ام سعود بضحك : أنا اقعد شوي مب مثلكم اذا قعدت الوحدة لو تنفجر قنبلة حولها ماحست
عبير : والله انا بكل مره اقعد أكون أبي شغلة وحده .. وهالشغلة عاد تسحب الثانية والثالثة والرابعة ومانتبه للوقت الا وانا قاعده لي كم ساعه
ام سعود : اي هذا انتم مراجيج
عبير :ههههههههههههههههههه حلوة مراجيج طيب قوليلي يمه محنا رايحين مكان اليوم ؟
ام سعود : لا وين نروح ؟؟
عبير : مادري بس انا كلمتني منى اليوم تقول مادوامت و ودها تطلع معاي فبشوف ان كان ماعندنا شي طلعت معها
ام سعود : لا والله ماعندنا ولا شي
عبير : زين أجل بكلمها

ودقت عبير على جوال منى واتفقوا على الوقت ..
وبعد دقايق وصل خالد ودخل وهو باين تعبان
خالد : السلام عليكم
عبير+ ام سعود : عليكم السلام
أم سعود : ياعمري ياخالد شكلك تعبان
خالد وهو يقعد : اي والله أحس راسي بينفجر
ام سعود : قومي ياعبير هاتي البندول من فوق الدولاب
عبير : ان شاء الله .. وقامت جابت لأخوها الدوا وكاس موية وعطته ..
أم سعود : خلني أعطيك شي تاكله بعدين روح نام
خالد : لا مابي والله مو مشتهي شي
ام سعود : مب لازم تكثر كِلك شوي بس
خالد : وش آكل اصلا تو الوقت بدري خلص الغدا ؟؟؟
ام سعود : لا ماخلص بس خواتك جايبين من برا أكل بحطه لك

عبير بصدمة : يمه حنا ماجبناه عشان تأكلينه خالد !!!!!!!!!!!!
أم سعود : حرام عليك أخوك تعبان مب قادر يفتح عيونه وماتبينه ياكل !
خالد مثّل انه طايح وتعبان !!
عبير : شوفي بالله قاعد يستهبل لا مالي دخل ماتعطينه
أم سعود : باعطيه شوي منه مب كله
عبير بزعل : يماه
ام سعود : وصمّه
خالد يضحك عليها : ك
عبير بحمق : وتضحك انت وجهك مسوي تعبان بس عشان ياكل غدانا
خالد : الله اكبر عاد اني ميت على غداكم بس عناد فيك باكله كله
وقام للمطبخ !!
عبير من وراه : ياويلك ياخالد والله ياويلك
خالد : ههههههاي وش بتسوين امانة ؟؟؟؟؟
عبير : اسوي الي اسويه المهم ياويلك تاكله كله
خالد راح لأمه وهي تغرف ومسك الملعقة منها وهو يقول : عنك يام سعود عنك
ام سعود : روح انت ارتاح وخلني اغرف
خالد : لالالالا انتي روحي ارتاحي
وأخذ الملعقة منها وغرف كل الي بالصحن وعبير جت جمبه وهي تقول : عاد بق شوي بتعاندني انا اوكي لكن فتون وش ذنبها بالله ؟؟؟؟؟
خالد : تاكل من الغدا اذا خلص
عبير : وجع حرام عليك
خالد مطنشها ودار عنها وقعد على الطاولة بالمطبخ وهو يقول : الاه ريحته تهبل
عبير : يمه شوفيه !!!!
ام سعود : خلاص عاد لا تنشبين بحلقه ان شاء الله بتطلعون اليلة واطلبوا الي تبون
عبير عصبت وطلعت وهي تقول لخالد : جعلك طحله يارب
خالد :ههههههههههههههههههههههههههههه هههه

وطلعت من المطبخ معصبة وشوي الا رجعت وقالت : تراني باطلع اليلة مع منى وانت الي بتودينا من الحين ضبط امورك ونام زين
وطلعت وهو من وراها يقول : دام السالفة فيها بيت خالتي ابشري من عيوني الثنتين
أم سعود : ماعليك منها اذا تعبان خلي السواق يوديهم
خالد : لا عادي انا بعد ابي اغراض من فيصل باخذها مره وحده
أم سعود : على راحتك اجل

صعدت عبير الدرج وهي تفكر بكلامه .. كانت من زمان تحس انه يحب مرام ويهتم للروحة لبيت خالته .. لكن الحين تحسه اتغير وبالعكس كم مره بكت منه مرام ومن نرفزته عليها ولا نظراته الجامدة لها وتصرفاته الغريبة .. هذا وش يسمونه طيب يحبها ولا مايحبها ؟؟؟

طردت من راسها الافكار وراحت غرفتها واتمدت على سريرها بتنام .. وانرسمت صورة تركي قدامها وهذا معناه ان ماعاد فيه نوم !! حست قلبها بينفجر من كثر حبها وشوقها لهالانسان .. وماتدري شلون توصله ؟؟
بعد فترة من التقلب بدون نوم .. قامت وفتحت شنطة الجامعة وطلعت كتبها وأوراقها تضبطهم .. وكتبت بعض ملخصاتها ومر الوقت وهي حايسة بين دروسها .. لين انتبهت للساعه 5 وشوي وبتصحي فتون عشان تجهز ويطلعون ..

رجعت تتمد على السرير وهي تقلب بالجوال لين وقعت عيونها على رقم تركي وخفق قلبها بقوة !! آه ياتركي والله مشتاقة لك حيل وانت وينك عني لا تحس فيني ولا تسأل !! وعجزت تقاوم رغبتها بسماع صوته واحتارت شلون تسمع صوته وتكلمه وبأي حجة !! وفكرت تدق على منال وتسأل عنه يمكن يكون جمبها وتطلع أي فرصة تكلمه .. ودقت على جوال منال بحماس وكانت المفاجأة ان جوال منال مفصول !!!

ابتسمت عبير بفرحة لهالمفاجأة لأن طرا على بالها الحين تدق على جوال تركي وتطلب منال !! بس هو مايعرف رقمها ويمكن مايرد !! وماسمحت للأفكار تلعب فيها أكثر وبكل فرح قعدت بسرعه وراحت لرقمه وسحبت نفس عميق ودقت !! رفعت الجوال لاذنها وايدها بدت تعرق من توترها ورن الجوال ولوهلة كانت بترجع تسكره مره ثانية لكن شوقها لصوته كان أقوى منها !! ومع كل رنة يرنها تزيد دقات قلبها أكثر واستمر الرنين بلا إجابة لين فصل !!!
سكرت عبير الجوال بضيق وحست ان مافي فرصة تسمع صوته وهالشي بيولع قلبها أكثر وأكثر !! رمت الجوال جمبها وسندت راسها على الجدار وسكرت عيونها .. وبعد ثواني بسيطة دق جوالها !!
انتفضت عبير من سمعت الرنين وانتبهت لفتون وهي تفتح عيونها بانزعاج ..
وأخذت الجوال بسرعه ويوم طالعت لقت
المتصل : تركي !!

قلبها صار يضرب طبول وهي تطالع فتون بخوف
فتون بكسل : شفيك منهو ؟؟
عبير : تركي يافتون تركي !!!!
فتون باستغراب : تركي ؟؟؟ وش يبي داق
عبير : انا داقة عليه
فتون : انتي ؟؟؟؟ طيب ردي عليه الحين لا يفصل بعدين حكيني
عبير : ياويلي ياويلي .. احم احم

وردت : الو
تركي بصوته الهادي : مرحبا
عبير : أهلين
تركي : عفوا اختي بس قبل شوي أحد اتصل على جوالي من هالرقم
عبير : ام .. هلا تركي
تركي : ................. أهلين مين معاي ؟
عبير : أنا عبير
وبلعت ريقها بصعوبة
تركي بعد صمت ثواني خلى قلب عبير يطيح :
هلا وغلا

عبير اتيبست وفتحت عيونها بوسعها لانها ماكانت متوقعة منه كل هالترحيب الحار وحمر وجهها حتى فتون سمعته وغطت فمها بالمخده عشان لايطلع صوتها وهي تضحك
وتركي كمل : شلونك عبير ؟؟
عبير بحرج : بخير الحمدلله انت شلونك تركي ؟؟
تركي : بخير دامك بخير
عبير وقفت وصارت تمشي ومو عارفة شلون تتكلم وبالقوة قالت : سامحني أزعجتك بس دقيت على جوال منال ولقيته مفصول وقلت اسألك عنها
تركي : اها .. وانا الي قايل ياحليل بنت عمي داقة تسلم على ولد عمها وتسأل عنه طلع عشان منال أجل هاه ؟؟
عبير اتمنت هالحظة تقول لا عشانك انت وبس مو عشانها .. ولهت عليك انت وابي اسمع صوتك .. وقالت : لا وعشانك بعد يعني كنت أقدر ادق على بيتكم واسأل عنها بس قلت مره وحده أكلمك أسلم عليك وعليها
تركي : اي كذا حلو ..
عبير ضحكت بحيا وماردت
تركي : وأخبارك وأخبار فتون والأهل
عبير : كلهم تمام الحمدلله ..
تركي : اي عبير ماسألتك
عبير : آمر !
تركي : شلونك بعد الطيحة ذاك اليوم ؟؟؟؟

عبير غطت وجهها بإيدها وهي تتذكر الموقف وحست انها بتموت من الفشيلة وهو شلون يسألها ويدري ان هالشي محرج بالنسبة لها ولاردت عليه .. وهو حس فيها وقال : عادي عبير كلنا نطيح مافيها شي بس انتي عسى ماتعورتي ؟؟؟
عبير بهمس : لا الحمدلله عدت سليمة
تركي : الحمدلله وهذي نهى لعنت ابو سكافها
عبير : هههههه لا حرام عليك
تركي : قلعتها ذي ماعندها حدود لا مع كبير ولا صغير
عبير : ياحبيلها ..
تركي : ياحبك لمين ؟؟؟
عبير انحرجت من هالسؤال .. وقالت بلعثمة : ل نهى !
تركي : بس نهى ؟؟؟
عبير مات من الحيا : .......................
تركي : ههههههههه شفيك سكتي ؟؟؟؟؟
عبير تضحك بحيا : مادري شقول
تركي : عادي عبير تحبيننا واحنا نحبكم أهل احنا مو ؟؟
اتنهدت عبير من خاطر وهي حست ان افكاره حيل بعيدة عن افكارها وقالت : اي عادي طبعا عادي
تركي : ههههه ياحبيلك
ابتسمت عبير وكلمته ماأثرت فيها وهو فهمها ان هالشي عادي كونهم أهل بس !
وتركي قال : أجل تبين منال ؟؟؟
عبير : بعد إذنك ..
تركي : انتي تامرين أمر
عبير : مايامر عليك عدو
تركي وهو يمشي بالبيت ويقول : خليني اشوفها ..
وصار ينادي : منال .. منال
وعبير مركزة كل حواسها معاه وبصوته وأنفاسه وكل شي فيه
ورجع قالها : لحظة يمكنها تحت

عبير : معليه تركي تعبتك معاي
تركي وهو ينزل الدرج : افا عليك تعبك راحة عبير
عبير بنعومتها : تسلم
نزل تركي وصار يدور منال تحت وهو يغني بصوت رخيم :
من سنين .. إفترقنا من سنين
وابتعد كل في دربه
بس شوقه والحنين
شالهم في قلب قلبه
كنت أظنه ينسى حبي
أو يخونه يوم صبره
الله الله كيف ينسى
الي قلبه حب مرة

ركزت عبير كل حواسها بكلمات الأغنية وحست انه كنه يقصدها بهالكلمات ودمعت عيونها وفتون طالعتها مندهشة !!!!

وشوي الا قال تركي : عبير !
مسحت عبير دموعها بسرعه وقالت : هلا تركي
تركي : مو لاقي أحد الظاهر كلهم طالعين حتى مرة أبوي مو لاقيها
عبير : اها مو مشكلة خلاص سلملي عليها
تركي : يوصل ان شاء الله
عبير : اوكي تركي باي
تركي : عبير
عبير : هلا
تركي : خلينا نسمع صوتك دايم
عبير بالقوة كتمت تنهيدتنها وقالت : ان شاء الله تركي
لاحظ تركي ان صوت عبير فيه شي وقال : شفيه صوتك اتغير ؟؟؟
عبير : لا لا مافيني شي والله
تركي : أكيد ؟؟؟
عبير : اي والله مافيني شي .. يالله تركي اشوفك على خير
تركي : على خير .. مع السلامة
عبير : مع السلامة

سكرت عبير وعلى طول انفلت دموعها وصارت تبكي من كل قلبها
قامت فتون مخترعة وهي تقول : وش صار فيك انتي انواع المشاعر بهالمكالمة شوي ضحك شوي حيا والحين دموع شفيك ؟؟؟
عبير وهي تبكي : مايحس يافتون مايحس !!
فتون : وعسى عمره ماحس تقعدين تبكين عشانه !!! بالطقاق الي يطقه هو على اخته
عبير : لانك ماتحسين بالي أحسه تقولين هالكلام !!
فتون : واضحة ياعبير تحبينه وهو مايحبك خلاص ليه تتعبين عمرك معاه اتركيه ولاتفكرين فيه !!
عبير وهي تقوم : وعلى بالك هالشي سهل ؟؟ كامبيوتر احنا اضغطي شي يشتغل واضغطي شي يمسح ؟؟؟؟
فتون :ههههههههههههههههههههههههههههه ه ياليتنا كذا والله وناسة
عبير : وناسة بعينك انتي الثانية
فتون : يالله عاد لا تعصبين بالله وقومي نزل ناكل تراني جوعانة ونفسي بالي شريناه
التفت عبير لها وضحكت وهي تقول : اي صح انتي مو دارية بالي صار !!
فتون : وشو ؟؟؟؟؟؟
عبير : خالد الحمار أكل غدانا كلله ؟
فتون نطت : ايش؟؟؟؟؟؟؟؟؟؟؟
عبير : هههههههههه شوي شوي .. والله اتهاوشنا وانتي نايمة وعاندني وأخذ الصحن كله غرفه وأكله !!!
فتون وهي تركض للبا : وجع ان شاء الله دايم يسويها فينا بس انا اوريه
عبير من وراها :هههههههههههههههههه تعالي فتون تعالي
فتون بمكانها من برا : وش تبين بروح أوريه هالحمار
عبير : انا قلتله عقابا لك انت الي بتطلعنا اليوم وطبعا بندفعه قيمة كل شي نبيه
فتون : أحسن
ونزلت تحت تسكت جوعها بأي شي سريع لين يطلعون


بعد المغرب كانوا بالسيارة مع خالد ماشين لبيت خالتهم
وخالد يغني مع المسجل :

لي صاحبٍ خذني بزينه عن كل مزيونٍ ورعبوب
روحي غدت لامره رهينه والقلب من نظراته يذوب

غضٍ يعيش اول سنينه .. ومن الدلع له طبع واسلوب
خطرٍ علي ان شفت عينه .. من نور حسنه امزع الثوب

الشمس في طلعة جبينه واليل وسط العين مسكوب
والخد يلفح ياسمينه مثل الشفق في حزة غروب

انتهت الاغنيه وفتون الي قاعدة وراه قالت : خلّود باسألك سؤال
قصر خالد المسجل وقال : هو انتي لسه بتسألي .. انتي بالنسبالي ايه .. !
عبير وفتون : هههههههههههههههههههههههههههههه ههههههههه
فتون : مو سائلتك انا وش بالنسبة لك لاني ادري اني ماخذة قلبك كله
خالد : ههههههه ليه شايفتني كاره حياتي عشان أعطيك قلبي ؟؟؟
فتون : الا تحبني غصب عليك
خالد : الحمدلله والشكر (( ويكلم عبير : هذي مادري شلون بتحب بيوم من الايام الظاهر بتبكس حبيبها بكوس عشان غصب يحبها
فتون : لا ياعمري انا حبيبي يجي يبوس ايدي عشان احن عليه واحبه وانا الي اصد وارفض ويترجاني وانا الي اعي ومتى ماحكم مزاجي حبيته !!
خالد : أحلى يالثقيلة ومنهو هذا تعيس الحظ ؟؟؟
فتون : عاشق الغبرا هازم البطحا
عبير :ههههههههههههههههههههههه وع عليك يافتون وش هالحبيب
فتون : اندري عنكم انتوا المهم لا تظيعون السالفة وقولي ياخالد
خالد : شتبين ؟؟؟؟
فتون : باسألك سؤال وتجاوبني بكل صراحة .. انت تحب مرام ؟؟؟؟
خالد رفع حاجبه مستغرب من سؤالها وقال : وش يخليك تسألين هالسؤال ؟؟؟
فتون : اشياء ملاحظتها وباتأكد منها
خالد : وشالي ملاحظته يالفاهمة ؟؟
فتون : الحين اسألك تروح ترد علي بسؤال ثاني !!! جاوبني عشان اقولك
خالد : لاء !
فتون : ماتحبها ؟؟؟؟؟؟؟؟؟؟؟؟
خالد : اقول لاء مو مجاوبك مو ماحبها
فتون : يعني تحبها هاهاهاهاها
خالد : مب صاحية انتي وعلى اي اساس حكمتي
فتون : قلتلك أشياء ملاحظتها
خالد : وشي طيب !!
فتون : دايم اشوف مرام ترتبك لما تكون معاك وتسكت وماتكلم كثير وهذا يعني ان في شي بينكم
خالد : هذا يعني ان هي فيها شي مو انا يالذكية
فتون : يعني هي تحبك أجل
وقف خالد السيارة قدام بيت خالته وقال : فتون اهجدي ولاعاد تطرين هالكلام على لسانك مره ثانية
فتون : ليش طيب هذا يعني انك تحبها !!!!!!
عبير : هههههههههههههههه هذا يعني وهذا يعني .. والله صاروا اخواني محللين قلوب
خالد : والله ماغير هالخبلة اختك
فتون : طيب تشوف اذا ماكشفتكم
خالد : اقول خلي عنك هالخرابيط ودقوا على البنات ينزلون (( وفتح الباب يبي ينزل
عبير : وانت وين رايح ؟؟؟؟
خالد : بروح آخذ اغراض من فيصل وأرجع
ودق على فيصل وقاله ينزله تحت .. وفيصل فتحله الباب الخارجي

دخل خالد الحوش لقى مشعل يلعب كوره هو وهاني جارهم
مشعل : هلا والله خالد
خالد : هلابك كمل كمل لعب
ابتسم مشعل وكمل لعب وخالد واقف بالحوش ينتظر فيصل ويقلب بجواله الا شوي صقعت الكورة برجله !
دخل خالد الجوال بجيبه وهو يقول : ماشاء الله كورتك يامشعل مثل كورة الملاعب !
مشعل : اي والله قوية لو تضرب فيها راس الكافر يسلم
خالد : هههههههههه يلا خذ .. (( وشات الكورة لهم بقوة ..
اتحمسوا العيال وشاتوها عليه ورجع شاتها عليهم بقوة أكثر وشوي ودخل معهم بالعب وصاروا يتشاوتون الكور ..
ومشعل وهاني استخفوا من الوناسة لان خالد لعب معهم
خالد عجبته الكورة وقوتها وحب يفرحهم ونوى يشوت عليهم الكورة بكل قوته ..
وركض بالكورة وهي قدامه وصار باب البيت وراه

هالوقت نزلت مرام قبل منى تمشي بالحوش رايحة السيارة ولا انتبهت لوجود خالد
وخالد كان داير ظهره وماشافها .. ويوم دار بسرعه شات الكورة بكل قوة ..
وطارت الكورة وصقعت بكل قوتها على وجه مرام من الجمب !!!!

وانصعق خالد !!!!!!

::

يؤيؤيؤيؤيؤ !! شالي سواه خالد بمرام وشالي بيصير فيها وكيف بيكون موقفه !!
سعود ابتدا مرحلة جديدة من حياته وش سالفة هالمظيفة الي لفت نظره ؟؟
صالح وأخيرا حصل على الوسيلة الي بيوصل من خلالها لحنان .. طيب وش الأسرار الي بالمنتدى والي راح تفاجئه !!
عبير الي بكت من تركي .. ! ياترى دموعها واحساسها بمحله ؟؟

::