قصيدة اليأس

أنا اللي للأسف عايش على هامش حياة الناس =حياة ما لها قيمة وأنا مجبور اجاريها
أنا من عاش بالدنيا طموحه رابطه بالياس =ولو بيدي حلول لحالتي ما احتلت اسوّيها
أنا كتله من الهم ومن الحزن ومن الهوجاس =مشاعر شاعر ما تعترف بشعور راعيها
أنا حس فقد حسه ومعنى الحس والاحساس =معاني ما لها معنى وتبحث عن معانيها
أنا قصر بلا ناس وبلا باب وبلا حراس =أنا اغنية(ن) يتيمه ما لقيت أحد يغنيها
أنا مثل العصا اللي راسها يركب عليه الفاس =خذ الفاس وجب الفاس وعصاها وين طاريها
أنا اللي لا رحلت ولا لقيت بديرتي مجلاس =أنا اللي لا حكيت وقصتي ملزوم أبحكيها
اشوف الناس تضحك وابتسم واضحك وأنا منحاس =واشوف الناس تحكي بي واصدد تقل ما اوحيها
وجع جرح الزمن لو هو هوين يذبح الحساس =وانا لو شفتني حي الحقيقة عنك مخفيها

شاعر قبيلة حرب زياد بن حجاب