الا يالعاشقه للشعر جددتي لي التذكار

وردتني هالبيتين من شاعره تكتب باسم (عاشقة الشعر)
بعد تركي لمنتدى كنت مشارك به سابقا ً

بروق وخوة طويق ومسار ودكترة شعار
........... وبرقع طفلة ٍ هيض لسانك قبل تفخر به

ثلاث سنين هالطفله تدور وما لقت لك دار
............ تقول شلون يبلشنا بحرب ومايتم حربه

وهذا كان الرد عليها

الا يا العاشقه للشعر جددتي لي التذكار
............. على حد الضما كنك سقيتي هاجسي شربه

انا جاني خبر ماهو على ذمة هل الاخبار
.............. على الشاشه قريته هكذا بالحيل وش قربه

سألتي عن غيابي ليه ما كملت للمشوار
........... انا ابحكي بصدقي عن شعور كنت اشعر به

صحيح اني كتبت الشعر مثلي مثل هالشعار
............ ولكن والله اني كنت شاعر عاش في غربه

وجدت بعالم الشعار عالم مكتنف باسرار
............. واثرني شاعر غرد بسرب ٍ ما طلع سربه

احسب ان الضيافه فوحة الدله وشب النار
............. واثرني واهم صارت سوالف بالسن ذربه

احسب ان الشعر كونك تجيب لدانة البحار
............... واثرني واهم صارت تجاب بشقة القربه

احسب ان المواسم تنتشي مع جية الامطار
............... واثرني واهم صارت مواسم رش للتربه

اذا في حلقي الشوكه وفي دربي نبت صبار
............. وليل طال لين اني حلفت اسريه واسهر به

رحلت وماتركت الا اثر واحد من الاثار
............. علشان المسافر لو بغى يرجع عرف دربه

تركت ابيات ما تحمل سوى فكرة طليب الثار
.................... ايا ربه يرد الثار بعد الصبر ايا ربه

نهيت الهاجس المشتاق للطيره على المطيار
......... ونهيت النفس لا تطرب وهي بالحيل منطربه

ابي لين الزمن من كثر ماشال الغثى ينهار
............ وابي لين الوجود يحن من شرقه الى غربه

وابي لين الشعر يستنطق الكلمه مدى الابهار
............ وابي تنفك عن كاهل مدى التعبير هالكربه

وابي لين النحل يترك حلى السكر الى الازهار
......... بعدها يرجع الشاعر وهو يضحك على حربه