سيّد الغيد

الشعـر موقف والمواقـف كثيـره

والزّين ماله غير طاري وسيره

يالعنبوا جــــده علـى هالوتيـــره

ماهوب راحمني ولا هوب منصاع..!!

جنّدت له قافٍ من الشعر مرغوب

يادوب يشكي له عن الحال يادوب

من عام الأول يبـدع القـاف ويذوب

والوضع مابه غير هجر وتوجّـاع..!!

قلت أكسبه بالشعر لا صرت شاعر

يمكن يجي لـه عقب صده مشاعــر

والظاهر إنه مايعــرف المشاعــــر

قلبه عـن إقلـوب المحبين جــــزّاع..!!

أثر الهوى غلاّب ياأهل المواعيد

ماهوب متخبّي ولا هــوب تأكــيد

من عيد تطرد سيـّـد الغيد للـعيــد

الحول دار ولا بقى للـوصل بـــاع..!!

وإن جاك عاذل قال وينك ووينه

علّقك بخيـــوط المـحبـــه وزينـه

منتب على وصله ولنتب تـــدينه

إنسه ترى شفّه على الغير طمّاع..!!

مايدري إني فيه مغــرم ومفتون

والحب مايخضع لمنطق وقانون

إمّا عطاني حــب مانيب ممنون

أنا عطيته غصنٍ أخضر ومرباع..!!

ياناس ياللي لمتوا عيـون سلطــان

يـوم إنفتن بالزين والزين لـه بــان

لاتكثرون اللــوم مـادمت عشـقان

كان الوصل وإلا الجفاء خافقي طاع..!!

من يــوم شفته والمــزايين شــانــوا

وإن كــان ماشفتوا تعالوا وعــانــوا

عـانـوا يتيــم الحســـن بـالله عانــوا

قدٍ رشيق وطول وعيونٍ وســاع..!!

هي صدفتٍ شفته وشفته وشفته

لا مالـمـحتـه ليت لـــوّي لمحتــه

ماكـــان غنّيت الغــرام وعـرفته

ولا كان حبّيته ولا صرت منصـاع..!!

عشّمت روحي فيــه مدري تعلّقت

الزبده إني فيــه ذبت وتشـــوّقت

جمّعــت كلي فيه مدري تفــرّقت

الزبــده إني منه عانــي وملتــــاع..!!

الله يســامح قلبـــــي اللي تــــولّع

في حب محبــوب الخفوق المدلّـع

شلّــع خفوقي ليـن العـــود شلّـــع

مانلت من حبه سوى ضيم وأوجــاع..!!