قاعدين بغرفة عبير ,, وانواع الاستهبال عبير ميتة ضحك
على اريج اللي مبرطمة لان الاخ بندر مسوي فيها زعلان
عشانها راحت بدون ماتشاوره
عبير: اروووج خلاص طنشي هو يتدلع بس
اريج: تصدقين عاد انا احس وقتي كله استهبال ,, والحين
هو جد زعل مادري شلون اتصرف .. احس اني لو براضيه
بموت ضحك
عبير: هههههههههههههه والله يطلع لك مع السماعة يذبحك
اريج: يمه منه يسويها والله
عبير: ههههههههههههههههههه انتي ليه مو راضية تقتنعي انه
تغير وذا كله كان زمان
اريج: مسبب لي عقدة وربي... هو بعد يضحك علي... تدرين
عبورة مادري ليش احسه يبي يهبل فيني لاصرت عنده ...
اعرف الرجال انذال لاعرف نقطة ضعفك يذلك فيها
عبير: وش بيسوي يعني؟ بيضربك مثلا؟
اريج: يخسي ماعاد الا هو
عبير: ياويلك لو يسمعك بس
اريج: هههههههههههههههههههه صدقتي عاد اني اخاف انا ام
لسانين اكرهه بعمره قبل يسوي فيني شي
عبير طول الليل تتأمل اريج تجيب طاري فهد بس اريج يقال
لها محتفظة بالسر : وش اخبار اهل الرياض؟
اريج بخبث: اخبار مين بالضبط؟
عبير: اخواني واخواتي يعني مين
اريج: اييييييه علينا كان قلتيها من اول ...بخير كلهم ويسلمون
عليك بعد
عبير: الله يسلمهم يارب
اريج: مصدقة ان زواجي بعد 3 اشهر ونص؟
عبير: لا ماني مصدقة احسك باردة وماتحمسين مثل اي عروسة
اريج: لا ناوية ان شاء الله اول ما ارجع الرياض اسوي لي برنامج
عناية كامل بمشغل ... والتقضي الله يعين عليه ... باخذ امي اوفاتن
ولا اروح مع بنات عمي او بنات خالاتي يعني بتعب الكل
عبير: والفستان؟
اريج: شفت كذا ديزاين بس للحين ما استقريت على شي معين
تدرين عاد والله حوسة واحس هالشهور بتمر بسرعة خصوصا
ان ندى بقى لها حول الشهر وتولد ... واكيد بننشغل بولادتها
عبير: يارب يسهل ولادتها
اريج: اللهم آمين يارب
كملو سوالف ... وعقب صلو الفجر ونامو
***********************
بعد صلاة الفجر دخل البيت مرهق وتعبان ... توه راجع من عمله
كان مستلم يوم كامل ...البيت غارق في الظلام الدامس... والهدوء
والصمت يلف المكان ... توجه للمطبخ وشرب له كاس مويه
ورقى لغرفته ... بس قبل مر على غرفة امه اكيد صحت للصلاة
وبعدها مانامت .. طق الباب ... وانتظر ردها
ام تركي: ادخل
ماجد فتح الباب ودخل شوي: السلام عليكم
ام تركي: وعليكم السلام تعال يمه
ماجد قرب من امه وحب راسها : شلون الغالية؟
ام تركي: بخير دامني اشوفكم بخير... جوعان يمه تبي فطور؟
ماجد: لا ابي راحتك يالغالية ... انا جاي اخذ جنو تنام عندي
ام تركي : سم بالله وشيلها بشويش ... وربي قبل تنام سألتني
مية مرة عنك
ماجد: الله يخليها لي يارب
ام تركي: آمين يارب
ماجد قرب من بنته وشالها: بسم الله
وتوجه فيها لغرفته حطها على سريره .. وراح ياخذ له دش
سريع ويبدل....
طلع من الحمام ( وانتو بكرامة) وهو يجفف شعره .. شافها
وهي نايمة مثل الملاك...تأملها بوله ,,, كل ماكبرت يوم زادت
شبه بأمها قرب منها وباس خدها انسدح وضمها لصدره وغطاها
( الله يرحمك ياملاك ) طلعت من قلبه وسط تنهيدة قوية
حاول ينام وابت افكاره الا انها تاخذه لماضيه بكل آلامه وجروحه
اوقات يلوم نفسه ويحس انه السبب في اللي صار لزوجته ...
واوقات يرجع لعقله ويتذكر انه قضاء وقدر وكل شي مكتوب
في كتاب .. استغفر ربه ... واستدعى النوم يجيه .. وبصعوبة
قدر انه ينام ...
*********************
من صحو وهم سوالف وتخطيطات وين يروحون ووين يجون
دخلت عليهم ام عبير وهي مبتسمة :السلام عليكم
اريج+ عبير: وعليكم السلام
ام عبير دخلت وقعدت على كرسي التسريحة: مادري ليه اذا
اجتمعتو احسكم ترجعون اطفال
اريج: ههههههههههههههههههه انا من الله ماعندي عقل كله
خبال بخبال
ام عبير: انتي الخير والبركة والله.. امممم عبورة
عبير: هلا
ام عبير: ابغى اتكلم معاكِ في موضوع
اريج جات بتقوم بس ام عبير قعدتها: والله ماتقومين عبير اختك
ومافي بينكم اسرار
عبير: خطبة كمان؟
ام عبير: ايوا
عبير: مين؟
ام عبير انتبهت لاريج المبتسمة: خلي اريج تقول لك
هنا عبير نبضها وصل مليون ..... وماعاد صارت تسمع اللي
حولها ... وتخيلت انهم يسمعون نبضاتها وتهادى لإذنها اسمه
بس مو عارفة اذا هي سمعته جد ولا من شوقها ولهفتها توهمت
هالشي: مين؟
اريج: خاااااالي فهود
عبير ماعرفت تنطق ولا قدرت تتكلم اصلا
ام عبير اللي كانت تظن ان عبير بعدها متأثرة من سالفته معاها
وماتبي تبين شي قدام اريج تحسبها ماتدري عن سواة خالها
حاولت تتكلم مع بنتها بهدوء: شوفي حبيبتي الولد تقدم لك وابوك
مرحب فيه وانا ماعندي مانع .. والراي الأول والاخير اكيد لكِ
انتي .. لا انا ولا ابوك راح نقول كلام بعد كلامك
عبير استنجدت بكل الكلمات والحروف وطلعت منها كلمتين
بس: طيب بفكر
ام عبير: خذي راحتك ياقلبي ... واريج عندك هو خالها واكيد
راح تقول لك عنه كل حاجة
عبير: ان شاء الله
ام عبير: طيب لا تتأخرون على الغدا ... العصر بوديكم مشوار
راح تنبسطو فيه
اريج نطت : تعيييييش خالتي
ام عبير: ههههههههههههههه الله يسعدكم يارب...... وطلعت
اريج: عبورة لاتفكرين ولا شي خالي يجنن ووسيم ويذبح وعسل
ودمه خفيف
عبير: اروج انا ابغى اخذ راحتي في التفكير
اريج: طيب لاتعصبين عشان اني ببيتكم مستقوية علي
عبير: هههههههههههههههههه انتي من يقدر عليكِ ياشيخة
( عبير فرحت بهالخطبة هي من الله كانت تبيها وتتمناها بس
ماتدري ليش حست انها ودها تعذب فهد شوي تبيه ينتظر ردها
ويتعب عشانها << يقال لك ماعذبتيه للحين؟ )
***********************************
هذا هو اللي تبيه .. ؟؟
اني ارحل من حياتك
واشعل عيوني بــ ليه..!!
بس خلاص ..!!
هذا هو اللي قدرته ..؟
وقدرك ربي عليه ..
بذمتك هذا كلام ..؟
اني ارجع من جديد
ارجع افرش كل تعب
عمري وانام ..
زين لحظه..!!
لااسالوني الناس وينك ..؟
وان درو ضحكة عيونك
عن عيوني سافرت
ردت لعينك ..
بذمتك قول ..
وش اقول ..؟
قول قول قول قول
الله يخرب بيت بيتك
توني يادوبي بديت
بعت عمري واشتريتك
خطوه خطوه واشتريت
توني باطراف البدايه
مدري وشلون
انتهيت ..؟
ياخي حس ..!!
والله عيب اللي تبيه ..
اني ارحل من حياتك ..
واشعل عيوني بــ ليه ..
لاجبينك شمس واحساسك مطر ..
لاعيونك شوق وشعورك دفا ..
جبت لك بـ ايدي ..
ابتسامات العمر ..
ليه تكسرها على اطراف الشفا ..؟؟
شوف ..!!
بعثرني احتياجي بالنظر..
شوف ..!!
وجهي امتلا منك بــ افا ..
ماتجي منك ..
ولكن يابشر ..
منت اول من طعني بالجفا
ابرا منك كل جروحي بالسهر
ولاافكر من ورى قلبك شفا
ول ياقلبك ..!!
مايجيب الا القهر ..
ول ياعمرك ..!!
ماعرف طعم الوفا ..
والا انا ..!!
مثل النهر ابقى نهر..
من تحوسه ترجع تشوفه صفا ..!!
فيني والله احساس لامنه ظهر..
يشعل ضلوعك اذا قلبك طفا ..
هذا هو اللي تبيه ..؟!!
وهذا هو اللي قدرته ..
وقدرك ربي عليه ..
بذمتك هذا كلام ..؟؟!!
اني ارجع من جديد..
ارجع افرش كل تعب ..
عمري وانام ..
وين اروح ..؟؟؟
شلون اجيب لقلبي المجروح .... روح
هذا هو اللي تبيه ..!!
حاتم من رفضته عبير صار مو طايق البيت وهي موجودة
للحين جرحه ما التأم ومايبي يشوفها عشان مايكرهها ...
جمع شتاته وسافر على اول طيارة لمصر ... هناك كان وحده
يشكي همه لنفسه ... للمكان .. للزوايا ... لكل شي حوله
بأوقات الغباء مايكون انك تقدم على خطوة شبه مستحيلة
لكن الغباء انك تقدم لهالخطوة بدون ماتحسب حساب الخسارة
وحاتم رغم انه كان عارف بمشاعر عبير قبل بس ماتوقع الرفض
وهذا اللي خلا صدمته اكبر ... وجرحه اعظم واقسى ......
لام نفسه على غبائه واندفاعه...
بأوقات كثيرة نندفع خلف مشاعرنا بجنون ....بس للأسف
نرفض تقبل الواقع مهما كان مؤلم...!
ومابين صراعات مشاعرنا نرتشف الألم حتى الثمالة .....
تفكير قاتل وشرود ذهني وافكار غريبة تتداخل مع بعضها
احساس حاتم مثل الضايع .. او الغارق في بحر بلا مرسى
محتاج لبر امان لو من بعيد.. او قارب نجآة يلوح له من الافق
وكثير ماتكون الحلول حولنا والبديل جاهز.... لكن الحزن
يغطي على كل اللي حولنا ... وماعاد نلمح غير الهموم ...
والشعاع اللي يلوح من بعيد نستصعب نروح له وندور على
الامل المفقود .... وعساها تعدي هالأيام .. وعسى ربي
ينسيه حزنه ......
*********************
بعد اسبوعين من هالأحداث عبير اعلنت موافقتها النهائية
الفرحة عمت البيت اريج مستانسة لاختها ولخالها اللي كل
يوم ازعجها اتصالات وقلبه منشغل على حبيبة قلبه
وابو تركي اللي فرح لبنته مثل مايفرح لباقي عياله ,,,وام
عبير اللي همها كله سعادة بنتها ...
بس عبير عندها شرط انه مايصير زواج قبل سنة واذا
يبون عرس بالصيف الجاي وبكذا يصير يبقى لها سنتين
وتتخرج .... وابو تركي ما اعترض على هالموضوع واكيد
كل شي راح يصير رسمي لا رجعو للرياض
فهد كالعادة من خطب عبير يتصل على اريج يوميا
اريج وهي مبتسمة : ماصرت خاطب اختي ياخي كلها سنة
وتصير ببيتك وتفكني من غثاك
فهد للحين ما استوعب: شلون؟
اريج: مبروووووك فهود عبير وافقت
فهد: احلللللفي اروووج؟
اريج: الحمدلله والشكر وهذا شي ينلعب فيه
فهد: اروج جد وافقت؟
اريج: اي والله توها مبلغة ابوي بموافقتها بس ماتبي عرس
قبل سنة
فهد: مو بكيفها
اريج: ههههههههههههههههه بعدي خالي ورها العين الحمرا
فهد: قالت لابوك هالكلام؟
اريج: اي وربي قالت ماراح تتزوج قبل الصيف الجاي
رضيت اهلا وسهلا مارضيت ماعندنا بنات للزواج
فهد عصب وتنرفز : ضفي وجهك بس... وسكر السماعة معصب
اريج: وربي اني مهانة بهالدنيا كلن يسكر بوجهي
عبير: ماعاش اللي يهينك اروج
اريج: اسكتي بس للحين بقلبي يوم تسكرين بوجهي
عبير: ههههههههههه بس ماقلتي لي خالك ليه معصب؟
اريج: يبي قرب حبيبة القلب وهي تتغلى عليه
عبير اتسعت ابتسامتها وماعلقت
الكل استانس بخبر خطبة عبير لفهد الا اثنين واكيد معروفين
ام تركي اللي ماتحب عبير ولا امها ( بهالشي مايقدر احد يلومها )
وحاتم اللي صدمته صارت صدمتين وحس انه حلمه تداعى نهائيآ
وماعاد فيه امل ابد....
اما باقي افراد العائلتين كانو بقمة سعادتهم .. حتى فاتن فرحت
من قلب لخالها... واهل حاتم يمكن تمنوها لحاتم قبل بس مايمنع
انهم يتمنون لها كل خير ... شهد بعد كانت تتمنى عبير تاخذ حاتم
وكانت دايم تقول خوذي اللي يحبك ولا تاخذين اللي انتي تحبينه
رجعو ابو تركي واريج للرياض ... وعبير وامها بعد شهر بالضبط
لاحقينهم.... ابو تركي اتفق مع فهد على كل شي الملكة بعيد الفطر
والزواج بالصيف الجاي وفهد قبل مجبر على هالشي والله يصبر
قلبك يافهد....
****************************************
*****************
قاعدة بجناحهم توها مصلية العشا وتنتظر ناصر يجي من عند
اخوياه ( ناصر للحين يروح الاستراحة بس مبدي ندى على
اخوياه ويروح لهم من فترة لفترة وهالشي ندى ما اعترضت عليه
خصوصا انه معطيها كل حقوقها )
تحس بآلام متفرقة والوجع يجي ويروح .... اتصلت في امها تبي
تتطمن: السلام عليكم...
ام تركي: وعليكم السلام هلا بندى
ندى: يمه مادري احس اني تعبانة ومو عارفة اذا هي ولادة ولا لا
ام تركي بخوف: وش تحسين يمه؟
ندى: مغص يجي ويروح بس كل شوي يصير اقوى والله يمه
مرررة تعبانة
ام تركي : وناصر وينه؟
ندى: شوي وجاي
ام تركي: ارتاحي يمه ولا تتحركين ودقي على ناصر يجي لك
انا بلبس عباتي وجاية لك
ندى تحبس المها وامها خافت يوم ماسمعت ردها: ندى
ندى: هلا يمه
ام تركي: طيحتي قلبي اكلمك ماتردين
ندى: يمه تكفين تعالي بسرعة
ام تركي : زين زين صوتي على خالتك تجي لك .. وسكرت منها
ولبست عباتها ونزلت رايحة صادفت ماجد لابس ونازل: ماجد
وين رايح يمه؟
ماجد: بروح لواحد من اخوياي , آمري يمه
ام تركي: ودني بيت عمك ندى اختك تعبانة واخاف يصير فيها
شي ورجلها ماجاها ...
سبقها ماجد للسيارة وحاول يهديها : يمه الله يهداك بيت عمي يعني
بيخلونها
ام تركي: اخاف مايدرون عنها قاعدة بجناحها تكفى اسرع وانا امك
ماجد يحاول يلطف الجو: ههههههههههههه اول مرة اشوف ام تقول
لولدها يسرع
ام تركي : ماجد واللي يسلمك مو وقت كلامك انا خايفة على بنتي
ماجد زاد سرعته شوي عشان امه ترتاح ..
وصلو بيت عمه ونزلت ام تركي... واول مادخلت لقت ندى لابسة
عباتها وخالتها ساندتها تمشيها بتروح المستشفى مع ناصر
ندى: يمه لحقي علي بموووت والله
ام تركي : بسم الله عليك يمه تخفيف ذنوب ان شاء الله...
طلعو بها للمستشفى وركبت ام تركي مع ماجد ولحقوهم
دخلوها على طواريء النساء والولادة والخوف بادي على ملامح
ندى ,,,, وهي تصيح وتتأوه ... والألم فوق احتمالها
ساعة تلتها ساعة وساعة اخرى ,,, ثلاث ساعات من الانتظار
جاتهم الطبيبة : السلام عليكم
الكل قام مرعوب: وعليكم السلام
ناصر: خير دكتورة بشري؟
الدكتورة : فين زوج المدام؟
ناصر : انا زوجها طمنيني يادكتورة
الدكتورة : مافي شي بس راح يكون فيه صعوبة في الولادة الطبيعية
لزوجتك .. حاولنا بكل الطرق بس مافي اي بوادر ان الجنين ينزل
واي تأخير فيه خطورة على الأم والجنين بعد ... احنا الآن محتاجين
موافقتك بس عشان نسوي لها عملية قيصرية
ام تركي: وشوله العملية يادكتورة
الدكتورة: والله ياخالة لازم هالإجراء بأسرع وقت ولا راح يكون
فيه خطورة على الاثنين
ناصر: خلاص سووها وان شاء الله تقوم بالسلامة
الدكتورة: اوكي تعال معاي وقع الأوراق الرسمية عشان نبدا
العملية ومانتأخر اكثر
راح معاها ناصر يوقع اوراق موافقته على اجراء عملية قيصرية
لندى ... وهو مايدري شلون وقع ويدينه ترتجف من الخوف
والكل بالانتظار متوجه بالدعاء للخالق يقومها بالسلامة ويقر عينها
بشوفة مولودها البكر..........
***************************
من فترة دخلو ندى لغرفة العمليات .... والوقت يمر طويل وكئيب
والدقايق فيه كأنها ساعات انتظار...خوات ناصر كلهم جو للمستشفى
اما اريج تدق على خالد تبيه يجيها تروح للمستشفى وقلبها ماكلها
على اختها ....
اريج: خلللللود تكفى بسرعة
خالد: يعني لارحتي الحين بيقولون ولدت؟
ريج: لا بس اكون مع امي مو هنا لحالي تاخذني الوساوس وتجيبني
خالد: زين بالكثير نص ساعة وانا عندك
اريج: كثيييييييير والله
خالد: اريج شسوي وربي زحمة بس بحاول اختصر الطريق
اريج: عفيه خلود لاتتأخر
خالد: ابشري وانتي لاتشيلين هم تو تركي مكلمني رايح هو وغادة
اريج: ياليتني رايحة مع غادة بيت خالتي يوم قالت لي
خالد: خلاص عاد هذا اللي ربي اكتبه .. اصبري وانا جاي لك
اريج: زين
دعت ربها من قلبها يقوم اختها بالسلامة وماتدري ليش قلبها
معورها عليها ,,, هي بالفترة الأخيرة تعبت وكانت متخوفة من
الولادة ....
سمعت صوت جوالها وسحبته .. شافت المتصل بندر
ردت وصوتها فيه الصيحة: الو
بندر: اروج؟
اريج بدون شعور صاحت وبندر خاف عليها : عسى ماشر
ليش تصيحين؟
اريج وهي تشاهق: ندى بالمستشفى
بندر يسحب منها الكلام كلمة كلمة : بتولد؟
اريج: ايه
بندر: كل الحريم لا حملو يولدون
اريج: لا ندى غير
بندر بطولة بال: شلون غير؟
اريج: تعبت عليهم وماقدرو ينزلون الجنين ومدخلينها من
ساعة يسوون لها عملية قيصرية وللحين ماطلعت
بندر: اريج الله يهداك الدعوة فيها بنج وتخدير وتجهيز
للعملية وبعدين يطلعون الجنين وعقب يخيطون مكان الجرح
يعني مو شغلة ساعة وانتهى الموضوع
اريج: ادري انها مو شغلة ساعة بس مادري ليش قلبي ماكلني
عليها ...
بندر: اريج اذكري الله
اريج: لا اله الا الله
بندر: انتي ادعي لها وربي يقومها بالسلامة وهالعملية بإرادة الله
سهلة
اريج: يااارب تسهل ولادتها
بندر: زين من عندك الحين؟
اريج: مافي احد انتظر خالد يجي ياخذني لهم
بندر : حبيبتي لا تشغلين قلبي عليك هدي نفسك وطمنيني عليك
ومانيب مسكر الا اذا وصل خالد
اريج: تسوي فيني خير والله لو قعدت لحالي وكملت وساوس
ما اوصل هناك الا انا مستخفة خالصة
بندر: وانتي يعني تنتظرين انا اتصل فيك؟ المفروض لا احتجتي
لي تتصلين وانا بكون معك بكل وقت
اريج: بندر لا تلومني انا لا خفت ما اعرف اتصرف
|