رواية جفاف وردة بيضاء في رُكن الذكريات /32

..
‏..( البارت الـ٢ والثلاثون )..
.
.
بعد جرحك : ما تفيد ألفين آسف
‏ي خسارة عشقي و ذروة حنيني ,
‏
‏إنت لو إنّك حبيبي .. ما يخالف
‏إنت أبو قلبي ، و ثالث والديني !
.
.
جلست بهدوء ونظرها لاصابعها في حجرها : توني جيت الشقه مافيها قهوه .
قاطعها وعيناه تتجول في الاثاث : شوفي حظتس .
واشار لنفسه : كله مني الفلوس والنعمه اللي انتي فيها .
رفعت نظرها بصدمه .
ابعد نظره وبتوتر اخفاه : وين رجلتس ؟! .
ابرار تنهدت بخفوت : عنده شغل .
ابو ابرار بتفكير سريع : دقي عليه ابيه .
ابرار استجمعت شجاعتها وهتفت : يبه مدري وش اقول ، لكن كيف للحين عندك وجه تقابلهم وتكلمه .
واكملت وهي تُحرك راسها ب اسى : تدري لما رجعت وش قال لي ؟! ، قال اكيد مارجعتس الا ابوتس .
ضحك ساخراً : ماعليتس منه ، كم لتس شهر عنده ولا قال شي .
ابرار ضممت كفيها وبعدم تحمل من تصرفاته : وانا انتظر متى يقول ؟! .
صرخ : انتي ماتستحين تحاسبين ابوتس .
ابرار وملامحها تتلون : الفلوس عندك رجعها لرجال .
قاطعها وصوته يضيق : والله ي ابوتس جمدو فلوسي ، ماعاد عندي ريال .
نظرت له بتساؤل : منهم .
ب ارتباك وقف : مالتس دخل منهم .
التزمت الصمت وهي تهز ساقها اليُمنى .
استدار لها : انتي فكري بحياتس اول ، والحين وبتدعين لي .
اغمضت عيناها وبهدوء : ليش كذبت علي وقلت هو خاطبني ، ليش طلبت رضاك فيه وانا ماكنت ابيه .
وفتحتها هاتفه بقسوه : ماتخيلت شكلي بينهم ؟ ، هو فيه اباء مثلك ؟! ، يرمون بناتهم عشان شوي فلوس .
قاطعها وملامحه تحمر غضباً : مايبلغ فيتس معروف ، انا اللي ربيتس ، وانفقت عليتس ، يوم جاء دورتس ترفضين .
وقفت وبرجفه بانت في صوتها : انت طلبت مني فلوس ورفضت ؟! .
قاطعها من جديد : هو عندتس فلوس عشان تعطيني ماقول غير احمدي ربتس على ماجد واخذي من فلوسه قبل يطلقتس ، وبكره بتتخيلين انتس في حضن راجس المنتف ، والله تعرفين وش انا من الاباء .
بللت شفاهها بصدمه من تفكيره : انا ماهمني الفلوس .
اشار لها بغضب : لا همتس ، ولد خالتس والله ماعنده ريال .
تنتهدت وتجولت بعيناها في ماحولها ماعاده : انا مو فاهمه وش بنستفيد .
اقترب وسحب عضدها وبحقد : اللي ابيه الحين تدقين ع الزفت ذا ولد العايد وتقولين ابي فلوس وتعطيني اياها .
اغمضت عيناها بإلم من ضغطه على ذراعها هامسه : نسيت انك اللي حاط الكيس بسيارة سواقهم .
اتسعت عيناه وهو يتذكر وسحب شعرها بوعيد : دامتس عارفه اني انا اللي حاطها ، ليه ماقلتي وين سياره سعد .
واكمل بغضب : الله ياخذتس من بنت ماستفدت منتس شي ، حماره مثل امتس .
دفعها بقرف واتجه ناحيه الغرفتين .
مسكت صدرها شاعره ب انحباس الهواء وعدم مروره ، ' تاكيده لفعلته يقتلها .
خرج بعد دقايق و تجاوزها حاملاً محفظة ماجد وسحب مافيها ورماها اسفل قدميها : اذا سال وين الفلوس قولي خذيتها لاتطرين اسمي .
رفع صوته صارخاً : تسمعين ؟! .
هزت راسها من دون تفكير .
هتف مُغادراً : ترى هم ماهمهم الفلوس مثلنا ، واذا خلصت الشهور اللي متفقين عليها طلقتس .
وضحك ساخراً : لكن والله لاقتله قبل لا يطلقتس عشان نستفيد منه وناخذ ورث .
زفرت بقوة مُخرجه حبسة الهواء ، جلست وبكت بإلم وهي تستوعب ان والدها اصبح مُجرم بسبب المال .
..
هتف بهدوء ثقيل : نعم ؟! .
الحارس الضخم ذو البشره السوداء : ي طويل العمر فيه واحد يقول اسمه حمد الغالي ، ويبيك برا .
اتسعت عيناه ونظره على طُرق الرياض المُزدحمه بهذا الوقت وكل وقت وبعد ثواني تفكير : دخله دخله .
ابتسم بسُخريه وهو يسمع خطواته الثقيله الواثقه كما عهده : سنين .
زياد (حمد) تحرك حتى وقف جواره امام النافذه العريضه : قليله .
بتفكير : ماتغيرت .
زياد رسم ع الزجاجه : الحقد دفين .
نظر لرسمته وببتسامه : ماتوقعت بشوفك يوم .
زياد ضحك : ليه عسى ماشر ؟! .
وضع كفوفه الضخمه في جيبه وبحقد : دفنوني ودفنونك .
زياد امال ثغره : ماحد دفني .
نظر له وضحك بشماته : يكفي اسمك بالقبر .
زياد بهدوء : جاك ردي ؟! .
حرك راسه برفض : بنقول ماجاني .
زياد بنفاذ صبر : جابر مايدخل بسوالفك الوصخه .
ضحك بقوه وب استفزاز : اكيد يعرف ماضي عمه ، وموافق يمشي ع خُطاه .
زياد ضرب طاولة المكتب : جابر مستحيل يقابله .
صرخ : لا بيقابله ، تدري كم بنكسب من وراه لما يقابله ؟! .
زياد ابتعد خارجاً : قلت ماراح يقابله .
بخبث : مايقابله ، لكن يقابل بنت العايد وشكل بينهم علاقات شي عادي عندك , هذا اذا ماكنت تدري ؟! .
وقف وبملامح ارتسمت عليها الصدمه : انت وش تقول ؟! .
حرك ثغره مُصطنع التفكير : لندن ، ثم مدرستها ، ثم المستشفى ، والخافي اعظم .
تحرك بغضب ناحيه صارخاً : تراقبه .
ضغط زر الجهاز الصغير في كفه ، ودخل حارسين وسحبوه للخلف بقوه مُكبلين عضديه ب كفوفهم الضخمه .
اشتعل جسده غضباً : خلك رجال وقول للكلاب ذولا يفكوني ، وتعال قدامي تكلم .
ضحك بقوه وجاوره مُغادراً : لاتنسى الوشم اللي على ذراع ولد اخوك ، واشمه لعبه؟! , له يوم وهذا يومه .
واكمل بهدوء : عندك اقل من شهر ، الفتره طويله فكر بهدوء .
ودلف باب اخر واختفى داخله .
زياد سحب ذراعيه وصرخ : والله لاذبحكم وراه .
وخرج يُعدل لابسه : اروح انا ولا يروح جابر .
..
المُمرضه بعد ان قاست ضغطه : تمام .
ماجد بضحكه : من يومك راعي مصايب .
زفر انس ضيقه : اللي فيني يكفيني .
احمد دخل ورفع حاجبيه ب استسلام : رافضين بكره بيكتبون لك خروج .
نظر لماجد المُتكي يميناً على الخزانه : وين اخوك ؟! .
ماجد بهدوء : طلع عنده شغل .
انس بتردد : وراكان ؟! .
ماجد نظر لانس وبعد طول تإمل : والله الحين مدري وش الوضع ، يعني راكان ذا وش يقرب لعروسك ؟! .
انس اغمض عيناه وهو يمسك لسانه عن تفوه شي .
احمد بحده نظر لماجد : انتهينا .
صرخ ماجد : وش انتهينا ؟! ، مابقى غير ولد العايد .
قاطعه انس ونظره لسقف : انس العايد .
ماجد بقهر : فرقت اسمك ولا اسمي ؟! .
انس هز راسه : ايه ، انا .
ماجد ب اشمئزاز : واضح انت اللي تبيها ، مستحيل عمي يجبرك ع بنت كذا .
انس بحده : ماجد ممكن تخليني لحالي .
ماجد سحب جاكيته وخرج بخطوات غاضبه .
احمد اقترب من انس : ولد عمك معه حق .
انس بهدوء : ابي انام .
احمد بتردد : قبل تنام بسالك عن البنت ذي .
تنهد انس : أي بنت ؟! .
ابتسم : لايروح بالك بعيد , اقصد الاجنبيه وش بينك وبينها .
انس بسُخريه ضحك : مُدير وموظفته لا اكثر .
احمد ببطء : لما اعطيتك ملفها ذاك اليوم تغير وجهك وواضح انك تعرفها .
انس وضع ذراعه على جبينه وبعد صمت قصير : تقابلنا بلندن .
فتح ثغره بدهشه : كيف تقابلتو بلندن ؟! .
انس نظر له : بالصدفه كنت تعبان وحاولت تساعدني ، وشكلهم كانو وقتها يراقبوني لاني مدري كيف رجعو يحطونها قدامي ، وماعرفها ابد ، وتحركت ساعتها .
عقد حاجبيه : وانت كيف عرفتها بعد كل ذي الفتره .
ابتسم : مانسى الوجيه بسهوله .
احمد جلس على المقعد : متى بتسال ابوك ؟! .
انس جلس وهو يرفع ذراعه بصعوبه : عن ؟! .
احمد بهدوء : عن كل اللي يصير فيك .
انس بضيق : ملف ابوي نظيف ، كيف تبيني اقابله واقول انت وش مسوي قبل عشرين سنه .
حرك راسها بخجل : مستحيل .
احمد وقف : انت ارتاح ، وكل شي بينحل .
سحب هاتفه بملل بعد خروج احمد وتافف من الرسائل والمكالمات الكثيره من زُملاء التجاره .
..
دقايق طويله وهي تستلقي على جانبها الايمن ونظرها على ستارة النافذه .
جلست بخوف وذهنها يرسم لها اشخاص من خلفها .
صرخت برعب على طرق الخادمه : من .
الخادمه : سيده شادن والدتك في الاسفل تُريدك .
شادن بضيق مُتعب : سانام .
نظرت لهاتفها وبتسرع اتصلت على رقم انس ، بعد ثواني اقفلت الخط هامسه : هو انس ناقص مصايب ، ابعدت نظرها والهاتف يُضيء باسم انس .
استلقت من جديد ع دخول والدتها : شادن حبيبتي ليش ماتنزلين .
شادن من تحت الغطاء : بنام .
ام انس ب استغراب : احد ينام العصر ؟! .
شادن تُمثل النُعاس : انا .
اقتربت والدتها واستلقت خلفها وبهمس : بنتي الحلوه وش تفكر فيه ؟! .
شادن استدارت لوالدتها ودخلت بحضنها وبرجفه باكيه : انا متاكده اللي يصير لانس .
قاطعتها وهي تمسح على شعرها : اخوك كان يساعد وحده ، لاتوسوسين .
شادن ارخت جفنيها هامسه : لاتروحين نامي معي .
..
نظر للملف امامه : وحيد ومايشتغل وللحين بقصر .
رفع كتفيه : هذا اللي لاقيناه عليه .
واكمل : عمته ناهد متزوجه التاجر ايوب المشعل وعليها منه ولد عمره ٧ سنوات .
ابو انس اغلق ثغره بكفه وهو يفكر بهدوء .
عاد للواقع على صوت المُساعد : الواضح ان عمته تتكفل بمصروفه .
حرك راسه ابو انس : عمره ثمانيه وعشرين ويعتمد على مره ماتجي بالمخ .
وبإمر : راقبه وشوف وين يروح وين يشتغل ، المهم اعرف كيف عايش .
هز راسه وبهدوء : اتكلم عن عائلة هاني الجابر ؟! .
تنهد وحرك راسه .
المُساعد : الاب هاني الجابر مات قبل ٤ او٥ سنوات .
ابو انس بخفوت ضايق : الله يرحمه .
اكمل : الام سُعاد النادر وللان على قيد الحياه .
ابتسم ابو انس وهو يشعر ان الفرج قريب .
المُساعد : منال الجابر البنت الكُبرى لعائلته الجابر وماتت مقتوله من زوجها .
اغمض عيناه بضيق وهو يتذكر تفاصيل تلك الليله .
اكمل بهدوء مُستغرب من تلون ابو انس : نايف وهُدى ورياض هم الاخوه الباقي .
قاطعه ابو انس : ابي عنوان بيتهم .
هز راسه : ابشر .
ابو انس بتردد : الكلام ذا خله بينا .
وقف : ابشر .
ضمم اصابعه واتكى بذقنه هامساً : مصيري اعرفك .
..
صعدت جواره وبضيق : شكلك نسيتني ؟! .
سيف ونظره لطريق : الدنيا اشغلتني .
هاجر بتردد : شفت تركي ؟! .
سيف نظر لها : ليه هو مهب بالبيت ؟! .
هاجر حركت راسها : لا .
واكملت بصوت مُتعب : اريان تملكت امس .
اوقف السياره بصدمه : متى ؟! .
هاجر نظرت له : امس .
تحرك وبربكه : وليكون ولد العايد ؟! .
هاجر هزت راسها : ايه .
سيف رفع حاجبه بدهشه : غريبه .
هاجر لم تعر كلمته اهميه ، ناطقه بهدوء : بعيش معك .
سيف بإمر قاطع : الشقه صغيره ، وسامي دايم عندي .
هاجر تكتف وبضيق : اريان وطلعت ، وشكلي غلط بالبيت .
سيف ب استغراب : بس انتي زوجه تركي .
هاجر بسُخريه : ليت تركي يحصل له غرفه بالبيت الحين ، عشان تقول زوجته .
سيف بتردد : محمد كلمني وطلب انك ترجعين .
هاجر ب اشمئزاز : ماعاد لقى احد يطبخه له .
سيف بحده : احترميه اخوك الكبير .
هاجر قبضة على كفها : اخوي ؟! ، ظلمني وغصبني ، وحتى ضربني ، وتجي تقول اخوك .
سيف بحنيه : انتي اكثر وحده تعرفين قلب محمد ، وان اللي غيره السوسه اماني .
هاجر بعبره : الله ياخذها انا ابي افهم وش تبي .
قاطعها سيف بتوتر : خلينا من سيرتها ، انتي كيفك .
هاجر ببتسامه : احاول اسعد نفسي بعدك .
..
بطولت بال والمطر يهطل بقوه : وهو وينه ؟! .
الحارس بنفاذ صبر : لاتخليني اجيب الشرطه لك .
ضحك بسُخريه : يلا كلمهم .
استدار على صوت السياره القادم وتحرك الحارس لداخل حتى يفتح البوابه ، ابتسم بخبث وتقدم امام السياره فاتحاً ذراعيه .
وقف السائق وبتعجب : هُناك شخص مجنون وقف امام السياره .
ام نايف بهدوء راحم : يمكن انه محتاج .
فتحت الباب ونزلت بخطوات ثقيله : تبي شي ي وليدي ؟! .
تركي نظر لها بصدمه وبحرج رفع كفه : لا .
وتحرك بخطوات هاربه مُبتعداً عن القصر .
عادت لسياره وبشفقه : المسكين شكل ماله عقل .
هُدى ونظرها لقفاه المُبتعد واختفى وهي تتوسط الحديقه : يمكن من اخوياء رياض , شكله ماهب شكل محتاج ولا مجنون .
ام نايف بتفكير : اي والله شكله .
بعيداً عنهم انحنى بتعب هامساً : رحمتها ولا كان فضحتك ي كلب .
ركب سيارته ودوا رنين هاتفه اجاب بهدوء : هلا ؟! .
سيف بتساؤل : وينك ؟! .
تركي داعب خُصلات شعره وبكذب : بالبيت .
سيف رفع حاجبه ونظر لهاجر : توني جيت البيت ومالقيتك ؟! .
تركي زفر ضيقه : رحت ادور الدكتور نايف ، بس قهر مالقيته .
سيف رفع صوته : انت صاحي ؟! .
هاجر بخوف : وش فيه ؟! .
تركي ابتسم : ماقلت المُزه معك .
سيف بنفاذ صبر : انت وينك الحين ؟! .
تركي لف المقود وهو يتوسط السيارات : بجيكم انا , انتم وينكم ؟ .
..
بتعب : ايه هذا قصدي ، تعالي عندنا .
نوره ابتسمت : طيب .
اقفل الخط وادخل يده بجيبه واخرج المفتاح ، دخل مُغلقاً الباب خلفه ، تجول نظره بهدوء المكان تقدم خُطى قليله ورفع حاجبه بصدمه من محفظة نقوده المرميه ، رفعها ونظر داخلها شهق بعدم تصديق ، هل هذه هربت من جديد وبـ ٥ الاف ريال .
اتجه بخطوات واسعه لغرفتها وفتح الباب بقوه ، تجمد نظره على ظلام الغرفه ، وبرودة التكييف ، اشغل الاضاءه وبعينان مُستغربه من وضعيتها الغريبه في النوم بوسط السرير .
اقترب بهدوء : ابرار ؟ .
احتضنت جسدها من البروده وهي تنام بعمق .
تحرك ناحية التكييف واقفله وطبطب على كتفها هاتفاً بعدم رضا : ابرار قومي .
سحب كفه بصدمه وبخوف رفعها وهو يشعر بحرارة جسدها العاليه : بنت وش فيك .
جلس بجوارها واحضتنها بتوتر : ابرار .
فتحت عينها واغمضتها بسُرعه : هم ممم .
مسح على وجهها وبحنان خايف : قومي عشان نروح للمستشفى .
همست مُبعده جسدها عنه بتعب : ابي انام .
رفع شعرها عن وجهها وصرخ بغضب وهو يشعر بالبلل فيه : ماتتغيرين ، احد يتروش وينام تحت المكيف بعز ذا البرد .
وابعدها وتحرك ناطقاً بغضب : ودي افهمك .
جلست والحراره تشتعل بجسدها ومسكت راسها محاوله تخفيف الدوران : اهتم لصحتك ثم تكلم عن صحتي .
عقد حاجبيه كاتماً غضبه : يعني عاجبك وضعك الحين ؟! ، يلا اوك خليك كذا .
اعطته ظهرها مُستلقيه بتعب وانفاسها تُسمع : كويس .
تنهد واقترب بهدوء : ابرار لا تتعبيني معك ، والله اللي فيني يكفيني .
ابرار بصوت خافت : ابي انام .
اقترب ولفها وبهمس حاني : ماراح تتحملين اكثر .
نظرت لحادقتيه وبحركه سريعه اخفت وجهها بين كفيها باكيه .
تشنج وجهه وتجمد جسده واحضتنها : حبيبتي وش فيك ؟! .
بكت بقوه وكلمة حبيبتي تخترق قلبها .
ابعدها وسحب كفيها وبتوتر : وش فيك ؟! .
بللت شفتيها وبشهقات مُتتاليه مُتلعثمه : انا انـ نا .
سكتت وبُكائها يزيد .
ثبت عيناه على ثغرها مُستغرباً صمتها وبكائها بهذا الشكل ، ابعد نظره ووقف هاتفاً بضياع على صوت الجرس : هذي اكيد نوره .
لم تلبث دقيقه الا ونوره تدخل مرعوبه : ابرار ي قلبي عسى بعدوك .
ابرار مدت ذراعها توقفها عن الاقتراب : انا بخير .
قاطعتها نوره وسحبت عبائتها بحديث لا اعتراض فيه : لازم نروح للمستشفى ، شوفي كيف لون وجهك صاير .
ابعدت نظرها عن ماجد الواقف امام الباب بفشلة مُتذكره بُكائها الغريب امامه .
وقفت بتوتر وهمست لنوره : ابي الحمام شوي .
نوره هزت راسها بقلق .
خرجت بعد دقائق مُتنهده براحه لعدم وجود ماجد بالغرفه .
..
معقودة حواجبه بصدمه وعيناه على محفظته في كفه ، فهُناك احمرار على ذراعها فهو ليس غبي حتى لا يُلاحظه ، رفع راسه على خروجهما .
ارتبكت وعيناها تقع على مافي كفه .
ماجد انزل المحفظه ووقف هاتفاً بهدوء : خلصتو ؟! .
احاطت ذراعها وبقلق : ايه .
ابتسم على خوف نوره : امها وانا مدري ؟! .
..
نزع قميصه وتثاوب بنُعاس فاليوم كان من اصعب ايام حياته .
تجمد وهو يشعر ببرودة فوهة السلاح على ظهره .
اغمض عيناه وبسُخريه : مافكرت اموت ومن عمي .
زياد ( حمد) : تشتغل من وراي ي ولد **** .
جابر بلل شفاه وبحده : وش دخل ابوي .
زياد ضغط على السلاح وهو يدفعه في ظهره : لانه ماعرف يربيك .
صرخ بآلم : وش مسوي ؟! .
زياد ضغط على اسنانه وعيناه تشتعل : تشتغل من وراي كثير .
جابر نظر للاعلى بتفكير وملامحه تتوجع : مثل ؟! .
زياد صرخ : انت اللي مفروض تقول .
جابر بتلعثم : مافيه غير البنت ..
قاطعه بحده : ايه البنت .
وهز راسه : بس لا تقول الاجنبيه .
همس عند اذنه بغضب حاد : بنت العايد .
برد جسم جابر رُعباً ، وهتف مُتدارك الموضوع : اراقبها زي اهلها .
سحب ذراعه بقوه ولفه حتى ارتطم ظهره بالجدار وصوب السلاح نحوه : تكذب ؟! .
جابر انفاسه اضطربت وسكت وعيناه يُنزلها ارضاً .
زياد انزل ذراعه صدمه وبتلعثم : ليكون بينك شي انت وبنت العايد .
رفع جابر عيناه وحرك راسه : لا لا .
صرخ : كذاب .
جابر رفع ذراعيه وهو يمسح على شعره بضعف : ماتشبه اهلها بريئه .
استدار زياد واعطاه ظهره وقلبه ينعصر آلماً : قلبك قلب عمتك .
جابر بضيق : وش فيه قلب عمتي ؟! .
زياد لف له وحرك راسه بعدم رضا : قلبها طيب ، مفروض قلبك ميت مثل ابوك .
جابر ابعد نظره وبتعب : حاولت اشبهك بس ماقدرت .
زياد اقترب وطبطب على كتفه : كنت مثلك بس ذبحته ، وانت بتكون احسن مني .
وبهدوء : تعرفك ؟! ، لانهم قالو تقابلها كثير .
جابر حرك راسه بسرعه : لا .
زياد تنهد : زين ، انساها .
جابر ب انكسار اخفاه وضيق : اللي تآمر به .
زياد رفع حاجبه وهو يختبره : بنشوف دبره لها .
اضاق عيناه وبخفوت : تحت امرك .
زياد ابتسم هاتفاً بحديث لا يُريده قلبه : فيه موضوع كبير ابي تجمع نفسك عشان اقوله لك ، والموضوع ذا مايحق لك رفضه .
هز راسه : اللي تبيه حاضر .
وقف زياد بتردد واضح لعينان جابر ، ثم خرج بخطوات واسعه مُلتزماً الصمت .
رفع جابر حاجبه بضيق ,وبتفكير غريب تحرك ناحية السرير ورفع الاغطيه مُخرجاً تلك الملفات ، اتكى بظهره لسرير وجلس بفضول فاتحاً ملف عائلة الجابر فهو لا ياكد يعرف الا انهم عائلة زوجة عمه منال .
ضاقت عيناه من المعلومات وتجمدت حادقته من جـملة ( منال الجابر قُتلت عام 1996 والقاتل زوجها ).
كح بقوه وهو يفتح عيناه بصدمه : لا مُستحيل .
ارتعشت كفوفه واغمض عيناه بتفكير سريع وفتحها ناطقاً : لو قلنا عايد العايد مظلوم وش يبي بملفات عائلتنا وعائله الجابر ؟! .
وقف فجاه وسحب حاسبه المرمي من شهور ، فتحه وكتب بخانه البحث ( جرائم الـ1996 ) ، دقق بالقراءة وعيناه تدور على انواع الجرائم ، تنهد بتوتر وهو يضغط على العنوان العريض ( جرائم القتل ).
فتح ثغره بصدمه واول جرئمه تظهر كانت ( ليله ***** ، تاريخ ** ، ** ، 1996 قتل زياد الراشد زوجته منال الجابر في مُنتصف منزلهم الواقع في العاصمه الرياض ، ووجود الطفله التي لا تتجاوز الاسبوع اريان الراشد المخطوفه في ساعات تلك الليله امام المنزل ميته ).
ضرب صدره بقوه شاعراً ب انحباس الهواء ، وهتف ببطء محاولاً استعياب الاسم : اريان .
مسك راسه بعدم تصديق وهو الان يستوعب عيشه لدى عمته في تلك السنه ومابعدها .
وقع نظره على اسم رياض وبقرف اغلق الملف ، واغلق الحاسوب ووقف هامساً : عمي قاتل زوجته .
قبض على كفه هاتفا : والله مانب بعيد عنه من قتل رائد الهادي ؟! .
استجمع عقله وبتوتر : انا ماذبحته .
انزل كفه لجيبه وب استغراب من عدم وجود الصوره : وين اختفت ؟! .
زفر انفاسه بهدوء وارتداء كنزة سوداء وخرج بخطوات واسعه .
وقفت خطواته على صوت الخادمه : لقد قدمت لوحدها .
ضرب المكتب بقوه : واين انا ؟! .
الخادمه بتوتر : السيده الكبيره هي من رفضت ان نُخبرك .
اشار للباب : اذلفي .
هزت راسها برجفه وهي تفهم من اشارته انهُ يُريدها ان تخرج .
نظرت يميناً ورفعت راسها بتوتر : سيد جابر العشاء جاهز .
زياد وقف وتقدم بخطوات هاديه حتى اصبح امامه ونظر لثيابه : وينك رايح ؟! .
جابر بتردد مُخفياً غضبه وكل مايدور براسه : من هذي ؟! .
زياد بملامح مُستغربه : منهي ؟! .
جابر بلل شفاهه : الحرمه الكبيره ، وماهيب اول مره اسمع انها جايتك .
زياد بشبه ابتسامه تحرك لطاولة الطعام : ايه هذي ام منال الله يرحمها .
جابر رفع حاجبه ب استغراب : وش تبي ؟! .
زياد تنهد وبسُخريه : تسلم علي .
جابر تشجنت ملامحه : صدق ؟! .
ضحك زياد بقوه : لا بس تسال متى بتشوف قاتل بنتها .
جابر بتلعثم وهو يجلس : كيف ؟! .
زياد رفع نظره : انا وعدتها اجيب لها القاتل .
جابر والحديث يغص في بلعومه : وعلى اي اساس تصدقك ؟! .
زياد نظر له محاولاً فهم مارمى : وش تقول انت ؟! .
جابر رفع ملعقته لثغره وبهدوء : ليش ماصدقت انك انت قاتلها ؟! .
زياد ابتسم هاتفاً بسُخريه : هو عمتك لعبت بعقلك بعد ؟! .
جابر حرك راسه وبعينان حاده : انا قريت .
زياد ضحك بقوه : ماهو كل مانقراه نصدقه .
جابر وثقة عمه تُرعبه : عمي .
قاطعه بغضب : تقول يبه .
جابر انتفض من غضبه .
وقف وبتهديد : لاعاد اسمعك فاتح الموضوع ذا ، ولو انا قاتلها بعترف وش منه اخاف .
ودفع الكُرسي للخلف حتى سقط : لكن والله ثم والله لايموت .
واختفى من امامه وصوت خطواته الغاضبه تبتعد .
نظر للاكل بعدم رغبه واغمض عيناه ، ام منال الجابر تُصدقه رغم وجودها تلك الايام ، فمن انا حتى لا اُصدقه فالارجح وجود لبس في هذا الامر ، تافف وحرك راسه بضيق .
..
المُمرضه : من الجيد انها اتت ،
نوره ابتسمت مُبلله شفتيها بحماس : طيب ي حلوه مافيه خبر حلو ؟! .
ابرار رفعت ذراعها قليلاً عن عيناها المُتعبه : خبر مثل وش ؟! .
اقتربت نوره واخرجت لسانها وبملامح مُبتسمه : مثل انك حامل .
رفع حاجبه ماجد وحديث نوره وصله وهو يدخل الغرفه : من الحامل ؟! .
ابرار كحت بفشله : انتي وش تقولين ، اي حمل .
ماجد ابتسم ونظر للمُمرضه : كيف صحتها الان ؟! .
المُمرضه وهي تتاكد من جريان المُغذي : حالتها مُنتظمه ، وبتساؤل نظرت لابرار : هل انتي متزوجه ؟! .
ابرار نظرت لماجد وبربكه من نظراته الغريبه بدت تشتم نوره داخلها : لا ايه .
ماجد امال ثغره : تجحدين عيني عينك ؟! .
نوره بخيبه : من سؤالها واضح مافي حمل .
ماجد ضربها من قفا راسها : اتركي سوالف الكبار .
نوره وعيناها للمُمرضه الخارجه : الله يغربلها كان عندي امل .
واستدارت لماجد : الله ي سوالف الكبار .
ابرار ارخت جسدها وبتعب اغلقت جفنيها ، فمايدور حولها لا تُريد التفكير به .
نوره همست له وعيناها لابرار النائمه : وش قال الدكتور ؟! ،
ماجد بتآمل لملامحها : بينومها الليله هنا وبتطلع الصبح .
نوره برجاء : طيب بجلس معها .
ماجد هز راسه : ايه اكيد ، بيرفضوني اصلاً ، انا بروح عند انس .
نوره حركت راسها : ماودك تجيب لنا اكل ترى جوعانين .
ماجد ابتسم : كم عندي نوره ؟! .
احتضنته بقوه هامسه : احبك لما تروق .
ماجد ابعدها وعقد حاجبه : ومين قال لك اني مروق .
نوره نزعت عبائتها : خلاص معصب ، المهم كلم امي لاني لو اكلمها بترجعني غصب .
ماجد تكتف : طيب اوامر ثانيه ست نوره ؟! .
نوره بتفكير غطت ثغرها ب إصبعها ألسبابه : ايه .
ماجد بغيض ابعدها عن طريقه واقترب لابرار : اعرفك ماتخلصين لكذا اسكتي .
اخرجت هاتفها مُنشغله فيه عنهم .
ماجد انحنى هامساً : كيفك الحين ؟! .
ابرار ابعدت راسها للجهه الاُخرى وبتعب : زي ماتشوف .
ماجد بلل شفاهه وقبلها على وجنتها بقوه هاتفاً : بتصيرين بخير .
سحبت الغطاء وغطت وجهها بضيق .
اعتدل بوقفته ب استغراب .
اقتربت نوره وبتساؤل : وش فيها .
تحرك وبهدوء حاد : انتبهي لها ، واذا صار شي كلميني .
نوره هزت راسها وهتفت بعد خروجه : متهاوشين ؟! .
ابرار التزمت الصمت وهي تضغط على ثغرها حابسه دموعها .
رفعت عنها الغطاء وبتساؤل : ماتسمعيني .
ابرار انقلبت على جانبها الايمن وبخفوت : تعبانه .
نوره اضاقت عيناها وابتعدت للمقعد الجلد حتى تُريح ظهرها : طيب مصيرك تسلمين .
..
قبل راسها : الله يهديك يمه وعشانك بعيش هناك وش تبين اكثر .
احتضنته وهي تمسح دموعها : قلب الام وش عرفك .
ابتسم وحاوط ظهرها : جعلني مابكيك كلها خمس ايام وارجع .
بعيداً عن تجمعهم ضممت شفتيها حابسه عبرتها رغم ماسمعته منه ذاك اليوم الا انه تناسته فهو الاخ الكبر الحنون دائماً ، الهادي في طبعه .
وقفت جوارها وبملل : امي مكبره الموضوع .
اريان بعبره اخرجت صوتها مخنوقاً : لاتلومينها .
هند نظرت لها وببتسامه : لاتقولين بتبكين ؟! .
اريان زفرت انفاسها وبهدوء محاوله تعديل صوتها : لا بس امي كسرت خاطري .
دفعتها من كتفها : عاد كلها شهور وبتروحين عاد هنا جد امي بتكسر خاطري .
نظرت لها بحقد : وش رايك تروحين تجهزين لجامعتك ؟! .
هند بتذمر : عشان عندك اوف بتقهريني .
اريان ببتسامه : عاد اهم شي قهرتك .
..
تنهدت وهي اخيراً تستقر على هذه الورقه ، اعادت قراءتها للمره المليون لتتاكد من كلماتها المُتناسقه وترتيب خطها .
وقفت بخبث وعدلت شعرها واتجهت بخطوات ثقيله لصاله ومدت الورقه قبل ان تُخرج جسدها : محسن حبيبي شوف وش معي .
قفز الطفل تاركاً حليبه خلفه : حليتي الواجب ؟! .
ظهرت مها مُتمخطره بخبث وعيناها لوالدتها : هاه شوفيني حليت واجبه .
ام مها انزلت نظرها لحافظة الفطور : وتوتس تحلينه .
مها ببتسامه استندت على ركبتيها امام حقيبة محسن باحثه عن كتاب الرياضيات : فديت الزعلان انا .
ودست الورقه بقوه بين الصفحات واغلقته هاتفه : عاد واجبه كان صعب وانتي تعرفيني اكره الرياضيات .
قاطعتها : خلاص اسكتي .
مدت شفاهها بضجر : طيب خليني اتكلم ليش تسكتيني ؟! ، مايكفي بذي الديره اللي احلف لتس انها مب بخريطة العالم .
محسن نهض بهدوء مُلتزماً الصمت فهو الذي تعود على تحلطم اخته الدائم .
مها ب استفهام : جاء ابوي ؟! .
والدتها بضيق : لا ، من جاو الرجاجيل اللي يسالون عن منيف طلع ولا عاد جاء .
بتردد : وش يبون فيه ؟! .
ام مها بعدم رضا : زوج عمتس حاله مهب عاجبني ، والله يستر جيتهم ماتبشر بخير .
مها بتفكير وقفت : بروح اشوف عمتي وجدتي .
والدتها ب استغراب : هاو وش تبين فيهم بذي الحزه ؟! .
مها سحبت جلالها الطويل وقماش اسود يُغطي الوجه يُطلق عليه ( البرقع ) : عاد بسير شويتين واجي .
..
دلفت الباب المفتوح قليلاً وهتفت بهدوء : ي ولد .
اتاها صوت عمتها ام ابرار : تعالي ي مها انا بالمجلس .
دخلت مها وببتسامه قبلت راس عمتها وجلس متسائله : وين جدتي ؟! .
ام ابرار بضيق : توه النوم يجيها .
مها بتردد وضح لعمتها التزمت الصمت .
ام ابرار رتبت على فخذها وبصوت متعب : قولي اللي بخاطرتس .
مها بخجل من سؤالها : وش مسوي عمي منيف ؟! ، ومن ذولا ؟ .
وبهدوء خافت : اهل رجل ابرار ؟ .
ام ابرار بضيق : ابرار قالت لتس ؟! .
هزت راسها : كانت متضايقه حيل .
ام ابرار غطت وجهها كاتمه دموعها : ي ويل قليبي ع بنتي .
مها بصدمه هتفت بتوتر محاوله تهدئة عمتها : بالاول لكن الحين حابه حياتها هناك وحتى تحب زوجها .
ام ابرار بعينان غرقت دمعاً : بيطلقها لو خلص الاتفاق مع ابوها ، والله مايهمه حب ولا غيره .
وقفت وخرجت ناطقه بصوت مخنوق : بروح اجيب جوالي يارب الشبكه زانت .
عادت بعد ثواني ومدت هاتفها : دقي ع راجس .
مها اضاقت عيناها : وش تبين براجس ؟! .
ام ابرار بغصه : ماجاو امس الا يبون الفلوس اللي عند ابوها واكيد بيرمونها علينا ، ولازم ترجع .
مها بتوتر : وتبين راجس يروح يجيبها ؟! .
ام ابرار بجديه : انا وجدتس بنروح معه ونجيبها .
نظرت لاشارة الجوال وبكذب اغلقته : مافيه شبكه ، وشحنه خلص .
ام ابرار اخذت الجوال وتحركت بتلحطم : الله ياخذ ذي الشبكه كل شوي وهي طافيه .
وقفت مها وبعجله : يلا ان شاءالله ابوي يجي ويطمنا على عمي منيف ، وبجيكم العصر .
..

..
جلس وببتسامه : اليوم مافي درس ، وسولفو بهدوء .
محسن اخرج ورقته وبضجر : والواجب استاذ ؟! .
احد الطلبه : مافيه واجب اصلاً .
محسن بسُخريه : الا فيه واجب .
علي رفع حاجبه واسكت اصوات الطُلاب المتفاوته : خلاص ، وانت علي جب واجبك اشوف .
قفز الطفل بورقته .
علي اخذ الورقه وبهدوء مُستفهم : هذا واجب الخميس اللي ماحليته ؟! .
بعبره تلونت ملامحه : لا هذا الواجب اللي بالورقه اعطتيني .
علي فتح فمه وهو يستوعب ماذا يقصد الطفل وبربكه هز راسه : ايه خلاص ي شاطر ارجع لكرسيك .
تحرك محسن عائداً لمقعده رافعاً حاجبه ساخراً من جميع الطلبه .
قلب الورقه عدة مرات ورفع حاجبه فاتحها : ( الى من لا اعلم وش اسمه ، الى من كذبو عليه وزارة التعليم وجعلوه معلماً ليس لك دخل ، انا واخوي ، من ؟! اخوي ، اخوك ؟! لا ماهب اخوك الا اخوي ، لا تتدخل فينا وخلك بكتابك ، واذا تبي تسقط محسن فسقطه ، اخرتها يسنع الحلال مع ابوي ، تحسبه بيجي استاذ ولا دكتور ؟! لا والله مايجي حنا بقرية النخيله ماحد يعرفها ، شوف شوف اقرب مثال خلصت ثالث ثانوي ونطقيت بالبيت ، وهو مثلي ، المهم ي ولد الحلال لاعاد تعطي الورعان واجب لاننا ماراح نحله ، وتعال ي انت وش اعتذار م اعتذار مسوي تمون وقال تربيه اقول تصبح على خير بس ، و يلا مع السلامه الاستاذه مها اخت محسن ).
انفجر علي بقوة ضاحكاً وانحنى وهو يمسك بطنه من شدة إلم الضحك .
الأطفال بنظرات استفهام ؟! .
علي تنحنح وبلل شفاهه محاولاً كتم ضحكته .
وبعد وقت وقف فهو لايستطيع كتمها اكثر خرج واتكتى على جدار الصف وارتفع صوت ضحكه .
..
وقف بخفوت ساكن وسار ناحية الحمام خرج بعد دقايق مُعدلاً تيشيرته الزيتي ذو الاكمام القصيره بيده اليُمنى .
اقترب اكثر وامال راسه وبتصفير عالي : ي حلو عندك دوام بالجامعه ولا نسيت ؟! .
فز ماجد جالساً ونظر لساعه واتسعت عيناه وعقاربها تُشير لثامنه والنصف : يوه توك تصحيني انت .
انس جلس بتعب : قالو لك زوجتك ؟ .
عقد حاجبه وبقهر : ومن قال لك ان زوجتي تصحيني ؟ .
ضحك انس وصوته المبحوح يرتفع : كنت مفكر انكم عسل .
ماجد مسك راسه وتحرك بضياع : مايمدي اوديهم للبيت .
قاطعه انس : بيكتبون لي خروج بعد شوي وبيوديني سعود ، ودام نوره تقول موجوده مع زوجتك خلاص يروحون معنا .
ابتسم ماجد ورمى قُبله لانس وهو يخرج .
تجول نظره في الغرفه البيضاء وانزلها بسرعه فلونها يُصيبه بالغثيان ، ذهب به تفكيره لهيلدا فالدكتور ليلة البارحه ذكر له انها فاقت من الغيبوبة المؤقتة .
وقف وإقدامه تسير بهُ لها .
..
اتكت على نافذه السياره والنوم يسحبها ، فلا تعلم لما مواعيد والدتها تُصادف ايام غيابها من الجامعه ، رفعت راسها على صوت والدتها : وبشر يارب انه حي ؟! .
فهد بهدوء : ايه قال لي راكان ان اليوم كتبو له خروج .
ام علي بخوف : وين مكانها الرصاصه ؟! .
فهد نظر لوالدته : بعضده .
ام علي ولسانها يُردد ذكر الله : ذا الولد حظه شين .
واكملت بضيق : ربطتو اخيتكم فيه ، تخيلو لو انه مات كان الحين .
قاطعها فهد : الحمدلله هو بخير وهذا اهم شي .
..
تإملها بهدوء فملامحها الشاحبه اخفت جمالها رفع نظره للمُمرضه : انها بخير .
هز راسه مُمتن وب اهتمام : هل هي نائمه ام مُخدر ؟! .
المُمرضه ابتسمت : لا نائمه .
لم تُكمل جملتها وهي تفتح عيناها .
اقترب انس اكثر : لقد اشتاق النور لعيناكِ .
ابتسمت هيلدا بخجل ومدة ذراعها .
نظر انس لكفها وابتسم ب اعتذار : اعدك ساتُصبحين بخير .
هيلدا بضيق من حركته : لن تمسك يدي ؟! .
انس بخفوت : لان انسى مُساعدتك لي .
بعد ثواني صمت هيلدا بتردد واضح لعينان انس : لاتثق بالجميع ، حتى سكرتير مكتبك .
انس بعدم فهم : ماذا ؟! .
هيلدا اغمضت عيناها : اُريد النوم .
انس رفع حاجبه وهو يفهم انها مُتضايقه منه : اوك .
..
نظرت للجالسين في استراحة المشفى ثم همست لوالدتها : ابي الحمام شوي .
ام علي هزت راسها : لاتتاخرين يمكن ينادوني .
ثبتت الحقيبه على كتفها وتوسطت الممر وهربت بحذر من امام موظفين الاستقبال ، صعدت الدور الثاني وزفرت انفاسها بتوتر، نظرت لغرفته وبتفكير سريع : يمكن غيروها ؟ .
تحركت بخوف للغرفه وصوت بعض الاطباء القادم من بعيد ، اغلقت الباب وتنهدت براحه والغرفه خاليه ، دارت بعيناها في الغرفه : والله اني مجنونه وش جابني هنا .
قطعت حديثها والباب خلفها ينفتح .
شهقت برعب على دخوله .
انس رفع حاجبه بصدمه ثم عانق ثغره شبه ابتسامه : مو لدرجه ذي ؟ .
اريان بتوتر حركت ذراعيها بضياع : انا كنت ادور امي ، اغلطت .
قاطعها بتقدمه خطوه لها : وش جاب امك لغرفتي ؟ .
اريان مسكت جبينها : وش دراني انها غرفتك ؟ .
ضحك وتجاوزها هامساً : انا بخير لا تخافين .
لفت عليه وبغضب : هيه هيه لاتصدق كذبتك .
جلس وببتسامه : اسمي انس ، اذا للحين ماتعرفينه .
بقرف من ابتسامته : والمطلوب ؟ .
انس بتسليه : المطلوب تفتحين الدولاب ذا وتعطيني جاكيت لان البرد ذبحني .
اريان نظرت له بقوه ثم استدارت على صرخته : حسك تفكرين تعصين كلامي .
اريان ونظرها للباب : شكلك شايفني خدامه ؟ .
انس ب استفزاز : محشومه الخدامه عندك .
اريان التفتت له واشتعلت عيناها مُشيره : بتنكشف حقيقتك يوم وعلى يدي .
بسخريه : الله يقويك .
اريان بنفس استفزازه : وماضيك اللي تخشه عن ولد عمك علمته اياه بدقيقه ، وهذا انا قدرت اتزوجك عشان اكشفه لاهلك .
انس وقف وتحرك لها بقوه ناسياً عضده وآلمه : انا ب اكون انسان قدام امثالك .
وهمس بعد ان اصبح امامها : لاتصنعين القوه قدام واحد مايهمه احد ، ولاتخليني اضايقك وانا مابي ذا الشي ، ويلا روحي دوري امك .
اغمضت عيناها وبحده : لاتصدق نفسك كثير ي انت .
بخفوت له معنى نطق : بتطلبين الموت ولا راح تلاقينه .
و بوعيد اكمل : الخميس ب اظلم بحياتك عشان تعرفين من اللي يصدق نفسه .
فتحت عيناها وب استفهام نظرت له .
انس ببطء : قولي لاهلك اتفقنا ع يوم الخميس زواجنا .
اريان تصنعت الابتسامه وعقلها لم يستوعب الموضوع : قول لهم انا وش دخلني ؟.
انس بنفاذ صبر : كيف وش دخلك ، ماهب انتي بطلة العرس ؟ .
اريان تمعنت كلمته ب استغراب ، فالسُخريه تطغى عليها : مو وقت تنكيت .
انس عض على شفاهه كاتماً غضبه : اذلفي من قدامي قبل يشوفك احد ويفهمني غلط .
اريان بهدوء مُستفز : زوج وزوجته وش يفهمون غلط .
وغمزت ب اشمئزاز : واتوقع متعودين عليك ، ويكفي ام شعر اشقر .
وضحكت بسُخريه : وفي مزرعه ابوي .
انس عقد حاجبيه وملامحه تتشنج من جراءتها : لاتلعبين لعبه اكبر منك .
اريان بتوتر نظرت له، تآمل عيناها لثواني وابعدها وهي تعود خطوه للخلف والباب ينفتح .
المُمرضه ببتسامه مُتعرفه عليها : سيده اريان ؟ .
اريان بتوتر هزت راسها : اهلن .
المُمرضه نظرت لهُما وبخبث : لم اتوقع ان اراك مُجدداً ، لكن يبدو ان المريض يهمكِ ؟ .
انس عاد لسريره وبقرف : ناقصك انتي ي الثانيه .
اريان شتمت نفسها على تهورها بزيارته واستدارت له بحده : الزم احدودك ، حتى تفكيرك الخايس .
قاطعها ساخراً : مافكرت بشي انا ، عاد مدري عن تكفيرك انتي .
تكتف بضجر وتأملت المُمرضه وهي تنشغل بقياس ضغطه .
المُمرضه غمزت لاريان .
ابتسمت من تفكير هذه المُمرضه وابعدت عيناها .
المُمرضه تذكرت مانسيته : سيد انس لقد وجدنا في دمك نسبه عاليه من البروفين هل تستعمل المُسكنات بكثره ؟! .
انس بخفوت : نعم .
المُمرضه بعدم رضا : مالسبب ورا هذا ؟ ، هل تعلم ان لها اعراض كثير وقد تُسبب فشل بالكلى .
قاطعها ساحباً ذراعه : خلصتي شغلك ؟ .
اريان رفعت زاوية حاجبها بصدمه : الاسلوب الشوارعي هذا مع الكل تستخدمه يعني .
انس ضغط على اسنانه : انتي وش موقفك للحين عندك ؟ .
اريان بتسليه : اسمي اريان ، اذا للحين ماتعرفه .
نظر لها بوعيد ، ونظرت له بمتعه .
المُمرضه ببتسامه : هل شكرتها على تبرعها لك بالدم ؟ .
تصنمت ملامح انس وهو يتعرف واخيراً على المُتبرع الاخر : دم ؟.
اريان اقتربت ونظرت لعضده : ايه دمي اللي يجري فيك .
ولطقت بلكنه انجليزيه ساخره : لايعرف المعروف اعذريه .
صرخ : ومن قال لك تتبرعين .
اريان بهدوء مصدوم : تبي تموت ؟ .
انس وقف وبقرف من كُل شي : ليتني مت ولا اخذت من دمك .
اريان بخوف من ملامحه : بدل ماتتحمد ..
قاطعها وهو يضغط على اسنانه : ي بنت الناس انلقعي من قدامي .
هربت مُغادره ، وتبعتها المُمرضه ، فالاول مره ترى غضباً كغضبه .
ضرب بقبضته اليُمنى الجدار صارخاً : وش القوه ذي اللي عندها ، مايهزها شي .
مسك جبينه والصُداع يُداهمه : انا طبعي مو كذا ، ولا ابي اضايقها او اقول كلمات ماتعودت عليها .
همس لضميره : عشان الوعد اللي اعطيت ابوها والشيخ ، لازم اتحمل .
زفر غضبه وتحرك للخزانه اخرج الجاكيت ونظر للكيس االشفاف الصغير المرمي جانباً دقق بمحتواه وضاقت عيناه مُتعرفاً على مابه ، ذاك الوشاح الاسود خاصتها الذي ربُط على ذراعه في تلك الليله اغلق الخزانه بقرف وابتعد .
بثواني قليلة عاد بهدوء من جديد فاتحاً الخزانه واخرجه من الكيس ودسه في جيبه .
..
ابتسمت ووالدتها تقترب : ماشاءالله اشوفك دليتي الطريق .
ام علي بتعب : وانتي وش فيك تاخرتي ؟ .
اريان بللت شفاهها وبكذبه : زحمه بالحمام .
ام علي هزت راسها : كلمتي راكان ؟ .
تنهدت بخوف ورفعت هاتفها اقفلت بعد ان اجاب راكان : يقول جاي .
واقتربت لوالدتها : اعطيني شنطتك شكلها متعبتك .
ام علي اعطتها الشنطه وعيناها تبحث عن مقاعد حتى تجلس .
اريان وهي تفهم والدتها : بالممر نروح لها ؟ .
ام علي هزت راسها ، حاوطت اريان ذراعها شاعره بالامان والخوف يخف .
..
راكان رفع حاجبه : والاخت ليش ماودها تتكلم ؟ .
سعود همس : خلنا نتركها الحين ، ومصيرها بتتكلم .
راكان زفره تعبه : وش صار على قضية سواقكم ؟ .
سعود ابتسم : ابوي شاك في واحد ، وبيروح له اليوم .
راكان نظر له : راح معه دوريه ؟! .
سعود وكز كتفه بكتفه : ابوي بيشوفه ،واذا تطلب الامر بنرسل دوريه .
راكان خرج وتبعه سعود : نبي حراسه مُكثفه على غرفتها ، يبي لها خمس ايام او اكثر عشان يطيب جرحها .
مشاري اقترب : ابشر ، اوامر ثانيه .
راكان حرك راسه : لا ، بروح اوصل الاهل للبيت .
سعود ابتسم : وش ذي الصدفه حتى اهلى موجودين .
راكان وقلبه خفق بعنف : اهلك ؟ .
سعود هز راسه من دون اهتمام : اختي وزوجة ماجد .
راكان اخفى شبه الابتسامة وتحرك خلفه .
مشاري وهو الاخر ابتسم وتبعهم وعيناه تلمع فرحاً هل سيرى تلك العينان من جديد ؟! .
..
بعد عناء طويل وضع كتف الجاكيت فوق كتفه الايسر ، ف ارتداه تيشيرت ذا اكمام قصيره فهذا الجو ليس مُناسب لكن جرح يده لم يطب حتى الان ، رفع نظره على قدوم سعود وراكان ناحيته .
سعود ابتسم : كتبو لك خروج ؟ .
انس بهدوء : انا قلت لهم .
راكان دقق بملامحه : وكيفك الحين ؟! .
انس بتعب لم يظهره : صرت احسن .
راكان بتردد : قالو جيتها الصبح ؟! .
انس انزل نظره : تقدر تقول ، متى بتحققون معها ؟! .
راكان وهو يفهم انهُ لا يُريد الحديث : لما تصير احسن راح نحقق معها .
حرك انس راسه : زين .
رفع هاتفه واجاب : ايه ، يلا انتظركم .
سعود نظر له وبتساؤل : الاهل ؟ .
راكان هز راسه : ايه .
ضغط انس على اسنانه ناظراً يميناً .
سعود ب استغراب وهاتفه على اذنه : جوالها مقفل .
انس عقد حواجبه : طيب روح نادها .
سعود همس : يمكن اضايق زوجة ماجد .
راكان رفع هاتفه : تعالي .
وهتف راكان ببتسامه : وين الغرفه ؟ ، بخلي اختي تناديهم .
اشار سعود للممر البعيد : هناك بغرفه ٣٢ .
حرك راسه راكان وابتعد جهة الفتاه القادمه .
سعود بتساؤل : لقيت المُتبرعين لك ؟ .
انس بلل شفاهه وبكذب : لا .
مشاري ونظره لراكان : اخت راكان تبرعت .
عقد حاجبيه ورفع نظره بسرعه لمشاري .
هتف سعود بضحكه : عيونك امسكها بتاكل البنت .
مشاري بربكه نظر لانس : انا رايح .
انس بحده بعد ان اختفاء من امامهم مشاري : هذي زوجتي .
سعود كتم انفاسه بصدمه .
انس بغضب قبض على صدره : وقبل كذا مفروض تحترم محارم غيرك .
سعود بربكه : نعتذر .
ابتعد انس ناطقاً بغيض : وراي مليون شغله ، اخلصو علي .
سعود بتردد وراكان يقف جواره : هذي اختك اللي تزوج انس ؟ .
راكان ب استغراب : ايه .
سعود والاستفهامات تكثر في عقله : قالو تبرعت لانس .
قاطعه راكان : ايه ، لما كلمني انس بالمزرعه كانت معي ، وجينا على طول هنا ، ولما احتاجو دم تبرعت .
سعود ببتسامه : خير سوت ، والله يكثر امثالها .
..
نظرت لرقم الغرفه وتنفست بقوه حتى تُخفف التوتر ، وطرقت الباب بهدوء .
ابرار نظرت ناحية الباب ، ثم لنوره النائمه بعمق : نوره اصحي .
نوره انقلبت للجهه الاُخرى بضجر : اممم بنام شوي .
وقفت بتساؤل : من ؟! .
اريان تنهدت براحه بعد ان وصل لها صوت من بالداخل : غرفة نورة العايد ؟! .
ابرار اقتربت للباب : ايه .
.
.
..( نهاية البارت الـ32 )..

سلمت يمناك
طرح جميل جدا

ماشاء الله تبارك الرحمن
ذوق في اختيارك
وعافيه عليك وعلى الطرح الراقي
لاحرمك الله رضاه
‏لك كل
تقديري واحترامي
مجنون قصآيد

طرررحك رووووعه للموضوووع
والله انك ذوووق

يعطيك العاااافيه

تسلم يمينك
ودام عطائك العذب
پآقة ورد

يسلمو ع المرور

سلمت أناملك لروعة ذوقك يسعدك ربي ويحقق أمانيك

ابدااااع راقي..
وفي منتهى الروعه والجمااال
كلمااااااااات من ذهب..
ومعطرة بعطور ساحرة..
لاعدمنا كل مايخطه قلمك لنا
تحياتي وعبير ودي

100
‏جمال الاختيار
خلفه ذآئقة جميله جدا

تعرف ماذا تقدم

‏محتوى الطرح اكثر من راقي

من الاعماق
اقدم لك شكري واحترامي



‏ليل المواجع
محمد الحريري