ذا ( حزن ) !

وأنا الباقي ..!
ألملم ماتساقط منّي البارح من اشواقي ..!
من احداقي ..!
من الحزن الشفيف الممتلي طهره .. من اعماقي ..!
واحاول قدّ ماأهرب ..
بعد أهرب ..!
من جنونك ..!
من الأيام ( من دونك ) !
من عيونك ..!
إذا ابتسمت على اوراقي !


سوالف لحظة البارح / عليها النور ..!
.................. عليها من السلام ( أبيض ) سلام ، ومن تحياته !
أنا الشعر البعيد / الشاعر / الجمهور !
.................. أنا الهمس القريب / وماتعب من ذاق ... لذّاته !

ومات إنسان !
قولوا ..
من عليه الدور !
.
.
حيا انسان !
قولوا ..
من يعزي فيه ... أمواته !؟

حنيني / حنطة احساس / ومعي عصفور !
.................. معي عصفور لكن / موسم الضحكات قد فاته !
.
.
.
ياعزيزي ماهي بـ لحيّة ( وزن ) !

ذا ( حزن ) !
.
.
جبت لك حزن ٍ عثا فيه المسا ...
................ دمعتي / زادي وضحكي / غايتي !
من رحل فينا ومن فينا رسا ..
................ علّمه عنّي .. وقول .... احكايتي !
قلّه إني كنت .. حمّال الأسى ..
................ وإني اتجاهل كثير .... مرايتي !!
وإني المقهور من ليت وعسى !
................ ذي بدايتها ..... وهذي نهايتي !!
.
.
وقولوا كان ..!
شاعر الما / والحنين العذب / وإحساس الحنان !
شاعر ٍ ماتت ورى الضحكات ..
ضحكاته ..
زمان !!
كان أدفى من عتب أحباب / دمعة أم ّ ثكلى !
كان أجمل ..
كان أكمل ..
كان أطيّب ..
كان أحلى ..!
وكل هذا لمّا كان !!
شاعر الما .. والحنين العذب .. واكسير الحنان !!
.
.
قل للقلوب اللي تبي منّنا :نور ..!
.................... خلاص طارت فالبياض / الحمامة !
ماعاد فيني شعور ويحرك شعور
.................... الليل دافي ... لو يخوف ظلامه !!
وش للمواجع تلبس انسان مكسور !
.................... لفّه حنينه وسط عينه .... ونامه !!
وعيون كل الناس آشوفها قبور !!
.................... تدفن وراها ..ضحكتين .. وغمامة !!
هذا انا شاعر يلوّح لي / النور !
.................... تبكيه طفلة / في يديها ... حمامه !!


بركات الشمري