لـ الشعر فيك / بلاد وبلاد وبلاد
ولـ الشعر فيني / دمعتين وسحابه



كلمة " أحبك" مالها عندي أضداد
هذي حقيقة عمر .. مايندرى به



أشيل بعيوني .. مسافات وجياد
وارتب بظهري / سيوف الكآبه



أحمل لك بكفي / مشاعيل وسهاد
وانظم من جنون الغرابه / غرابه



أنسج من امطاري / فرح ماله اولاد
لو غصـتي تفرض علي الحرابه



لجلك /عذوبة حرف تنفضك بحياد
ولجلك / ربيع الما يزيد اغترابه



لك في عذوق الصبح / منشا وميلاد
ولك من غدير الليل / صمت ومهابه



جمرة غيابك .. تحتفل صخب وعناد
وروح البياض .. تزف فيك الكتابه



قصة جمالك .. مثل دارٍ للأجواد
وانا غريبٍ .. جوعه اطول ثيابه



عينك / مواني نور وافراح واعياد
وعيني / سواحل جرح طوَل عذابه



خطوتك فيها .. تاج وملوك واسياد
وفيها انثيال الما .. وصدري ترابه



بسمتك في ركن السما / تبني الضاد
وآضم قصرك .. واحتفل في خطابه



أوتار صوتك .. نبرتك / طيش وقاّد
بيده حنين .. يفتت أضخم رتابه



من وين ببدا ؟ والبدايات تنعاد
وكلك على بعضك / سؤال وإجابه



لاتسأل التاريخ .. عن غصن وانشاد
وانت اختصار الريح / قدر / ورحابه



وصلك .. مدينه مالها باب واصفاد
وهجرك .. فقيرٍ طاح بك عند بابه



شربت وصلك من عروقي ولا فاد
دامك بدمي .. هات معنى غيابه ؟



تعال .. صفف بالسما كل ميعاد
واشعل فتيل الوصل .. في كل غابه



امطر حنين / ولمني شعب وافراد
بين السما والأرض / مالي قرابه



الليل شيخي .. يوم انا جملة احفاد
والصبح بشفاتك .. ذبحني سرابه



تعال خذني معك .. لبلاد وبلاد
واشعل فتيل الوصل تحت السحابه ..!