والشباب ايولون..
(( محمد – حمد – أحمد سعيد – عبيد – سيف – منصوري – مطر )) ايبسون عند يدتهم ووديمه
اما (( بو محمد – علي – منصور بن سالم - حمدان – فلاح – سلطان – مهــيـّــر – خالهم عمير – عيال يرانهم – ربعهم )) ايولون رباعه ومرتبشين وكل واحد يتخقق
راشد سار عدال حمد لانه كان اييبس عند اخته.. منصور شافه وجان يسير صوب اخته سلامي
منصور : سلامي ... منوه هذا البدوي اللي اهدا وديمه.. اتعرفينه
سلامي ضحكت وبخبث : اعرفه بس ما بقولك
منصور : قولي عن لا افضحج الحينه واكفخج
سلامي : واحد
منصور : انزين ادري انه واحد هب وحده
سلامي : واحد يعشق ودوم
منصور : منووه >> بصوت قوي شويه
سلامي : يهمك اتعرف
منصور : لاء.. بس قولي
سلامي : وان ما قلت
منصوري : عادي لا اتقولين... بس لا تين باجر واتقولين منصور اريد واريد... خيبه اسويلج اللي تبينه .. ) وسار (....
سلامي : منصور تعال بخبرك
منصور طالعها : خلاص ما ابا اعرف تدرين ما يهمنيه
سلامي : ولد خالي راشد
منصور : في ذمتج
سلامي : والله.. سمعت كلمات الاغنية كله بالعاني مختارنها
منصور : هيه... ) وسار عنها (
منصور دخل مره ثانيه وياهم ايول... ودخل واحد شيبه بعد ايول واحد يعرفونه بس ما يقرب لهم ابدا وتموا يضحكون عليه والشباب عافدين عنده ايولون وايبسون...يعني استوت الحشره والضحك ... كااان فنااااان بمعنى الكلمه شوي وضهروا الرياييل كلهم والشباب برى البيت يعني ساروا بقعتهم.. اتعرفون عسب يتعشون وعقب ما خلصوا عشا
عمتهم مريم اذا تذكرونها اخت بو محمد بغت يولعون شلق وسارت رمست قوم حمد وعبادي
عبادي : عموه سيري رمسي الشرطي اخاف يقبضونا ما انروم انولع اتعرفين ممنوع خاصه انه دوريات هنيه عند الباب
مريم : ما عليه انا برمسه...
حمد : انزين عيل يالله
مريم : لا قبل ودونيه عسب اييب الشلق
عبادي : يالله
وركبوا السياره وساروا صوب بيتها ما شي قريب وااااااايد في نفس الحاره
ويوم ردوا..
عبادي : هذوه الشرطي رمسيه...
) وفجت الدريشه (
مريم : السلام عليك خوي
الشرطي : عليكم السلام
مريم : لو سمحت ممكن انولع شلق
الشرطي ابتسم : عاد يا ختي ممنوع والله
مريم : جيه... عاد هالمره اسمحلنا... و نحن يينا ورمسناكم.. وخلونا حفله وحشره...
الشرطي : والله... ( وتم ساكت وخلاف وافق اشر لهم يالله سيروا )
مريم : مشكور اخويه ما اتقصر.. عاد اسمحلنا
الشرطي : مسموحين اول واخر مره نسمح
مريم : ان شاء الله مشكور
وساروا وولعوا االشلق ( مناورات وغيره )
الحرمات كانن يتعشن ومن سمعن تنقيع فوقهن وحشره اتروعن اللي غصت بالعشيه واللي اتغيضت... وفي من الحريم تمن هدادات ليش يولعون شلق... حد منهن من سمع التنقيع ضهر وسار.. طبعا الا كمن حرمه مب الكل
وخلاف الشباب والرياييل يعني من اهل البيت عقب ما ساروا الرياييل عنهم دخلوا داخل البيت من الباب الثاني (( طبعا باب الحوش )) لانه ما ايرومون يخطفون جدام الحريم وهن يتعشن
وطبعا حد منهم تم خاري
واللي دخلوا داخل البيت
بو محمد – سعيد بن سالم – حمدان بن عمير – حمد بن سلطان – عبيد بن راشد – سيف بن راشد – على بن راشد – راشد بن عمير يالسين داخل الميلس اللي داخل
اما أحمد بن سالم خاري عند هزاع اربيعه – خليفه بن عمير بعد خاري ومحمد
وديمه ما كانت تدري انهم ساروا داخل البيت وهي كانت لابسه العباه والعباه خفيفه هاي اللي يحطونها على الراس بس طبعا هي ما حطتها على راسها على جتوفها وما سكتنها بايدينها ولابسه شيله تور كلها شك وتطريز وفوقها شيله ثانيه سودا لانه الشيله التور يبين شعرها وهي اصلا سارت بتعق الشيله والعباه داخل البيت وبترد تضهر لانه خلاص الشباب ضهروا وهي اصلا لبستهن لانه الشباب دخلوا ايولون وبعد لانه امها طرشتها داخل عسب شي
وتوها داخله... راشد كان يالس فالصاله يرمس فالتليفون يعني ضهر من الميلس وشافها هي ما كانت متغيشه لانها ما شافته هو بعد ما شافها زين الا شويه من علباها (( علباها = ظهرها )) لانها كانت عند الباب اللي داخل بين مدخل البيت والصاله والله سلمها انها بعدها ما عقت العباه وبتقولون كيف عرفها من صوتها طبعا لانها كانت اترمس البشكاره على طول راشد سكر عن اربيعه ويوم يت بتدخل لمحت كندورة ريال بيضا يعني شافت صوب الريول مب صوب الراس لانه كان يالس فبسرعه بسرعه اتغشت قبل لا يشوفها.. يعني الحمدلله ما شافها وكانت متستره
وديمه (( اوووهووو منوه هذا بعد يالس هنيه شو جيه اسميهم الا ضغط الواحد ما ياخذ راحته ابد افففففففف ))
ومشت تبا اتسير صوب الميلس ما تدري انه الرياييل هناك..
راشد : سلام عليج وديمه
وديمه : عليكم السلام ) طعبا وهي خاطفه تمشي حتى ما وقفت ولا لفت ويهها (
راشد : واشحالج...
وديمه : ابخير الحمدلله ومن صوبك
راشد : دامني شفتج انا ابخير وتراني ما اشجي غير من فراق الغالي
وديمه : انزين
راشد : مبروووك ... تستاهلين
وديمه : الله يبارك فيك
سلامي داخل شافت راشد جان تتغشى
سلامي : ودوم
وديمه : لبيييه
سلامي : لبيتي حايه.. اوه راشد اشحالك
راشد : يسرج الحال ولا يضرج يا غير اشكي فراق الغالي
سلامي : الغالي هاه.. انزين
راشد : لا ما شاء الله وديمه اليوم ضاهره حلوووه >>> طنش سلامي
سلامي : جيه بس اليوم
راشد : لاااا طبعا كل يوم بس تدرين اليوم اسبشل
ودوم طنشت وسارت صوب الميلس وكانت تبا تحدر ومنصور بن سالم يبا يضهر والله سلمها ما اداعموا منصور عرف انها ودوم لكن ما رمسها ولا قال شي.. وعفكره كان يالس عدال الباب لانه كان يرمس فالتليفون والرياييل كانوا يرمسون فما كان يقدر غير انه يضهر او يسير عدال الباب وطبعا سمع الحوار اللي دار بين راشد وودوم وسلامي ... وطبعا يوم ودوم شافت انه هناك رياييل ظهرت واصلا بعدها ما دخلت وسارت المليس الثاني مال الحريم
راشد طبعا اتغيض من الخاااطر (( هاي ليش اطنشني هاه شو بلاها عليه يا ربييييه... لا وزين ما دعمت منصور هاللي قاصر بعد.... لتيها دعمتني انا ^_* جان بفرح............ افففففففف .... ))
منصور : ها بوسنيده واشعنه متبرز هنيه عن الرياييل
راشد : ما شي كنت ارمس اربيعي
منصور : هيه يا حيك.... انزين قم خلنا انسير عندهم
راشد : ما عليه شوي وبييك.. بس اتريا اتصال مهم
منصور : هيه سبحان الله ) وسار عنه (
منصور (( اونه اتصال مهم بصدقك اتحرانيه ..))
في ميلس الحرمات
ودوم : شو جييييييييه افففففففف
سلامي : خيييبه يا ودوم كنتي بتدعمينه
ودوم : المشكله السبال ما قال انه رياييل داخل وهو شافني اني سايره بدخل
سلامي : ما عليه حصل خير.. يالله خلصي انتي انقفضي خلينا نضهر خاري
شوي ولانه ميروووه يايه ويايبه عواش وشميم ولطوف
شميم : هيه دبوووووه يالسه هنيه هاه
ودوم : بسم الله ... انزين العرب اتسلم..
شميم : السلام عليكم ... انتي وينج وينج هاه خبريني وين وين اختفيتي ونحن اندورج نحن ياين حق منوه هاه
سلامي : بسم الله... انزين عواش لطوف اشعنه ما اتقولن بعد شي
عواش : جيه شمامي خلتنا انقول شي سدت الرمسه عنا
شميم : جب يالله جب
ودوم : الله حركااااات اسميكن...
شميم : وانتي شو ميلسنج هنيه
عواش : لو تدري امايه اني اتحركت من الطاوله بتغيض اصلا يالله يالله خلتني ايي..
شميم : واشعنه اتحركتي من الطاوله جان يبتي الطاوله وياج عسب يوم بتحلفين بتقولين والله ما اتحركت الا ويا الطاوله
الكل : ههههههههههههههههههههههههههههههههههههه
ودوم : جيه امها هنيه ما بتشوفها يعني ...
وتمن يسولفن وكان باب الميلس مب مسكر الا ملايم يعني مفتوح شويه.. واذا واحد واقف مجابل الباب وفتحته يمكن يقدر يطالع اللي داخل اذا كان اللي داخل واقف عند فتحت الباب
حمد سار وزقر منصور خاري وتموا يرمسون فالصاله.. حمد عاطي مقفاه لميلس الحرمات اما منصور فكان مجابل الميلس وما كان يطالع لانه كان يرمس حمد.. شوي حمد ضهر التليفون وتم يرمس.. >> هذيلا شي عندهم ^_*.....
المهم .... منصور يوم كان حمد يرمس يطالعه ويطالع اماكن ثانيه يعني ما بيتم الواحد يطالع بقعه وحده وجان يلاحظ حركه ورفع عيونه واطيح عيونه على ميلس الحرمات وعلى الشخص اللي مجابل...
وعرف انها ودوم وبدون شعور تم يطالعها وسرحان
منصور (( ما شاء الله عليج يا وديمه... اسميج الا غاااااااااااااويه بمعنى الكلمه .... بس والله ما ادري بس اكرها الحينه المشكله الاهل غاصبيني اخذها وانا ما اباها وهي ما تباني.. واللي زاد الطين بله انه انا اتحديتها بخبالتيه وقلت لها باخذج غصبن عنج.... اففففف اخر شي اللي بيطيح فيها انا.. يالله... شو الحل الحينه... بس انزين اذا خذتها بيكون هالجمال حقي انا وبس... مب حق رويشد.. لا لا ما ابا الجمال دامني اكرها... يالله شو الحل ))
بشكل عام اذا واحد تم يطالعك ولا خوز عيونه من عليك... اكيد واصلا بدون شعور او اراده بترفع نظرك صوبه... حتى لو ما كنت منتبه... بس هذا شي طبيعي فاالانسان...واكيد انتوا جيه استوابكم واذا ما استوى وهذا طبعا غير ممكن... جربوا وطالعوا....
نفس الشي ودوم... مندمجه فالسوالف والضحك.. وكانت طبعا تضحك وبدون شعور لفت ويهاا صوب الباب لانها حست انه حد يطالعها ولقت واحد اسمه منصور.. يطالعها هيه يوم شافته يطالعها خاصه بدون غشوه على طول غيرت موقعها ولفت عقب ما حمر ويها ... وحمر لانه مهمى كان مدى كرهج للواحد ساعات يصير موقف يخلي وييج احمر.. مثل ما صار على ودوومه الحلوووه ^_^
ودوم (( شو هذا شو يبا يطالع عنبوه ما يستحي ولا يخيل.. خيبه اذا اللي يكرهني وعارف ملامح ويهي جيه يطالعني لو راشد شو بيسوي.... افففففففففففففففففف.... صدق انه مضيع المذهب.. شو يبا يطالع ابا افهم.. ماااااااااضخ... سباااااااااااااااال.... اووووووهوووووووووو... ما تسوى عليه هالحفله يوم كل هذي اثموووم ))
شميم : حووووووووه بنت سلطان.. وين وصلتي
ودوم : هلاااا هنيه والله بعدنيه ما ظهرت من الباب.. والحينه ناويه اظهر
سلامي : صدق فضيحه وخاصه ودوم
ودوم : امايه بتحتشر عليه ...
عواش : يالله عيل حتى انا ما فيه امايه اتعصب .. بتقول حوامه.. ادور لها معرس
الكل : هههههههههههههههههههههههههههه
شميم : فديت امايه قلت لها بسير اطالع ودوم قالتي سيري بنيتيه...
ودوم : تعالي ما سلمت عليها امج ولا ام عواش ولا لطوف
شميم : يالله انزين خلينا انسير عسب اتسيرين اتسلمين عليهن قبل لا يسيرن ويشلنا وياهن
سلامي : يالله
وسارن خاري عقب ما اتغشن لانه منصور وحمد حضرتهم يالسين عالدرب اقصدد فالصاله ما ادري شو عندهم...
سلامي : عنبوه شو ميلسنهم هذيلا هنيه لا خيال ولا مستحى
ودوم : درانيبهم.... برايهم المهم ضهرنا... اقول بسير هناك بتين
سلامي : هيه
ودوم : ميروه وين
سلامي : عند قوم شميم
ودوم : احسن عسب اتعرف عليهن
سلامي : اصلا شمامي ما خلت مجال حق عواش ولطوف يتعرفن على ميرووه..
ودوم : لطوف بنقول بتم ساكته لكن عواش لا مستحيل حتى لو شميم ماسكه الجووو اكيد بتحط بصمه
سلامي : اسميهن هههههههههههه
ودوم سارت عند المغنية وحبت تهدي الحضور اغنيه ميحد حمد ... ثروة الحب
المغنية : اهداء خاص من ودة حفلتنا.. وديمه لكل الحضــــــور
للاستـــــماع <<< سوري كنت بحط لكم رابط الاغنية لكن قالوا ممنوع
وبعدين سارت ومسكت الميكروفون وعدت قصيده من قصايد الشاعره القديره عوشه... فتاة العرب..
وديمه : السلام عليكم... ومساكم الله بالخير والسرووور.. ويا مرحباااابكم ملاااااااااين... حبيت اعد قصيده واهديها لكم.. طبعا مب قصيدتيه ^_^ قصيده الشاعره فتاة العرب..... واتقول :
هــــلا يا مرحبـــا باللي جـــدانا عنو والحق واجبـــهم علــــينا
تشــرفنا ونورتوا مــــــسانــــــا وعم الانـــس واسفر به حوينا
وعذرِ ٍ به جميل الرد يانـــــــــا تلقـينا قــبوله شــــــــاكرينـــا
عســانا ما نخلي منكم عســانــا ولامنـّــا تنال المغرضـــينـــا
محبـــي يوم حققتوا رجــــــانـا ولا شمتـّــوا الحســــــاد فينـــا
عرفنــــا ثابت ٍ معكـــم غلانــا وصـــار الشـّـك يمحيه اليقينــا
تـــــطاولنا من الفرحه سمـــانا ونــوطي فوق لاعــدا قاهرينـا
وقلنـــا يا هلا باللي لفـــــانـــــا ولـــو ندري فرشنــــا الياسمينا
وسواااااااالم
الكل : صح لسانج...
وحده من الحضور : لا عاد نبا قصيده من قصايدج
وديمه في خاطرها (( خيبه اشدراها اني اعد قصيد.. خيبه استحي ما قد عديت او سمعت حد قصيدي.. مبتدأه فيدتني.. يا ربيه )) ودوم تمت تضحك ومستحيه واصلا هيه كانت واقفه عند الدري مال بيتهم فوق يعني عند مدخل البيت والكل يطالعها ^_^ مستوي جنه مسرح لوووووووول طبعا نزلت وسارت تيلس عدال يدتها
ام محمد : محد قالج يالله عديلهن وحده
ودوم : ما اقدر امايه استحي
وتمن الحرمات الا يسمعن قصيده من قصايدها ..<<< اسميهن الحرمات حشره يالله
طبعا داخل يسمعون لانه ميكروفون وسماعات
حمد : هههههههههههههههه حليلها
بو محمد : والعثه شو بيفجج بنيتيه من اللسنتهن.. الله واكبر عليهن
حمد : بيعطونها عين هههههههههههههههههه
أحمد : وتضحك..
حمد : جيه ما ضحكت عليها انته
الكل يضحك (( حمد – منصور – عبيد – راشد – أحمد – محمد – سعيد – حمدان – سلطان – فلاح – مهـيـّـر ))
ودوم : ما اعرف اعد قصيد
وحده من الحضور : لا لا اتعرفين سمعنا انج شاعره يالله سمعينا
ودوم : استحي
الكل : لا لا يالله
تمن ساكتات وودوم ميته من المستحى شوي وبطيح وبيغمى عليها
يدتها يالسه تقرا عليها ^_*
وعدت قصيده يالله يالله 4 أبيات ما رامت اتكمل والحرمات يصفقن لها ويردن وراها.. وحشره
سلامي : هههههههههههههههههههههههههههههههههههههههههههه
شميم : مسكين حالها هههههههههههههههههههههههههههه
سلامي : راحت لبنيه فيها عاد ودوم ما تقهر ههههههههههههههههههههههههه
شميم : شوفي الدخان اللي يضهر من راسها.. اختربت التسريحه
الكل : هههههههههههههههههههههههههههههه
سلامي : حرام عليج..
شميم : كله كوم والمكياج اللي اخترب كووووووم صدق صدق تحفه مستويه.. ميكب موديل يديد لووووووووووووووول
وخلاف ردت الاجواء حشره مره ثانيه عقب ما عم الهدوء يوم مسكت ودوم الميكروفون
وتمت الحشره لين ساعه متأخره من الليل
وعقب ساروا العربان ومحد تم والكل تعبان
والحوي استوي فاضي كراسي وطاولات خاليات وديكور وخياس وحاله ام محمد يالسه على الطاوله اللي قرب البيت ام سعيد وياها وبو محمد .... بو سعيد وسعيد ساروا وزاهره وياهم البيت
سلامي بعد يالسه عندهم وحمد ومحمد وسلطان وفلاح ... فطامي سارت فوق ودوم سارت بتيلس عندهم بعد يسولفون شوي منصور يى ويلس بعد ويوم يلس ودوم نشت
ودوم : يالله انا بسير حد في خاطره شي
ام محمد : لا الغاليه برايج سيري بدلي اثيابج
سلامي : جيه بتخليني بروحي
ام سعيد : جيه منو بيشلج وانتي يالسه عند امنوه
الكل : هههههههههههههههه
سلامي : لا امايه.. انا ابا اسولف ويا حد...
ودوم : انزين تعالي عندي فوق وبدلي ثيابج...
سلامي : جيه ابدلهن هاه.. تستهبلين
ودوم : برايج.. عيل.. يالله تصبحون على خير..
الكل : وانتي من أهله
ودوم كانت سايره ويالسه ترقى الدرى ... منصور يطالعها....
ودوم وقفت عند الباب ما دخلت.. اترمس البشكاره اللي كانت خاري فالحوي...
منصور : يالله حتى انا بسير اسمحولنا .. حد في خاطره شي
الكل : سلامتك...
منصور : هاه امايه بتسيرين ويايه...
ام سعيد : ما ادري.. لا برايك بسير ويا أحمد
منصور : عراحتج الوالد.. يالله فمان الله
وسار ركب سيارته شغلها وولع الليت .. ودوم كانت بعدها خاري يعني هي قامت هو قام عقبها وكل شي صار فنفس الوقت... ودوم لفت ويها لانه الليت ضارب فيها...
ودوم (( منو هذا عنبوه اشعنه ما بنده ... منصور.. شو ليش ما يبنده عنبوه يبا يعورنيه ))
كان يتعبل بفصوص السياره وخلاف عدل عمره ويوم كان بيسكر الباب شاف انه اللي ضارب على ودوم ابتسم ونزله عنها وسكر الباب وريوس وسار يعل الله يحفظه وودوم دخلت داخل وسارت حجرتها اتبدل ثيابها وتسبح
ام سعيد : يالله عيل بنسير بعد نحن شي فالخاطر
ام محمد : ما قصرتي الدوب
ام سعيد : بسير انتو تعابا ونحن بالمثل ومن الصبح هنيه
ام محمد : يتج العافيه ختيه...
ام سعيد : يالله بو محمد شي في خاطرك
بو محمد : وين ما يلستوا
ام سعيد : بنسير..
بو محمد : الله يحفظكم...
وساروا بيتهم
|