بــيــت الــطـــيــن

يامن يعاوني على بعض الأفكار = أفكار بيت الطين شرحه ومعناه

يسمون بيت الطين يامسندي دار = الاسم عــــمّ الدار كلـــه ومبناه

أولهن القهوة مصاريع و وجار = و دلال يسمونه معاميل مركاه

و نقيرةٍ معها الحجر نحت الاحجار = و الطاق هو و المحكمة مع امسواه

و مبرّد القهوة و محماس له كار = و الملقمة و المبهرة عند مَصفَـاه

و القبّـة اللي به َروَازن للاسرار = مثل: الفُـروك و مِكحلة عين ودواه

واوتاد ِيسلّـتهن بقدوم نجـار = يعـلّـق به الملبوس لجله ركزناه

والورد يمشط به صغيرات وكبار = وقبة اصْـفاف البيت للعيش ورحاه

و التّـبرقه لـرحـا المعيّـة والاثمار = ومنخاس من عند المخفة لفزناه

وجصّـة و صوبه ثابتات بهالدار = و عِـرزالة الصفة غريبه مسواه

والقرو والمَطهَـر لهن ذكر واخبار = والكل منا مادرى ويش يقفاه

وقوتالةٍ تكشف له الباب والمار = ولا السماوه منور البيت تلقاه

ورواشن المصباح له دور وادوار = وغريفة المنفوح بالسطح مبناه

والمغرفة والموقعة بنت الاشجار = والصحفة اللي من خشبنا نجرناه

والباب فيه اخبار واذكار وآثار = فيه القلاقل حافظات لمجراه

والسكّـره للباب من بين الاذكار =والحوش فيه الحسو والدلو ورشاه

والسرج من صنع التّـنـك ماله انوار = يطفى من ادنى " تش "من جاه طفاه

والزند والخلخال للوقت تعبار = وبربوش والخشخاش للساق يزهاه

وخصور وزميّم يعلق بشنكار =ومقمّرات من المجاول مطواه

اسمع وخلك من هل العرف والكار =اخبار ماقبلك وقل الحمد لله

صلوا على المختار ماهل الامطار =او عد مادهم السحايب نثر ماه


ممارق لي

تسلم يدينك ع ماجلبتي لنا ويعطيك العافيه

لاهنتو يالغوالي على المرور

لاهنتو على مروركم

تسلمين يا قلبي
لج مني كل ود
لج

لاهنتي انجووله على المرور