من قال اني رخيصه .,

فأترك لكم القراءة ووقت ممتع اتمناه لكم

/
/
/

> >< البـ الأول ـارت ><<

سحر : لمووي
لمى : هاه
سحر :تدرين ؟؟!!
لمى :...... " قاعده تسوي بحث حق الجامعه على الاب توب مالها "
سحر : لموووي أكلمج !
لمى : نعم تراج طفرتيبي .. أففففففف.
سحر: تدرين ؟؟!!
لمى : شنو " من غير نفس "
سحر مسترسله : بن سالم خطبج ..
لمى : يع يعععع لا تييبين سالفة الخطبه انا وراي بحث مابي الوع جبدي ..
سحر : ليــــــــش؟!
لمى : اكره شيء فحياتي الريايل لا تسوين نفسج ماتعرفين .
سحر : ادري .. لكن ابوي تظنين بيسكت لج ؟؟؟؟؟
لمى : بكيفه اهو ! انا الي بتزوج.. طالت و شمخت بعــد يتحكم فيني..
سحر : انت ما تعرفين وراج 3 بنات عزابيــــــه ! و فوقج 2 متزوجات وانت بنص تروحين.. يمشي الدرب .
لمى :..........] معطيتها بو لباس " مطنشتها "[
سحر : ألا لمى انت ليش تكرهين ابوي ؟؟
لمى : لاسباب خاصه انزين ... تاركه لج الغرفه أف تلوعين الجبد اقوم للصاله احسن .. "وقامت "
سحر : انت الخسرانه .. بس غريبه اهي كيف بترفضه سمعت انه غني وايد ...
اوووووف وانا شعلي اروح اذاكر احسن لي ..
--------------------------------------
شخصية لمى قويه و عنيده واذا انت راسك يابس اهي ايبس منك واهي لابغت تسكت سكتت بمزاجها وكانت تكره ابوهاعشانه بعد ما اعطته امها توكيل عام على حلااالها اللي جمعته يوم كانت بزنس ومن وقبل لا ييها سرطان " بعيد الشر عنكم " فباق حلالها و طلقها و امها ماتت بحسرتها و لمى تحمل ابوها كل المسؤليه لانها كانت تحب و تعز امها وايـــــــــد و كانت امها تحبها اكثر شيء من بين 6 بنات وولد عشان جذيه
كان ابوهم يكره امهم عشان كله تييب بنات ومكان يدري بسالفة البوق الا لمى و خوالها لانها كانت اكثر وحده تفهم امها و ما كانت شرات خواتها كلمه تييبهم و كلمه توديهم مع انها الوسطى فكانت امها تشكي لها من الظلم الي اهي فيه فزاد كرهها على ابوها وهي عاشت وياى يارا و امها عند خوالها بعد الطلاق 3 سنين وبضبط بعد ما أنولدت يارا آخر العنقود وياى امها سرطان الرحم ... وبعد وفاة امها راحت تعيش عند ابوها وكان عمرها ذاك الوقت 12 سنه و هالسالفه جديمه من تقريباً 8 سنوات عشان جذيه لمى رافضه الزواج لانها تكره الرجال بالإضافه للفلوس " البيزات " اللي تعمي النفوس..
-----------------------------------------------------
@((عائلة بو زياد))@
ريناد : عمرها 25 سنه متزوجه من ولد عمتها يعقوب و عندها منه
عبد الله :5 سنوات و نوره : 3 سنوات .
لمياء : عمرها 23 سنه متزوجه من محمد ولد خالتها و عندها منه رهف : 3 سنوات
لمى :عمرها 20 سنه "وهاي تقدرون تقولون البطله الرئيسيه "
اهي جذابه و احلى خواتها عيونها عسليه لوزيه ولها انف صغير و شفايف مرسومه بدقه متناسقه مع بشرتها البيضاء و شعرها الاسود شبه الناعم ويكون دائما اذا اخذت شاور كيرلي و هي في ثاني يامعه تدرس طب وهي مهتمه بدراستها وايد لانها تعتبرها مستقبلها لانها مب ناويه تتيوز.
زياد : عمره 19 سنه مدلع و مخقق من قبل ابوه خكري " شرات البنات مايع "
و الفلوس تلعب بين ايديه ..في اول يامعه ..
سحر : عمرها 17 سنه في ثاني ثانوي .
سهر : عمرها 15 سنه في ثالث اعدادي .
يارا : آخر العنقود و عمرها 12 سنه في اول اعدادي ماتت امها وهي عمرها 3 سنوات عشان جذيه لمى تحبها وتشفق عليها ولا ترفض لها طلب لانها ماذاقت حنان الام لان ساعتها في امها سرطان ولانها موصيتنها عليها قبل ماتموت .
--------------------------------------------------------
"بو زياد يدش البيت "
بو زياد : لمـــــى ... لمـــــى و صمخ ان شاء الله وينج ؟؟!
لمى " تسكر اللاب توب و تحطه في صوب" : نعم يوبا ..
بو زياد : نجبتي الغدا ؟؟؟؟!
لمى : لا .. لحظه وانجبه .. "وراحت "
بو زياد : بسرعــــه لا بارك الله فيكم ولا فامكم هالبواقه ..
(( اهو قايل لبناته ان امهم هاللي باقته ويوم كشفها ياها عقاب من الله سرطان و ماتت ...
و اعياله كانوا يهال وصدقوا .. واكبرهم ريناد اللي فهمت نص السالفه وهي ان امها ياه سرطان بعد ما ولدت يارا ويوم كبرت عرفت كل الحقيقه من عمتها و اللحين اللي يعرف الحقيقه ريناد و لمياء واهم ماكره ابوهم شرات لمى لانهم ما عرفوا كيف تعذبت امهم ولا ماتت بين يديهم مثل لمى ))
يت لمى وفرشت السفره ونجبت الغدا وراحت تنادي خواتها .. نادت خواتها ..وراحت لزياد
لمى القت نظره سريعه على غرفته الملكيه اللي اذا يت عدال غرفتها اهي وسحر تصير غرفتها غرفة خدامات مقارنه بغرفة اخوها لكن هذا قلما يهمها ..
لمى : زياد .. زياد ..
زياد : هاه .. لحظه حبي في وحده مدري شتبي ..
البنت "بكل رقه ودلع ": ويــــه لتكون تكلم وحده غيري ترى اجتلك ..
زياد : لاعمري انا ما خونج انا اصلا ودرت كل البنات عاشنج يا بعد عمري والله ..
لمى : زياااااد تراني نجبت الغدا .. "وراحت "
زياد : طيب ..طيب .. هلا لا تغارين هاي الخدامه تقول نجبت الغدا يالله بااااي..
" زياد لو سمعته لمى يقول عنها خدامه يويله منها اهي اصلاً كرهت الريايل من اخوها وابوها ابو حرامي بواق واخو خقاق و نذل و اناني و اكبر جذاب بالعالم ولا يستحي يكلم رفيجاته قدامها "
--------------------------
بو زياد : لمى وويع ..
لمى "كانت تاكل رفعت راسها " : نعم "من دون نفس "
بو زياد : وين سندي وروح وحياة ابوه ولدي زياد ؟؟
"زياد ياي"
لمى : كاهو ياى ...
بو زياد : تعال يا غناة الروح عدالي ..
" ياى و يلس عدال ابوه "
بو زياد : شفيك تأخرت ؟؟ عسى ما شر ياولديه ..
زياد : كنت اكلم رفيجي و اسأله عن كيفية تقديم البحوث تعرف اول يامعه ..
<< " مايبالها سؤال "
بو زياد : عسى ما زعجتك لمى ؟؟
زياد "وهو يناظر لمى " : لا يوبا عادي ..
لمى : ...." معطيتهم بو لباس تكرهم وما دانيهم بعيشة الله "
--------------------------------------
"بيت بو يعقوب "
كانت ام يعقوب يالسه وياى يعقوب و ريناد يتقهوون
ام يعقوب : ريناد.. يمه صدق اللي سمعته ؟؟!
ريناد : خير عمتي شنو سمعتي ؟؟!!
ام يعقوب : سمعت ان بن سالم خطب اختج ..
ريناد : مدري عمتي بس ليه تسألين ؟؟!!
يعقوب : شنو ليه تسأل هذا ولد رايح فيها كم مره صادوه الشرطه مع بنات و يطلع منها زي الشعره من العيين .. له نفوذ وابوه غني بالحيل وهذا اللي مقويه و خطب كل بنات البلاد و كلهم رافضينه ..
ريناد في نفسها " عز الله رحتي فيها يا لمى دام عنده بيزات ما بتقدرين تردينه ابوي بيوقف في ويهج الله يعينج على ما ابتلاج "
ام يعقوب :و الله انا اعرفه ابوج دام بن سالم عنده بيزات بيوزه لمى و الله انج مسكينه يا لمى لو عندي ولد ثاني كان يوزتج اياه كنتي حبيبة المرحومه ..
ريناد : الله يرحمها .
يعقوب : الله يرحمها .." شاف الحزن على ريناد " جان يقول :
ليه يمه ولد ثاني انا موجود << قالها عشان ماتحزن ريناد
ريناد شافته بنظره
ام يعقوب : هو يا ولديه ! بتاخذ عليها اختها ؟؟
يعقوب : شفيها يمه الشرع حلل اربع .. " وهو يبتسم "
اضربته على راسه ريناد و قالت : يمزح خالتي .. مايقصد ..بعدين ماييوز ..
يعقوب : أي يعووور .. " ناظرته ريناد " ايه ما أقصد وبعدين ما ييوز..
بس حبيتكم تضحكون ..هي هي هي هي "ويناظرهم "
ريناد : ما يضحك ..
جان تييهم بنتهم نوره وهي تصيح ..
يعقوب : تعالي حبيبتي في حظني .. شنو فيــج ؟؟
نوره :اهيء اهيء بابا شوف عبوود شنو سوى
يعقوب : شنو سوى ؟!
نوره : ياخذ لعبتي و يرميها عالطوفه و يقول سوبر مان اهيء اهيء
بابا هاي مو سوبر مان هاي باربي اهيء اهيء
يعقوب:ههههههههه المره اليايه بيطيرج بدالها خنشوف شنو عنده..
" وقام يعقوب مع بنته عشان يشوف شنو قصتها "
------------------------------
@(( عائلة بو يعقوب ))@
بو يعقوب :
الله يرحمه مات من سنتين
شجون : عمرها 32 سنه متزوجه من مسعود وعندها منه
((سديم : وعمرها 12 سنه وهي رفيجة يارا الروح بروح واختها من الرضاعه ..في اول اعدادي .
عمر : 10 سنوات
مايد : 7سنوات
ريم : 4 سنوات))
يعقوب :عمره 28 سنه و متزوج ريناد .
شجن : 17 سنه واخر العنقود ورفيجة سحر في ثاني ثانوي
----------------------------------------
" وفي بيت او خلونا نقول قصر بن سالم كان هالقصر عود وايـــد وكان معاه عدة ملاحق و حديقه عوده تفتح نفس الواحد بعشبها الأخضر و اشجارها اللي محاوطتها.. وعلى كراسيها اللي كانت تتميز بعراقة التصميم و روعة الزخارف .. كان يالس عليها ام جاسم ويا ولدها جاسم يشربون عصير "
ام جاسم : ولديه ابشرك لقيت لك بنت مزيونه و خطبناها لك .. " واهي تبتسم "
جاسم " بلا اهتمام ": واذا يمه مثلها مثل غيرها بترفضني " ويشرب العصير "
ام جاسم :ليه يا ولديه انت احسن الشباب بالفريج و البلاد بكبرها ..
جاسم : في خاطره "صدق انج على نياتج .. بلاج ماتعرفين شنو يسوي ولدج وليش ابوي يبي يوزني بسرعه بسبت البلاوي اللي انا اسويها .. "
ام جاسم : ولديه بس تعرف ..؟! " يلتفت لها جاسم ويقطع سرحانه "
هذيلا قالوا عطونا فرصه نفكر يومين و نرد عليكم .
جاسم " باستغرب ": غريبه يمه منو هذيلا ؟؟!!
ام جاسم : بن سهيل .
جاسم :منو بن سهيل ؟؟!!
ام جاسم : ابو زياد هذاك ابو البنات اللي عنده 6 بنات وولد عرفته ياولديه ؟؟!
جاسم : ايييييييه هذاك التاجر اللي طايح سوقه " بصوت خافت " مو لله بيناسبنا ..
ام جاسم : شنو تقول ياولديه ؟؟!!
جاسم : ما شيء .. ما شيء .. " وقام " يالله يمه انا رايح توصين على شيء ؟
ام جاسم : لا سلامتك .
" طلع جاسم من الحديقه وهو محبط و قابل ابوه في الطريق
جان يي ابوه يقعد يشمشمه "
جاسم : شنو تسوي يوبا ؟؟!!
ابو جاسم : اتاكد انك ما تشرب عقب ذيك الليله انت ولديه الوحيد وخاف عليك ..
جاسم : شدعوه ماكو ثـقه ....خلاص انا ودرته عشانك ..
ابو جاسم : طيب شنو هذي ريحته ؟؟!!
جاسم : زقااير .." ابوه يناظره بدون تصديق" زقاااير .. حتى شوف " ويطلع له بكيت الزقاير من دشداشته "
بو جاسم : الله يهديك يا ولديه انا خايف عليك من رفاق السوء ..
" جاسم طنشه وكمل طريجه "
بو جاسم "يصوت عليه " :جانك ماتدري .. ترى ملجتك الاسبوع الياي..
"وقف "جاسم : شنوووووووو ..
بو جاسم : اظن سمعت .. انا بروح ابشر امك ..
"جاسم راح وهو معصب حده من ابوه اللي حدد ملكلته من دون شوره ما توقع احد يوافق عليه اهو مشهور انه راعي بنات .. ركب سيارته .. وحرك .."
-----------------------------------------------------
جاسم : عمره 26 سنه.. عطالي بطالي لا شغل ولا مشغله ماوراه الا ملاحق البنات وتفضيحهم ..الولد الوحيد حيلة امه و ابوه .. وسيم نظراته حاده عيونه وساع وانفه شرات السيف المسلول ..عنيد يحب يمشي في الاتجاه المعاكس ..واذا عصب لحد يشوفه ..مدلع من قبل امه وممسوك شويه من قبل ابوه .. راعي بنات من الدرجه الاولى ..خقاق .. مغرور..
-------------------------------------------------
كان قلبها ينغزه كأن فيه ابره.. تحس شيء بيصير ولا انتبهت للدكتور شنو يقول ..
دانه "بهمس":لموي شفيج ؟؟!
لمى : بعدين اقولج ..
كانت تحس ان مصيبه بتصير و تمت تقرى على نفسها اذكار الصباح والمعوذات..
لان قلب المسلم دليله وهي عمرها احساسها ما خاب .....
--------------------------------------
كان في السياره وخلقه ضايق وايـــــد ففكر يتصل على رفيجه خالد ..
خالد : الوووووو
جاسم "بدون نفس": هلا..
خالد : هلا براعي هالصوت .. جسوم شفيك متضايق ؟؟!
جاسم : شنوجسوم !! اصغر عيالك انا ..المهم عندي سالفه تيي نروح للقهوه ؟؟!!
خالد : اوكي لحظه واكون عندك..
جاسم : لا انا بمرعليك .. انت بالبيت ؟!
خالد : ايه ..انتظرك ..باي
جاسم : باي ..
"واتجه لبيت خالد ..
------------------------------------------
ما صدقت على الله خلص الدكتور المحاضره جان تطلع مع رفيجتها دانه
عالكوفي وطلبت شاي ....
دانه : شفيج لمووي ؟؟! كنج متروعه ؟!..
لمى : والله مادري بس قلبي ينغزني يقول في مصيبه بتصير الله يستر بس " وشربت الشاي "
دانه : انت روقي اعصابج ..ذكري الله ..الله معج .. وقل لن يصيبنا الا ما كتب الله لنا ..
لمى : صدقتي قل لن يصيبنا الا ماكتب الله لنا .. " تنهدت " .. الا دنوي انا بروح.. اوديج معاي ؟؟!
دانه : لا مشكوره.. انا وراي محاضره ..يا حضج ..
لمى : قولي ماشاء الله ..
دانه : ماشاء الله .. بعدين مالقيت الا انتي اصكج بعين اصلا ً انا يوم الاربعاء اخلص قبلج ..
لمى :هههههههههه طيب ..طيب ..كلتيني بقشوري .. يالله مع السلامه ..
دانه : مع السلامه ..
-----------------------------------
كان ياي من عند تقاطع بيت خالد اللي يتقاطع مع مدرسة سحر
لمى كانت بتسير سيده واهو بيلف عالشارع اللي هي فيه وتصادموا...
جاسم " وهو نازل من السياره ويصرخ": هاي انت ماتشوفين .. قدامج .. ( اهو بروحه معصب وغلطان وحط حرته فيها )
لمى " وبكل هدوء " : عفوا اخوي بس انت الغلطان فلا تقعد تصرخ علي ..
( اهي خلقه اعصابها مرتبكه لان قلبها ينغزها بالشر وهذا اوله )
جاسم" وهو قاعد ويسب ويلعن" : الشرها مب عليج الشره على الدوله اللي خلت الحريم يسوقون ...
" اهي هني عصبت وخافت تفقد اعصبها ركبت وحركت وهي تقول" لمى : اليوم كله شكله بيصير نكد ..
لا إله إلا الله .. استغفر الله .. هالريايل من طينه وحده .. اففففففففففف
-------------------------------------
" بيت ابو سعيد "
كانت ام سعيد وياى بو سعيد و لمياء زوجة ولدها محمد و بنت ولدها سعيد رغد
ام سعيد " تكلم بالتلفون": ان شاء الله يا بو زياد ..
الله لا يجيب احقاد .. فمان الكريم .."وصكرت "
لمياء : شنو يبي ابوي خالتي ؟!
ام سعيد : يخبرنا بملجة اختج لمى .. و يقول فرصه ننسى الاحقاد الي كانت امبينا والي استمرت بعد يوازج ..
لمياء : منو هذا اللي بيملج على لمى ؟؟!!
ام سعيد : قالي جاسم بن سالم ..
لمياء : انزين منو ؟؟!!
ابو سعيد : والله يابنتي هذا ولد غني وايـــــــد بس اشين ولد بالبلاد ريحته فايحه منه وهو قبل شهر خاطب بنت يارنا رفضوه لانه راعي بنات.. بس شكل ابوج بيناسبهم طمعاً فيهم بعد خسارته بالبورصه ..
--------------------------------------------
@((عائلة بو سعيد))@
سعيد : 37سنه متزوج اخت رفيجه شذى وعنده منها :
(رغد : 15سنه في ثالث اعدادي..
جاسر : 10 سنوات ..
نوف : 5 سنوات ..)
سعد :33سنه متزوج سابقاً وماتت زوجته وبنته ..وهو رافض الزواج ..
محمد : 29سنه متزوج لمياء ..
طارق: 19سنه اول يامعه..
--------------------------------------------------
===========================
" وصلوا خالد و جاسم للقهوه وقعدوا "
خالد : عسى ما شر شفيك ؟؟!
جاسم " بعصبيه " : ماكو شيء بس ملجيتي الاسبوع الياي ..
خالد : مبرووووووك و عقبالي ..
جاسم : لا والله فرحان انت وويهك ..
خالد " بمزح " : شفيه ويهي يهبل وكل البنات يقولون اني وسيم ..بعدين تعــــال واذا يعني مب انت وافقت انهم يخطبون لك ؟؟؟!!
جاسم : أيـــــه .
خالد : هذاك قلتها انك موافق فليش زعلان ؟؟!
جاسم : انا وافقت لاني عارف رد الناس و انهم بيرفضوني وبعدين امي بيضيق خلقها و يطبون السالفه بس صار العكس كل ما رفض حد راحت امي ادور بعزيمه اكبر ..
خالد : فيه حد مايبي الاستقرار و الهدايه وانه يصطلب حاله ؟؟!!
جاسم : ايه انا عايبتني حياتي مابي بنت تغير علي ... انا احب التنويع ..
خالد : خلاص لقيتها ..
جاسم "بتشويق" : شنوووو؟؟!
خالد : تزوج اربع ..وحده من هني والباقي جنسيات على كيف كيفك ..
جاسم "بعصبيه" : تتطنز حضرتك؟؟!
خالد : لا من صج ايه اتطنز ايل في حد يحب الحرام ؟؟!
جاسم : ياخي افهمني مابي اتيوز ..اوووووووف اروح احسن لي .." وراح "
خالد : صدق انك خبل ايل فيه حد مايبي الحلال .. اشوف اخرتها معاه ..
--------------------------------------------
لمياء بنفس الوقت
" قامت عشان تدق حق لمى .. لانها مستغربه موافقتها ..هي متأكده
ان اختها تكره الريايل "
لمياء : الووووو .. السلام عليكم ..كيفج .. شحوالج ..
لمى : وعليكم السلام .. مب بخير ..
" توقعت لمياء انها بسبت الملجه "
لمياء : انا مستغربه انج موافقه ..
لمى : شنو تتكلمين عنه .. انا ضايق خلقي من واحد صار لي معاه حادث بسيط وحط كل الوم علي وهو الغلطان ..الا تعــالي انت مستغربه من شنو ؟؟!!
لمياء " شكت انها ما تعرف شيء " : انا بقولج اذا وصلتي البيت ..
لمى : لميووه قولي لي بسرعه انا قلبي ناغزني من الصبح ..
لمياء : اوكي .. بس انت وينج ؟؟!!
لمى : انا توني واصله البيت .. "تكلم سحر" :يله سحر نزلي ..
سحر : ان شاء الله شوي شوي علي ..
لمياء : الوووو .. لمى وينج ؟!
لمى : هلا .. بس دقيقه ببركن السياره ..و اكلمج ..
" لمى بعد ما بركنت السياره نزلت "
لمى " بقلق " : يله قولي لي بسرعه ..
لمياء : مب في الطريج .. اذا وصلت غرفتج ..دقي علي ..اوكي ؟؟!
لمى : اوكي ..
" وصكرت "
=================
" وصلت لمى غرفتها وبدلت ملابسها بسرعه ودقت على لمياء "
لمى : شسالفه ؟؟؟!!!!!
لمياء : بالول سلمي ..
لمى : مب فاضيتلج .. لمياء ولي عافيج قولي ..
لمياء : طيب .. تعرفين جاسم بن سالم ؟؟!
لمى : منو ؟؟! هذاك اللي خطبني ؟؟!
لمياء : ايه .. تدرين ان ملجتج عليه الخميس الياي ؟؟!
لمى " منصدمه " : ....... شنــــــــــــــــوووو؟؟!
لمياء : والله ما جذب ..
=====================
" لمى عقبها ما تحركت من سريرها تنتظر ابوها يي عشان تتأكد .. شلون ملكتها الخميس الياي وهو حتى ماخذ شورها .."
بو زياد : لمـــى وويع ..وينج ما نجبتي الغدا ؟؟!
" لمى قامت من سريرها وراحت للصاله "
لمى "بغير تصديق" : يبه صدق ان بن سالم خطبني .؟!
بو زياد " بفرح " : أيــــه وملجتج الخميس الياي ..
لمى " بجرئه غير معهوده ": منو سمحلك تقرر عني انا ماقلت مابي اتيوز ؟؟!
بو زياد "بصراخ وعصبيه " : والله مب بكيفج .. ماتبين تتيوزين .. اصلاً انت ليش مخلوقه ؟؟! انت مخلوقه حق الريايل " استغفر الله "
لمى : لا يبا يكون في معلومك ان القرآن يقول " وما خلقت الجـ...
" قاطعها ابوها بصفقه على خدها لفت ويهها عالصوب الثاني من قوتها "
بو زياد : وترادديني بعد .. صدق بنت امج .. انا الغلطان اني خليتج عندها ..
لمى "بصراخ مختلط مع دموع ": امي تسواك و تسوى كل الريايل ويواز مب متيوزه ..لو على ينازتي.. واعلى مافي خيلك اركبه ..
" وراحت لغرفتها لكن ابوها يرها له وقال بنظرة تحدي " : ان مايوزتك اياه ماكون انا بو زياد..لاني ولي امرج .. واقدر امنعج من دراستج ..فختاري ..يايواز ..يا يواز بدراسه ..انت متيوزه.. متيوزه .." وفكها "
" لمى راحت لغرفتها وهي تقول في خاطره : مب متيوزه... مب على كيفه لو اكلم هالجاسم اللي مادري من وين طلع لي "
--------------------------------
" بيت بو جاسم ><غرفة جاسم>< "
قاعد يفكر شنو يقدر يسوي عشان يمنع هاليواز وفي خاطره يقول : توني صغير على الزواج ..وانا مب ويه مسؤليه وزوجه وعيال .. شنو اقدر اسوي ...يالله يا جاسم فكر شنو تقدر تسوي .." ابتسم بخبث " : لقيتها اتسلى فيها واذا مليت من ثرثرتها يودتها الباب وطلقتها واريح عمري منها..و اذا ماعيبتني .. هذي مشكلتها ..
----------------------------------------
كانت لمى يالسه بمكتبة اليامعه تقرا معلومات عن الطب تفيدها في بحثها بعدين اتسجل اهمه عاللاب توب ... وهي تقرا كان فيه شخصين يراقبونها ..
رامي : والله تقهر ها لمى من اسبوع قلت لها عن حبي و اعترفت بلي في قلبي صوبها .. وبعدين اسمع ان الخميس الياي ملجتها !! ولاااااا تدري شنو تقــــول ؟؟!!
سامر " بملل " : شنو ؟!
رامي " يقلد صوتها " : توني صغيره عالزواج و لا افكر فيه .." تنهد " .. مادري ليش الله بلاني بحبها ..
سامر : والله هذي مشكلتك .. مب مشكلتها ..
رامي "بتفكير": تصدق بروح احاجيها ..
سامر " متحمس " : ايوااااا كذا ابدا بالاكشن بدل هالملل .. ايوه ياوسيم يا دافور "شاطر" خلك شجاع ..قوي قلبك.. خليك قدها..ولا اقول اختر ياديو يابيبسي ..خبرك المشروبات الغازيه مضره بالصحه ..هههههههههههههههههههه
رامي : ههههههههه بل بل بل لهدرجه طفشان و تبغاني اتورط ..
سامر : واكثر بعد لــ..
"قاطعه" رامي : تدري ليش احبها ؟؟!!
سامر "متملل زياده" : ليــــــــــش ؟!
رامي : لانها ماتعطي ويه لك وللامثالك .."ويناظرها بحلم"
سامر : هاهاهاهاي لاتنسى انك معانا.. ياشيخ تدري انك تملل ..انت ماحبيت زي الناس صدق حمار ..زين انها ماعطتك ويه لانك جبان وخواف و دافور ..
رامي : مب جبان بعدين اذا صار الواحد دافور..يصير ماعنده احساس مب من حقه يحب .. بعدين سمعت انها دافوره زيي واكثر بعد ..بس صدق تقهر ترفضني مع اني احسن من خطيبها جويسم راعي البنات كيف هي راضيه في واحد مثله ؟؟!
سامر : سمعت انه ولد غني وايـد مب زيك ماحيلتك الا راتبك ..
رامي : تصدق انـ ...
"قاطعه" سامر : صدق انك تملل ياخي ترى ذبحتني بتصدق معلق عليها من الصبح .. روح حاجيها و خلصني ..افففففف..
رامي : شكلي بسوي جذيه .. شهيق"ياخذه بعمق" ..زفير"يطلع الهواء بقوه"..بسم الله ..
سامر : حشى خلص الهواء علينا ..
"راح رامي لحد لمى ووقف فوق راسها لمى ألتفت له بعدين ارجعت تقرا بدون اهتمام يذكر رامي انقهر منها ويلس على الكرسي الي ينبها اهي يوم شافته يلس قامت وصكرت الكتاب وشالت اللاب توب وتوها بتروح .."
رامي : طبعاً عرفتي من تختارين ..
"ويوم شافها ماعبرته وبتروح يودها من ايدها"
رامي :وين رايحه ؟؟!طبعاً لجسوم حبيبج .. طبعاً لانه غني وعنده بيزات و.."قاطعته"
لمى : فج ايدي يا رامي مب متفيجه لك ..
رامي : مب فاجها الا لمين اعرف ليشـ .."قاطعته"
لمى : قلتلك فج ايدي مب متفيجه لك ..
رامي : طبعاً طبعاً اكيد بتفيجين له لــ .."قاطعته للمره الثالثه"
لمى : تراك ذبحتني طبعاً و طبعاً ..اففف.. فج ايدي وقول لك ..
"فج يدها"رامي : قولي ..
لمى "بعصبيه": اف .. لاني اكرهك واكره كل الريايل ..ويواز مب متيوزه لاانت ولاجاسم
ولاغيركم .. انزين .."بصوت اعلى" مب متيوزه .. سمعت ..اففففف.."راحت وخلته في دوامة حبها وفي حالة ذهول كبيره خلفتها وراها في رامي "
"رامي في خاطره : شلون ملكتها الخميس الياي وهي مب موافقه ..اكيد مغصوبه .. لكن ما اظن لمى من النوع المستسلم انا اعرفها عدل ..شلون تسكت على هالشيء ..شلون؟؟!!"
ياه سامر : شصار ..رامـي ..رامـي.. تسمعني ؟؟!
رامي : ايه ..
سامر : شصار ؟؟!
رامي "وهو يناظر الفراغ" : ماشي..ماشي ..
سامر : شلون ماصار شي وانت سنه تحاجيها ؟؟!رامي قولي شصار ؟؟!
رامي "يلتفت له" : قلت لك ماشي ..اف منك ..
"وراح وهو منذهل وباين على ويهه الاستغراب"
-------------------------------------
رامي : 24سنه رابع يامعه مؤدب وخلوق وعلى قد حاله وهو دافور .. وسيم ويلبس نظارات ويعشق شيء اسمه الكتاب ..بس يتيم ..ماعنده لااب ولاام وعايش بروحه في شقه ويا رفيجه سامر..
--------------------------
سحر "تكلم شجن": أيــــه ماتدرين ؟؟!
شجن"بلقافتها المعهوده": شنـــو؟؟!
سحر: خلاص مب قايله لج ..
شجن : بلا سخافه تدرين .. اني ملقوفه ..يلاااااا عاد قولي ..يا سحوري ..ياحبي .."تتمصلح"
سحر : يا لقفج المهم تدرين.. ان ..لمى ..ملجتها الخميس الياي ؟؟!
شجن : كح كح كح كح..
سحر : صحه ..
شجن : ههههههههه صدقتي ..انا اقصد انج غبرتي لاني داريه من زماااااااااااااااان ..من الخميس اللي راح ..
سحر "تحاول تركب ويهها بعد ماطاح": اها ..طيب ..شخبار الدراسه ..
شجن : يقلع ابو التصريفه ..حلوووووه بس لا تعيدينها ..
سحر : انت لاتقلدين ..جميع حقوق النسخ والطبع والكلام محفوظه ليوم اخر لدى سحر بصفتي محاميتهم ..احم ..احم ..
شجن : يالله روحي بس ماعندج شي ..وسلميني على حبي ..
سحر : الا كلبج ..مدري شتحبين فيه ..خايس ..يع انا اخته ما اقدر اتحمله لا هو ولا رفيجاته ..
شجن"تتطنز": لا تمدحينه جدامي بهالطريقه ترى استحي .."تنهدت" ..
تدرين القلب وما يهوى ..مب بكيفي..لو بكيفي حبيت شباب وايد ما يخلصون..
سحر : الله صار فندق ماصار قلب ..عدال يالاميره ديانا انتي وياى هالشباب اللي تحتج يتمنون حبج ..يالله مع السلامه ماعندج سوالف صدجيه ..
شجن : حراام سحر انا طفشانه ..يالسه بروحي شجون في بيتها ويعقوب مع اختج ريناد ..
وانا شنو اسوي بعدج؟؟!
سحر : مب مشكلتي ..
شجن :سحوري يالله عاد ..
سحر : اوكي بعطيج عدت مشاريع ..
واحد ..مقابلة التلفاز و مشاهدة احدى السخافات التي تعرض مثل ستار اكاديمي والتليقف عليهم..ولكن بغض البصر عن احمد حسين لانه لي ..
اثنان..وهو المفضل لدي وهو مشاهدة الطوف التي لديكم وتصقعين راسك بها الى ان يغمى عليك وتصبح لديك اثاره ..واكشن ..لتكتشفي كيف يغمى على الانسان..
شجن : هاهاهاهاهااااي ياخف دمج ..تتطنزين ..طالعوا هاي انا من صدجي وهي تتطنز ..بس تصدقين سحور..؟!
سحر : شنو؟؟!
شجن :لغتج الفصحى شي.. ماشاء الله ..اللهم لاحسد ..طوف ..تصقعين ..شي والله
سحر : احم ..احم ..تعرفيني خبره ..
شجن:..اقول
سحر: هاه
شجن : باي ..
سحر : يالله باي..
----------------------------------------------
$مابقى على الملجه الا يومين$
لمى كانت تفكر كيف تمنعها لمى في خاطرها :
(اللحين ابوي حاطها تحدي يعني لو شنو بنملج ..وانا مابي املج ..لحظه..انا مابي املج ..وانا العروس يعني ماتتم الملجه الا بي ..."ابتسمت بخبث..على فكرتها")
لمى"فرحانه": يهوووووووووو لقيتها ..لقيتها ياسحر .. لقيتها ..
سحر"شالت الروايه اللي تقراها" : بسم الله الرحمن الرحيم ..شفيج ؟!.."بتشكك" دخل فيج يني؟؟!
لمى : "تنهدت".. ماصدق كابوس وبينزاح..
سحر : شنو ؟؟!
لمى : سر خاص فيني ..واذا نجح قلت لج ..الحمد لله ..الحمد لله ..
سحر "تطالعها باستغراب": الله لا يبلانا ينت وقعدت..
----------------------------------------
"السوق"
كان جاسم طفشان مره وماله نفس وقاعد يدخن
ام جاسم:ولديه كتمتني شيل هالزقاره ..
"طفى الزقاره ورماها بملل وهو شارد الذهن"
ام جاسم : شرايك يا جاسم في هاي تصلح تصير شبكه للمى؟؟!
جاسم "بلا اهتمام ": ايه ..ايه..بس نخلص..(في خاطره..اسمها لمى ..الله يعينج يا لميوه براويج الويل ..عشان موافقتج على هالملجه )
ام جاسم : يالله ولديه هالمحل ماعنده شي .."وتحرك وراها .."
--------------------------------------
" بيت بو زياد "
بوزياد: لمــــــى..وينج ؟؟!
لمى "بدون نفس" : نعم !!
بوزياد :يله لبسي شيلتج وتعالي بنشتري فستان الملجه..
لمى: مابي ..
بو زياد: شنو تقولين ؟؟! ماسمعت؟؟!
لمى : اظن سمعتني ..مابـــــــــي"ولفت بترجع لغرفتها ..لكن بوزياد مسكها وقال"
بوزياد : مب بكيفج بتشترين يعني بتشترين..فاهمه؟!
لمى : لا..لا ..مب فاهمه ..وروحه مب رايحه..
"بو زياد مسكها من شعرها وقال"
بو زياد: بتروحين ..وبتشوفين الفساتين وبتختارين ...سحـــــر ..سحـــــر..
"سحرارتعبت من ابوها يوم شافته يمسك شعر اختها وهي تتالم"
سحر"بخوف": نعم ..
بو زياد : يبي شيلتج وشيلة اختج بسرعه بنروح للسوق ..يله..
"وراحت تييب الشيل"
-------------------------------------------
جاسم كان طفشان مره وقاعد ينتظر امه لين ماتطلع من المحل ..
وشاف واحد مب غريب عليه ومعاه بنتين محجبات وحده شكلها مرتعب"سحر" ووحده طفشانه زي حلاته وشكلها مغصوبه على شي ولي معاها ميودها من ايدها بقوه كنها بتضيع "لمى"
يوم شافها حس انه قد شافها قبل كذا يوم التقت عينه بعينها قامت تناظره بستحقار وهو مستغرب منها خذ له زيقاره وحاول يتذكرها بعدين تذكر انها اللي صدمها ذاك اليوم نفث دخان الزقاره بملل وانتبه له اللي مع البنتين ويا عنده ..
بو زياد: هلا ولديه كيف احوالك؟؟!
جاسم"بنظرة استنكار" : بخير ..
بو زياد"لاحظ استنكاره":انا بو زياد ..نسيبك..
جاسم :اها..
بو زياد : اعرفك على بناتي "يأشر على سحر" هاي سحر "ابتسمت سحر له" ..
"اشر على لمى" وهاي لمى ..خطيبتك...
"لمى كانت مطنشته ولا كانه موجود"
"جاسم يتفحصها ويقول هاي خطيبتي ؟؟!ويشوفها من فوق لتحت كانها بضاعه معروضه"
بو زياد :لمى سلمي على خطيبج جاسم..
لمى"بنظرة استحقار وبدون نفس": السلام عليكم...
اظن تتذكر البنت اللي صدمت فيها قبل ايام ؟؟!
جاسم "يسحب زقاره جديده بعد مارمى زقارته الاول": طبعاً انا مافي بنت تروح عن بالي.. (قالها عشان تكرهه ..مادرى انها ماتطيقه)
لمى "بلا اهتمام": تشرفنا ..سحر نروح لذاك المحل.."واشرت على محل
ويرت سحر من ايدها وراحت لان ابوها كان فاج ايدها وما يقدر يمنعها"
بو زياد "متفشل":يالله مع السلامه..
جاسم :مع السلامه..
(في خاطره: مب خطيبه هاي بس حلوه ماتوقعتها جذيه ..حلوو العب فيها)
بو زياد "بعد ما راح " : فشلتني ..انا واريها بس فالبيت..
=======
زياد لقت امه شبكه فخمه و شرتها ...
لمى ماطاعت تشتري شي لكن ابوها خلا سحر تشتري لها غصباً عنها..
=======
$مابقى على الملجه الا يوم$
في يوم الاربعاء راحت لمى لليامعه ووقفت هالكورس استعداد للمشاكل اللي بتحاذف عليها من كل صوب بسبب عنادها وراسها اليابس ..
---------------------------------------------
ام جاسم انكتمت وهي فيها ربو وجاسم ولأول مره في حياته يفرح بمرض امه لان هذا معناته الغاء الملجه او تأجيلها الى مالا نهايه..
جاسم : الحمدلله ..يايمه..جت سليمه..شلونج اللحين؟؟!
ام جاسم "فيها دوخه وصعوبة التنفس من الجهاز" : زينه ياولدي ..الحمدلله ..مافيني شي..
جاسم : لاتجذبين ..الدكتور قال لازم يومين راحه ..وماتطلعين برى البيت لان الغبار يضرج..
بو جاسم : ايل ادق على بوزياد واقول له ان الملجه تأجلت.."وتوه بيدق"
ام جاسم : لايا سالم اليوم اللي انتظره يتأجل ..لا وألف لا.. الملجه في نفس موعدها ..وان شاء الله بحضر العرس..انا ماصدقت ولديه يقتنع ..تيي تبي تأجلها..
جاسم"فيه خيبت امل عشان الملجه مب متأجله" :لا يمه..انا مب مالج الا معاج ..من دونج ما أسوى بيزه..
ام جاسم "باصرار" : لا يا ولديه بتملج من دوني اهي بس ملجه مب عرسك ..
جاسم"يحاول": لا يمه بس .."قاطعته"
ام جاسم : قلت ملجتك بكره ماراح تتأجل..
"جاسم قام زعلان بعد فشل محولاته"
ام جاسم "بتشكي" : شفت ولدك يا سالم .. يبي يأجلها بأي شكل ..عشان ما يتيوز ..
بو جاسم : الله يهديه ..
----------------------------------------
$يوم الملجه$
قامت لمى من سريرها بكل برود ولا كأن اليوم ملجتها تمغطت وبدت تفكر بتنفيذ خطتها ..
لبست لبسها وشلت معها البوك وشافت جم فيه من دينار
لمى: زين ثلاثمية دينار ..ياترى تكفي ولا لأ؟؟!
يالله تمشي الحال..
سمعت حد يتمغط وراها.."لفت عليها"
سحر : صباح الخير يا العروس..
لمى "بنظره ناريه ": سحور بلا سخافه..بعدني ماعرست..لاتفاولين علي..
سحر: ان شاء الله ........الا بتروحين؟؟!
لمى: لا بتفرج على ويهج ايه بروح..
سحر : غريبه..العاده ثمان ..لكن اليوم قبل الكل..
لمى: مب فاضيه لكم ..انا طب مب أي تخصص..
سحر: بسم الله شفيج علي من الصبح..اففففففف..بس خبري ان اليامعه ما تفتح الخميس..
بس بكيفج سوي اللي تبينه..
لمى : طبعاً ايل بشاورج..و حطي في معلومج تراني بتاخر فلا تخافون..ترى بطول وايـــــــد..اوكي؟؟!
سحر:اوكي..
"طلعت لمى من الحجره ومعها جنطتها و اللاب توب مالها ..وكيس فيه شوية ملابس ..وهي ناويه نيه "
طلعت من البيت راحت لسيارتها وركبتها .. مسكت السويج وحركت ..وهي اصلاً اليوم لا عليها يامعه ولا شي..
-------------------------------------------------
# ياترى شنو بيصير مع ابطال قصتنا؟؟! </b></i>