{كـمل جميــــلك}

{ كمل جميلك }


حالتي صعبه / بدونك ..
وكيف حالك يا بعيد ؟
أشتكي منِّك إليك ..
ومن جروحي , أشتكيلك !
والله ما قصرَّت فيني بس ..
ودِّي لو تزيد !
يعني " إذبحني " وكمِّل يا بعد قلبي / جميلك !


أدري غلطاتي كثيره .. وفوق كل هذا عنيد
وش تسوِّي هذا حظِّك رغم زلاتي [ خليلك ] ..!
أقتلك ..
لا من خطيت ويا عسى عمرك مديد !
و أعذرك ..
لو كنت قاتل لأنه يستاهل قتيلك .!


ويلي منِّك لو نسيتك والزعل طبعاً " شديد " ..
ولو أحس لحظه بـ أنِّك منشغل عنِّي ؟!
يا ويلك ..!


كل عاذل جاك بَعْدِي .. وقالـ لك إنِّي : سعيد- ما صِدَق !
وين السعادهـ !
والحزن شيَّد رحيلك !


وكل عاذل قال عنِّي شي ..
- إحساسه بليد !
ما قدر ياخذ كثيرك ..
صار يطمح في قليلك !


وكل عاذل إن عطيته وجهـ ..
- ورَّااااك المزيد !
لو يقول إنَّهـ : يبيلك خير !!
والله ما يبيلك !


جيتهم طيِّب وأدري
في زماني ما يفيد !!
وش حصيل الطيب فيهم ؟
ومن فراقي , وش حصيلك !


بترك الدنيا عشانك !دام هذا ما تريد ..
ويا عسى كلمة " عشانك " ..
تشفي يا روحي غليلك !!
الدليل إنِّي أحبك :
صرت أحسِّك بـ [ الوريد ] !
وأدري في قلبك يحبني دون ما أسمع دليلك !


في عيونك صرت ( شاعر ) واصل القمَّه / فريد !!
وصرت تسوى في عيوني كل بَني جنسك , وجيلك ..
مثل قلبك ما ألاقي ..!
ومثلي ما تلقى أكيد !
يعني ما عندك بديل ومستحيل ألقى بديلك ..!


يا غزالٍ شُوف قلبي
ما يبي غيرك يصيد
ولا بغيتك ..
أدري وينك
أسمعك , وأتبَع [ سليلك ] ..!
إجلس بـ عرش الفؤاد ولك أحاسيسي عبيد
وإعتبر حُبي نهارك , وقمرةٍ ..
تضوي في ليلك !


ياللِّي شيَّعت المفارَق إشرَب وصالي و أزيد ..
خذ دفا إحساااسي و " إدفا " ..
كان بردك
هد حيلك ..!


يا أجيلك
يا تجيني !هذا هو الحل الوحيد ..
وإنتَ قرِّر يا حبيبي ..
يا تجيني
يا أجيلك !

احدى روائع الشاعر:
احمد الصانع..

ودي ووردي..

وكل عاذل قال عنِّي شي ..
- إحساسه بليد !
ما قدر ياخذ كثيرك ..
صار يطمح في قليلك !

مبدعه في الاختيار
ألف شكر ..
صح لسانك ولسانه ..
يعطيك الف عافيه ..
تقبل تواجدي هنا ..
نادر الوجود

وصح لسانك اخوي .. تسلم على حضورك االرائع..

يسلمو ريحانه على الانتقاء المميز سلمت يداك

بترك الدنيا عشانك !دام هذا ما تريد ..
ويا عسى كلمة " عشانك " ..
تشفي يا روحي غليلك !!

الله يسعد ايامك ويحقق مرادك

صح لسانكـ ولسان قايلها
ريحانة غلا
يعطيكـ العافيهـ يالمبدعهــ
ربي يسعدكــــ

وكل عاذل إن عطيته وجهـ ..
- ورَّااااك المزيد !
لو يقول إنَّهـ : يبيلك خير !!
والله ما يبيلك !

اختيار مبدعة
لك كل الثناء على اختياره

تشرفت بمروركم..
واسعدني تواجدكم..

نورتـــوا..

قصيدة في قمة الروعة ,, ومايحتاج الشاعر احمد الصانع ..

تسلمين يالغالية طرح ولا اروع..