متضايق...الله اعلم هو وينه والا شمسوي؟؟؟ هو .. لو بس يفتح
تلفونه ... بشرح له كل شي...)
انتظرت العنود الى اليوم التالي حتى تحدثت مع جاسم في الموضوع
عندها قال : وانا اقول الرجال مهب طبيعي ...ثرج انتي ورا السالفه..أنا
لله وانا اليه راجعون ..
العنود: وش العمل الحين؟؟؟ من امس اتصل والجوال
مسكر...باستخف...حتى رقاد ما رقدت...
جاسم: واكيد هو بعد مارقد اللي ماقدر يقعد في البلاد ولا ينطر للصبح...
العنود: عندك رقم ام شربل؟؟ يمكن تعرف شي...
جاسم: لا طبعاً...ما كنت محتاجه...
العنود: تصرف...اذا ماتصرفت بسافر له...
جاسم وهو يبتسم: وين تسافرين؟؟ تعرفين وين هو ؟؟
العنود: اقولك ... اسأل في الشركة ...هم اللي حجزوا حق ام شربل اخر
مره اكيد عندهم معلومات...
جاسم: بكره أن شاء الله..ان الله احيانا...
العنود بخيبة امل : بكره؟؟؟
جاسم: عندوه ...الشركة مسكره والموظفين في بيوتهم...بكره يعني
بكره...
العنود: ويرقد اليوم بعد وهو متضايق؟؟؟
جاسم: قصدج ويسهر اليوم بعد وهو متضايق لأنه اكيد النوم مجافيه...
في ظهر اليوم التالي
في بيت ابوجاسم
كانت العنود تنتظر على احر من الجمر عودة جاسم من الشركة بعد أن
تعبت من عدم رده على مكالماتها المتكرره ...حتى سمعت صوته يصعد
الدرج فأسرعت اليه وسألته: بشّر؟؟
جاسم وهو متعب: الناس يقولون السلام عليكم ...
العنود: السلام عليكم ..بشّر.
جاسم: ماتنطرين لين عقب الغدا؟؟؟
العنود: انا انطرك من الصبح وبعد تبيني انطر لين تخلص غدا...اخاف
تقول عقب تبغي تقيل..قول عاد شسويت؟؟؟
جاسم وهو يدخل غرفته ويجلس على السرير: طلعوا لي الرقم وكلمتها..
العنود: طلع عندها؟؟؟ هو بخير؟؟؟
جاسم: هو بخير ...بس...في مشكله..
العنود: خير؟؟
جاسم: لما سألت من يخدمهم الاثنين قالت انها جابت حفيدة اختها تعيش
معاهم وتخدمهم طول ما ناصر هناك...لأنها وهي بروحها ما تحتاج الا
يطلون عليها في اليوم ساعة ويروحون ..ينظفون ويطبخون
وخلاص...بس ناصر متعود أن حد يخدمه...فجابت هالبنت..
العنود:So ؟
جاسم: اللي اذكره ان ناصر كان دايماً يقول ان بنات ضيعتهم مزايين..
واذا هالبنت اللي عندهم مزيونه وبتقعد عند ريوله وتخدمه وتعطيه من
الكلام الحلو اللي انتي خابرته...راح عليج ريلج...
العنود: تخسي ...هي والا غيرها يخسون...
جاسم بلؤم: عاد هي اللي هناك وانتي هنيه..ولا وبعد زعلان....بتراضيه
وبتنَسيه..
العنود وقد قربت دمعتها على النزول: شسوي؟؟ علمني شسوي؟؟؟
جاسم: وتطيعيني؟؟؟
العنود: في كل شي...واي شي..
جاسم: متى تخلصين امتحاناتج؟؟
العنود: باقي لي واحد انطره عقب يومين ...
جاسم: خلاص عيل بحجز لج ولي وعويش بعد إذا تقدر..ونروح لبنان
ونوصلج لي عنده تستسمحين منه واحنا نروح نصيع في الجبل لين
تخلصون..
العنود: وش بنقول حق هلي؟؟
جاسم: بنقول لهم بنروح دبي والا بوظبي كم يوم ...عادي..
العنود : يعني بنكذب عليهم!!؟؟
جاسم: احنا مهب مكذبين ...انا بقولهم ان بسفركم كم يوم اذا سئلوا
بقولهم قريب.. اذا معاي محد ينشد...لا تخافين...
العنود: بروح اشوف عويش..
دخلت على اختها ووجدتها ترسم خطوطاً على ورقة وهي تضع الايبود
أشارت لها بيدها وسألتها: اييييه ...
رفعت رأسها وسألت: هاه ؟؟؟
العنود:شيلي السماعة خلنا نعرف نكلمج.. انتي شسالفتج من كم يوم
وانتي مهب طبيعيه...؟
عائشة: اللي صار لي ما صار حق حد ....
العنود: شصار عووش ؟؟؟ قولي...
حكت لها كل ما صار وفي النهاية تنهدت بقوة..
تسألت العنود: شقصده؟؟
عائشه: مادري... خسبقني ...
العنود: مهب هو كله مطيح في مجلسنا؟ يمكن قصده شريف..
عائشه: فلم عربي هو ؟؟؟
العنود: يعني يبغي يتزوجج...
عائشه: حتى ولو ...ليش يقوللي ...احنا وين قاعدين...؟
العنود:وماجا مره ثانيه يوضح موقفه؟؟
عائشه: اصلاً انا من يومها ما رحت الجامعة...
العنود: انتي خلصتي الكورس؟؟
عائشه: من زمان ..الحين بس عندي بروجكت اكمله حق ماده deadline
يوم الخميس.
العنود: زين عيل ...شرايج...تروحين معانا لبنان؟
عائشة: وين؟؟ ليش؟؟؟
العنود: انتي صج راقده على اذنج...
وحكت لها بدورها ما حصل في الايام الماضيه...
عائشه: احجزوا حق يوم الخميس ..
العنود: بللللللللل تبغيني انطر 4 ايام!!!
عايشه: ههههه.. خلاص عيل بشتغل اليوم وبكره واحجزوا الثلاثا..
العنود: الصبح...بتخلصين بكره..
عائشه: عندوه...شفيج ؟؟ اقولج بحاول اخلصه فالليل... متى اسلمه؟؟
اكيد الثلاثا الصبح...احجزوا الظهر ..
العنود:يعني نوصل فالليل؟؟؟ متأخرين..
عائشة: تبغون والا روحوا بدوني... سبحان الله الحين عرفتي قدره؟؟
العنود: اصلاً طول عمري اعرف قدره وحتى هو ...اكيد بيفهم...انا متأكده
ناصر يحبني...
عائشه: قوللي أن شاء الله..
العنود: أن شاء الله..
في صباح يوم الثلاثاء
الساعة 9 صباحاً
دخلت عائشه مكتب الدكتور فيلبس وسلمته المشروع وخرجت منه
وتوجهت للمكتبة لتعيد الكتب التي استعارتها من أجل المشروع وبعد أن
انتهت واستلمت بطاقتها سمعت بالقرب من اذنها : كنت حاس انج
بتجين ...كنت اجي كل يوم الصبح وانطرج...
التفتت ووجدت فهد واقف خلفها وابتسامه ساحره مرسومه على وجهه
فأدعت الغضب وقالت: فهد ...لو سمحت...لا تحرجني ...أنا مهب راعية
هالسوالف..
فهد: ادري ...والله اني ادري...ولو ما ادري ماجيتج ...ولا نطرتج هالايام
كلها.. بس تستاهلين ...انطرج العمر كله مهب بس كم يوم..
عائشه وهي تتحرك من أمام الموظفه الاسيوية: فهد...
فهد: عيونه...
احست عائشه بالاحراج واحمرت وجنتاها والتفتت له بغضب: لو
سمحت ...انا لازم اروح المطار لا تأخرني..
فهد: انتي اللي لو سمحتي ...تعالي اقعدي شوي ....طيارتكم الساعة 3
...تو الناس..
عائشه بدهشه: انت شدراك!!!
فهد: قلتلج ..كل شي يخصج اعرفه...لأنه يهمني اعرفه...البارحه جاسم
قالي فالمجلس وطلب عناوين ورقم السواق اللي هناك ...ولا
تخافين ...الموضوع بينا احنا بس ... ممكن تقعدين شوي...
وسحب لها مقعد لتجلس وعندما اطاعته جلس امامها وأخذ يتأملها
لبرهه ثم بدأ كلامه: أنا ومن يوم ما كنت صغير واهلي محيرين لي مزنه
بنت عمي ...مع إن أحنا ربينا مع بعض مثل الاخوان ...وكنت مستعد
اكمل معاهم خطتهم لين شفتج... تغير كل شي ...وتغيرت حياتي
كلها ...قلبتيها فوق تحت...عايشه..انا ابغي زوجة توقف معاي ...زوجة
تفهمني وافهمها...زوجة اطلع وأنا مطمن أني تارك وراي مره سنعه .. ام
تربي عيالي بطريقة حديثه...طريقة نتفق عليها ...عايشه اذا خطبتج من
هلج بتوافقين؟؟؟
وفقت عائشة وقالت: جرب...
مشت عائشة بأتجاه الباب ولحق بها فهد: يعني موافقة؟؟؟
عائشة: جرب ...وبتعرف ...هذا اللي تعلمناه في الجامعة ...صح؟؟
خرجت عائشة وتركته واقفاً مكانه محتار من تصرفها معه...وفكر ( يعني
موافقة والا لا؟؟ الواحد شلون يعرف ؟؟؟ والله حاله ..)
في التاسعة واربعون دقيقة ليلاً حلت طائرة الامارات ارض مطار رفيق
الحريري وبمجرد أن انتهوا من تدقيق الجوازات مع ترحيب الضابط بهم
بحراره عندما علم انهم قطريون وجدوا السائق ينتظرهم بسيارة الدفع
الرباعي والذي اتصل جاسم به واتفق معه على أن ينتظرهم في ذاك
الوقت ...كان كل منهم يسحب حقيبة صغيرة بيده لذا لم يتأخروا لأستلام
الحقائب وخلال دقائق كانوا خارج المطار مروا على منطقة الضاحية
والتي ضُربت أثناء العدوان الاسرائيلي وتم تعميرها ثانية بدعم من ايران
ولاحظوا الفرق الواضح بين الشوارع الضيقة والغير نظيفة هناك وبين
شوارع الداون تاون الواسعة والنظيفة والتي وصلوها بسرعة ثم عطف
السائق على شارع ادخلهم منطقة الاشرفيه ومنها الى الشقة الفندقية
التي حجزوا فيها...
في الصباح
كانت العنود أول من استيقظ حضّرت لنفسها كوب شاي بالحليب
وارتشفته لوحدها في الشرفة ونسمات الهواء العليل حولها طوال الوقت
وانتظرت الى الساعة الثامنة ثم ايقظت الباقي بعد أن طلبت لهم الفطور...
العنود: اذا ما قمتوا وبرزتو بروح بروحي مع السواق.... كيفكم ...
في خلال ساعة كانوا في الطريق الى جونية على طريق الاوتوستراد وبعد
نصف ساعة وصلوا جبيل وصعدت بهم السيارة الى اعلى جبل عنايا حيث
شاهدوا دير مار شربل وعدد من المصلين المتوجهين للكنيسة..واشجار
السنديان المنتشرة ... واخيراً ظهرت لهم ضيعة كفر سما ببيوتها
الحجرية المتفرقة وامامها اشجار اللوز الكبيرة..
وبعد أن سأل السائق عدد من الماره توقف بهم أمام بيت قديم بُني من
الحجر بدا صغير الحجم..وقال: هيدا بيت ام شربل...تفضلوا...
نزلوا من السيارة ورأوا ام شربل جالسة على كرسي خشبي قديم أمام
الباب صعدوا الدرجات القليلة وسلموا عليها وهي ترحب بهم وعندما
رأت العنود قالت: يا هلا .. اهلين والله بمرت ابني ...كيفك يابنتي...؟
العنود: الحمدلله... خالتي وين ناصر ؟؟؟
ام شربل: تفضلوا ببعت له البنت تناديه...هو جالس حد النبع...
العنود: لا خالتي ...انا ابغي اروح له اسوي له مفاجأه وين طريق النبع...
ام شربل وهي تشير بيدها : تطلعي من هون وتمشي عطول بعد تخلص
البيوت بتنزلي شوي بتلئي النبع ...رح تسمي صوت المي ...
تبعت العنود توجيهاتها وعندما اقتربت من النبع سمعت صوت عبدالمجيد
عبدالله يغني :
لازاد فيني الحزن
اكتم دموعي واون
واقول ابد ماابيك
واتذكر هوانا واحن
وين انت عني انا ..
وكلتني للعنا
ماكني الي هويت
ولاكننا نفسنا
عيشتني بــالوهم
قتلتني بــالالم ..
عودتني عالدموع
عرفتني عالندم
قلبي معاك رجعه
كلامك بيسمعه
قله يشوف الحياة
وان أنت ماتنفعه
علمت أن ناصر كان يسمع الايبود وحزنت لأختاره هذه الاغنية ...وقفت
قليلاً ثم نظرت الى مصدر الصوت فوجدت ناصر جالس تحت ظل شجرة
سنديان قديمة أمام نبع ماء ينزل من الاعلى والمكان المغطى بالعشب
الاخضر بدا كمنظر من الريف الاوروبي... سبحان الله ...كان يرتدي تي
شيرت بيج وجينز كحلي ...
انتظرت الى أن اقتربت منه ونادته: ناصر...
التفت ناصر بسرعة نحو الصوت واخذ يفرك عينيه ...ثم وقف مكانه
ورأها تقترب فتأكد انه لا يحلم فقال: العنود....انتي هنيه؟؟؟
العنود: جيت هنيه ...لك ...جيتيك وهديت الدنيا كلها...
تذكر فأدار ظهره عنها وعاد لجلوسه وهو يقول: شجايبج؟؟؟ ماقريتي
رسالتي؟؟؟
العنود: ولأني قريتها جيتك...
جلست بجانبه ولمست كتفه واكملت : انت فهمت غلط يا ناصر...حسن
كان حلم.. حلم سخيف كنت اعتقد انه حلو ...ولما تزوجتني ...حسيت
بتفاهة تفكيري...ناصر...كل شي كنت اتمناه لقيته فيك ...وانا معاك احس
بالامان واحس اني املك الدنيا وما فيها...انت اللي علمتني كل شي ...لما
اخاف اجيك وانا ادري انك انت اللي بتمحي الخوف... انا كل ايامي الحلوة
اللي عشتها وانت معاي تلاشت يوم حسيت انك بتبعد عني..صعب القى
كلام يوصف شعوري لك...انت شلون تتصور اني ممكن اعيش حياة انت
مهب فيها!!!! كيف تتصور اني ممكن انادي حد غيرك حبيبي!!!!
التفت لها ناصر وسألها : انتي متأكدة؟؟؟
ابتسمت العنود وردت: طبعاً والا ما كنت شفتني هنيه...
في تلك اللحظة ظهرت فتاة شقراء جميلة بيدها انيه صغيرة وضعتها
بالقرب من ناصر وهي تقول: الغدا استاز ناصر...
نظرت لها العنود بغضب وقالت: مشكورة ...ناصر بيتغدا معاي...اخذي
غداج...
ضحك ناصر على تصرفها وعرف أنها شعرت بالغيرة من الفتاة فسألها:
ليش تفشلين البنت؟؟
العنود: مالك خص...عشان جذيه قاعد هنيه ...عشان يحلى لك المكان
معاها...قوم اشوف ...قوم...
امسك ناصر يدها ونظر لها في عينها وقال بجديه: عنودي...تدرين انج
بكلمة وحده تنسيني كل اللي صار وتريحيني من الهم اللي
عشته..قبلج...كنت اعيش في وحده سنين وسنين ...كنت اكلم
روحي..والحين...بتملين حياتي علي ..تحبيني عنودي؟؟؟
العنود بخجل: اموت فيك ....
ناصر: اخ ياقلبي....انا اللي بموت...
في نفس الوقت
كان فهد يقنع اباه بأن يخطب له عائشة...
فهد: يبه ارجوك افهمني...انا كبرت الحين واعرف ان هالبنت هي اللي
ممكن تصير مرتي...مزنه مثل اختي واللي خاطبها الحين رجال معروف
فيه خير ليش ما تخلونها تروح في نصيبها...
ابو فهد: بتكسر عوايدنا...؟
فهد: باخذ لها هديه هي وامها ...رضوه ..على حسابك...صدقني هي ما
تبغيني.. بتستانس لأنها بتفتك...
ابوفهد: والله يابوك ..أذا بنت عمك راضيه.... توكل على الله ...
فهد: هي الحين مسافره..اول ماترجع نروح حق اهلها نخطبها..
ابوفهد: ليش مستعجل؟؟ انت بتروح تدرس وتقول ان هي تدرس؟؟
فهد: انا بروح اكمل وهي بعد تقدر تكمل هناك...هي نفس الجامعة...
ابوفهد: مرتب كل شي؟؟؟
فهد: كل شي اذا رضيت عني يا اغلى ابو فالدنيا...
بعدها بساعة
كان جاسم يتحدث مع عائشة بأنتظار العنود وناصر...
جاسم: عويش ...شرايج في ليلى؟؟؟
عائشة: اي ليلى..؟
جاسم: يعني اي ليلى ؟؟؟ ليلوه رفيقتكم اللي تشتغل عندنا في الشركة..
عائشة: شفيها؟؟
جاسم: اوهو علينا ...عويش ..شفيج؟ غبية؟؟
عائشة: اييه ..زينة..
جاسم: تنفع تصير مرت اخوج؟؟
عائشة: ما تصلح ...حمود بيجننها ...
جاسم: شدخل محمد الحين ؟؟؟ انا اكلمج عني انا ...هالبنت دشت مزاجي
بالقو... اخت رجال ... وتستحملني... مهما غربلتها تستحمل...
عائشة: البنت فقيرة ...ويتيمة ...حرام عليك...
جاسم: معليه ...لي خذتها دافعي عنها...الا وينها اختج؟؟ ليكون راحت
نبع في ضيعه ثانية...
عائشه: عطهم ساعة واذا ما جاو ..نروح ندورهم ...الحين بس
ارتحت ...يوم عندوه لقت حبها الحقيقي...
في المساء فالدوحة
كانت نوال تتحدث في الهاتف : حبيبي ابوي بيسافر عقب كم يوم لازم
تجي تخطبني قبل لا يوافقون على اللي جاي يخطبني ...
...: انا كلمت الاهل ويمكن نجيكم عقب بكرة ..بأكد عليج فالتلفون ...
كانت نوال اوقعت رجل متزوج اكبر منها بعشرين سنة في حبالها واصبح
كالخاتم في اصبعها ..ولكنها لم تكن تعلم ان زوجته الشريرة كانت تجهز
لها مفاجأة من العيار الثقيل...
النهاية
اختكم العوده
الملكة الام
|