احسب سنيني واكتب البيت باليت

ياطيري اللي للمقانيص حنيت
واشتقت للطلعه وصيد الحباري
لاتحسب اني ساهيٍ ماتمنيت
للعشب والصحرى وجو البراري
ورفقة اللي في المقانيص خاويت
والهيل والدله وزين الطواري
لوشفتني ياطير مره توانيت
غصبٍ علي ياطير ماهو قراري
أي والله اني ماعن الوعد قفيت
وني على خبرك محبٍ وشاري
اعد واتقصى جميع المواقيت
والشوق يسبق قبل ليلي نهاري
شوقي لزولك لي فقدتك ورديت
ولهفة اشواقي وطول انتظاري
لكن ظروف الوقت جارت وهميت
كني طريدٍ تالي الليل ساري
احسب سنيني واكتب البيت باليت
والدمع ياطيري على الخد جاري
حسبتها حسبت فقير وعديت
وضاعت الحسبه وضاع اعتباري
لاتحدني ياطير اسولف بما اخفيت
ويبان ضعفي للعرب وانكساري
ياطير خبري فيك لي ضقت هديت
وتغار لي من صار لي اي طاري
رفيقي اللي للملمات خليت
ون صابني مكروه تاخذ بثاري
ون كنت فيني يوم ياطير شكيت
اسف على ظني وسوء اختياري
دام الرفيق اللي هقيته وظنيت
دربه تغير وانحرف عن مساري
الله يعوضني وحسبي اذا اخطيت
عن طيري اللي صار صيد الحباري