الحلقه الثانيه ..
......... : هب لازم تخيسين ايديج بهالقذاره
طالعته وأنا فيني الغبنه أبا أصيح أرمي روحي عليه أسوي أي شي بس أبا الحنان والعطف
.........: عمور شل أختك وسيرو السياره
تحركنا أنا وعموري وعدول ويانا أول ما ابتعدنا شوي دموعي بدت تهل ع خدودي بصمت حسيت الكل يطالع صوبي حاولت أخفي ملامحي
بس ما قدرت بدت دموعي تهل أكثر وأكثر
عمور بحزن : نوار لا تصيحين حرام خليه ها يولي
طالعت عمور اقتربت منه أكثر مسكت ايده ويد عدولي ومشينا رحنا صوب الباركنات نتريا بابا ينزل ويي عندنا أكيد بيتصل بنا
شفناه ياي صوبنا مبتسم شالسالفه أكيد صار شي اممم احترت وايد فتح السياره بالسويج من بعيد واشر لنا نركب
عموري قال لي اركب يدام يمكن بابا بيناقشني ولا شي عن الموضوع
شفت ابوي يرمس فالفون مبتسم ياه وركب ويانا قلت الحين بيجتلني يمكن مو بعيده .. يمكن فهم الموضوع غلط يا ربيييييييييه
ابوي دخل مبتسم
ابويه : ها شو الطلعه يا عيال ..؟
توقعته بيقول لي كلام سم أو أي شي جذا فاكتفيت بالسكوت لو تكلمت يمكن بيجلب كل شي علي
أبويه : أسألكم أنا ..؟
عموري : واييييييييييييد طررررررر
أبويه : ههههه وانت عدول ..؟
هاللحظة تأكدت انه شايل فخاطره علي لا بابا حرام عليك لو زعلت منّي منو بيتم وياي فـ هالدنيا غيرك لا ابوي انا محتايه ضمتك محتايه عطفك وحنانك دخيلك لا تزعل
ابويه ابويه دخيلك لا لا حرااااااااااام لا تزعل
عدول : وايييد طررررررر
ابويه : ههههه يقلد عمور
ابويه : وانتي نوار شو رايج
اهني دقات قلبي بغت توقف
ابويه : ارمسج نوار
نوره : حلوه
ابويه : بس جذا حلوه وبس
نوره : حلوه واييييييييييييد شراتك
ابويه : بس مو احلى عن نوار ملكة جمال العالم
حسيييييييت الحياه ردت لي هذا هو ابوي هذا الانسان اللي اعرفه والله هو والله ما غيره أحبه هالكثر هالكثر واحبه هالشكل احبه
ردينا البيت حمدت ربي ابوي ما فاتحني بالموضوع دعيت فسري انه ما يفاتحني به بعد احلى جذا
الكل دخل حجرته عمور وعدول رقدو
أما أنا كنت راقده الظهر ما ياني رقاد الحين اجازة عندنا 3 اسابيع كاملات اجازة قعدت ع سريري شفت صوب جهازي ما تفيجت اشغله ملانه ومالي بارض لا للنت ولا لشي
انسدحت عالسرير
تذكرت الماضي وكيف كانت حياتنا حلوه انرسمت ابتسامه صغيره على شايفي
وفجأأأأه انقلبت حياتنا بين يوم وليله لا مو يوم وليله في ثواني قليله ولحظات مافيه اقصر منها يمكن انقلبت راساً على حدر انقلبت
تحولت لجحيم قمت اتمنى الموت فيوم من الايام لولا خوفي من ربّي كنت بنتحر كنت بجتل روحي يمكن كنت بسوي أعظم عن جذا
بدت عبراتي تهل بصمت دعيت ربّي يسهل لنا حياتنا ويردها شرات أول مثل قبل عايله مستانسه بس هالشي مستحيل خلااااص
صحيح انّي حزينه ومتعذبه بحياتي بس أبوي أكثر أكيييييييد هو أكثر لأنه مسؤولياته أكبر عن مسؤولياتنا نحن
قمت من على سريري شفت الساعه 12 بليل رحت تيددت وفتحت السياده ويلست اقرا قرآن وأنا أصيح بمراره هالحزة ينقبل الدعاء ويرووح فوق عن رب السماوات والأرض
أكيد فيوم من الايامي دعائي بيستجاب أكيد ربّي يحبني لأني انسانه صابره (ان الله مع الصابرين )
قريت وقريت قرآن وحسيت مع كل آيه لا مع كل حرف من حروف هالكتاب العظيم هم ينزال من علي صدق والله نفسي هدت وقمت أصيح بصمت
وما حسيت بروحي الا وايد على جتفي صديت وراي بسرعه
.........: بارك الله فيج
نوره : بابا
ورميييييييييت روحي فـ حضنه على طووووول
باباتيه : بارك الله فيج الله يحفظج يا بنتي والله انج ما خذلتيني انتي نوره اللي اعرفها
نوره : بابا دخيلك لا تزعل علي الله يخليك لا تزعل مالي فـ هالدنيا أحد سواك يالغالي
باباتيه : والله انّي مو زعلان عليج بس انتي ادعي لي
نوره : والله ادعي لك فكل صلاه وفكل لحظه
باباتيه : الله يحفظج
نوره : بس متى يابوي متى ...؟ ربّي يستجيب دعائي ..؟ تعبت والله تعبت
باباتيه : نوره شو هالكلام انتي عاقل بس ربج يختبر عبده انتي ما عليج الا بالدعاء
نوره : انشالله بابا الله يوفقك
باباتيه ضمني له ووقفني وياه ورفع القرآن حطاه عالكوميدينو وقعدنا ع السرير
باباتيه مسح على شعري
نوره : بابا انت زعلان منّي
باباتيه : على شو... سويتي شي غلط انتي عشان ازعل ..؟
نوره : لا ما سويت شي بس سالفة اليوم والله مو .............
قاطعني ......
باباتيه : نوره انتي تربيتي ولا يمكن أشك فيج والله تصرفج فرحني
نوره : بابا يعل راسك دوم مرفوع وما عاش من يوطيه والله لو حد حاول بس بجتله
باباتيه : ههههه مرة وحده تجتلينه
نوره : يمكن اسويها
باباتيه : دامج بغيتي تكفخين الريال اكيد تسوينها
نوره : زعلت منّي
باباتيه : لا مستحيل
نوره : شو سويت به بابا
باباتيه : ما عليج منّه خلاص دام أبوج حي محد يقدر يمس شعره منج .. انتي بنت سيد الرجال وأخت أسود
نوره : فديتك انا يا سيد الرجال
باباتيه : ما نقدر عاد
باباتيه : يلا عاد أنا بسير برقد
نوره : تم ويايه
باباتيه : باجر ورانا صلاة جمعه
نوره : هي صح
باباتيه : عمور وعدول راقدين عندي ههه شكلهم بيفروني من ع السرير من المرافس
نوره : ههههه اللع يعينك
طلع باباتيه
شفت لابتوب البيت فحجرتيه رحت صوبه وحدرت نور الامارات على طول
افتريت شوي وتصفحته ع السريع
رحت صوب الاقلام الحرة فــ خاطري اقرا شعر لناس هم واقع فحياتنا واعرفهم
شفت اشعار وايد بس شفت فيه واحد اسمه لا تعذب قلب يهواك
شدني الاسم وايد على طول دخلت
يتيمة زايد كاتبتنه فديتها والله شاعره وأنا أشهد
بديت أقرا فالبدايه عتاب في عتاب دوم يتومه أسلوبها جذا دوم تعاتب ابد ما تمدح بس من اللي تعاتبه شخص مجهول محد يعرفه حتى هي ما تعرفه
حلو هالاسلوب وايد
بس على آخر كم من بيت شدني واييييييييييييد تمدح روحها وايـــــــد توصف لمستها مشيتها ضمتها نظرتها اصلها كل شي فيها وتقول انها بنت سيد الرجال وأخت أسود وأشبال
لاتعذب قلب يهواك
يقول البـــــــــــــحــــــــتـــــــــري : ( قـــــــال طبيبي وطبيبٌ ذو احتيال )
أشــــــك بما شــــــــــئـــــــــــت ســـــــوا الحـــــــــــــــب فإني لا أبــــــالي
ســـــقم الحــــــــــــــــــــــــب رخـيص ودواء الحـــــــــــــــــب غـــــــــالي
وحـــــــــــــــبـــــــيـــــــبـــــــي قال : (( انسانـي ترا مكانك بالقــــلب خالي
خلاص ما عدت أحـبك مثل أول ولو بغيت أحبك ’’’ بحـــــبك بس من تالي
لا تحاول معي خلاص عافك الخـــاطر لأنك ما عدت ذاك الحبيب الغالي ))
انصــدمت من كـــــــلامه وخيانــته هذا آخر ظـــــني فيه وآخـــــر احتمالي
وشلون طاوعه قلبي يتركني وحـــــيــد بدنيتي ويعيشني بالهـــواجيس لحالي
هاجـــــس حبّـي اللي يذكرني به وهاجـــــس الذكــرى بعده عالقٍ في خيالي
ما يفــــــــارق خــــيالي لو لحـــــــظة ومحـــــــــــال يفارق فكـــري محالي
وعـــــــيني كل ما جت بعـــــــينه تطــــــرح ألــ(1000)ـف سؤال وسؤالي
منها وش ذنــــبي دامنـــــي غلطت ..؟ يعيــشني بحـــــــــزن وهم وغربالي
لأني غلطت غلطـــــة صغيرة راح على طول قطع حـــــــــــبـــل الوصالي
محدٍ فــ هالكون معصـوم عن الغلـــــــــط كلنا بشر أصـــــــلنا طين ورمالي
ما قول غير دام ذي البـــــدايه أكيد نهايتـــــــــنا شك وصــــــــــراع وقتالي
لأن طبع الزمــــــــــن كذا يغدر بي .. مهما تعنّيت محدٍ يفكر بي ويتعنى لي
بس أناوقـــــت الطـــــــيب طيبه ولكن وقـــــت الجــــــد مقدر أقاوم انفعالي
لكــن وربّي لعلــــــــمه من أنــ..ـــا ووش أنـــ..ـــا وان مستـــــــــواي عالي
مستواي محدٍ بـهالكون يقدر يدنييه حتى ولو صفحتي ســــــوده أيام الخوالي
أضل أنا أشرفهم كلهم وأحــــــــلاهم وأسواهم وأنا صاحــــــبة الشأن العالي
"لمستي" كنها لبــس الحريـر .. "مبسمي" خجول يشابه بدر السما والهلالي
"ضمتي" كنها الشمس بدفاها .. و"وجــهي" كنه قمر نـــــوّار بظلمة الليالي
"عيوني" هي عــــــــــيون المها .. و"مشيتي" كنها مشية ظــبي ولا غزالي
و"صوتي" كنه نــــــــوح الحــــمــــام ينـــــوح ونوحـــــــه بالجــــــو عالي
أنا "بنــت" أمي وأبي و"حفـــيدة" جدي وجدتي و"أخـــــت" أسود وأشبالي
ما أجــــي بدقة الاصــبع ،، أضل أنا .. أنا .. مهما الزمـــــن قصر أو طالي
ومهما تغيرت الأزمــــان طبعي هو..هو..وطبعي ما اعيش الا وسط الدلالي
أنا هبالي مهوبالهبال اللي تعرفه أنا هبالي من نوع راقي وما هو بأي هبالي
عرفـــت من أنا ولا بعدك تبي تعرف أكثر..؟ أنا بنت ذاك ســـيــــد الرجالي
وربّي لرجعك لي مثل أول وأخليك تشتاق لي شــوق الظميان للماي الزلالي
( من أشعار يتيمة زايد )
وايد عيبني الشعر وعقب تصفحت المنتدى وشفت تصاميم الأعضاء والصور
حسيت ياني رقاد على طول سكرت اللاب وتلحفت تجلبت ما ياني رقاد
شليت بطانيتي ورحت صوب حجرة بابا شفته راقد ع الأرض فديته وعمور وعدول محتلين السرير هههه
رحت شليت لي فراش وفرشته يمب بابا ورقدت يمبه حسيت بالدفا والحنان الحين لو ماما يمبي كنت بحس بالدفا أكثر
رقدت وأنا مرتاحة البال حسيت انّي بحلم اليوم أحلى أحلام فــ هالدنيا كلها
اشرقت شمس يديده يمكن تحمل معها السعاده لنا ... ويمكن تخبي لنا التعاسه وتزيد أحزاننا جروحنا عييت تبرا .. هالسنوات كلها ويمكن تزداد بس لا ماباها تزداد لو تتم مثل ماهي احسن لنا بس ما تزيد حسيت بكسل مره ثاني وغمضت عيوني وما حسيت الا بصوت بابا يسكر التكييف
باباتيه ريحة عطره دوم قويه أحسه متسبح به هههه
فتحت عيوني بكسل شفته
ابويه : بسج رقاد نشي صلّي
نوره : جيه الساعه كم ..؟
ابويه : وحده الا ربع
نشيت مفزوعه
نوره : هاااااااااه وحده
ابويه : هي وحده .. بلاج نورو
نوره : انتو رحتو الصلاه
ابويه : وردينا بعد
شفت ع السرير
نوره : وين عمور وعدول
ابويه : عمور تحت يطالع تلفزيون تونا ردينا من صلاة الجمعه وعدول توه ناش راح يتسبح
نوره : بابا جيه ما وعيتني
ابويه : قاعد اوعييج من الساعه 11 بس انتي رقادج ثجيل ما شالله
نوره : ههههه من يومي رقادي ثجيل
ابويه : طالعه على امج فـ هالشي بعد
ابتسمت لابوي حبيت اغير السالفه عسب الجو ما يتوتر
نوره : بابا انا بروح بتسبح بقرا سورة الكهف وبصلي
ابويه : انزين اسرعي عسب نتغدا .. يواعه نحن
نوره : انشالله الغالي
دخلت تسبحت وعقب صليت وقريت سورة الكهف كنت كاشخه لانه يوم اليمعه
بابا : الله شو هالزين ما نقدر نحن ..
عمور : أسيل أسيل بسرعه انجبي الغدا بموت من اليوع
عدول يقلده : وأنا بعــــــــــــــد
باباتيه : كلّه منج شوفي
نوره : هههه لهالدرجه ...
باباتيه : لحظه لحظه انتو الثلاثه اوقفو
وقفنا وبابا بعصبيه
باباتيه : انتو شو سويتو أمس
تخرعنا تمينا نطالع بعض يا رييييييييه استر الله المستعان بابا معصب يوم يعصب ينسى روحه
باباتيه : ههههههههههه
استغربنا طالعنا بعض
باباتيه : هاي أخرتها تفروني تحت وترقدون عسريري
نوره : هههه عشان جيه الزيغه كلها هاي
باباتيه : زين نفعت
عمور : ها عدول قال نرقد حجرة بابا
عدولي : عادي بابا يحبنا صح بابا
باباتيه : هي فديتك ..
طالع صوبي بابا : وانتي بعد وياهم ها
نوره : هههه أغار أنا قلت بابا مالي أنا بس جان أيي
بابا : الله يحفظكم
تغدينا وبعد الغدا عمور وعدول قعدو يلعبون بلاي استيشن
باباتيه حطا ام بي سي اكشن وتم يطالع
كنت قاعده اطالعهم وبس ما عندي شغله ثانيه سرحت شوي بس اللي صحاني صوت بابا وهو يقول
باباتيه : تجهزي اليوم العصر بنروح بيت عمّج
انصدمت هاااااااه شو يقول
نوره : بــس ..........
باباتيه : لا بس ولا شياته بنسير كل مرة هم ييون عاد نحن بعد بنسير
نوره : بابا بس بيتهم يذكرني فحياتنا
باباتيه : ما عليج اذكري ربج لي متى بتعيشين على ذكرى ماضينا
نوره : صدقك
باباتيه : نتوكل ونسير لهم
نوره : امممم أوكي
باباتيه : هي اباج جذا صار لنا 5 سنوات ما نطب بيتهم كلّه هم ييون لو البنات قلنا هي .... حتى حرمة عمّج هي اللي تزورنا وياهم عيب عاد هي كبيره مفروض انتي تروحين لها
نوره : عدل كلامك
باباتيه : عمّج مره ثانيه طلب منّي نروح نسكن عندهم
نوره : وانته شو قلت
باباتيه : قلت له اسمح لي مرتاحين فبيتنا بس عشان خاطرج
نوره : فديتك أنا
باباتيه : والله عمّج وايد يحبج حتى حرمته
نوره : هي فديتهم كل أسبوع ييون عندنا يوم كامل
باباتيه : يلا قومي تجهزي اعرف لين باجر ما بتخلصين
نوره : انشالله
وقمت بسرعه قبل ما يقول لي حتى بهاي طالعه على امج قلت انجو بأنفسكم وشليت روحي اربع صوب حجرتيه
تجهزت وجهزت عمور وعدول كشخنا
طالعت روحي فالمنظره متى آخر مره شفت فيها أولاد عمّي يمكن قبل 3 سنوات لما رحنا البر كان عمري وقتها اربع تعش سنه يااااي كنت صغيره بس قبل 5 سنوات وأنا عند الجوهره نذاكر يوسف دش الحجره يا ربيييييييييه يينن هالانسان بس الجوهرة دشت بسرعه
كنت وقتها اثنعش سنه وااااااااااااايد صغيره كنت احب اروح بيتهم بس بعد فتره تذكرت الماضي فجأأأه قطعت وقامو حرمة عمي وبنات عمي هم اللي ييون ما قمت استحمل ... كل مكان فهالبيت يذكرني بالماضي
هذي انا عايشه على ذكرى الماضي وعلى ياليت وكان وكنت بسوي وكان بيصير فحياتي ما اقول باجر:: حياتنا جدام:: ،،، عايشه على ذكرى الماضي وبس
عدول : يلا بسرعه نووواري رايحين بيت قوم علاوي
خذيت معاي الفون والشنطه وطلعت بسرعه رحنا صوب السياره وركبنا
تمينا دقايق فالسياره اطالع الشوارع وصلنا لفريج قوم عمّي وايــــــــد تغيّر عن قبل صدق الدنيا تغيرت وأنا بعدني على حالي ما تغيرت مرة عمّي أسبوعين ما زراتني لأنه امتحانات تدري انّي بسنتر عندها وما بذاكر بس كانت تتصل عالبيت تتطمن علينا وبنات عمّي الجوهره وجواهر يو عندي قبل أسبوعين أكيد اليوم يوم يشوفوني عندهم بيتخبلون اكيد الكل بيقول رديت لطبيعتي آه شكله محد بيعرف اللي فداخلي غير ابويه
نزلنا عمّي وعياله كانو صوب الميلس عمّي تجدم من السياره وعياله ترييو لما بابا ينزل وييون قلت أكيد خقاقين وما يحشمون ترييت
شفت علاوي وعمّي يايين
ابوي نزل سلّم على عمّي وعلاوي الصغيرون وعيال عمّي الكبار يو سلمو على أبوي جنه أبوهم وأكثر بصراحه بالفعل محد يحكم ع الغير من مظهره كانو 2 يوسف و ياسر عرفتهم تغيرت ملامحهم شوي عن قبل ثلاث سنوات عبرو كنهم ثواني بس الكل تغيّر وايـــــــــــد وايـــــــــــــد
أبويه : نواري عمور انزلو
عمور دوم ييي بيت عمي هو وعدول أما أنا لا
عمّي : له له نواري يايه صوبنا ما صدق أنا
بغيت أتغشى بس قلت دامني يوم اطلع ما اتغشى جيه يدام عيال عمّي أتغشى
نزلت من السياره تجدمت من عمي سلمت عليه وحبيت راسه
عمّي : منوره بيتج والله بنيتيه
نوره : منور بوجودك يالغالي
ياسر ويوسف كانو منزلين راسهم
عمّي : بنت عمكم نوره يا عيال
يوسف وياسر : اشحالج بنت العم
نوره : بخير
ما قلت اشحالكم استحيت وايد منهم
عمّي : ها شو سويتي فالامتحانات
نوره : تمام الحمدلله
عمّي : الله يوفقج دشي حياج البيت بيتج
فالبدايه ترددت انّي أدش بيت قوم عمّي بس أبوي زخ ايدي ودشينا
سمعت صوت جواهر تقول : عمّي يااااااااااااه
وطلعت ركض يايه تسلم على باباتيه
جان تعطي بريك أونها
جواهر : نورووووووه اهني
ابتسمت لها دومها خبله جوجو
يت صوبي وضمتني بالقو : منوره وربي منوره
نوره : تسلمين حبيبتي
باباتيه : شكلها نستني
جواهر : عمي كل اسبوع عنا بس نوره من خمس سنوات هاي اول مره تيي .. دوم نحن نروح لها
باباتيه : نوروه تراها مصلحجيه لا ترابعينها
جواهر : اربع وعشرين ساعه نرمس عالمسن شقايل ما تباها تعرفني
بس جواهر فجأأأه صخّت يوم حسّت بالكلام اللي تقوله
قالت مسن يدام اخوها لا واربع وعشرين ساعه يعني تحدر بليل وهي قايله انه ما تحدر بليل خخ راحت ملح البنيه
عمّي : بتخبل بكم هاي وين الجوهرة وأمج
عمتي أم حمد : ييت أنا
تفاجأت يوم شافتني ضمتني على طول وبدت دموعها تهل ع خدودها وتدعي لي
حسيت روحي بصيح بس فشله عيال عمّي اهني
شكلهم يبون يطلعون عسب ناخذ راحتنا بس عمّي قال لهم يقعدون
عقب يت الجوهره كانت منزله راسها هاي الجوهره وها طبعها من كم من سنه تحولت مو هي الجوهرة اللي اعرفها الرقله الفري و الخبله وايـــــــــد تغيرت صارت انعزاليه هاديه
سلمت على أبويه ويوم شافتني اتفاجأت شافتني ابتسمت ويت صوبي باستني وبستها يودت ايدي رصّت عليها جنها تبا تقول اشتقت لج وايد
طالعتها ابتسمت
لو هي الجوهرة اللي أعرفها قبل كانت سووت أكثر عن جواهر ونطّت فوقي بعد بس للأسف كلنا تغيرنا محد تم مثل ما هو حالنا تغيّر حياتنا تغيّرت
قعدنا جواهر كانت تسولف وياي كنت ارد على اسئلتها بس وعمي وابوي كانو يسولفون وعيال عمي ياسر كان وياه اللاب كان قاعد ويانا بعد بس بعيد شوي عدول وعلاوي تمّو يلعبون يوسف كان قاعد ويمبه عموري كان عموري يسولف عن سوالف شبابيه والله كبير بعيني ويوسف كان يسولف معاه على انّه واحد عود بس يوسف مو مثل أول يوسف الاجتماعي الحبوب اللي يطفر بي ويفعلني ..
بس يمكن لأنه كبرنا تغير لا لا هذا مو سبب كافي يوسف صار مغرور وايد
الجوهره كانت ساكته كانت ترد على الاسئله وبس مثلي بس هي حبه زياده يعني ترد بصوت يالله يالله اسمعه صارت انطوائيه وايد وايد تحب العزله
|