11-02-2015
|
#4
|
الجزء الرابع
::
وصلت الطائرة لمطار هيثرو تحمل بداخلها سعود وأنس ..
أنس صديق سعود من أيام الدراسة والجامعه .. مو بس صديق إلا أخو .. دومهم يتمون أمورهم ويا بعض واتفارقوا بسبب سفر سعود لدارسة الماجستير والدكتوراة بالخارج .. ومن بعدها رجعوا لبعض وظلوا دايم مع بعض وحتى هالسفرة يوم تقررت سافروها ويا بعض ..
نزلوا بتعب واستلموا أمتعتهم واتوجهوا لأحد الفنادق الراقية المحجوزة بأساميهم من قبل مايجون .. أنس على طول نام من التعب .. لكن سعود نزل لمقهى الفندق ومعاه اللاب توب ليشوف عنوان الشركة وأمورها الي بيبدون الشغل فيها من بكرا ..
كان قاعد على الطاولة وطلب نسكافيه وظل يشتغل بالكامبيوتر لما اتقدمت المظيفة بصينية النسكافية وابتسامة عذبة على محياها واجب عليها ترسمها لظيافة النزلاء .. ! لكن سعود مانتبه لها واهو منهمك بالشغل .. الا يوم سمعها تعيد عليه بالانجليزي :
?? any thing else
" تبي شي ثاني ؟؟ "
رفع سعود عيونه وابتسم لها واهو يقول :
no thank you
" لا شكرا "
المظيفة بابتسامة :
if you need anything call me please
" اوكي لو احتجت اي شي ناديني بليز "
سعود :
yes sure
" أكيد "
وابتعدت المظيفة واهي تبتسم واهو عقد حواجبه مستغرب من شكلها ! شي في شكلها خلاه يستغرب بس ماعرف وشو .. رجع يشتغل على اللاب توب .. ثواني ونسى الي صار ! وبعد ساعات من الشغل المتواصل حس بالتعب وسكر اللاب توب وصعد للجناح ينام .
من بكرا الاثنين كان أول يوم دوام بالشركة
داوم فيه سعود وأنس بكل نشاط .. رجعوا للفندق جوعانين ودخلوا مطعم الفندق وطلبولهم أطباق مشكلة .. وقعدوا على أحد الطاولات يسولفون .. ودقايق واتقدمت نفس المظيفة ومعها عصيرات .. وابتسامتها العذبة على وجهها وهالمره طالع فيها سعود بوضوح واهو يحاول يتبين شالغريب فيها !! وبعد ما ابتعدت قال : أنس طالع بالمظيفة اذا رجعت شوف ماتحس فيها شي غريب !
أنس : شي غريب مثل وشو ؟
سعود : مدري أحسها مو نفس المظيفات فيها شي يختلف عنهم بس مادري مو قادر أميزه !
أنس بضحك : وانت شدخلك فيها الحين ! غريبة ولا مو غريبة ..
سعود : مدري لفتت نظري بس على قولك انا وشلي فيها !!
أنس : ماقلتلي شرايك بقسمك الي حطوك فيه !
سعود : ممتاز والله .. ولو اني ماتعودت أكون تحت أحد يأمرني بس يلا نجرب شعور المرؤوسين
أنس : عاد تصدق أنا أبد مو مرتاح بقسمي
سعود : ليه شالي مو مريحك ؟
أنس : مو تخصصي ولا اهتمامي وكل شي جديد والي معاي أجانب مو انجليز
سعود : وأنا نفسك حبيبي بس بالعكس هذا من صالحنا
أنس : شلون
سعود : نجرب شي جديد مختلف .. (( ودار عيونه عن أنس لحظات .. وأنس لاحظ عيون سعود الظايعة من خلفه والتفت ليشوف وش الي يطالع فيه سعود ومالفت نظره شي .. رجع يطالع بعيون سعود واهو يقول : شفيك انت بايش تطالع !!
سعود : ياخي هالبنت غريييييبة !!
أنس : منهي هذي !
سعود : إهي ماغيرها الي تظيفنا .. تو جا واحد من النزلاء يكلمها والظاهر يبي منها شي .. ولو تشوف شلون طالعته بنظرة نارية وصدته عنها وبعدت !
أنس بعدم اهتمام : اي مو كل المظيفات يرضون يذلون انفسهم عشان الفلوس ..
سعود وعيونه تلاحق المظيفة : بس طالع أنس حتى لبسها محشم مو مثل الباقيات !
أنس : لا خلاص حبييييييتها أنا
سعود باستغراب : حبيتها ؟
أنس : أندري عنك انت تمدح فيها كنك تبيني أحبها غصب .. ياخي كمل غداك بس خلنا نقوم من هنا والله تعبان وأبي أريح ..
سعود : هههههههه يقطع ابليسك ..
وكملوا غداهم وقاموا والمظيفة كانت عند الباب تبتسم وتودع .. ويوم جا يطلع سعود طالعها بنظرة طويلة وهي ابتسمت ابتسامة سريعة ودارت وجهها عنه ومشت وتركته بعالم من الاستفهامات .. !!
*******
السعودية
بيت أبو فيصل
صحت حنان على الساعه 7 الصباح .. وتقلبت بفراشها بملل .. جفاها النوم ولاتدري اذا قامت وش بتسوي .. ؟ ظلت بفراشها تقلب بالجوال ويوم ملت قامت للحمام غسلت وغيرت ملابسها ولفت وشاحها حول رقبتها .. وطلعت وهي تدري انها مو لاقية أحد .. الي بدواماتهم والي نايم ..
نزلت الصالة وتفاجأت يوم لقت أبو فيصل بثوبه وشماغه مستعد للخروج
حنان وهي تمشي : صباح الخير عمي
ابو فيصل : هلا حنان صباح النور
قعدت حنان على الكنب وأبو فيصل يقول : وش مصحيك هالوقت ؟
حنان : مادري عجزت لانام
ابو فيصل بحنان : تعبانة فيك شي ؟
حنان : لا والله عمي مافيني شي بس نومي متلخبط هاليومين
ابو فيصل : انتبهي عل نفسك حبيبتي
حنان : ان شاء الله عمي
أبو فيصل وهو يوقف : يلا انا رايح الشركة توصين على شي ؟
حنان : لا والله سلامتك
ابو فيصل : زين مع السلامة
حنان : مع السلامة
وتبعت ابو فيصل بعيونها لين طلع وبعدها قامت للمطبخ تسويلها نسكافيه وأخذتها وطلعت غرفتها وفتحت النت .. وفتحت على منتداها ومتنفسها الوحيد الي تشكي فيه كل همومها وأحزانها بدون ماحد يدري منهي
بنفس هالوقت كان صالح بالدوام يفكر بالسالفة الي عرفتها فتون عن حنان وماقالتها له للحين وانتظر لين صارت الساعه 10 ودق على فتون وهو مأمل انها تكون صحت .. لكنها ماردت وعاد عليها الاتصال ولاردت راح أرسلها مسج :
" كلميني ضروري "
وعلى الساعه 12 دقت فتون عليه وكان عند مقهى الشركة اهو وخويه حسام
صالح : هلا صح النووووووووم
فتون بكسل : صح بدنك
صالح : بالله توك تقومين ؟
فتون : يعني من شوي .. ليه فيه شي ؟
صالح : أول شي شلونك ؟
فتون : الحمدلله
صالح : أخبارك وأخبار الاهل
فتون : كلنا بخير الحمدلله انت شلونك ؟
صالح : تمام الحمدلله ..
فتون : أحس وراك شي !
صالح : اي والله وراي جدار
فتون : ههههههههههه تنكت انت وجهك
صالح : اي أنكت عندك مانع
فتون : لا بالعكس كثر منها خلني اتونس حدي طفشااااااانة
صالح : خلي العطالة تنفعك
فتون : والله الظاهر بتطلع اجازتي من عيوني كثر ماتعايروني فيها
صالح : تستاهلين المهم اسمعي
فتون : هلا
صالح : بجي اليوم أتغدا عندكم
فتون : يااااي وناسة .. حياك الله
صالح : الله يحييك ومن الحين باتفق معاك تدبرين اي فرصة نكون لحالنا وتعلميني بالسالفة
فتون :ههههههه انت للحين تفكر فيها ؟
صالح : وذبحني التفكير فيها بعد خلاص ارحميني وعلميني
فتون : اووووكي ان شاء الله اعلمك اليوم بس شالمقابل ؟
صالح : بدت تذل !! بوديك السوبرماركت تختارين الي تبين
فتون : أحــــــــلى يسلملي هالعم
صالح : يالملصلحجية يلا قومي الحين على المطبخ ابي سفرة أشكال والوان
فتون :هههههه مالقيت الا انا
صالح : اي وانتِ وش ناقصك عاد
فتون : مانقصني شي بس ماحب المطبخ .. يلا خلني اروح أبلغ امي
صالح : اوووكيك .. سلام
فتون : باي .
وبعد انتهاء الدوام رجع صالح على بيت أخوه واتغدوا سوى ..
وبعد الغدا طلع الكل يريحون بغرفعهم .. وأخيرا انفرد بفتون وقالها : يلا خلصيني وعلميني
فتون : وش تبي تعرف ؟
صالح : مادري عنك انتي الي ذاك اليوم تقولين عرفت شي عن حنان بيقربك منها بشكل ماتتصور !!
فتون : وانا صادقة
صالح : زين وشو علميني تكفين
فتون : طيب عمي صالح بس أمــــــــــــــــانة ماتعلم أحد ترا لو درت اني انا اصلا عرفت بهالشي بتزعل مو عاد اني أعلمك انت !!
صالح والشوق متملكه على الآخر : طييييييب يافتون والله مو معلم أحد خلصيني
فتون : أمانة برقبتك عاد !!
صالح : زييييييييين وشوووووو ؟؟؟؟؟؟؟
اتعدلت فتون بقعدتها وقالت : السالفة ياطويل العمر ان حنان قبل فترة كانت نايمة عندنا .. وكان معها لاب توبها تورينا صور وأشياء المهم يوم جينا ننام قالت انها تبي تشبك على النت شوي .. تركناها انا وعبير ونمنا وهي سهرت بالصالة على النت .. بعد ساعة انا ماجاني النوم وطلعت اشوفها .. ولقيت لابتوبها مفتوح وهي راحت المطبخ تسويلها شاهي .. ضرب عرق الفضول عندي اشوف هي وش تسوي وقعدت قدام لاب توبها ولقيتها فاتحة منتدى مسجلة فيه وتشارك وتكتب .. طالعت بالاسم المكتوب لقيته اسمها وبهالشكل عرفت اسمها بالمنتدى والظاهر انها تكتب دايم بهالمنتدى وتحط أسراها كلها فيه
صالح بحماس : يارهيييييييبة انتي وش اسمها قولي ؟؟
فتون باستهبال : لا مو قااااااايلة
صالح : بتقولين غصب عليك ولا ترا بنتفك تنتيف
فتون : يمممممممااااه كل ذا عشانها
صالح : عشانها ولا مو عشانها قولي وبس
فتون : طيب بقولك بس والله خايفة تدري وتذبحني
صالح : وشالي بيدريها انتي اذا قدرتي تسكتين كل الأمور بتمشي تمام
فتون : هههههههههههههههههههه وش قصدك يعني عشان علمتك الحين
صالح : لا بالعكس هذا أنجح شي سويتيه بحياتك بس قوليلي وش اسمهااااااااا
فتون : "بقايا جروح"
سكت صالح فاجأة وعاد الاسم مره ثانية : ...... بقايا جروح ؟؟
فتون : ايه ..
صالح عاد الاسم بنبرة حزينة : بقايا.. جروح ............ ياعمري عليها !!
فتون : انا يوم قريته انكسر خاطري مره وبسرعه قمت لاتجي تشوفني قدامه وتعرف اني كشفتها .. وبعد ماراحت فتحت النت من عندي ودخلت منتداها لقيت مافي غيرها بهالاسم
صالح باهتمام : اممهمم .. خلاص فتون لاعاد تعلمين أحد غيري ولاحتى عبير !
فتون : لا مو معلمة أحد
صالح : لانها لو حست ان احد عرف بتغير اسمها أكيد ويالله من وين بنعرفه مره ثانية
فتون : طيب سؤاااااال يطرح نفسه ؟؟
صالح : خييييير
فتون : وش بتسوي الحين بعد ماعرفت ؟؟؟
صالح : بارسلها فايروسات
فتون : وشووووووووو ؟؟؟؟؟؟
صالح : أندري عنك انتي وش بسوي يعني باقرا مواضيعها بس
فتون : طيب وماتبي تعرف وش اسم المنتدى ؟
صالح : اييييي والله اني مهوي وش اسمه صح ؟
فتون : ههههه ياحليلك .. مو حافظته بشوفه من كامبيوتري وبارسلك اسمه على الجوال وانت عاد سوي بحث بقوقل ويطلعلك
صالح : حلو يلا قومي ارسليه الحين
فتون : اصبر اذا فتحت الكامبيوتر ارسلته
صالح : الليلة فتون
فتون : ان شاء الله
صالح وهو يوقف : يلا انا بامشي خلاص هالوقت متعود أنام ..
فتون وهي تقوم معاه : و متى الوعد ان شاء الله ؟؟؟؟
صالح : يوووه يالبلشة والله فتون تعبان انا لحين
فتون : مو شغلي والله انا ماوافقت الا عشان وعدك لي
صالح : أوف منك انتي يلا البسي عباتك بسرعه واستناك بالسيارة
فتون : طيراااااان أجيك
ولو شفتوها وهي تركض لغرفتها كان قلتوا انها فعلا تطير .. وبسرعه لبست عابيتها ونزلت الدرج .. وطلعت وركبت مع عمها ومشوا للسوبر ماركت
*****
ابريطانيا
مساء يوم السبت راح سعود وأنس لمول قريب من الفندق يشرون أغراض محتاجينها
داروا المول وشروا الي يبون .. وبعدها قعدوا يتعشون بالمطاعم المفتوحة ..
أنس : لي كم يوم ما كلمت أهلي ومشتاااااااق لهم وربي
سعود : مالومك أنا الي أكلمهم كل يومين اشتقت لهم
أنس : الله يخارجنا من هالغربة على خير
سعود : آمين الله يسمع منك والله كسروا خاطري خواتي وامي وهو يبكون ليلة السفر
أنس : يوه مثل حالاتي وبالقوة سحبت نفسي منهم وطلعت وأول ماركبت السيارة بكيت
سعود : ههههههه لاعاد أنا أقوى منك مابكيت
أنس : انت متعود على السفر والتغرب أنا أول مره
سعود :و ان شاء الله تكون آخر مره
أنس : آمين
وكموا عشاهم وقاموا يطلعون .. وهم يمشون بالأسياب انتبه سعود لبنت جالسة على أحد الكراسي وساندة راسها على الجدار من ورى وحاضنه شنطتها ومبين التعب بوجهها
تأملها سعود لحظات وفاجأة قال : أنس أنس شوف هالبنت !!!
أنس : وين ؟؟
سعود : ذيك الي قاعدة على الكرسي ومسكرة عيونها مو كنها المظيفة الي عندنا بالفندق؟؟
أنس : والله ياسعود ياكثر المظيفات هناك شدراني
سعود : لا تذكر المظيفة الي كلمتك عنها ذك اليوم !!!
أنس : ايييييه تذكرتها
سعود : مو كنها هذي هي !
أنس : لاااااا ماظنيت أبد .. ذيك مبتسمة وش حلاتها اما ذي شكلها تعبانة ولاتعرف للزين
سعود وهو يتأملها : عندي احساس انها هي !
أنس : أقول امش نطلع بس هي ولا موهي احنا شدخلنا ..
ومشوا للسيارة ولقوا عليها ورقة مخالفة لأن المواقف بابريطانيا بفلوس .. وهم قعدوا بالمول أكثر من الوقت الي دفعوا عليه المبلغ بالمواقف !!!
أنس وهو يطالع ورقة المخالفة بعصبية : يووووه خالفونا وحنا تأخرنا دقايق بس
سعود : حسبي الله عليهم وعلى نظامهم
أنس : امحق نظام حتى على الدقيقة يحاسبون
قرى سعود الورقة وقال : بس والله حلو النظام
أنس وهو يدخل الورقة جيبه : حلو النظام هنا بس مو علينا احنا الي ماتعودنا عليه
سعود : هههههه وانت صادق ويننا احنا ووين الأنظمة
وركبوا السيارة وأول ماجو يمشون .. انتبهوا للبنت الي كانت على الكرسي طالعة ومعها بنت ثانية محجـبة !! ركبوا البنات السيارة ومشوا وسيارة أنس وراهم والطريق كان واحد اثنينهم وقفوا قدام الفندق !!
ونزل أنس وسعود والبنت الي شافوها نزلت من السيارة وسلمت على صديقتها وراحت عنها
سعود وهو يطالع البنت : ماقلتلك انها هي !
أنس : اي صدقت ويبيلك جايزة
سعود : هههههه لابس عشان أثبتلك
أنس وهو يطالع البنت وهي تدخل الفندق : بس غريب شكلها تعبانة ومكشرة !
سعود وعيونه على البنت الي بدت تبتعد : أكيد حبيبي وقت الظيافة لازم يبتسمون ويرسمون البشاشة على وجيههم لو وش ماكانوا متضايقين !
أنس : لالالا غلط يوم دخلت انت إدارة أعمال كان لازم تدخل علم نفس
سعود وهو يدفه من كتفه : أقول اهجد انت اتكلم جد انا ما استهبل
أنس وهو يضحك : طيب صح كلامك بس عاد تراك أدوشتنا فيها
سعود : مادري ياخي هالبنت فيها شي غريب ولافتني لها !
أنس : الله يعينك
دخلوا الفندق وصعدوا جناحهم وقعدوا يتفرجون على فلم وبعد ساعه من السوالف داهمهم النوم ونـاموا .
******
صباح يوم مشرق في السعودية الكل بدواماتهم ماعدا اثنين
فتون وحنان
فتون بدا الملل يداهمها وهي الي مادخلت الجامعة هالترم .. سجلت ثلاث ايام بالاسبوع بنادي رياضي تتونس فيها وكونها بعد مجنونة رياضة
بعد مانتهت من النادي طلعت ومرت على عبير بالجامعة وظلت تنتظرها بالسيارة لحظات وطلعت عبير وركبت وهي تقول : ليش مادخلتي ؟؟
فتون : مافيني عبير والله جاية من النادي تعبانة
عبير : بايخة والله كنت أبي صديقاتي يشوفونك
فتون : اعزميهم بيتنا خل يشوفوني
عبير : والله الظاهر باعزمهم فشلة كل وحده عزمت البنات الا انا ماعزمتهم
فتون : خلاص اعزميهم الخميس ماعندنا شي
عبير : بشوف عن ظروفهم ان شاء الله
فتون : اسمعي وش رايك نوقف نتغدا بأي سوق
عبير : الحمدلله ذا وقته ؟؟؟
فتون : اي هذا وقت غدا
عبير : ادري بس حر وتعب اصبري يمكن اطلع بالليل أنا ومنى تعالي معنا
فتون : أجي معكم ماعندي مانع بس بعد الحين ابي نروح مكان
عبير : والله بتعصب امي طابخة ونروح ناكل برا
فتون : لا تونا بدري 12 ماظنيتها طبخت الحين
عبير : كلميها شوفي
فتون : طيب وحتى لو مارضت بنمر السوق لو ناخذ ايسكريم
عبير : يعني الا والا تفرفرين ؟؟
فتون : اي والله زهق وابي اغير جو
دقت على أمها ولأن الوقت كان بدري وماطبخت فماعترضت عليهم .. وراحوا البنات السوق ونزلوا طلبولهم أكل وقعدوا ينتظرون وفتون فتحت جوالها وهي تقول : بوريك فيديو يفطس من الضحك ارسلته لي عهود صديقتي
عبير : وشو وريني ..
فتحت فتون الفيديو وورتها المقطع الكارتوني الي في ولد صغير ينادي أمه وهي نايمة :
لويس لويس لويس .. مام مام مام .. مامي مامي مامي .. ماما ماما ماما.. ماه ماه ماه .. مام مام مام .. مامي مامي .. ماما ماما ماما
والأم تعصب وتصرخ فيه : واااااااااااااااااات ؟؟؟؟؟؟
الولد : هاي هيهيهيهيهيهيهيهيهيهيهيهيهيهيهيهيهيهيهيهيهيهيهيهيهي هيهيي !
عبير بلا شعور : ههههههههههههههههههههههههههههههههههههههههههههههه غبي غبي غبي
فتون :ههههههههههههههههههه مب صاااااحي يرفع الضغط
عبير :هههههههههههه ارسليله اياه بسرعه .. وفتحت البلوتوث
حاست فتون بجوالها وطولت ما ارسلته
عبير : يالله بسرعه
فتون ارتفع صوتها : اصبري ياعبيييييييير
وشوي جاها رسالة تنبيه ان في بلوتوث واصل وهي وافقت بسرعه بدون ماتقرا الاسم على أساس انه من فتون
وأول مافتحت اتفاجأت برسالة من شخص تقول : فديت هالضحكة وصاحبتها : 05559... الخ
اخترعت عبير وهي تقول : فتون في واحد مرسلي !!
عبير : واحد منهو ؟
عبير : مادري شكله حولنا يقول فديت هالضحكة .. وججججع
أخذت فتون الجوال وشافت وقالت : وكاتب رقم جواله بعد!!
عبير : اييييه الله ياخذه .. قومي بس مابي يحس اننا ارتبكنا
فتون : وين نقوم نروح ؟
عبير : ناخذ غدانا ونطلع
فتون وهي توقف : وجع يوجعه الي خرب علينا الحمار
كتمت عبير ضحتكها ومشوا ياخذون طلباتهم بدون مايلتفتون للي لحقهم وقام وراهم ويوم ركبوا السيارة ركب ومشى ورى سيارتهم ..
السواق مصطفى : هدا رجال في امشي ورى سيارة أنا من زمان
فتون : كذاااااااااااب عسى مايكون هو !
عبير : ماعليك يامصطفى امشي عادي ..
مصطفى : بعدين يعرف بيت احنا
عبير : والله صرت خبرة بهالحركات يامصطفى طيب لاتخليه يمشي ورانا ادخل هنا ولف كل اللفات بسرعه عشان يظيع
مصطفى اتحمس : طيب
ولف من أقرب لفة كانت بالشارع وبسرعه لف اللفة الي بعدها يمين بعدين يسار بعدين يمين وفتون طالعت من الشباك الي ورى ومالقت ولا سيارة وقالت : الحمدلله شكله ظاع !
عبير : اشوى الحمدلله .. يلا مصطفى روح البيت
مصطفى : ماعرف طريق !!!
عبير : ماتعرف طريق البيت ؟؟؟؟؟؟؟؟؟؟؟؟
مصطفى : انا ماعرف طريق من هنا لازم روح برا شارع مره ثاني عشان عارف
فتون :خخخخخخخخخ يعني بنرجعله مره ثانية والله حالة !
عبير : لا ان شاء الله يكون مل وراح .. خلاص ارجع يامصطفى والله انك مشكلة
رجع مصطفى للشارع ومشى فيه الا لقى السيارة واقفة بمكانها تنتظرهم وعادت تلحقهم من جديد !!!!!!!
عبير : وججججججع ماتحرك الحمار
فتون : حطنا بباله الزفت
عبير : يوه مابي يلحقنا ويعرف بيتنا والله بيوقعنا بمشاكل
فتون : وش نسوي طييييييييب
عبير : شكلي بافتح البلوتوث وأرسله فكنا منك
وفتحت البلوتوث ولقته متواجد أرسلتله : لو سمحت لا تلحقنا وتوقعنا بمشاكل
بعد ثواني جاهم الرد يقول : دقي علي دقة وبعدها أوعدك أروح عنكم
عبير : مصدق عمره هذا يبيني أدق عليه ويعرف رقمي !
فتون : لا والله يعرف بيتنا أحسن من رقمك
عبير : يعني شالحل !!
فتون وهي تضحك :ههههههه عندي فكرة !
عبير : وشي ؟
فتون : دقي عليه من جوال مصطفى !
عبير :ههههههههههههههههههه جبتيها والله .. مصطفى هات جوالك
عطاها مصطفى الجوال ودقت على رقمه دقة وحده وسكرت .. وبعدها شافوا السيارة عكست طريقها وراحت
فتون : ههههههههههههههه رااااح أخيرا مابغى يفكنا التبن
عبير : بس زين انها جت على كذا
ورجعت عبير لمصطفى الجوال وكموا للبيت مرتاحين
بس ياترى هل بتنتهي السالفة على كذا ؟؟؟؟
دخلوا البيت ومعاهم أكياس الغدا .. وسلموا على أمهم ويوم شافت أكياسهم قالت : وش هالاكياس ماتغديتوا بالسوق ؟؟؟
عبير : هاه .. لالا .. فتون صدع راسها وأدوشتني يالله يالله
فتون وهي تمسك راسها : اي اي .. مادري شجاني صداااااع بروح أنام ..
أم سعود : ياعمري خذيلك حبتين بندول
فتون : لا مايحتاج ان شاء الله اذا نمت ارتاح وبعدين آكل
راحت عبير المطبخ وحطت الأكل بالفرن وطلعت وقالت لأمها : يمه بروح آخذلي شاور وأنزل
أم سعود : يالله زين ..
طلعت عبير الغرفة ويوم دخلت شافت فتون قاعدة معصبة وقالت : الحين انتي ليش ورطتيني؟؟؟؟
عبير : يعني تبين اقولها السالفة وتذبحنا ؟؟؟؟؟
فتون : لاقوليلها انك انتي مصدعة مب انا
فتون : مادري عاد طلع معاي اسمك
فتون : واصلا حتى لو درت بالسالفة مب قايلة شي لاننا ماغلطنا !!
عبير وهي تفصخ عبايتها : لا ياحبيبتي تعرفين امي ماتمرر هالسوالف على خير وبتقعد تراقب وتتأكد .. وبتقول ليه تفتحين البلوتوث أصلا وليه أرسلك .. وليه ضحكتي بصوت عالي وليه وألف ليه وأنا مالي خلق صراحه
وأخذت ملابسها ودخلت الحمام وفتون رمت نفسها على السرير وكنه الصداع صدق جاها وسكرت عيونها بتعب ودقايق وغطست بالنوووووم ..
طلعت عبير من الحمام وشافت اختها نايمة وابتسمت وصكت الستارة ونزلت الصالة شافت امها قاعدة
عبير : يمه
ام سعود : خير يمه
عبير : سعود دق اليوم ؟؟
ام سعود : لا بس ان شاء الله يدق بالليل
عبير : امانة ان دق خليني أكلمه لي أربع ايام ماكلمته
عبير : ان شاء الله اذا دق اناديك هو بعد سأل عنك آخر مره يقول ماغير فتون الي ترد علي بكل مره وينها عبير !
عبير : ياعمري ياسعود .. خلاص بكلمه الليلة ان شاء الله
ام سعود : اختك نامت ؟
عبير وهي تكتم الضحكة : اي نامت توها
ام سعود : مادري وش سالفة الصداع معاهم تو خالد داق علي يقول استأذن من الدوام وطلع مصدع بالحيل
عبير : يوه شفيه هو بعد ؟
ام سعود : اكيد من السهر طوال الليل سهران مانام غير ساعتين
عبير : ياحليله وسهران على ايش؟؟
ام سعود : على هالنت الي ماصار نت الا صار ادمان
عبير :هههههههه وحتى انتي يمه ادمنتي معنا
ام سعود بضحك : أنا اقعد شوي مب مثلكم اذا قعدت الوحدة لو تنفجر قنبلة حولها ماحست
عبير : والله انا بكل مره اقعد أكون أبي شغلة وحده .. وهالشغلة عاد تسحب الثانية والثالثة والرابعة ومانتبه للوقت الا وانا قاعده لي كم ساعه
ام سعود : اي هذا انتم مراجيج
عبير :ههههههههههههههههههه حلوة مراجيج طيب قوليلي يمه محنا رايحين مكان اليوم ؟
ام سعود : لا وين نروح ؟؟
عبير : مادري بس انا كلمتني منى اليوم تقول مادوامت و ودها تطلع معاي فبشوف ان كان ماعندنا شي طلعت معها
ام سعود : لا والله ماعندنا ولا شي
عبير : زين أجل بكلمها
ودقت عبير على جوال منى واتفقوا على الوقت ..
وبعد دقايق وصل خالد ودخل وهو باين تعبان
خالد : السلام عليكم
عبير+ ام سعود : عليكم السلام
أم سعود : ياعمري ياخالد شكلك تعبان
خالد وهو يقعد : اي والله أحس راسي بينفجر
ام سعود : قومي ياعبير هاتي البندول من فوق الدولاب
عبير : ان شاء الله .. وقامت جابت لأخوها الدوا وكاس موية وعطته ..
أم سعود : خلني أعطيك شي تاكله بعدين روح نام
خالد : لا مابي والله مو مشتهي شي
ام سعود : مب لازم تكثر كِلك شوي بس
خالد : وش آكل اصلا تو الوقت بدري خلص الغدا ؟؟؟
ام سعود : لا ماخلص بس خواتك جايبين من برا أكل بحطه لك
عبير بصدمة : يممممممممه حنا ماجبناه عشان تأكلينه خالد !!!!!!!!!!!!
أم سعود : حرام عليك أخوك تعبان مب قادر يفتح عيونه وماتبينه ياكل !
خالد مثـّل انه طايح وتعبان !!
عبير : شوفي بالله قاعد يستهبل لا مالي دخل ماتعطينه
أم سعود : باعطيه شوي منه مب كله
عبير بزعل : يمممااااااااه
ام سعود : وصمـّه
خالد يضحك عليها : كككككككككككككككككككككككككككككك
عبير بحمق : وتضحك انت ووجهك مسوي تعبان بس عشان ياكل غدانا
خالد : الله اكبر عاد اني ميت على غداكم بس عناد فيك باكله كله
وقام للمطبخ !!
عبير من وراه : ياوييييييييلك ياخالد والله ياوييييييلك
خالد : ههههههااااي وش بتسوين امانة ؟؟؟؟؟
عبير : اسوي الي اسويه المهم ياويلك تاكله كله
خالد راح لأمه وهي تغرف ومسك الملعقة منها وهو يقول : عنك يام سعود عنك
ام سعود : روح انت ارتاح وخلني اغرف
خالد : لالالالا انتي روحي ارتاحي
وأخذ الملعقة منها وغرف كل الي بالصحن وعبير جت جمبه وهي تقول : عاد بق شوي بتعاندني انا اوكي لكن فتون وش ذنبها بالله ؟؟؟؟؟
خالد : تاكل من الغدا اذا خلص
عبير : وجع حرام عليييييييك
خالد مطنشها ودار عنها وقعد على الطاولة بالمطبخ وهو يقول : اللااااااااه ريحته تهبل
عبير : يمه شوفييييييييه !!!!
ام سعود : خلاص عاد لا تنشبين بحلقه ان شاء الله بتطلعون الليلة واطلبوا الي تبون
عبير عصبت وطلعت وهي تقول لخالد : جعلك طحله يارب
خالد :ههههههههههههههههههههههههههههههههه
وطلعت من المطبخ معصبة وشوي الا رجعت وقالت : تراني باطلع الليلة مع منى وانت الي بتودينا من الحين ضبط امورك ونام زين
وطلعت وهو من وراها يقول : دام السالفة فيها بيت خالتي ابشري من عيوني الثنتين
أم سعود : ماعليك منها اذا تعبان خلي السواق يوديهم
خالد : لا عادي انا بعد ابي اغراض من فيصل باخذها مره وحده
أم سعود : على راحتك اجل
صعدت عبير الدرج وهي تفكر بكلامه .. كانت من زمان تحس انه يحب مرام ويهتم للروحة لبيت خالته .. لكن الحين تحسه اتغير وبالعكس كم مره بكت منه مرام ومن نرفزته عليها ولا نظراته الجامدة لها وتصرفاته الغريبة .. هذا وش يسمونه طيب يحبها ولا مايحبها ؟؟؟
طردت من راسها الافكار وراحت غرفتها واتمددت على سريرها بتنام .. وانرسمت صورة تركي قدامها وهذا معناه ان ماعاد فيه نوم !! حست قلبها بينفجر من كثر حبها وشوقها لهالانسان .. وماتدري شلون توصله ؟؟
بعد فترة من التقلب بدون نوم .. قامت وفتحت شنطة الجامعة وطلعت كتبها وأوراقها تضبطهم .. وكتبت بعض ملخصاتها ومر الوقت وهي حايسة بين دروسها .. لين انتبهت للساعه 5 وشوي وبتصحي فتون عشان تجهز ويطلعون ..
رجعت تتمدد على السرير وهي تقلب بالجوال لين وقعت عيونها على رقم تركي وخفق قلبها بقووووة !! آه ياتركي والله مشتاقة لك حييييييييييل وانت وينك عني لا تحس فيني ولا تسأل !! وعجزت تقاوم رغبتها بسماع صوته واحتارت شلون تسمع صوته وتكلمه وبأي حجة !! وفكرت تدق على منال وتسأل عنه يمكن يكون جمبها وتطلع أي فرصة تكلمه .. ودقت على جوال منال بحماس وكانت المفاجأة ان جوال منال مفصول !!!
ابتسمت عبير بفرحــــــــة لهالمفاجأة لأن طرا على بالها الحين تدق على جوال تركي وتطلب منال !! بس هو مايعرف رقمها ويمكن مايرد !! وماسمحت للأفكار تلعب فيها أكثر وبكل فرح قعدت بسرعه وراحت لرقمه وسحبت نفس عميق ودقت !! رفعت الجوال لاذنها وايدها بدت تعرق من توترها ورن الجوال ولوهلة كانت بترجع تسكره مره ثانية لكن شوقها لصوته كان أقوى منها !! ومع كل رنة يرنها تزيد دقات قلبها أكثر واستمر الرنين بلا إجابة لين فصل !!!
سكرت عبير الجوال بضيق وحست ان مافي فرصة تسمع صوته وهالشي بيولع قلبها أكثر وأكثر !! رمت الجوال جمبها وسندت راسها على الجدار وسكرت عيونها .. وبعد ثواني بسيطة دق جوالها !!
انتفضت عبير من سمعت الرنين وانتبهت لفتون وهي تفتح عيونها بانزعاج ..
وأخذت الجوال بسرعه ويوم طالعت لقت
المتصل : تركي !!
قلبها صار يضرب طبووووول وهي تطالع فتون بخوف
فتون بكسل : شفيك منهووو ؟؟
عبير : تركي يافتون تركي !!!!
فتون باستغراب : تركي ؟؟؟ وش يبي داق
عبير : انا داقة عليييييييييه
فتون : انتي ؟؟؟؟ طيب ردي عليه الحين لا يفصل بعدين حكيني
عبير : ياويلي ياويلي .. احم احم
وردت : الوو
تركي بصوته الهادي : مرحبا
عبير : أهلين
تركي : عفوا اختي بس قبل شوي أحد اتصل على جوالي من هالرقم
عبير : اممم .. هلا تركي
تركي : ................. أهلين مين معاي ؟
عبير : أنا عبير
وبلعت ريقها بصعوبة
تركي بعد صمت ثواني خلى قلب عبير يطيح :
هــــــــــــــــــــــــــــللللاااااااا وغــــــــــــــــــــــــــلللااااااااااااا
عبير اتيبست وفتحت عيونها بوسعها لانها ماكانت متوقعة منه كل هالترحيب الحار وحمـــــــــر وجهها حتى فتون سمعته وغطت فمها بالمخده عشان لايطلع صوتها وهي تضحك
وتركي كمـل : شلوووونك عبير ؟؟
عبير بحرج : بخير الحمدلله انت شلونك تركي ؟؟
تركي : بخييييير دامك بخير
عبير وقفت وصارت تمشي ومو عارفة شلون تتكلم وبالقوة قالت : سامحني أزعجتك بس دقيت على جوال منال ولقيته مفصول وقلت اسألك عنها
تركي : اهااااااا .. وانا الي قايل ياحليل بنت عمي داقة تسلم على ولد عمها وتسأل عنه طلع عشان منال أجل هاااه ؟؟
عبير اتمنت هاللحظة تقول لااااااااااااااااا عشانك انت وبس مو عشانها .. ولهت عليك انت وابي اسمع صوتك .. وقالت : لا وعشانك بعد يعني كنت أقدر ادق على بيتكم واسأل عنها بس قلت مره وحده أكلمك أسلم عليك وعليها
تركي : اي كذا حلوو ..
عبير ضحكت بحيا وماردت
تركي : وأخبارك وأخبار فتون والأهل
عبير : كلهم تمام الحمدلله ..
تركي : اي عبير ماسألتك
عبير : آمر !
تركي : شلونك بعد الطيحة ذاك اليوم ؟؟؟؟
عبير غطت وجهها بإيدها وهي تتذكر الموقف وحست انها بتموت من الفشيلة وهو شلون يسألها ويدري ان هالشي محرج بالنسبة لها ولاردت عليه .. وهو حس فيها وقال : عادي عبير كلنا نطيح مافيها شي بس انتي عسى ماتعورتي ؟؟؟
عبير بهمس : لا الحمدلله عدت سليمة
تركي : الحمدلله وهذي نهى لعنت ابو سكافها
عبير : هههههه لا حرام عليك
تركي : قلعتها ذي ماعندها حدود لا مع كبير ولا صغير
عبير : ياحبيلها ..
تركي : ياحبك لمين ؟؟؟
عبير انحرجت من هالسؤال .. وقالت بلعثمة : لـ نهى !
تركي : بس نهى ؟؟؟
عبير ماتت من الحيا : .......................
تركي : ههههههههه شفيك سكتي ؟؟؟؟؟
عبير تضحك بحيا : مادري شقووول
تركي : عادي عبير تحبيننا واحنا نحبكم أهل احنا مووو ؟؟
اتنهدت عبير من خاطر وهي حست ان افكاره حييل بعيدة عن افكارها وقالت : اي عادي طبعا عادي
تركي : ههههه ياحبيلك
ابتسمت عبير وكلمته ماأثرت فيها وهو فهمها ان هالشي عادي كونهم أهل بس !
وتركي قال : أجل تبين منال ؟؟؟
عبير : بعد إذنك ..
تركي : انتي تامرين أمر
عبير : مايامر عليك عدو
تركي وهو يمشي بالبيت ويقول : خليني اشووووفها ..
وصار ينادي : مناااااااال .. منااااااال
وعبير مركزة كل حواسها معاه وبصوته وأنفاسه وكل شي فيه
ورجع قالها : لحظة يمكنها تحت
عبير : معليه تركي تعبتك معاي
تركي وهو ينزل الدرج : افا عليك تعبك راحة عبير
عبير بنعومتها : تسلم
نزل تركي وصار يدور منال تحت وهو يغني بصوت رخيم :
من سنين .. إفترقنا من سنين
وابتعد كل في دربه
بس شوقه والحنين
شالهم في قلب قلبه
كنت أظنه ينسى حبي
أو يخونه يوم صبره
الله الله كيف ينسى
اللي قلبه حب مرة
ركزت عبير كل حواسها بكلمات الأغنية وحست انه كنه يقصدها بهالكلمات ودمعت عيونها وفتون طالعتها مندهشة !!!!
وشوي الا قال تركي : عبير !
مسحت عبير دموعها بسرعه وقالت : هلا تركي
تركي : مو لاقي أحد الظاهر كلهم طالعين حتى مرة أبوي مو لاقيها
عبير : اها مو مشكلة خلاص سلملي عليها
تركي : يووووصل ان شاء الله
عبير : اوكي تركي باي
تركي : عبير
عبير : هلا
تركي : خلينا نسمع صوتك دايم
عبير بالقوة كتمت تنهيدتنها وقالت : ان شاء الله تركي
لاحظ تركي ان صوت عبير فيه شي وقال : شفيه صوتك اتغير ؟؟؟
عبير : لا لا مافيني شي والله
تركي : أكيد ؟؟؟
عبير : اي والله مافيني شي .. يالله تركي اشوفك على خير
تركي : على خير .. مع السلامة
عبير : مع السلامة
سكرت عبير وعلى طول انفلتت دموعها وصارت تبكي من كل قلبها
قامت فتون مخترعة وهي تقول : وش صار فيك انتي انواع المشاعر بهالمكالمة شوي ضحك شوي حيا والحين دموع شفييييك ؟؟؟
عبير وهي تبكي : مايحس يافتون مــــــــــايحس !!
فتون : وعسى عمره ماحس تقعدين تبكين عشانه !!! بالطقاق الي يطقه هو على اخته
عبير : لانك ماتحسين بالي أحسه تقولين هالكلام !!
فتون : واضحة ياعبير تحبينه وهو مايحبك خلاص ليه تتعبين عمرك معاه اتركيه ولاتفكرين فيه !!
عبير وهي تقوم : وعلى بالك هالشي سهل ؟؟ كامبيوتر احنا اضغطي شي يشتغل واضغطي شي يمسح ؟؟؟؟
فتون :هههههههههههههههههههههههههههههه ياليتنا كذا والله وناسة
عبير : وناسة بعينك انتي الثانية
فتون : يالله عاااااااااد لا تعصبين بالله وقومي ننزل ناكل تراني جوعااااااااانة ونفسي بالي شريناه
التفتت عبير لها وضحكت وهي تقول : اي صح انتي مو دارية بالي صار !!
فتون : وشو ؟؟؟؟؟؟
عبير : خالد الحمار أكل غدانا كلللللله ؟
فتون نطت : ايش؟؟؟؟؟؟؟؟؟؟؟
عبير : هههههههههه شوي شوي .. والله اتهاوشنا وانتي نايمة وعاندني وأخذ الصحن كله غرفه وأكله !!!
فتون وهي تركض للباب : وجع ان شاء الله دايم يسويها فينا بس انا اوريه
عبير من وراها :هههههههههههههههههه تعالي فتون تعالي
فتون بمكانها من برا : وش تبين بروح أوريه هالحمار
عبير : انا قلتله عقابا لك انت الي بتطلعنا اليوم وطبعا بندفعه قيمة كل شي نبيييييييه
فتون : أحسسسسسسسن
ونزلت تحت تسكت جوعها بأي شي سريع لين يطلعون
بعد المغرب كانوا بالسيارة مع خالد ماشين لبيت خالتهم
وخالد يغني مع المسجل :
لي صاحبٍ خذني بزينه عن كل مزيونٍ ورعبوب
روحي غدت لامره رهينه والقلب من نظراته يذوب
غضٍ يعيش اول سنينه .. ومن الدلع له طبع واسلوب
خطرٍ علي ان شفت عينه .. من نور حسنه امزع الثوب
الشمس في طلعة جبينه والليل وسط العين مسكوب
والخد يلفح ياسمينه مثل الشفق في حزة غروب
انتهت الاغنيه وفتون الي قاعدة وراه قالت : خلّوووود باسألك سؤال
قصر خالد المسجل وقال : هو انتي لسه بتسألي .. انتي بالنسبالي ايه .. !
عبير وفتون : ههههههههههههههههههههههههههههههههههههههه
فتون : مو سائلتك انا وش بالنسبة لك لاني ادري اني ماخذة قلبك كله
خالد : ههههههه ليه شايفتني كاره حياتي عشان أعطيك قلبي ؟؟؟
فتون : الا تحبني غصب عليك
خالد : الحمدلله والشكر (( ويكلم عبير : هذي مادري شلون بتحب بيوم من الايام الظاهر بتبكس حبيبها بكوس عشان غصب يحبها
فتون : لا ياعمري انا حبيبي يجي يبوس ايدي عشان احن عليه واحبه وانا الي اصد وارفض ويترجاني وانا الي اعيي ومتى ماحكم مزاجي حبيته !!
خالد : أحـــــــــــــلى يالثقيلة ومنهو هذا تعيس الحظ ؟؟؟
فتون : عاشق الغبرا هازم البطحا
عبير :ههههههههههههههههههههههه وع عليك يافتون وش هالحبيب
فتون : اندري عنكم انتوا المهم لا تظيعون السالفة وقولي ياخالد
خالد : شتبين ؟؟؟؟
فتون : باسألك سؤال وتجاوبني بكل صراحة .. انت تحب مرام ؟؟؟؟
خالد رفع حاجبه مستغرب من سؤالها وقال : وش يخليك تسألين هالسؤال ؟؟؟
فتون : اشياء ملاحظتها وباتأكد منها
خالد : وشالي ملاحظته يالفاهمة ؟؟
فتون : الحين اسألك تروح ترد علي بسؤال ثاني !!! جاوبني عشان اقولك
خالد : لاء !
فتون : ماتحبها ؟؟؟؟؟؟؟؟؟؟؟؟
خالد : اقول لاء مو مجاوبك مو ماحبها
فتون : يعني تحبها هاهاهاهاها
خالد : مب صاحية انتي وعلى اي اساس حكمتي
فتون : قلتلك أشياء ملاحظتها
خالد : وشي طيب !!
فتون : دايم اشوف مرام ترتبك لما تكون معاك وتسكت وماتتكلم كثير وهذا يعني ان في شي بينكم
خالد : هذا يعني ان هي فيها شي مو انا يالذكية
فتون : يعني هي تحبك أجل
وقف خالد السيارة قدام بيت خالته وقال : فتون اهجدي ولاعاد تطرين هالكلام على لسانك مره ثانية
فتون : ليش طيب هذا يعني انك تحبها !!!!!!
عبير : هههههههههههههههه هذا يعني وهذا يعني .. والله صاروا اخواني محللين قلوب
خالد : والله ماغير هالخبلة اختك
فتون : طيب تشوف اذا ماكشفتكم
خالد : اقول خلي عنك هالخرابيط ودقوا على البنات ينزلون (( وفتح الباب يبي ينزل
عبير : وانت وين رايح ؟؟؟؟
خالد : بروح آخذ اغراض من فيصل وأرجع
ودق على فيصل وقاله ينزله تحت .. وفيصل فتحله الباب الخارجي
دخل خالد الحوش لقى مشعل يلعب كوره هو وهاني جارهم
مشعل : هلا والله خالد
خالد : هلابك كمل كمل لعب
ابتسم مشعل وكمل لعب وخالد واقف بالحوش ينتظر فيصل ويقلب بجواله الا شوي صقعت الكورة برجله !
دخل خالد الجوال بجيبه وهو يقول : ماشاء الله كورتك يامشعل مثل كورة الملاعب !
مشعل : اي والله قويـــــة لو تضرب فيها راس الكافر يســلم
خالد : هههههههههه يلا خذ .. (( وشات الكورة لهم بقوة ..
اتحمسوا العيال وشاتوها عليه ورجع شاتها عليهم بقوة أكثر وشوي ودخل معهم باللعب وصاروا يتشاوتون الكور ..
ومشعل وهاني استخفوا من الوناسة لان خالد لعب معهم
خالد عجبته الكورة وقوتها وحب يفرحهم ونوى يشوت عليهم الكورة بكل قوتـــــــــه ..
وركض بالكورة وهي قدامه وصار باب البيت وراه
هالوقت نزلت مرام قبل منى تمشي بالحوش رايحة السيارة ولا انتبهت لوجود خالد
وخالد كان داير ظهره وماشافها .. ويوم دار بسرعه شااااااااااات الكــــــــــــورة بكل قوة ..
وطارت الكووووووورة وصقعت بكل قوتها على وجه مرام من الجمب !!!!
وانصعق خالد !!!!!!
::
يؤيؤيؤيؤيؤ !! شالي سواه خالد بمرام وشالي بيصير فيها وكيف بيكون موقفه !!
سعود ابتدا مرحلة جديدة من حياته وش سالفة هالمظيفة الي لفتت نظره ؟؟
صالح وأخيرا حصل على الوسيلة الي بيوصل من خلالها لحنان .. طيب وش الأسرار الي بالمنتدى والي راح تفاجئه !!
عبير الي بكت من تركي .. ! ياترى دموعها واحساسها بمحله ؟؟
::
|
|
|
ٳل̨هي جملني بحلتين قلب رحيم وعقل حكيم ...
|
|