ياليل لا تحسب اني اسهرك فرحه

ياليل لا تحسب اني اسهرك فرحه
او تحسب ان الوله اختار منزوله

ولا تظن ابحياتي زايد الفسحه
شفها حياتي كماهي العام مشغوله

اضحك لثغر الثريا واطرح السمّحه
حتى يجيني القمر ويطيح من طوله

يعنى معاك السهر قد صابني رمحه
ما غير ادندن مع حرفي بتفعوله

كذا تعودت مجلاسي الى صبحه
اشخبط ابدفتري من عرضه ل طوله

اروح لأبعد خيالٍ واصل ن جرحه
واشوف ذكرى بأقصى القلب مقتوله

فيها حزن ما قوى قلبي على طرحه
وفيها فرح كل من حوله يغنوا له

وفيها بقايا غرام قام من ضرحه
وفيها سوالف خذت قلبي لمجموله

تجمعت كلها حزني مع مرحه
فرصه وكلن يغنى لي على موله

الليلة كالبارحه وبكره ترى شرحه
عزاه ياقلب ن اصحابه تعدووا له

صارت حياتي كما طير بلا جنحه
اسير ليله ومن حوله تواصوا له

فالقلب ماعاد به ملي بلا رمحه
يعني تعود على طعنات من حوله

من كثرهمه خلط نقصه مع ربحه
عجز يبين من اللي صدق يصفوا له

لين اصبح الهمّ مقباله وفي نزحه
تثور فيني شظايا غير مجهوله

يغيب فكري ويفرك كفي السبحه
بين الحنايا انين ن زاد مفعوله

حتى لفا صوت خفف قوة الذبحه
وحاول يعيد طرفي قبل ياجوا له

وقال يابوحي الغافي كفى سرحه
خل السوالف مع ليلك ومسئوله

يا بوح رح نام يالله عدها مزحه
وشوف لا مات قلبك كيف يرثوله

وقمت ودعت ليل ن طايل صبحه
غمضت عيني تعب قدام ماتوله

وقلت ياليل/خذها بآخر الصفحه
ان نمت والا سهرتك كلها جولة