سالفه عشاق

من بغى الفرقا لقـى لـه عـذر واسبـاب ودليـل
خـل عنـك العـذر والاسبـاب دام الحـب ضـاع

كان ودك بالفراق .. ابشر عسـى عمـرك طويـل
لاتـردد وانـت لـك كلمـه ولـك امـر ٍ مطـاع

لـي عليـك انّـك تبّـت بكلمـة ٍ تشفـي الغليـل
ولك عليّ انـي لأوّقـف وقفـة الرجـل الشجـاع

لاتجاملني مخافة ( قال ) مـدري خـوف ( قيـل )
عمر ( هرج النـاس ) مايسمـن ولايغنـي جيـاع

كان قصدك ( سر حبك ) .. اوعدك لأصبح بخيـل
واحمل اسرارك معي للمـوووت قـدر المستطـاع

بس قلها ... قل ما احبك ... وابشر بصبر ٍ جميـل
لاتحسب أني مثـل مـن طبعهـم لـوي الـذراع !

صاحبـك ماهـو كـذا ياصاحـب القـد النحـيـل
صاحبك طبعـه غريـب وغربتـه غربـه طبـاع

فـي الهـوى مايقبـل الحـل الوسـط ولا القليـل
مثل ماهو لاشرى يشـري .. ليامـن بـاع بـاع

ثابت ٍ لو هـي تميـل الارض حـدره ... مايميـل
يـدري ان الفقـر ماهـو عيـب والدنيـا متـاع

ماعشـق لـذّة حياتـه كثـر عشـق المستحيـل
ولا كـره حتـى مماتـه كثـر كـره الأنصـيـاع

كم تعلّم مـن شديـد البـدو وش معنـى الرحيـل
وكم تعلّم من غروب الشمس وش معنـى الـوداع

وكم تعلّم من سحاب الصيف وش معنـى الحصيـل
وكم تعلّم مـن ليـال البـرد وش معنـى الضيـاع

ايه انا هذا طريقي ( موحش .. وصعب .. وطويل )
وانت لامنـك تعبـت .. العالـم فجوجـه وسـاع

اعتبرنـي فـي بدايـة سكّتـك عـابـر سبـيـل
و رح وانا قلبي معك من ويـن وجّهـت الشـراع

يكفي اني لاانذكرت فـي سالفـة عشّـاق .. قيـل
:عاشر احبابه شجاع .. وفـارق احبابـه شجـاع

الله يعطيك االعافيه
طرح موفق وراقي

ساكون دوما على متصفحك

لك مني الاهتمام والتقدير والاحترام

فـي الهـوى مايقبـل الحـل الوسـط ولا القليـل
مثل ماهو لاشرى يشـري .. ليامـن بـاع بـاع

صح لسانك ولسان شاعرها

ننتظر المزيد

صح لسانك ولسان الشاعر
قصيدة روعه ..!!
ألف شكر لك

يسلموووووووووووو على مروركم العطر