ع ـــــطـــــش!!

الليل صحرا ، والسهر اقدام ، والغربه سؤال
والصبح خطوه ، والدروب ايام ، والموطن : عليل

والوقت ذكرى مؤلمه لاكفنت لحظة وصال
والعمر ماضي لااصبح النسيان في عينك قتيل!

البارحه مرّت علي لحظات ياشوق الليال
ماكنّها الاّ بيد ، والساعه ثوانيها صهيل

أحسها بين الألم واللو ، واجراس المحال
واشيلها لااقصى مكان ، ولاأشوف انّي اشيل !

رفيف دمعي كذّبه عمري ، ولكن لايزال
وهزيم صدري ضجّ بي ، والدمع عيّا لايسيل

مااقسى من الخذلان لاشفته من احبابك وحال
بينك وبين الصد وجد ٍ لاحدا في كل ليل

وان جيت اكابر واعلن المسفار نادتني :تعال
لحظة حنين ، وتنرسم صوره لها معنى جميل

الصدق فيني مايزال..وصدقهم من وقت زال !!
تغيّروا ، وانا احسب الخلّان ماتخذل خليل

مديت كفي من غلا،، وانا احسبه لي راس مال
واثر النوايا ماتبين الّا بعد وقت ٍ طويل

ماعادوا اللي يدّعون ان الوفا سهل المنال
ولاعادوا اللي عاهدوا،،ولاصار للعشره حصيل

ماصرت احس الليل شوق ، ، ولابقى للحب فال
الليل صحرا..والقدم حارت وضيّعت الدليل

كل اتجاهاتي عطش..كيف ارتوي؟هذا السؤال
والصبح خطوه ..والدروب ايام..والموطن: عليل



مــــنـــــقــول