احيانا الواحد يفكر بعض التفاكير اللي تخليه يحس ان وده يكتب وصيته، يغب عليك قلبك،

وكل مافيك يقوم يوجعك وودك تروح الطبيب بس ماتدري وش تقول له لأنك ماتعرف وين الوجع فيه،

مرات تمسك راسك تحس ان البلا منه ومرات تطقطق ظهرك كود ان الوجع اللي فيه يروح بس ماش،

كل ماتقرأ بجريدة عن مرض تحس ان اعراضه تنطبق عليك مية بالمية،

حتى الكوكب اللي يقولون انه ممكن يصدم بالارض بعد عشرات السنين تقعد تحسب كم باقي من عمرك

وكم زمن وصوله وكنك انت الوحيد المعني بهالخبر، الوسوسة اللي تجي بعض الناس تخليه ماعاد يحس بطعم الحياة،

من خلاك بخلاك تقوم تكوم انواع الهواجيس فوق راسك، مرات تلاقي هالشخص ماسكة معاه

ان فيه مرض وهات يامراجعات وتحاليل الدم كل اسبوعين، احيانا يحس ان الدنيا

خلاص ماعاد فيها شي يستاهل ان يعيش فيها، احيانا يهوجس ان ماعنده صديق وان الدنيا كلها مصالح في مصالح،

قل ايمان الواحد وقل توكله على الله خلا عزومه ترقل واي شي يضيق صدره ويرفع ضغطه،

تلاقيه متضايق بدون سبب، واكثر الاوقات منعزل لحاله، وبس يحسب عمره

وكم باقي له سنه ويموت، مرات يطمن نفسه انه راح يعيش مية سنة ومرات ستين

ومرات يتراجف خايف انه يموت بسكته والا جلطة وهو نايم، بس ناقل هم، ودايم اعصابه مشدودة،

انتبهوا من هالحالة تراها الله لايبلانا مصيبة المصايب مالها حل الا الصلاة بخشوع.