الغياب المدوّي

ياصاحبي يكفـي غيـاب وحمـاقـات

إلـى متـى حبــل الوصـال إمتلـوّي








إلـى متـى والقلب ينبض شـرارات

يغلي تحت صاج الغيــاب المـدوّي








أظهرتنـي من جـوّ كلّــه مســرّات

ودخّلتنـي فـي جـوّ مـاهوب جـوّي








جـوٍ كئيـبٍ كلّــه إظنــون وآهــات

جـوٍ ينــاقض فـي غرامـك علـوّي








وأنا معك صادق من الذّات للذّات

وأنـا معـك عـاقـل ولا ني مهـوّي








ماكان لي مع صادق الحب زلّات

طبع الوفاء يعكس هواي وسموّي








حبّيت فيــك الحب يــوم البدايات

وعشقت زينك دون شور وتروّي








ماهوب حقّي منك كثـر الخلافـات

شيّبت بـي وأنـا مع العمــر تــوّي








أنا معك يـآئـس ومـالـي سلامـات

وأنتـه عقب هشّ الطبـاع إمتقـوّي








عوّد ترى مافالجفـاء غير شمّـات

لا تسمع إلهرج العـذول المغـوّي








أنت الحبيب اللّي له الحب مامات

وأنت الضجيج اللّي يغازل هدوّي








إمّــا تعــال ونسّنــي كـل مـافـات

وإلّا تـوجّــاد الفتـى وش يســوّي