ديوان الشاعرة/منتهى القريش

الليل لسه بأوله

بدري
تعال نسهر
الليل لسه بأوله

ما قلت له؟
ليه يا قلب ما قلت له
إن السهر ..
أحيا رموشي الذابله

ما بي أنام
وطيفه يروح
أبيه يزرعني كلام
يبقى معي
باسم الغرام..
يملاني دهشه وأسئله

وينك حبيبي لا تروح
ابقى وحيده بدنيتي
لما تغيب
بُعدك ترى مر وصعب
لا تعتقد
روحي أبد.. تقوى البعاد
صعبه الهجر تتحمله

مو مشكله
لو قلت لي
من غيبتك تقدر ترد
راح انتظر
واوقف على درب الهوى
الملم شوية صبر
وروحي تكون
ويا الصبر متفائله

ومهما البعاد
طال وسطا
وصارت سهامه قاتله

بترد لي.. بترد لي
عقب الغياب
نطوي مسافات الألم
نلغي الزمن
تكسر عقارب ساعتك
واكسر عقارب ساعتي
والوقت نقدر نقتله

لا تلتفت
خل الي راح
ماضي اندفن
ننساه .. ذكرى مُهمله

تعال.. نتشكل وطن
ما قد أحد.. مره أبد
نخلق لنا .. عالم جديد
نبني عليه أحلامنا
وانت وانا.. بس ندخله

ما بي تكون
قصة هوانا معلبه
وحتى الكلام .. ما بيننا
يتجاوز أحكام اللغه
نحط النقاط
فوق الحروف المتعبه
بفرحه نلم اشواقنا
يحملها أو هي تحمله

تعال.. نكتب أغنيه
عنوانها:
الليل لسه بأوله
نعزفها فوق اضلوعنا
ونهيم في عالم بعيد
واشفاهنا
تكون الشواطي والغرق
ونصرخ سوى
انت وانا
الليل لسه بأوله

يا ناس..
ليه العشق.. في شرعكم
ذنب وحرام
وليه الغرام
سويتوا منه معضله

لو كان في حبنا ذنوب
ما اعتقد نقدر نتوب
خلنا نذوب بعشقنا
مو ذنبنا؟
انت وانا نتحمله

تعال..
يا العشق الذي
لملمني واحياني ربيع
لا تبتعد
اخاف من بعدك اضيع
تعال..
خل نسهر سوى
وباسم الهوى
آنا اعترف
ان السهر
أحيا رموشي الذابله