البارت الثالث عشـــر
ناصـر وصل البيـت واهوه داخل جان يرن تلفونه.... ( عادل.... يتصل بك )
اهوه كان ناقل كل الأرقام حق خطه اليديد بس استغرب شلون عادل يعرف هالرقم لان عمره ما دق عليه منه...بعدين تذكران الزين دقت من تلفونه...وشال الخـط...
عادل: السلام عليـكم
ناصر: وعليـكم السلااام...هلا بالحبـيب
عادل باستغراب: هلا والله!!! منو معاي؟؟
ناصر: افاا ما عرفتني من صوتي؟!
عادل: امممم والله جني عرفت بس مو متأكد!! ناصر؟!
ناصر: ايووه يبتها صح....شلوونك؟؟
عادل: اووووله ناصر بشحمه ولحمه داق علي!!!
ناصر: ههههههه والله سامحني ادري اني قطعتك فجأه
عادل: زين والله فكرت تدق علي,,,,انت الحين بالكويت؟
ناصر: اي والله بالكويت
عادل: اووف من متى؟!
ناصر: من حوالي شهر وشي
عادل: أفااااا يعني يا أخي تغير خط تلفونك وتسافر فجأه تكمل دراستك بره وبعدين ترجع الكويت وولا تقولي؟!
ناصر: والله سامحني لان صارت معاي ظروف وانشغلت وايد
عادل: انت تدري ان بيتكم اقبال بيتنا على طول؟! اشدعوه مرني الدوانيه.. سلم علي مو رفيجك انا؟
ناصر: عزيز وغالي والله وصح كان مفروض اعطيك خبـر بس لاني كانت حايس هالفتره
عادل: يعني هالموزراتي مااالتك؟؟؟
ناصر: اييي شفتهاا
عادل: ايي اكيد شفتهااا...خووش سياره والله...عاد طلعني فيها مره؟
ناصر: افااا عليـك بس جذي...اذا تبي أسلفك اياها بعد
عادل: تعجبـني... ياريــت والله ودي اجربهاا!!!!
ناصر: ما عندي مانع...السياره تحت أمرك
عادل: تسلم والله ...راجع زياره انت او شنو؟
ناصر: لا ويـن...خلاص رجعت اكمل دراستي بالكويت
عادل: لا والله!! ما مشى الحال بره؟
ناصر: لا صارتلي مشاكل وجذي فسحبت اوراقي ورجعت جامعة الكويت
عادل: زين والله وجامعة الكويت ما قالوا شي؟
ناصر: لا عادي اشوه خلوني ارجع اكمل دراستي اهني بس في وايد مواد راحت علي ما احتسبوها..
عادل: وي حسافه...يلا ما عليه
ناصر: الله كريم
عادل:انزين تعال تعال الحين الدوانيه بقعد معاك أكلمك شوي
ناصر: الحين!! والله توني راجع من الكليه...شرايك نخليها بليل؟
عادل: يلا اوكي...انا من بعد الساعه 9 راح اكون بالدوانيه
ناصر: اوكي تمام
عادل: عاد مو تكشت فيـني
ناصر: لا لا ان شاء الله اكيد ياي
عادل: يلا أشوفك على خيـر
ناصر: مع السلامه
شاف ناصر امه قاعده بالصاله وراح سلم عليها وحب راسها....
ام ناصر: ها شلون كان دوامك اليوم؟
ناصر: الحمدالله بخيـر
ام ناصر: شوي وراح نحط الغدا
ناصر: لا يمه ميخالف مالي نفس اكل
وصعد ناصر غرفته وعلى طول قط نفسه على الفراش من التعب ونام....
الزيـن وصلت البيت وشافت عادل وامها قاعدين في الصاله...
الزيـن: السلام عليـكم
ام عادل وعادل: وعليـكم السلام
وعلى طول قطت نفسها على القنفه ( الكنبه) من التعب...
ام عادل: شلون الدوام؟
الزيـن: زين الحمدالله
عادل: اي يمه شكنت بقولج..شكنت بقولج!!! نستني هذي...اي عرفت..تدرين ناصر ولد ييرانا رجع من السفر واليوم يايني الدوانيه
ام عادل انعفس ويهها: اهاا وشاللي رجعه؟
( الزيـن عدلت نفسها بالقعده وطالعت عادل تنطره يرد على امه لان صج تبي تعرف ليش رد)
عادل: مادري يقول صارتله مشاكل اهناك ورجع يكمل دراسته اهني
ام عادل: اي الله ما يرضى
عادل: ليش؟! على شنو ما يرضى؟!
ام عادل: هااا!! لا لا ولا شي...يلا ما يعتوا؟!....خل احطلكم الغدا
عادل: اي يمه تكفيييين حدي يووعااان
الزيـن : انا صاعده ابدل هدومي وراده
صارت الساعه حوالي 6 المغرب وقام ناصر من النوم ولبس وطلع رايح النادي....
طول الطريج يفكر باللي صار مع الزيـن اليوم....ما كان عاجبه الطريقه اللي عاملته فيها بس ما يلومها....وبنفس الوقت فرحاااان انه خذا وعطى معاااهاا...تذكر اول واشتاق حق ذيج الأيام الحلوه لما كانوا يسهرون بالساعات بس يسولفون.....
ناصر: أحبـــــــــــج
الزيـن: شكثرر؟؟
ناصر: احبــج كثـر دوس الأرض
الزيـن: بس؟
ناصر: كثر ما ارمشت عيون الناس
الزيـن: وبعد؟
ناصر: كثـر ما تنقال الكلمه
الزيـن: أي كلمه؟؟
ناصر: أحبـج أحبج أحبج
في بيت بوعادل.....
الزيـن دقت على حنان
الزيـن: حنون خل نطلع مكان
حنان: الحين يايه تقوليلي...الساعه 6:30 عبال ما نلبس ونوصل الا صارت الساعه يمكن 8
الزيـن: ويعني؟؟
حنان: مادري عادي انا اهلي ما يقولون شي بس لا نتأخر عن الساعه 10
الزيـن: اي بس نتعشى ونرجع
حنان: اوكي...انتي تمريني ؟
الزيـن: اي انا امرج
ولبست الزيـن وكشخت وبعدين تذكرت انها ما قالت حق عبدالرحمن...ودقت عليه
الزيـن: الوو...عبدالرحمن قلبي انا بطلع الحين اوكي
عبدالرحمن: وين بتروحين؟
الزيـن: بروح بس اتعشى مع حنون وراده
عبدالرحمن: اوكي حبيبتي عاد ديري بالج على نفسج وحاولي ما تتأخرين بره
الزيـن: اي اي بس عشا ورادين
عبدالرحمن: انا بمر دوانية اخوج اليوم
الزيـن: اها صج!! الساعه جم؟
عبدالرحمن: مادري والله يمكن على 9:30 او 10
الزيـن: اها اوكي...يلا حبيبي تامريني على شي؟
عبدالرحمن: لا قلبي تسلميــــن ابي بس سلاامتج
الزيـن: مع السلامه
عبدالرحمن: مع السلامه حبي
وطلعت الزيـن من بيتها ومرت بيت حنان وخذتها....
الزيـن: ما تدرين شنو صار معاي اليوم
حنان: شنو صار؟؟؟
الزيـن: تخيلي مو صح انطفى جهازي وما فيه شحن
حنان: اي
الزيـن: وانا ماشيه بالسياره جان توقف علي فجأه ما فيها بانزين وكنت متوووهقه مو قادره ادق على احد
حنان:وييييييي,,,ومحد وقفلج؟
الزين: امبله وقفولي بس ما تتوقعين منو اللي ساعدني
حنان: منووو؟؟؟
الزيـن: ناصر
حنان: حلللفي
الزيـن: والله تخيلي
حنان: شصار قوليلي
الزيـن: اهوه اول شي ياي يبي يساعدني بس ما عطيته ويه وقلتله ما ابي منك شي وطلبت منه تلفونه ادق على احد
حنان: اي وبعدين؟
الزيـن: على حظي لا عادل ولا عبدالرحمن قاعدين يردون علي فاخر شي خليت هالحقير يساعدني
حنان: ههههه وبعدين شصار؟
الزيـن: بس ما صار شي سوالي السياره...بس كسر خاطري ما كنت قاعده اعامله زين ولا حتى شكرته
حنان: يستاهل هالحقير
الزيـن: حنان لا تقولين عنه حقير
حنان: بسم الله انتي توج قايله عنه هالكلمه
الزيـن: انا اقول عنه عادي بس انتي لو سمحتي لا تسبينه
حنان: امبييييييييه بذبــــحج....زينوووو لا يكون رجعتي تحبينه؟
الزيـن: انا متى أصلا ما حبيته
حنان: زيــن انتي من صجج؟؟!!! شفيييج انتي مخطوبه حق واحد ثاني
الزيـن: ادررري يعني بس شسوي غصبن علي
حنان: ماكو شي غصبن عليج....زين وين كلامج اول؟؟ ما قام يعنيلي وما احبه وما ابيه وخل يولي
الزيـن: زين اذا انا الحين احبه مو معانته اني ابيه وابي ارجعله
حنان: عيل شنو؟
الزيـن: احبه غصبن علي...حنان كان بينا عشره وذكريات وايد ما اقدر اتخطاها بسهوله
حنان: المهم انتي ساعدي نفسج
الزيـن: ادري حنان...مستحيل اسامحه على اللي سواه فيني...وانا مو بكيفه متى ما يبيني يبيني....وبعدين أصلا يمكن حتى ما يبيني وما قام يحبني
حنان: مادري والله على نظراته لج شكله بعده يحبج
الزيـن طالعت حنان بسرعه فرحانه من اللي قاله
الزين: والله؟؟؟ حسيتي بهالشي؟
حنان: الله يهداج شفيج تصرقعتي؟؟
الزيـن: هااا!! لا انا عادي كلش
حنان: والله انتي مشكلتج مشكله
ووصلوا المطعم وقعدوا ياكلون....
ناصر كان راجع البيت وتسبح وبدل وصارت حوالي الساعه 9:30 وطلع رايح دوانية عادل....
بينه وبين نفسه: غريبه وين سيارة الزيـن!! الساعه 9 وشي وبعدها مو في البيـت!!
ودخل الدوانيه وقامله عادل...
عادل: يا حيالله نويصر
ناصر: هلا والله هلا
وسلموا على بعض وقعدوا يسولفون....
ناصر: والله لك وحشه
عادل: وانت اكثر والله...جذي يا ناصر جذي
ناصر: شنو؟
عادل: جذي تقولي بتقدم حق اختك وانا معجب فيها وابيها وبعدين اكتشف من امي انك هونت على الزواج؟!!! صدمتني فيك
الصراحه
ناصر ارتبك شوي:لان انقبلت فجأه بالكليه عندهم وما كنت متوقع يقبولني وكل شي صار بسرعه واضطريت أسافر على طوول
عادل: انزين اشدعوه جان كلمتني..عطيتني خبر
ناصر: الصراحه ما عرفت شقولك!! كنت مفتشل
عادل: لا من صجك!!! الزواج قسمه ونصيب وما صار شي
ناصر: ميخالف سامحني
عادل: لا عادي خلاص يبه شي قديم وطااف بس وقتها تضايقت شوي منك
اعتفس ويه ناصر فجأه لما شاف عبدالرحمن داخل....
عبدالرحمن: السلام عليــكم
ناصر بينه وبين نفسه: هذا اللي بنتفه الحيــن....شيايبه!!
واضطر ناصر يقوم يسلم عليه لان شافه ياي صوبه
وقعد مع عادل وناصر....
عادل: منور منور يالعبد
عبدالرحمن: بوجودك حبيبي
عادل: شلونك؟؟ان شاء الله كل شي تمام؟
عبدالرحمن: اي الحمدالله تمام التمام
ناصر طول الوقت ساكت ماله خلق ياخذ ويعطي معاه...
عادل: ناصر تدري ان عبدالرحمن خطيب الزيـن اختي
ناصر يسوي روحه متفاجئ من الخبر: لااااه صج!! مبروووك
عبدالرحمن : الله يبارك فيــك...والله احسن شي سويته اني خطبت...عايش احلى اياام حياتي
ناصر حس بدمه يغلي من كلام عبدالرحمن....
ناصر: ومتى الزواج؟
عبدالرحمن: بعد راح نملج بعد حوالي شهرين وبعدين الزواج عقب ما اتخرج
ناصر قام يحس انه حرررااان...ومخنووق....ومو قادر يقعد بعد
ناصر: موفقين ان شاء الله....عن اذنكم حاس اني دايخ شوي
عادل: أفا يا ناصر....ما صارلك الا ثلث ساعه قاعد
ناصر: ميخالف لان وراي محاضره من صباح الله خير
عادل: على راحتك...عاد خلنا نشوفك
ناصر: اي ان شاء الله ولا يهمك
ناصر: أشوفكم على خيـر
عادل وعبدالرحمن: على خير ان شاء الله
ناصر طلع على طول من الدوانيه واهيه يمشي بسرررعه والزين قاعده تدخل سيارتها من مدخل البيت عشان توصل حق الجراج اللي صاير داخلي شوي...والدوانيه قريبه من مدخل البيت الرئيسي اللي تدخل فيه السيارات >> عاد تخيلو مو عارفه اشرح عدل خخخخ
المهم ناصر اهوه وطالع بسرعه جان على طوول اتيي بويهه السيااره وكانت دايسه وتصروع بغت تدخل فيـــه واهيه وقفت فجأه كانت على وشك تدووووسه خلاص....وقلبها يرقع يرقع حيـــل وجسمها كله ينتفض من الخوووف ونزلت من السياره
الزيـن: امبيه حشتك؟؟؟
ناصر قلبه قاعد يطق بسرعه من الخرعه وقاعد يتنفس بسرعه: اشدعوه جذي داايسه؟!!
الزيـن واهيه مخترعه عليه: مادري يعني!! ما شفتك!! اسفـه
ناصر بعصبيه: كنتي بتدوسيني خلاص
الزيـن تتكلم واهيه خايفه: يعني انت بعد ما شفتني يايه!!!
ناصر بعده معصب: والله ما توقعت في سياره راح تدخل الحين الساعه 10 بلييييييل
الزيـن انحرجت وعارفه ان اللي قاله نغزه حقها....
الزين بنرفزه : والله عاد انا أرجع البيت بكيفي وبأي وقت ابي....على العموم حصل خيـر...مت؟؟مت؟؟ لا ما مت!!!
ناصر : ان شاء الله تسوقين عدل مره ثانيه
وعطاها نظره ومشى......
واهيه دخلت البيـــت وصعدت غرفتها وقلبها بعده يدق يدق حيــــــــل
وبعدين فجأه قامت تضحك على اللي صار توه....
وفصخت هدومها وخذت شاور وخلصت...وطول الوقت في بالها الموقف...
بينها وبين نفسها: يا حلاته واهوه معصـــب....مو عاجبه بعد اني راده متأخرر...وااااي هذا ناصر نفسه ما تغيـــر...
امبيــه شلون بغيـت ادوسه توه!!! اسم الله عليــه اشوه ان ما صار فيـه شي جان والله مـت...
وانزلت تحت وراحت الصاله شافت امها....
الزيـن: قوه يمه شلوونج؟؟
ام عادل: هلا حبيـبتي...تمام..شلون طلعتج مع رفيجتج؟؟
الزيـن: تمام والله ونااسه
ام عادل: تمام الحمدالله....زين بغيت أسألج
الزيـن: هلا يمه قولي
ام عادل: شنو شعورج لما عرفتي ان ناصر رجع؟؟؟
الزيـن: امممم عادي ولا همني الموضوع
ام عادل: والله؟؟؟
الزيـن: اي يمه خلاص نسيته
ام عادل: اشوه الحمدالله حبيبتي ريحتيني
دق تلفونها ( حمني يتصل بك) وقامت من مكانها رايحه غرفتها
الزيـن: هلا حمني
عبدالرحمن: ها رجعتي البيت؟
الزيـن: اي انا بالبيت
عبدالرحمن: حسافه جان قلتيلي انج يايه جان طلعت من الدوانيه اول ما تيين عشان أشوفج,,,ولهااان عليييج
الزيـن: امبيه لا يكون اخوي يمك؟
عبدالرحمن : لا لا لاهي مع الربع...بعيد عنه انا
الزيـن: اي اشوه....مادري والله ما حبيت أزعجك انت وقاعد مع ربعك
عبدالرحمن: انتي انتي تزعجييني!!!! من صجج!! انا ما اصدق اسمع صوتج او أشوفج
الزيـن: يا بعد عمري...ميخالف باجر راح أشوفك بالكليه
عبدالرحمن: اي ان شاء الله...نفس المكان؟؟
الزيـن: نفس المكاان
عبدالرحمن: تمااام...يلا حبيبتي تصبحين على خيـــــر
الزيـن: وانت من أهله قلبي
وصكت الخط و انسدحت على الفراش.....قاعده تشوف المسجات اللي واصلتلها بالبلاك بيري ماسنجر
بعدين فجأه جان تتذكر الورقه اللي كتبت فيها رقم ال pin حق البلاك بيري ناصر...وراحت على طوول حق جنطتها تدور الورقه ولقتها وقعدت تطالعها
وتفكررر...أضيــفه عندي او لا؟!؟! أضيــفه او لا!!! خل أضيــفه ما راح يعرف أصلا منو اناا
( طبعا كلكم اعتقد تعرفون تلفون البلاك بيري وسوالف البلاك بيري ماسنجر وكل واحد عنده بلاك بيري يقدر ياخذ الpin حق بلاك بيري ثاني ويضيفه عنده بالبلاك بيري ماسنجر ويعرفون بعض بالنكات اللي حاطينها...وصاير تقريبا نفس المسن
قررت تضيـفه بس اول شي شالت الاسم اللي حاطته ( ZoOZOo)
وحطت بداله نك ثاني عشان لا يعرفها ( DaLa3 )
و تقوم تضيفه عندها وناطره الأكسبت منه....دقايق جان ينضاف عندها بال ....contacts
يطلع !!! ناصر: منو Dala3
بعدين اهيه دخلت كلمته....( طبعا الكلام كله بالانجليزي معرب) >> عشتو
Dala3: هاااااااي
NaSser: هااي
Dala3: شلونك؟؟
NaSser تمام... عفوا بس منو معاي؟
Dala3: معجبـه
NaSser: من وين خذيتي ال pin مالي؟
Dala3: من احد
NaSser:اهاا!! انزين منو معاي؟؟
Dala3: يعني ضروري تعرف؟؟؟
NaSser : اي أبي أعرف
Dala3:مابي أقول
NaSser: شوفي انا مو فاضي حق هالسوالف.. بحذفج يلا باي
Dala3 :لحظه لحظه
NaSser :نعم!! اشتبين؟؟
Dala3 : أبيــك
NaSser: اشتبين فيني؟
Dala3: أحبـــك....
تــم الجــزء الثـالث عشر
|