفي اطرف الصالة ،، هناك اثنين
واحد يقول : شفت هاذيك الطويلة اللي ترقص ؟
الثاني : وين؟
هاذيك اللي مع حسين
واعدتها البارحة وجتني ،، مالومها حبتني ،، اعطيتها ألفين
مسكينة هي ،، ماودها تجلس في ملهى ،، بس انها تساعد اهلها
الثاني قال : كل البنات اللي هنا تساعد اهلها
غسان ،، غسان ،، مدير هالصالة
ركض للباب ،، وصل فلان ،، وصل المهاب ،، معاه عشر اشخاص
ركض غسان اهلين وسهلين شو هالحلو،، يخزي العين
الفرقة تنهي الأغنية وتعزف بسرعة
حمد لله عالسلامة ياجاي من السفر
أحلى طاولة للمهاب ،، طاولة على البست
لفلان اللي من اسبوع كان لابس البشت
اليوم قاعد على البست
غسان قلقان مضت ساعة ،، ومانقّط أحد
نادى ياجارسون وحط يده في جيب البنطلون
خذ هالألفين على المغني ارميها ،، وشاور على فلان
ادريس قام فلان ينقّط وانا لا،، ياللإهانة والله لنقّط
يادريس لا ،، هذي فلوس التذكرة ،، وشلون نرجع ؟
السفر بكرة
ادريس قال : بكر ه اروح لفلان احلف له ،، انسرقت فلوسي
الاوتيل غالي ،، وانا مع عيالي
وأرجع ،، أنقّط
جارسون هناك يحكي مع زميله
غسان قال الفواتير ماتنزل الا آخر السهرة
الحق معه ،، بهذا الوقت ،، مافيه احد يقرا
جوزيف وين اليوم فل
ودوه للشرطة
غسان شافه يسرق من النقطة
والكل عارف الثلث للفرقة ،، والثلث للنمرة ،، والثلث للصالة
وكله لغسان
طلعت الشمس الساعة ثمان
الكل سكران
الكل تعبان
ماعدا غسان قفل الصالة ،، الوعد بكرة
|
|
|
|
| | | | |
العرض العادي
