جيتك بعز انكسارك / وبمهابة شجاع
لأنك تركت البشر عنّك ،،،،، وطريتني
ماهان دمعك هذاك اليوم عقب انقطاع
وماقلت عقب المفارق ،،، ليه مريتني
ركنت ماصار مِنك / وجيت لك باندفاع
عشان تدري انا وش كنت ،،،، لاجيتني
وأنهيت لك كل مابك / من كدر والتياع
وانت اللي من قبل بعت القلب وانهيتني
قادر اخليك ترجع / بانكسار وضياع
وتحتار مابين ياليته وياليتني
وقادر أجاريك بالحيله / ولي الذراع
واضحك واسوي سواتك يوم جافيتتي
كلمت قلبي على انه يهملك / ماستطاع
جابتك الايام / لكن وين وديتني
ردتني ايام كانت بيننا ،،،، باقتناع
صدقني منت اللي في طلبتك رديتني
رديت ابنهي لك احزانك وابطوي الشراع
ماهو تواصل وحبيتك وحبيتني
ماعاد ابي من يمينك غير اشارة وداع
ومسامحك ماني ابضايق ولا اشقيتني
انا اعرف ان الغلا غيرة وموقف شجاع
والا انت يوم الوجيه اتشين خليتني