ما كنه شهر رحمه وغفران للصيام

يا شكواي لله منك يا الطاري المقدام
تقدّمت وهجوسي عن البثّ محجوبه
علامك تورّدني على مصدر الإلهام
ما خليّتني تايب .. وأنا معلن التوبه
يقول الوعد وينه .. وأقول الوعد قدام
تخاويت مع شفّه ولبيّت مطلوبه
لا جيت أقفل البيبان وأنكّس الأعلام
زهمني وأنا جايز عن الشعر ودروبه
عسى الله يعين الحبر والصحف والأقلام
على كلّ موهوب .. وعلى كلّ موهوبه
يدور الفلك ويلفّ وتذعذع الأنسام
و تمضي بما فيها والأعمار محسوبه
ومن حسبة الحسّاب باقي ثمان أيام
ويهلّ الهلال ويلفت أنظارنا صوبه
على أفضل شهر وأزكى ليالي سلام إسلام
عسى الله يجمّلنا ونعطيه ماجوبه
أشوف الفضاء قامت قنواته النيّام
توايق من كموم الفضاء وانفتق ثوبه
تحضّر لشهر الصوم بمصوّر الأفلام
دراما خصوصيّه .. وصيّه و مكتوبه !
عروض ٍ تجيك من الخليج ومصر والشام
على شاشة التلفاز للناس مجلوبه
تهلّ وتبثّ وبثّها حصري من العام
مسلسل حلقاته على الشهر مصبوبه
كذا يستغلون إسمه ومحتواه الهام
علشان من ينتج عمل تكبر جنوبه !
على كل شاشه طفرة ٍ تكسر الأرقام
و للّهو كل ٍ قام يدعيك مندوبه
ما كنّه شهر رحمه وغفران للصيّام
وعتق ٍ من اللي لأقرد الخلق مشبوبه
يا مسلم حماك الله من الذنب والآثام
ترا غفلة المسلم تضاعف له ذنوبه
وصلك الشهر وإليا بلغته وحظك قام
عيونك على التلفاز ماهيب مغصوبه
أخذ من كتاب الله .. لا تآخذ من الأوهام
ما يضمن نجاتك وأكثر الناس منكوبه
منقول