ديوان الشاعرنايف صقر

نايف صقر

وهو من أبراز شعراء جيل الثمانينيات طوع القصيدة بجميع ما تحمل من كم هائل بالمفرادات الشعرية على حسب ما تشتهي ذائقته هو ليبحر معه جمهوره إلى جمرة التفرد الإبداعي التي صحاها من خلال مخزون كامل من التجديد والتألق بمستوى شاعر من الطراز النادر.
هو الإسم الصعب الذي أنتهج لنفسه خطاً مغايراً عن أبناء جيلة ليحلق كالصقر في فضاءات أوسع لم يستطع لرحاب نفسه أن يتسع له ويمشي بخطوات ثابتة نحو القمه
التي كانت تنتظره بفارغ الصبر

يقولون الشعر وصل القلم والصفحه الطرقى

وانا اقول الشعر قدح الخيال ونـار صوانـه

حبيبي والبحر سور التراب ودفتـر الغرقـى

لو اني ماكتبتـك لامنـي ملحـه ومرجانـه

حبيبي لاهمت حبر العروق الغيمـه الزرقـا

على رمل الورق دمي سحاب هـل هتانـه

حبيبي كل ماذعذع جفاك وناحـت الورقـى

يتل البال قلبي واهـدي السجـات جنحانـه

حبيبي وانت مرقاب الشجون وهاجس المرقى

ترى كلٍ يموت الا الوفـي بعيـون خلانـه

حبيبي والجروح اللي سببهـا ليلـة الفرقـا

ضما يدها الوصال اليا ظما المحروم حرمانه

حبيبي لو يسامحك البحر وتبيحـك الغرقـى

أنا ما اسامحك لو لامني ملحـه ومرجانـه

القلب عود يفوح والطيب مـن مكسـره

تحته من الجمر مايوقد سكات الرمـاد

والعين مغرورقـه بالدمـع ومبعثـره

بين الصور والرسايل والدجا والسهـاد

حنـا اليـا حسبنـا مازرعنـا الـذره

قل للعصافيـر تتركنـا وقـل للجـراد

البارحه جف في غصن المـلام ثمـره

عقب البياض انكسر ضلعه وسال السواد

والناس خلان قبل الريـش والمحبـره

شعوب وفخوذ واحباب وصباح وهجـاد

هذا الجمل لو سنامه سامك فـظهـره

ماله عزوم يقوم بهـا ولا لـه شـداد

ياذيب عيد علـى قلبـه وفـج نحـره

دامه رغى عقب هدراته وشـم الحمـاد

تمخض الوكر والقرناس عـن حمـره

في راس قشعه لعب فيها الظما والنفـاد

يوم النحاس انصدع لونه وذاب أصفـره

غنيت للسنبله كـل اغنيـات الحصـاد

مايدفي الا الوبـر والوصـل والمقـدره

لازاد شوك الشتا في راحتـك والفـؤاد

ولاصار ما لك اليا منك ركضت اغبـره

شوري عليك اترك البيدا .. وكب الطراد

صاحبـي عذبتـنـي صاحـبـي وريتـنـي

في لقا ساعه بعض حلـم وسنيـنٍ قادمـه

ياحبيبـي كـان ماسميتنـي .. سميتـنـي

ليت روحي منك ياعـذب المـوادع سالمـه

جيتنـي لـولا الليالـي جابتـك ماجيتـنـي

والليالي جابتك مثل القدر كل الظروف تسالمه

آه ماخليتنـي ثــم رحــت ماخليتـنـي

في دروب طوال مهزمـه معـاك وهازمـه

كن في عينك مـن العشـره اليـا باريتنـي

شي اقل من الحيا بعيون ضيـف وعازمـه

ليتنـي لاجابـو اسمـك ياحبيبـي ليتـنـي

تشرب الذكري بعض عيني وعينـي حازمـه

انـت لودليتـنـي فـرقـاك .. مادليتـنـي

دام حبـك فـي جبيـن الليالـي واسـمـه

لك بكي جرحي قصيدي وانـا مـا أبكيتنـي

آه ياحـر الوجـع فـي النفـوس الجازمـه

الموت حظ القلـم والمجـد للدفتـر

حبر القلم غلطتي وايامـي اوراقـي

الخوف يجتاحني وجه الطريق أسمر

راح اكثر العمر ياخوفي على الباقـي

ياجرح رافقتنـي للنـاس لاتظهـر

وان عشت في نظرتي مامت باعماقي

ياصوت لاتلتحف صمتي ولاتصبـر

قل ماتبي واترك الهقوه على الهاقي

والخطوه اللي عن آخر سكتي تقصر

ماهيب من طبع رجلينـي ولاساقـي

مانيب من عاش لايربح ولا يخسـر

ولاهو ضرري تكون أفعالي أخلاقـي

ثراي ماينشد الغيمـه متـى تمطـر

مادامها في سماي تحـن لاغراقـي

رح وين ماتشتهي رح قـد ماتقـدر

أنا اول الناس في قلبك وانا الباقـي

يكفيني انك تعذبنـي وانـا اتفجـر

قصايـدٍ تنتظرهـا كـل عشـاقـي

وانا قصيدي يجي مختارني مهجـر

وأنبت عشانه نخل وسنيني الساقـي

تمرك كن عاتقها غريمك وتخضع لك عيـن

واعز رموشها لاعـاودت ترعـاك وتذلـه

تبيك تحس فيها لارنت لك ياوعـل يبريـن

ولكنك خلي والربع الخالي وانت خـال لـه

جفول لاهدت يسلى بها الديـان راع الديـن

واذا مالت يميل لها البعيـد ويعتـدل ظلـه

تخاف من ختول وقبسة البـارود والسكيـن

وتسلم من عطيب الرمي والرماي فاطن لـه

تباري راعي البندق وتحت ضلوعها قلبيـن

تحت صدرين ضلع من فرار وضلع من ذله

يلاعبها الحبل وتلاعبه بالحبـل والحبليـن

محبتها((مراجـيـح الطفل))وفوادهـا:دلـه

يراودها السدر عن فيته ويشمها النسريـن

لو ان العـرق ماينبـت رياحينـه ولا فلـه

وكن الطلح في قرونك تخشب والشجر قرنين

وليتك ياوعل قرن الهزيـل تعـف وتزلـه

صليت شفعي ولا سجيت عن وتـري

ومن الوله فاضت أنفاسي على ثيابـي

قلت اكتب الحب واقطع حيرتي وأسري

لين أصل الصبح وأشرف على غيابي

حبيبتي ما بعدك أحباب فـي صـدري

واللى قبل لا أعرفك خليهـم أحبابـي

كان المحبه خطـاي اتقبلـي عـذري

الحـب سكـه لعينـك دلـت أركابـي

الحب قبلك دجـى وسهـاد يافجـري

لو قبلك أقمار فـي ظلمـاي وكتابـي

أفداك وأفدى ليالي رمشـك الخـدري

اللي إذا همـت فـي نجـلاك حيابـي

وأحن لك ماخفق ريش وسجع قمـري

وأشتاق لك ماحزنت وماضحك نابـي

حبيبتي مالك جـروح وأقـول أبـري

ولا لك ادموع في شكـواي وأهدابـي

ياما دقايق وصالـك طولـت عمـري

وياما الشتا في يديني من يدك ذابـي

عقب الظما كنك الما في عطش تغري

والفيـه البـارده لخطـاي وأتعابـي

عنك أسألوني رفاقي وأحرثوا حبـري

وأنا اللي أخفيك بين رضاي واعتابي

مابي عن الحب حساد الهوى تـدري

لو كان هم من هلي وإلا من أصحابي

سألت عنك الرياض ورددت حضـري

ولديت يم الفيـاض وقالـت اعرابـي

قلت أكتبك ونخلي مايل علـى تمـري

وأقريه موزون من صنعي وهندامـي

يابير طيك طـي واعماقـك اعمـاق

.................ويعيش بك داب وحمامه وعصفـور

فاضت عيونك ماك وابتلـت احـداق

................وتنهـدت منـك محالـه النـاعـور

يوم انبطت روحك سجدتـي لخـلاق

...............وعقب ارتفع جمك ضحكتي مع النور

ويوم انهمر دمعك خضعتي على ساق

.............ويوم انكسر حجلك زعلتي على الحور

ياما بـك الرمـان زهـر فـالاوراق

.............لين اكتنز في حلـق نحلـه ودبـور

وياكم وردك وصدرك ضيـن ونيـاق

...........وياكم بهج جمـك بعاريـن وصـدور

وياما رطب نخلك تعسـل فالاريـاق

.............وياما طحين ارضك تقسم على الدور

وياما وهبتي جـل وافنيتـي ادقـاق

............وياما هماجك حل في الخصب والبور

شفتك وانا قلبي على صلدك ارقـاق

............وحسيت في حنجرتي عظام وكسـور

كلّك تعالي غلا .. والا ارجعي كلّـك

بعض الغلا منك ما يستاهـل الجيّـه

طالت وانا في رجا ليتك .. وياعلـك

أوراق بالذاكره .. واوراق منسيّـه

ما بل ثوبك مطر شوقـي ولا بلّـك

لوعلّتك من سحاب الروح وسميّـه

ليه امشي الدرب دامه ما يوصّل لك

تخاف رمضا الضياع اقـدام رجليّـه

يا بنت تو الهوى ما صرت انا خلّك

للحين .. ما زالت الصوره رماديّـه

ومازال بعض الغموض الشره يحتلّك

وشلون انا اعشقك واحبك على النيّه

اشوفك هناك قدّامـي .. ولا ادلّـك

صعب الكتابه ليا صار الورق ميّـه

إن كان شمسك تساومني على ضلّك

ما عاد ابي منك لا شمس .. ولا فيّه

اما تعالـي لقلـبٍ فـز لـك كلّـك

والا اتركيني ما ابي لك بالهوى جيّه

سجد قلبي على رمل الضلوع وهـزه التنهيـد

وانا في جوفي خيام الندم والخوف منصوبـه

يارب افهق هلاكي والمنايـا والـدروب بعيـد

مـادام المودمانـي للتـراب تقـوده دروبـه

ياغياث الضوامي والثمـام وجرهـدي البيـد

اعذني من جهنم والحشر والمـوت وكروبـه

انا مانيـب لامشـرك ولافاسـق ولاعربيـد

انا اللي لاعصى واخطا تجهم واقلقـه ثوبـه

وانا اللي يرتجف مثل ارتجاف الخايف الرعديد

ليا شاف القبور الضيقـات وحـس بذنوبـه

انا عبدك ولد عبدك وجدانـي هـل التوحيـد

خطايـاي اخجلتنـي يالله الغفـران والتوبـه

انا الانسان حمال النقايـض والكمـد والكيـد

غريق الطين واللذات مـن راسـه لعرقوبـه

انا عبدك ياربي وانت تفعل ما تشـاء وتريـد

سالتك يالله العفـو العظيـم وهيـن دروبـه