الجزء [3] من قصة أنـــا وصغيري

وردوا البيت ....

الجزء السابع
===============
ثاني يوم العصر .. كانوا ام احمد ومهره في الصالة .. ام احمد ترمس بالتلفون ومهره تدرس
ام احمد: افااا عليج .. اكيد بتوافق .. لا تحاتين .. تركي السالفة علي .. ان شاء الله .. برد لج خبر .. هيه .. في اي وقت.. هههههه .. طبعا .. خلااص .. مع السلامة
في حجرة احمد..
احمد: هلا سعيد
سعيد: اهلين
احمد: شحالك؟
سعيد: بخير
احمد: شو بلاك؟؟
سعيد: احمد تقدر تيي عندي الحين؟؟ اباك في موضوع مهم
احمد: خير؟؟
سعيد: يوم تيي بقول لك
احمد: اووكي خلاص ربع ساعة واكون عنك
سعيد: خلاص عيل اترياك
احمد: يالله عيل مع السلامة
سعيد: مع السلامة
في الصالة ..
مهره: يمه .. منو هاي؟
ام احمد: عمتج
مهره: اي وحدة؟؟
ام احمد: عمتج حصة .. ام خالد
مهره: هيييييييه
ام احمد: ما تبين تعرفين شو تبا؟
مهره: له .. مايخصني فيها
ام احمد: مهرووه إلي ترمسين عنها عمتج
مهره: انزيين
ام احمد: مهره
مهره: خير يمه
ام احمد: شرايج في خالد؟
مهره: منو خالد؟
ام احمد: مهرووه عن الاستهبال .. خالد ولد عتمج حصة
مهره: هيه شو بلاه؟
ام احمد: شرايج فيه؟
مهره: من اي ناحيه يعني؟
ام احمد: من كل النواحي
مهره: ممم .. ياهل .. جاهل .. فاشل ..
ام احمد: بس بس بس .. هذا ولد عمتج شو هالكلام إلي اسمعه منج؟
مهره: هذا رايي وبس
ام احمد: مهرووه جاوبيني شرايج في خالد؟
مهره: قلتلج .. انا ما ادانيه ولا اطيقه ولا ابي اجوف ويهه .. خقاق ورافع خشمه على شو مادري راسب وما عنده شهادة ثانوية .. وفوق كل هذا ما يشتغل
ام احمد: سمعيني .. عمتج دقت علي توها وتقول ان الولد يبي يخطبج
مهره: في عينه .. يحلم هذا
ام احمد: انتي إلي تحلمين انا عطيت عمتج كلمه وخلاص
مهره: لا والله؟؟ منو إلي بيتزوجه انا ولا ..
ام احمد: ولا منو؟؟ تقصديني انا يالدكتورة؟؟
مهره: لا يمه انا ماقصدت جيه .. بس خله يجوف وحدة ثانية
ام احمد: يبي ياخذ وحدة من العيلة
مهره: يا كثرهن بنات عيلتنا
ام احمد: بس هو يباج انتي
مهره: انا ما اباه
ام احمد: مب ع كيفج
مهره: يمه بس ها مب لعبه .. انا ما ادانيه
ام احمد: السالفة انتهت خلاص .. انا موافقه
مهره: انا مب موافقه
ام احمد: كيفج
مهره: ابوي يعرف؟
ام احمد: اليوم برمسه
مهره: واحمد؟
ام احمد: شو بلاه؟
مهره: يعرف؟
ام احمد: لأ
مهره ودموعها في عينها : انا بسير حجرتي
ام احمد: زهبي عمرج .. تراهم باجر بيون عنا
طلعت مهره وع الدري جافت احمد اخوها
احمد: مهروووه شو بلاج؟؟ ليش تصيحين؟
ما رديت عليه وسارت حجرتها بسرعة
نزل احمد بسرعة وسار عند امه وسألها
احمد: يمه مهره شو بلاها؟؟
ام احمد: ماشي
احمد: جفتها تصيح .. كتبها هني .. ما شلتهم وياها
ام احمد: قلتلك ماشي .. بس خالد ولد عمتك حصة يبي يخطبها وانا وافقت
احمد: منو؟؟؟؟؟؟؟ خالد؟؟؟؟ هالخبل خالد؟؟ يفكر في مهرووه ؟؟ ههههههههههههههههه
ام احمد: حمود .. شو هالكلام؟؟ شو بلاكم انتوا ع الريال
احمد: يمه ما لقيتوا غير خالد؟؟ هذا اخبل عنه ماشي
ام احمد: بس عاد.. السالفة انتهت وباجر بيون وكل شي بيتم
احمد: ومهره موافقه؟
ام احمد: رايها مب مهم
احمد: شوو؟؟ رايها هو اهم رايي لازم هي توافق وبعدين نحن
ام احمد: يالله عليكم يالمتخرجين.. ها تفكيركم؟؟ .. خالد ولد عمتها ولازم توافق عليه شو بيقولون عنا الناس
احمد: هذا إلي هامنكم .. كلام الناس؟.. ما تهمكم حياة بنتكم؟ بتعيش مع واحد جاااهل وما يعرف شي .. رااسب ومب فاهم شي
ام احمد: هذا إلي همكم ناجح وراسب
احمد: هيه طبعا .. يعني مهروه السنة الياية بتتخرج من كلية الطب يعني دكتورة وخالد هذا لين الحين ما يشتغل بالعقل يعني هذا ما ينفع لمهره
ام احمد: السالفة انتهت خلاص
احمد: لا مانتهت .. ابوي يعرف؟
ام احمد: يوم بينش من رقاده بقول له
احمد: هيييه .. انا بطلع وبجوف اختي
طلع احمد واخذ كتب مهره وياه .. وسار حجرة مهره دق الباب
احمد: مهره فجي انا احمد
فجت مهره الباب .. والدموع تارسه عينها
احمد: مهروووه .. ما تسوى عليج خلهم برايهم
مهره: شو برايهم؟؟ .. انت تعرف شو بيسون؟
احمد: هيه اعرف بس لا تخافين ما بيستوي شي
مهره: شو ظمنك؟
احمد: تركي السالفة علي وخلاص
مهره: امي قالت انهم بيون باجر ... مابي مب ع كيفهم .. هذي حياتي انا
احمد: ما عليج .. قلتلج تركي السالفة علي .. ولا انتي ما تثقين فيني؟
مهره: امبلا اثق فيك
احمد: خلاص عيل .. غسلي ويهج .. وهذا هي كتبج .. انا بسير الحين .. هيه صح راشد عنده واجب انا تميت وياه وخلص نصه .. تمي وياه شوي لا تخلينه يطلع ويلعب لين ما يخلص كل إلي عليه
مهره: ان شاء الله ... انت وين بتسير؟
احمد: سعيد داق علي .. يباني في سالفة مهمه
مهره: سالفة مهمه؟؟ وسعيد؟؟ .. عرفت
احمد: هههههههه .. شو عرفتي؟
مهره: يباك تسير وياه مكان وتحاوطون .. ماعنده سالفة
احمد: شدراج؟
مهره: اعرفه
احمد: هههههههههههه زيين .. يالله تآمريني بشي؟
مهره: سلامتك ..
احمد: هيه صح اذا ابوي نش دقي علي
مهره: ان شاء الله
طلع احمد وفي الطريج تم يفكر ويقول: غريبة اول مرة سعيد يرمسني بهالطريقة .. السالفة اهم من طلعه وحواطه .. اكيد يبي شي
في بيت سعيد
سعيد: وينك تأخرت قلت لي ربع ساعة .. مرت ساعة إلا ربع
احمد: ما عليه اسمح لي بس استوت سالفة
سعيد: خيير؟؟
احمد: لا ماشي
سعيد: لا قوول .. راشد فيه شي؟
احمد: لا ماشي .. راشد ما يخصه في السالفة
سعيد: عيل؟؟
احمد: مهره
سعيد: مهره ؟؟ شو بلاها؟؟
احمد: شو فيك؟؟؟ ... مافيها شي
سعيد: توك تقول مهره
احمد: ماشي .. امي تقول لها لازم توافقين على خالد ولد عمتي
سعيد: خالد؟؟ .. هذا ال.....
احمد: هيه ال.....
سعيد: يبي يخطب مهره؟؟ .. هذا يحلم؟؟
احمد: هههههه الظاهر
سعيد: ومهره موافقه؟
احمد: لا مسويه لنا مناحة في البيت.. امي تقول لها لازم توافقين عليه وهو ولد عمتج ومن هالكلام .. وهم بيون باجر .. عسب يعلنون الخطوبة
سعيد: بهالسرعة؟؟
احمد: جفت عاد .. خططوا وكل شي والحين قالوا لنا
سعيد: هيييه
احمد: خير ان شاء الله .. هيه صح كنت تباني في موضوع مهم
سعيد: لا ماشي
احمد: سعيد؟؟ .. يبتني من بيتنا وتقول سالفة مهمه والحين ماشي؟؟
سعيد: هيه ماشي يعني السالفة مب مهمه وايد .. كنت بقول لك اني بسير دبي تيي وياي؟
احمد: ههههههههههههههههههههههههه
سعيد: ليش تضحك؟؟
احمد: ههههه.. لا ماشي.. بس يوم قلت لمهره ان سعيد يباني في موضوع مهم قالت لي اكيد يباك تطلع وياه وتحوطون
سعيد: هههههههههههههه هيييه
احمد: انا ماقدر ايي وياك باجر
سعيد: هيه .. عسب جيه قلت لك ماشي خلاص
احمد: المرة الياية ان شاء الله .. بس قول لي اذا كانت السالفة فيها حواطه ولا شي
سعيد: هههههه ان شاء الله
احمد: الظاهر ان ابوي نش من الرقاد
سعيد: شدراك؟
احمد: مهره اتصلت
سعيد: هييه
احمد: انا برد البيت .. اجوفك باجر في الدوام
سعيد: ان شاء الله
احمد: يالله مع السلامة
سعيد: مع السلامة
طلع احمد من بيت سعيد .. وتم سعيد في حجرته يفكر بكلام احمد ويقول: دامه ولد عمتها خطبها خلاص بيخلونها توافق .. بنسى السالفة خلاص .. بنسى مهره ... بنساها
وصل احمد البيت ولقى راشد يلعب
احمد: رشود خلصت واجباتك؟
راشد: هيه خلصتهم .. بابا
احمد: هلا
راشد: بابا ابا بلي ستيشن تو
احمد: بشتري لك بلي ستيشن ثري
راشد: مابا ثري .. ابا تو
احمد: انا بشتري لك ثري
راشد: مابا .. ابا تو
احمد: هههههههههه ثري احسن
راشد: ابا توووو
احمد: يالذكي .. اصلا ماشي ثري
راشد توه استوعب السالفة: ههههه هيه صح ماشي .. متى بتشتريلي؟
احمد: مممم يوم ما يكون عندي شغل
راشد: انت كل يوم عندك شغل
احمد: لا يوم الخميس والجمعة ما عندي شغل
راشد: خلاص .. بس لا تنسى
احمد: ان شاء الله
راشد: بابا
احمد: خير بابا؟
راشد: لا ماشي
احمد: شو بلاك؟؟
راشد: نسيت
احمد: هييه .. خلاص يدك نش ولا بعده؟
راشد: هيه نش ... هيييه تذكرت
احمد: شوو؟؟
راشد: اليوم واحد اتصل وكلمني قالي انه يحبني وااايد وانه يبا يشلني وياه
احمد: نعم؟؟؟ .. منو هذا؟
راشد: ماعرف .. بس هو قال لي انه يحبني وانه بيشتري لي إلي اباه
احمد: وانت شو قلت له؟
راشد: ما قلت له شي
احمد: شو ما قلت له شي ؟؟
راشد: ماعرف انا سكت
احمد: متى اتصل؟
راشد: يوم انت طلعت من البيت
احمد: هييه .. وبعدين؟
راشد: بعدين عمتي مهره سحبت مني التلفون وقالت الووو بس هو قفل
احمد: هييه .. وما جفتوا الرقم؟؟
راشد: مادري عمتي مهره تعرف
احمد: خلاص انا بسير وبسألها.. انت دش داخل ولا تطلع برع
راشد: ليش؟؟
احمد: سوي إلي اقوله لك وخلاص
راشد: والبلي ستيشن؟
احمد: بشتريه لك
دشوا احمد وراشد .. وطلع احمد حجرة مهره بسرعة
احمد: مهره ... صج إلي سمعته من راشد؟
مهره: شو قال لك؟
احمد: عن هذاك إلي رمساه اليوم؟
مهره: هيه صج
احمد: وما جفتي الرقم؟
مهره: امبلا .. بس الظاهر انه متصل من تلفون عمومي
احمد: منو هذا بعد .. من وين طلع لنا؟
مهره: ما ادري انا ما حبيت اقول لك ع التلفون عسب ما تخاف وتسوق بسرعة
احمد: ما عليه ما صار شي .. بس منو هذا .. ما سمعتي صوته ولا شي؟
مهره: لا .. انا يوم قلت الوو قفلوا .. تعرف انه من جم يوم ما ادري منو يتصل ويقفل
احمد: صج؟؟؟
مهره : هيه .. انا لاحظت هالشي وميره بعد
شوي ويدش راشد الحجرة
راشد: بابا جوف شو لقيت .. بلي ستيشن يديد .. مكتوب عليه اسمي جوف ر ا ش د
احمد وهو معصب: رده لنفس المكان إلي لقيته فيه
راشد: كان عند باب البيت
احمد: مب انا قلت لك لا تطلع برع
راشد: انا ما طلعت .. بس مادري منو دق الجرس ويوم فجوا الباب لقيته عند الباب
احمد: هييه
مهره: منو هذا بعد؟؟ .. من وين طلع لنا الحين
احمد: مادري بس لازم اعرف هالشي بسرعة
نزل احمد تحت بسرعة وسأل امه
احمد: يمه ماجفتي منو إلي ياب هذا ؟؟ ..
واشر ع البلي ستيشن
ام احمد: لا ماجفت احد
احمد: هييه خلاص .. ابوي وينه؟
ام احمد: في حجرته
احمد: انا بسير له الحين

الجزء الثامن
===============
في بيت سعيد
سعيد يالس في حجرته بروحه ويفكر ... قطع تفكيره صوت امه
ام سعيد: سعيد يمه .. شو بلاك يالس في حجرتك؟ مب من عوايدك
سعيد: لا ماشي بس طفران شوي .. وقلت بيلس شوي
ام سعيد: احمد فيه شي؟؟
سعيد: لا ماشي .. ليش؟؟
ام سعيد: عقب ما طلع من عندك وانت يالس بروحك .. قال لك شي ضايجك؟
سعيد: لا ابد .. حمود ما يضايجني
ام سعيد: هييه .. سعيد ابي افاتحك في موضوع
سعيد: خيير ؟؟
ام سعيد: سعيد انت كم عمرك الحين؟؟
سعيد: هههه شو هالسؤال الغريب؟؟
ام سعيد: رد على سؤالي
سعيد: 27 ... والشهر الياي بدش 28
ام سعيد: هييه
سعيد: ليش؟؟
ام سعيد: ماتجوف انك بعد سنتين بتدش في الثلاثينات
سعيد: هيه صح
ام سعيد: وانت بعدك مب معرس
سعيد: ..........
ام سعيد: سعيد انت ولدي الوحيد .. ابي اجوف عيالك قبل لا اموت
سعيد: لا يمه لا تقولين جيه الله يطول في عمرج
ام سعيد: جوف احمد ربيعك عرس وعنده ولد
سعيد: ان شاء الله يمه ان شاء الله
ام سعيد: والمعنى؟؟
سعيد: إلي تجوفينه
ام سعيد: صج؟؟؟
سعيد: هيه
ام سعيد: شرايك في بنت خالتك نورة؟؟
سعيد: ماشاء الله عليج .. حاجزة ومزهبه كل شي
ام سعيد: هههه يا وليدي انا امك وابي افرح فيك
سعيد: إلي تجوفينه
ام سعيد: خاطري ايبب
سعيد: ههههههههه .. خذي راحتج
ام سعيد: بوفرها حق يوم عرسك
سعيد: ههههههههههه
ام سعيد: خلاص انا برمس خالتك واذا وافقت البنية بنسير على طول ما بأجل شي
سعيد: اووكي
طلعت ام سعيد من حجرة ولدها وهي مستااااانسه .. والدنيا مب واسعتها وسارت حجرتها وتمت ترمس اختها عسب تخطب بنتها حق ولدها سعيد
في حجرة سعيد ...
تم سعيد يفكر بإلي استوى الحين وانه وافق على بنت خالته .. ومهره؟؟؟ .. قال في خاطره مهره بتعرس.. بتوافق على ولد عمتها.. ما تقدر ترفض ابدا خاصة انه واحد من اهلها .. وانا لازم انساها .. لأنها ما بتكون لي .. هي ما تفكر فيني ابدا .. تعتبرني اخوها.. انا تأخرت واايد .. لحظة انا ماعرف اذا كانت بتوافق علي ولا لأ ؟؟ ... ماظن .. الله يهنيها ويوفقها ..
في حجرة مهره ..
مهره يلسه ع مكتبها وحاطه الكتب جدامها وتفكر وتقول في خاطرها .. شو إلي بيستوي فيني؟؟ امي تباني اوافق على ولد عمتي.. خالد.. خالد الخبل .. انا ما ادانيه .. ماتحمله كيف يبوني اوافق عليه واعيش وياه طول عمري ماقدر .. انا شو بلاني؟؟ خالد ولد عمتي بس انا مادانيه.. ابوي .. ابوي بيخليني اوافق على ولد اخته .. انا ماقدر .. هذي حياتي وانا إلي بعيشها مب هم .. ليش ما يبون يفهموني ..
احمد كان في حجرة ابوه ويناقش وياه موضوع اخته مهره
احمد: يبه دريت؟
بواحمد: لأ شو صار؟
احمد: يقال .. ان ولد اختك المحترم خالد .. يبي يخطب بنتك وحبيبه قلبك .. الدكتورة مهره
بواحمد: شوووو؟؟ ومنو قال لك هالكلام؟؟
احمد: ام احمد
بواحمد: متى؟
احمد: ممم اليوم .. بس شكلهم مخططين لهالسالفة من زمااااااااان
بواحمد: هيييه .. حمود سير وازقر امك وانت سير عند ولدك
احمد: يعني طرده
بواحمد: هيه يالله بسرعة
احمد: ان شاء الله ... نسوي كل شي ويطردونا
بواحمد: شو قلت؟؟
احمد: ماشي ماشي
بواحمد: سمعتك
احمد ابتسم وطلع بسرعة ... نزل تحت وسار عند امه
احمد: يمه ابوي يباج فوق في حجرته
ام احمد: ليش؟
احمد: ماعرف سيري عنده وبتعرفين
ام احمد: اعرف سوالفك اكيد قلتله
احمد: تراه في كل الاحوال بيعرف
ام احمد: انزين انزين .. وطلعت عند ريلها
بواحمد: صج إلي سمعته من احمد؟؟
ام احمد: هيه صج .. اختك تبا تخطب بنتي حق ولدها وانا وافقت
بواحمد: وانا مالي كلمة في هالبيت؟
ام احمد: حشى عليك .. اذا انت ما وافقت خلاص هالعرس ما بيتم
بواحمد: الراي راي مهره .. مب رايي انا ولا انتي
ام احمد: يا يوسف.. مهره بنتنا ونحن نعرفها عدل .. حرام عليك يا ريال البنية الحين عمرها 23 ولين الحين ما عرست.. مريم اختها عرست وعمرها 19 .. انا ابي اضمن مستقبلها .. ابي اجوف بنتي في بيت ريلها قبل لا اموت
بواحمد: هيه بس مب بهالطريقة .. تجبرين البنية
ام احمد: يوسف ..انت تعرف بنتك عدل وتعرف تخصصها .. وتعرف اننا نحن في عيلتنا نرفض هالتخصص .. وبنتك تحدت الكل.. اونها تبا تستوي طبيبة.. انت تعرف ان اي بنية تختر هالتخصص عندنا ما تعرس .. انا ما صدقت متى طلبها ولد عمتها.. حرام عليك لا تضيع هالفرصة عليها .. حتى اذا جبرناها .. بس بعدين بتعرف هي اننا كنا نفكر في مصلحتها
بواحمد: هيه بس هالكلام تقولينه يوم البنية تكون موافقه
ام احمد: وليش ما توافق؟؟ ولد اختك شو قاصره؟
بواحمد: ماعرف .. يمكن ما يعجب بنتج .. وبعدين على سالفة الطب .. انا إلي شجعت بنتي وهي طاعتني وبتحقق رغبتي
ام احمد: هيه عسب تحقق رغبتك .. تهدم حياتها .. وما تعرس ابد
بواحمد: عاشه .. انتي تعرفين مهروه بشو تفكر؟
ام احمد: لأ بشو؟؟
بواحمد: انتي امها .. ولازم تفهمينها .. يمكن في شي في قلبها وهي خاشته يمكن استوى شي وخلاها ما تفكر في الزواج .. مهره حساسة واايد .. انا اعرف بنتي عدل
ام احمد: ويي عليكم .. حساسة .. هذي لسانها اطول عنها من مريوم تقول لها كلمة ترد عليها بعشر
بواحمد: هيه ترى مريوم تستاهل
ام احمد: حليييلها بنتي الغالية.. ليش تستاهل؟
بواحمد: لا تغيرين السالفة خلينا في سالفة مهره ..
ام احمد: اختك تقول انهم بيون باجر
بواحمد: ماشاء الله محددين كل شي
ام احمد: لااا مب جيه بس بتيي وبيجوفون البنية
بواحمد: لا مب باجر خلهم ايون يوم الجمعة
ام احمد: اليوم سبت ..
بواحمد: شو فيها؟؟
ام احمد: لا ماشي .. خلاص برمس حصه وبقول لها
طلعت ام احمد من الحجرة وسارت ترمس حصة .. دش احمد بسرعة عند ابوه
احمد: بشر يبه؟؟ ان شاء الله رفضت
بواحمد: مايخصك
احمد: يبــــــــــه .. قول لي عسب اطمن مهره
بواحمد: الراي رايها
احمد: وهي مب موافقه
بواحمد: خلنا نتريا شوي .. انا قلت لأمك تقول لهم ايون الجمعة
احمد: يبه مهره رافضته
بواحمد: خلها تفكر ... جدامها فترة طويلة تفكر فيها
احمد: آآه .. كيفكم .. انا بسير عندها
في بيت سعيد
ام سعيد: كللللللللللللوووووووووووي
سعيد: هههههههه شو بلاج يمه؟؟
ام سعيد: اهل العروس وافقوا
سعيد: مسرع .. شو كانوا يتريوني؟؟
ام سعيد: هيه .. طبعا .. انت سعيد مب اي واحد
سعيد: هههه الله يخليج يا يمه
ام سعيد: زهب عمرك باجر بنسير
سعيد: لااا ليش؟؟ خلنا نسير اليوم
ام سعيد: صج؟؟؟
سعيد: ههههههههه يمه شو ما صدقتي على طول .. تبين الفكة مني
ام سعيد: لا يا وليدي .. بس خاطري اجوف عيالك .. من فرحتي ابي اسوي كل شي بسرعة
سعيد يحب راس امه: الله يخليج لي
ام سعيد: زهب عمرك باجر بنسير وبنعلن الخطبة في نفس اليوم
سعيد: ان شاء الله
في بيت احمد .. في حجرة مهره بالتحديد
احمد يدق الباب: ادش ولا ممنوع؟؟
مهره: ههه دش
احمد: هلا .. شحالج الحين؟؟
مهره: ماشي الحال
احمد: عندي خبر .. هو حلو ومب حلو في نفس الوقت
مهره: قول اسمعك
احمد: ما بقول
مهره: ليش؟؟؟؟
احمد: شو بلاج ترمسين بدون نفس؟؟
مهره: مافيني شي صج .. يالله اخوي الغالي الحبيب قول إلي عندك
احمد: احم احم .. اووكي السالفة وما فيها
مهره: هييه
احمد: ان عمتج ما بتيي باجر
مهره: صج؟؟ خلاص هونت؟
احمد: لا ما هونت بس ما بتيي باجر بتيي يوم الجمعة
مهره: هييه
احمد: انا قلتلج انه خبر حلو ومب حلو
مهره: ما عليه المهم انها ما بتيي باجر
احمد: هيه لين ذاك الوقت انا بسوي شي
مهره: شوو؟؟
احمد: شي .. بتعرفينه عقب
مهره: يا كثر اشياءك .. صح شو صار في سالفة راشد؟؟
احمد: منو راشد؟؟ .. هيييه رشود ولدي ... هههههه نسيته الصراحة .. بجوف منو هذا بعد ومن وين طلع لي
مهره: احمد تعرف
احمد: لا ماعرف شو؟
مهره: انا اتوقع ان إلي يتصل هو حمد .. بوشيخة الله يرحمها
احمد: انا بعد شكيت في السالفة .. بس هو مب هني هو مساافر .. سافر عقب اربعين راشد وما عرفنا عنه شي لا هو اتصل ولا رد على تلفوناتي
مهره: يمكن رد؟؟
احمد: ماظن انا مريت على بيتهم ولقيته مقفل ومبين عليه انه محد قرب صوبه عقب ما اهله سافروا
مهره: هييه .. ما يدرى شو تخبي لنا الايام
احمد هيه والله .. الله يستر
مهره: هيه .. الله يستر
ثاني يوم في المكتب
احمد يالس ويفكر في سالفة اخته مهره و ولده راشد شوي ورن تلفونه
احمد وهو متملل: الوو
........: هلا
احمد: منو وياي؟
.......: مب لازم انك تعرف
احمد: شو تبا؟
........: ابا راشد
احمد: نعم؟؟ وانت منو؟؟ وليش؟ وشو يخصك فيه؟
........: اسمعني انا راشد باخذه يعني باخذه .. انا بربيه
احمد: شوووو؟؟
.......: طوط طوط طوط طوط .... قفل
احمد: الووو .. الووووو .... منو ها بعد من وين طلع لي الحين انا في شو وهذا طلع لي الحين
شوي ودش سعيد
سعيد: هلاااااااااااااااااااااااااااااااااااا بربيعي الغالي
احمد: اهلين .. سعيد ييت والله يابك
سعيد: خير شو صار
احمد قاله السالفة
سعيد: وين عايشين نحن؟؟ حمود خلك واقعي .. هالسوالف تستوي في الافلام مب عندنا هني عندنا شرطة ومحكمة وكل شي .. الدنيا مش سايبه
احمد: هيه بس راشد ولدي .. افهمني
سعيد: انا فاهمك
احمد: اذا صار في راشد شي .. انا بموت
سعيد: حمود شو هالكلام .. لا تنسى انك مب وحيد في هالكون .. اهلك وخاوتك محتاجين لك .. وانا بعد .. انت ربيعي وانا محتاج لك بعد .. وراشد ما عليه شي .. بس انت بكلامك هذا بتذبح عمرك ويمكن يكون واحد سخيف يبي يسوي فيك شي .. واحد يبي ينتقم منك
احمد: ان شاء الله تكون السالفة جيه وبس .. مع اني خايف وقلبي مقبووض
سعيد: الله يستر .. هيه شو صار على سالفة مهره؟؟
احمد: ماشي بيون يوم الجمعة
سعيد: هيه يعني اجلتوا السالفة؟
احمد: شوي
سعيد: هيييه صح ما قلت لك
احمد: قول
سعيد: اليوم بسير بيت خالتي
احمد: وشو اليديد في السالفة؟
سعيد: اليديد اني بخطب بنت خالتي
احمد: سعيد انت متفييييييييج .. انا في شو وانت تستهبل علي
سعيد: والله ماستهبل عليك .. بخطب صج بنت خالتي
احمد: والله؟؟؟ يعني انحلت عقدتك؟
سعيد: هههههه هييه
احمد: بالمبااااااارك تستاااهل والله تستاهل
سعيد: الله يخليك
احمد متى بتسير؟؟
سعيد: اليوم عقب المغرب
احمد: عقب صلاة العشا انا بدق عندك وببارك لك عسب اكون اول واحد
سعيد: ان شاااا الله
نفس اليوم عقب الداوم في بيت احمد
احمد: مهرووه شحالج؟
مهره: حمووود ييت والله يابك
احمد: خير شو صار؟؟
مهره: اليوم واحد اتصل وتم يهدد ويتوعد ويقول انه بياخذ راشد غصبا عنا
احمد: شوووو؟؟ هذا نفسه إلي اتصل اليوم
مهره: شووو؟؟ شو السالفة؟ هو اتصل عندك؟؟
احمد: هيه وتم يهدد ويقول انه بياخذ راشد
مهره: من وين طلع لنا هذا بعد
احمد: مادري .. تعرفين انا بدق عند عمي حمد
مهره: شو بتقول له
احمد: بسأله عن احواله
مهره: وبعدين...
احمد: بعرف منو هذا إلي يطفرنا
اتصل احمد عند بوشيخة .. رن التلفون وااايد ومحد رد
احمد: جفتي محد يرد
مهره: انا اقول لك انه هو
شوي ورن تلفون احمد
احمد: هذا عمي حمد
مهره: رد بسرعة
احمد: الوووو السلام عليكم
حمد: وعليكم السلاااااااااام .. هلا هلاه بوراشد شحالك
احمد وهو مستغرب ويطالع اخته : تمااام انت شحالك ؟
حمد: والله تمااام بخير وعافية وينك ما تدق ولا شي
احمد: انا موجود ودومي اتصل بس محد يرد
حمد: هييه صح .. انا ما استخدم هالتلفون .. بس اليوم شغلته بالصدفة وسرت اصلي ويوم رديت جفت رقمك
احمد: هيييه يالله زيين انا سمعنا صوتك .. وينكم انتوا؟
حمد: بعدنا في استراليا انت تعرف ان اخو شيخة يدرس هني ونحن عنده
احمد: هييه اووكي تردون بالسلامة
حمد: الله يسلمك .. انا طالع الحين تآمرني بشي؟
احمد: سلامتك
حمد: الله يسلمك .. مع السلامة
احمد: مع السلامة
احمد .. مصدوم ويطالع اخته
مهره: شو بلاااااك؟؟
احمد: في شي ... شي غريب
مهره: شووو؟؟
احمد: عمي .. عمي حمد .. بوشيخة
مهره: شو بلااااه؟
احمد: ماسأل عن راشد
مهره: نعم؟؟؟
احمد: ماسأل عن راشد ابدا ولا ياب طاريه
مهره: المفروض انه يده وانه مشتاق له
احمد: هيه ترى هذا هو الغريب
مهره: وهو وينه؟
احمد يقول: اونه في استراليا
مهره: هيه
احمد: بس قال لي انه كان يصلي
مهره: شو فيها؟؟
احمد: فيها واايد .. اي صلاة الحين؟
مهره: حموود لا تنسى فرق التوقيت
احمد: هيه اعرف .. بس اي صلاة هذي ؟؟
مهره: يمكن الظهر
احمد: لاااا شوو الحين الساعة 3
مهره: هيه صح والفرق بينا وبينهم اكثر عن ثلاث ساعات
احمد: هيه
مهره: يمكن الفير؟
احمد: ولا الفير ... انا اقول لج انه مخبي شي انا متأكد
مهره: يمكن هو الي يتصل؟
احمد: لا مب هو
مهره: حمود حيرتني وياك
احمد: انا حاس انه في شي عووود بيستوي
مهره: وانا بعد .. الله يستر
احمد: هيه والله
في الليل
كانوا كلهم في الصالة يتسولفون ويضحكون وراشد يطفر عمته ميره واحمد يرمس بالتلفون
احمد: مبروووووووووووووووووووووك منك المال ومنها العيال الله يوفقك .. اووكي يالله مع السلامة
ميره: ها منو عرس؟؟؟
احمد: ملقووووفه
راشد: بابا منو عرس؟
احمد: شو استويت ملقوف شرات عمتك؟؟
مهره: هههههههه حليلكم
احمد: شو ما سألتيني منو عرس؟
مهره: انا مب ملقوفه .. بس الله يهنيه
احمد: هههههه هيه والله يستاهل ... هذا سعيد إلي بيعرس
مهره اول ما سمعت اسم سعيد ارتبكت وماعرفت شو تسوي وتمت اطالع اخوها وبعدين انتبهت على عمرها وقالت: صج؟؟؟ اخييير قرر انه يعرس؟
احمد: جفتي عاد .. خطب بنت خالته
مهره: يستاهل .. الله يوفقه .. وقامت من مكانها
احمد: شو بلاج؟؟
مهره: لا ماشي بسير حجرتي
احمد: بيي وياج
مهره: حيااك
ميره: شو اسرار؟؟
راشد: شو اسرار؟
ميره: انت اسكت مستوي ببغاء
راشد: انتي اسكتي مستويه ببغاءه
ميره: ببغاءه مرة وحدة
احمد: خلكم هني .. يهااال .. إلي يجوفكم يقول انكم نفس العمر
وطلعوا فوق في حجره مهره
احمد: شو بلاج؟؟
مهره: لا ماشي
احمد: لا تخافين ما بيستوي شي اعرف انج متضايج من سالفة خالد وجيه
مهره: لا ما عليه دامه امي وابوي موافقين انا بعد بوافق خلاص
احمد: شوووووووو؟؟؟ مهرووه شو هالكلام؟؟ مهروه يالعاقلة
مهره: احمد اذا امي وابوي قرروا انا لازم انفذ
احمد: بس ها ما كان كلامج
مهره: احمد السالفة انتهت
احمد: شو إلي غير رايج؟
مهره: ماشي خلاص احمد انا تعبت من هالسالفة و وكلت امري لله خلاص
احمد: اووكي .. الله يوفقج .. وما بيخيبج دامج توكلتي عليه ودامج تدورين على رضى امج وابوج
مهره والدموع في عينها: ان شاء الله
احمد: وليش هالدموع؟؟
مهره: ماشي ماشي
احمد: خلاص اخليج بروحج .. اعرف انج ما تحبين احد يجوف دموعج دموعج..
ومسح على راس اخته وطلع
مهره: انا ليش وافقت عليه .. ليش سويت جيه .. ليش قلت هالكلام؟؟ .. انا تريت سعيد واايد بس خلاص .. كل شي انتهى .. الظاهر اني كنت اقص على عمري .. خلاص كل شي انتهى
وتمت تصيح بروحها في حجرتها ...