الجزء الثامن
احبك ياعزيز واحب اسميك عزيز ........... ودي تعطيني فرصة ادلعك .... مدري راح يجي يوم تتخلى عنه فيني بس انا خلاص بدونك مادري كيف اعيش .........الله يسامحك ياعزيز ظلمتني معك ...
.................................................. .......................................
هذي لينا .... اللي كل ماضاق صدرها راحت للدفتر اللي شرته في يوم علشان اذا دخلت الجامعة تكتب في محاضرتها ............... بس امها كسرت خاطرها وحطمت احلام بنتها لينا يوم رفضت انها تكمل ..............من يومها ولينا كل ماضاق صدرها فتحت هالدفتر واكتبت مايضايقها وبس .... لفت الدفتر بقطعة قماش شرتها مخصوص له .... سبع سنين مرت عليه وهي تستخدمه ...انهرى الدفتر بس هي مستحيل تغيره .... شرت هالقطعة مخصوص علشان تلفها به علشان تحميه ......ودخلته بين اغراضها في الصندوق اللي حطت فيها ملابسها يوم جت عند عبد العزيز .....
سرحانه تفكر كيف ترضيه علشان ماتبيه يتركها ...
كان في شخص يراقبها من باب الغرفة جاء وهي ماحست عليه ...شخص يحبها من يوم دخلت في حياته بنت ضايعة تبي من يساعدها دخلت قلبه ... وعمره مافكر غير انها مظلومة .... احتار ووده يعرف قصتها بس خاف يسالها وهو يشوف دموعها تنزل ... عرف انها تعبانة ..... نزلها قبل بيتها بس نزل وراها وعرف وين دخلت ... هالبنت اللي علقت قلبه اربع سنين .... وهو كل ماحن لها جاء عند باب بيتها علشان يمني نفسه انه ممكن يشوفها حيرته كثير ....... وحبها كثير
ويوم امه ماتت جاء عند باب بيتها وده يشكي لها همه بفراق الحبيبة الغالية ...
حس ان الدنيا ملكه يوم وصل يوم يخطب عند باب بيتها وفرح اكثر يوم عرف انها هي البنت اللي نزلها في يوم ..مافي غيرها بنتهم الوحيدة ... كيف ماتكون هي وهم نفسهم بالبيت اكثر من ثمان سنين اكيد هي ...
يوم ملك عليها .... ارتاح الحين بيعرف مين هي وش هي قصتها ...... نادوها علشان تدخل عليه .... تمنى انها تعرفه يومها ... وكان وده يعرفها من هو .....
بس شقد تحطم حلمه لمن دقت عليه اخته تعلمه بعد الملكة مين هي وكيف انو الناس تتكلم عليها بالسوء وكيف انها غشته وماقالت له انها مطلقة مرتين ....... مرتيـــــــــــــن .....
لو هي قالت له .... ماكان ظل كل يوم من دخلت هالبيت يشك فيها انها ذاك اليوم ابد مو مظلومة ... وجلس يسال نفسه كل لحظة ..... وش كانت تسوي قبل ماتطلع في وجهه ذاك اليوم....
تعذب من حبه لها كل يوم .... يحبها اكثر ويعشقها اكثر .... مايقدر يخليها ابد تروح عن عينه بس ...... مايقدر
بس الشك الشك قطع قلبه !!!!!!!!!!!!!!!!!!!!!!
ياترى هالشي اللي تخبيه فيه جواب ... رجع لنص الحوش ... ونادى : لينا .............. لينا
سمعت صوته وجات تركض له : سم ..... هلا عزيز ............ الله يعطيك العافية ... تبي احط لك الغداء
لف وجهه ... وضاق صدرها هالقد مو متحملها .... بس هو مالفه علشان يكرها لفه علشان ماتشوف ضعفه من العشق اللي سكنه .... عشقها
عبد العزيز : ماتبين تروحين تشوفين جدتك ....
لينا : اي عزيز ابي ... مشكور
عبد العزيز: في خاطره "اخ ليش تناديني عزيز ماتدرين يالينا وش قد اتقطع يوم تناديني عزيز " .... يلا بسرعة معك عشر دقايق ..
لينا : بس مايمديني اجهز عمري ولا يمديك تتغداء .....
عبد العزيز : لا انا مستعجل اوديك واذا رجعت اتغدا لوحدي يلا جيبي عبايتك ... علشان اقدر ارجعك بدري مابيك تطولين عندهم ..وقفا وكمل : انا في السيارة ...
البست عبايتها كانت خايفة يقول لها ابوديك على طول بس الحمد لله انها بس زيارة ...وراحت معه عند بيت خالها فيصل ... ونزلت وهي نازلة قال لها : اذا خلصت شغلي جيتك ،،،،،خليك جاهزة متى جيت ابدق وتطلعين لي ...
دخلت رنت الجرس وفتح لها خالها فيصل مدت يدها وهي ساكتة وحبت راسه سمعت حس الغالية جوه وراحت وطاحت على يد امها هيا : يمه حبيبتي ... ليش انتي زعلانة مني ....وضمتها ويكن وياها .... الكل استقبلها بحرارة خالها وجدتها وحتى مها ... وماظنت انهم يسوون كذا
الجدة هيا : كذا يابنتي تقطعينا ...
لينا : يمه انتي ماتدري بلاك وش صار فيني ...
الجدة : وش صار ؟؟!!
وعلمتهم وش صار معها في مرضها ...................
....................................
اما عبد العزيز اللي طلع لينا بسرعة من البيت علشان يرجع يبي يعرف وشو اللي خبته .... دخل بسرعة ... وفتش لين حصل اللفة... عرفها ... هي نفسها اللي خبتها .... فتحها ولقى الدفتر فيها ......طلع على الحوش ... وراح على الدرج حق السطح وجلس وتسند على الجدار .... وجلس يقلبها صفحة صفحة .....
اربع ساعات وهو يقرا ... وعيونه دمعت على روحه يوم مارحمها وهي ضعيفة تبي مين يحضنها ويعوض عليها مو يزيد همها هم ..... سكره ورجعه ....." ااااااه ياقليبي انتي ... وانا اللي مارحمتك ... كيف اذا قلت لك احبك وش تسوين يعني بتسامحيني ...ر اح لها مسرع وكنه يبي يعوض عليها ...
.......................................
وفي بيت الخال رن الجرس ....قام يشووف مين وجع : مها قومي داخل هذا عبد العزيز يبي يدخل يسلم على امي ............... فرحت لينا يوم سمعت ياربي ياعزيز اكيد ربي هداك
دخل ..........
وسيده جاحب راس الجدة
عبد العزيز: كيف الحال يمه عساك بخير
الجدة: بخير يمه ... تفضل اجلس ليش واقف ..انت كيف احوالك ؟؟
عبد العزيز : بخير مانسال الا عنكم ...
وتقهوى ولينا تطالعه وهو يضحك "ياقلبي عليك ياعزيز ياحلو ضحكتك "اذن العشاء وطلع هو فيصل يصلون في المسجد ولمن جاء
عبد العزيز : لينا يلا
الجدة: ياوليدي بغيتك في طلب
عبد العزيز : سمي يمه ... انتي امري
الجدة : ابيك تودي لينا تسلم على امها ............... لف على لينا اللي وجهها انخطف وهو وحده يعرف ليش
عبد العزيز : طيب يمه خلاص الحين اوديها
لينا استسلمت لانها ماتبي تقول لا ....لان ساعتها بيسالون ليش....وهي ماراح تقدر ترد ..
عبد العزيز : يلا استئذن
فيصل : ليش توى الناس خلكم تعشوا معنا ..
عبد العزيز : تسلم مرة ثاية بس يلا يمديني اودي لينا عند امها وبعدين بروح البيت ارتاح
سلموا وطلعت وودها لعند بيت امها ....
عبد العزيز : يلا لينا انزلي احتريك ........................ نزلت وهي خايفة ودها تقول له تعال معي ...
مشت بخطوة مترددة .... لين وصلت للباب ودقت الجرس ... فتح الباب ... اللي كانت تخاف منه ...
وسحبها لجوه... وهو مايدري انو عبد العزيز شافه
وهي تصارع عند الباب تبي تلف بس هو مو مخلي لها فرصة
مشاري : تعالي جابك الله .... امك مو هنا ......جالس انا لوحدي...... زين فكرتي تجين تسليني
فجاة جاه كف .... خير يالطيب وش جالس تسوي ...وسحب لينا وراه ..
مشاري طاح على الارض ... تفل عليه عبد العزيز : انسان خسيس .... الشره مو عليك على اللي يفكر يجي هنا
واخذ لينا وطلع وصدم بسعود اللي كان جاي مع امه توهم وشافوا كل شي بس هو وقف منصدم من الموقف يعني معقولة مشاري يسوي كذا .... بس الام الحين كانت منصرعة اكثر لان الحين بيعرفون ليش هي ماتبي لينا في البيت ...
عبد العزيز : تعالي ماعد لك رجعة لهالبيت
سعود : عبد العزيز ........... لينا ............. اصبروا
عبد العزيز : اركبي يلا
وركب هو ... وعند النافذة وقف سعود عند لينا ......
لينا : عرفت ليش ............. وهي تبكي ... الله يسامحكم ياسعود ... الله يسامحكم
سعود : لينا ماكنت ادري ........... صديقيني ....
لينا : كان واضح ...........كان واضح ....وهي تبكي اكثر
عبد العزيز اللي رد بعصبية : سعود وخر نبي نحرك................ واذا تبي لينا تعرف وين هي ... هي في بيتي معززة مكرمة
طول الطريق وهم ساكتين .......... ولمن وصلوا دخلها البيت ودخل ............ راحت غرفتها وجلست على فراشها تخبي وجهها منه وش بيقول عنها الحين ياربي ........... وجلست تبكي اكثر واكثر
عبد العزيز لحقها وجلس جنبها وقرب اكثر .............. اخذها في حضنه ....
عبد العزيز: لينا تكفين لا تصيحين دموعك غالية ..
وردت بصوت مقطوع : انا صدقني ... والله
عبد العزيز : اعرف ياقلبي .... لا تصيحين ... ورفعت راسها ..............." قال قلبي " شافت دموعه
لينا : عزيز اشفيك ...
عبد العزيز : لينا تسامحيني ..
مسحت لينا دموعها وهي مستغربة ....... لف عبد العزيز وطلع الدفتر ... وحطه على حجر لينا ...
لينا : انت شفته ..غطت وجهها بيدينها
عبد العزيز : اي سامحيني ومسك يدها وقربها وباسها ...........
لينا نزلت راسها وبكت اكثر : كله ياعزيز ............ قريته كله ... عزيز اانا احبك والله والكلام اللي ..
حط يده على فمها ................. وباسها على راسها ....
وضحك : لينا قلبي كيف كنتي تنامين هنا ياعمري الفراش يعور ... انا جلست دقايق ماتحملته
ضحكت ............ مسح دموعها .... : تدرين اشلون ايش رايك نجربه مع بعض...
نزلت راسها ......
عبد العزيز : فديت الي يستحون ....عضت عل شفتها ونزلت راسها اكثر
الجزء التاسع
سمع صوت ونه جنبه .....فتح عينه ولقى لينا تون .... بصراحة حتى هو تعب من النومة مايدري ليش ماناموا في غرفته .... قرب منها يصحيها : لينا .............. حبيبتي اصحي ......قام مسرع وراح جاب لها كمادة حارة ... هو عارف انو الالم اللي في ظهرها يرجع لها دايم .... حط لها الكمادة تحت ظهرها ....
لينا : تسلم تعبتك معي ....
عبد العزيز: مايهم قلبي اهم شي راحتك..
لينا : عزيز ...
عبد العزيز: ياعيونه ....
لينا : ابي اقوم ماقدر انام اكثر من كذا على الفراش ..
عبد العزيز: تعالي ..... مسكها من يدها وساعدها علشان تقوم .... من شدة الالم اللي تحس فيه نزلت دمعة على طرف عينها ....
عبد العزيز: لينا ياشاطرة عيب عليك كبيرة ..... وماتتحملين شوي
عفست وجهها وردت: كل هذا منك انت ..
عقد حجاته وهو داري انه السبب ... بس هو شو يسوي زوجته وحبيبته .... جلسها على الكرسي وجلس جنبها ..
اما هي ضاق صدرها علشان طلعت منها هالكلمة ....
لينا : عزيز قلبي لاتزعل ..... اساسا المرتبة مرة متعبة ....
عبد العزيز : معليش اسف قلبي من بكرة اشتري لك مرتبة امريكية علشان ترتاحين عليها اكثر....
لينا بزعل : ليه ........." يعني هو موناوي ينام معي مرة ثانية ..... مو الحين احنا تصالحنا يعني لازم اسوي روحي تعبانة "...انتبه عليها انها سرحت .... وضحك لانه عرف وش تفكر فيه ....
عبد العزيز : تبين تنامين معي ....ونزلت لينا وجهها من الفشلة الحين وش بيقول عني ماتستحي ...
عبد العزيز: انا عمري ماشفت زيك الحين متزوجة مرتين وتستحين بعد ...
لينا بدلع : عزيز ....
عبد العزيز : طيب خلاص .......... لينا ....
لينا : سم ...
عبد العزيز : تدرين اني احبك ......وساد بينهم صمت ......لان لينا مش مصدقة من جد انو ربي رزقها بعزيز اللي حتىفي الفترة اللي راحت عمره ماتذمر منها او فكر يتخلى عنها ...وجاء في بالها سؤال ...
لينا : عزيز ..... انت الفترة اللي راحت عمرك ماضايقتني بس كنت احسك تعبان .... ابي اعرف ليش ...
قدم نفسه على طرف الكنبة .............. وتنهد ...
عبد العزيز : تدرين قلبي انك حيرتيني كثير ... مادريت انو ممكن ربي يجمعنا في يوم بس .... يوم عرفت انك انتي اللي بتزوجك فرحت .... كان في خاطري سؤال .............. كنت ابي اعرف قصتك وابي اعرف ليش طلعتي في وجهي ذاك اليوم........ لكن فرحتي راحت يوم عرفت انك خبيتي عني انك مطلقة مرتين .... وعرفت انو الناس ماتمدح فيك ابد ....ضاق صدري يوم حسيت انو في احتمال ولو مليون في المية ان الكلام اللي يقولونه الناس صدق ........ وظل السؤال في خاطري يقطع فيني ومالقيت له جواب ... و كنت اشك انك ممكن تجاوبين عليه بصراحة وماواجهتك ........ تخيلت انك خبيتي عني مرة ... يعني ممكن تسوينها ثاني مرة ......ارتحت يوم عرفت اللي صار ...................سامحيني اني ماحترمت خصوصيتك ...................... بس الشك ذبحني .................................سكت شوي بعدين كمل : ..... لينا .... تكفين ياليت تنسين ... سامحيني ... مو كل شي يقولونه الناس صدق .... المفروض اني اسالك ............. مد يده ودار وجهها لوجه : لينا ابي اسال ليش انتي كذا ............. المفروض ماتسكتين ... لازم تدافعين عن نفسك .....
نزلت راسها ......لينا : ماتعودت ....عزيز ....وتغير وجهها .....وهي تدري انو كلامه صحيح ..
عبد العزيز ضحك وباسها على راسها .....: خلاص انا ادافع عنك بس بشرط ...
رفعت راسها وقالت بدلع : امر ...
عبد العزيز : هم ثلاثة شروط ....حط يدينها في يده ..... اولا تسامحيني ولا عاد نرجع لهالسيرة ................
لينا : وثانيا ...؟!
عبد العزيز: تحبيني مثل ماحبك ....
حطت عينها في عينه : قد ايش عزيز تحبني ...
تنهد : اااه ياربي بلاك ماتعرفين قد ايش ....
ابتسمت .....: والثالث ....
عبد العزيز: بوسة ....
حطت يدها على فمها ورفعت حواجبها وقلبها يدق بقوة ومن قوته بيطلع من محله : يوه
عبد العزيز: الحين طريت البوسة وسويتي كذا لو بغينا اكثر وش بتسوين ..
طقته على كتفه وهي تبي تعاتبه : عزيز
عبد العزيز : عيونه ............... تدرين عاد جوعان مرة .....
لينا : الحين اسوي لك شي تاكله ...
عبد العزيز : لا قومي البسي نروح ناكل برى ......ومنها نغير جو ..
قامت البست وهو بعد شخص وطلع معها .... ركبت جنبه بالسيارة وهي سرحانة فيه ..... هي طلعت معه كثير بس المرة هذي غير المرة ذي طلعت معه وهو زوجها صدق وحبيبها ........ فرحانة والدنيا كلها ماتوسع فرحتها به ...... بس فجأة تغيرت ملامحها وكن الفرحة طارت منها في لحظة ، لانها تذكرت شي .
لينا : عزيز ......................
عبد العزيز : عيونه ...
لينا : تهقى اهلي بيكلموني .....
عبد العزيز : شوفي انا رايي انك ماتقطعينهم بس خلي السالفة الحين تاخذ وقتها .. وكل شي ينحل... بس طلبتك يالينا بعد اليوم لاتسكتين عن حقك ابدا ...
لينا : ان شاء الله
الحين ارتاحت نفس عبد العزيز اللي يحبها وهو واثق انها تحبه .... الحين لقى البنت اللي بيعيش معها وبتكون دوووم معه ان شاء الله حبيبة وصديقة وزوجة .....بتملى عليه وحدة دنيته اللي ضاقت به من يوم مرضت امه ..وتكفل بها لين ضاقت به الديون ... وهو لسى يدرس واطر يشتغل على الليموزين الي كان حله الوحيد علشان يحصل فلوس يصرف بها على مرض امه ... حتى اخته ماقال لها انو الفلوس ضاقت به علشان هو صمم يقوم بنفسه بالمصاريف علشان هي امه الغالية .... ويوم ماتت تمناها تكون جنبه تشيل عنه الهم والضيق ....ساقته رجلينه تحت بابهم ..بس مارتاحت نفسه ... ورجع وسكر على نفسه الباب وحيد ... عاش حياته يتمنى قربها ... يوم تخرج وتوظف عز عليه يترك الليموزين لانه سبب معرفتهم ....قرر يمضي في طريقه ومادري انها رجعت ودخلت ثاني حياته ... رفض كثير فكرة الزواج بس وافق يؤدي اخته بس علشان يخلص من اصرارها .. ولمن وقف عند الباب انصطدم هو نفس البيت ... احترى اخته على احر من الجمر وعرف انها هي .... تعذب كثير وهي قدام عينه ويبي يعلمها انها عشقه ... اللي ماتصور انه يملكه والحين هذا هي جنبه تاكل وتاكله وتدلعه زوجته حبيبته ....... " اي يالينا ابي اعوضك عن كل ماراح منك في هالدنيا وان شاء الله ربي يقدرني "
ضحكت صار له مدة سرحان فيها وهي عجزت تبي تنحاش من نظراته اللي اكلتها بس هو احرجها ومابطل ..
لينا : عزيز حبي خلاص .................ماعاد فيني شوي وبغص باللقمة لا تناظرني كذا ..
عبد العزيز : ياعيون عزيز وقلب عزيز وش اسوي ..... ماقدر ...الا عاد كان تبيني اتفرج على اللي في المطعم ماعندي مانع
كشرت وردت الملقة في الصحن : كيفك عزيز ...
عبد العزيز: المشكلة مايملى عيني الا انتي ............. ماقدر الف وجهي .... وضحك
لينا : الله لا يحرمني منك ......
اليوم تمشوا لين الليل وانبسطوا كثير قد مايقدرون لان بكرة عبد العزيز يخلص اووفه ويشتغل .....ورجعوا البيت بدري ..
عبد العزيز اول مادخل راح الغرفة وشال اغراض لينا كلها لغرفته ..
لينا : عزيز قلبي خلها بكرة انا اوديها روح انت ارتاح ..
عبد العزيز: مالي راحة في بعدك ابد من اليوم تنامين معي وعلى طول ... يلا قدامي ..
لينا : توا الناس عزيز.... روح انت انا بجلس شوي..
عبد العزيز : لا مايف ماراح انام الا على حضنك ..يلا
ضحكت ومدت يدها له ..وراحت وحطت راسها على المخدة بتنام بس لاول مرة حست للنوم طعم ثاني ...
الطعم اللي دخله عزيز على حياتها
...............................
قامت الصبح بدري علشان تجهز له لبس الدوام ... والفطور
عبد العزيز: والله انا ماقدر على هالدلع ادوخ ..
لينا والابتسامة شاقه وجهها : ياعمري انت ياعزيز.... جعل ايامنا كلها دلع ... لا ياقلبي تعود من اليوم ادلعك ولطول العمر ان شاء الله..
عبد العزيز جلس على الطاولة وهو يفطر ..: لينا ابي احول دوامي شفتات ..
لينا : ليش ..... تراني ماقدر انام في اللي لوحدي ...
عبد العزيز : وانا بعد ياقلبي اخاف عليك ... نلقى لها دبره ......... بس انا لازم ابدى شوي اكون لنا كم قرش علشان نبني مستقبلنا ياقلبي ... وبعدين ابي اخلص من الديون بسرعة لسى باقي علي شوي ...
لينا : طيب عزيزليش مانروح نسكن بالعمارة ................وقبل ماتكمل
عبد العزيز وقف وهو معصب ورمى اللقمة اللي في يده: لينا ماصارت كل ماطقت حصاة قلتي عمارة ... لا
لينا : عزيز قلبي انا اسفة لا تزعل ... وشدت طرف بدلته ..... اجلس حبيبي كمل فطورك هذي اخر مرة ...
عبد العزيز : شبعت..
لينا : علشاني عزيز .... تكفى .............. وطالعت بنظرة ترجي ...
جلس ماحب يزعلها هو يبي يعوضها مو يزيد عليها .....: خلاص بس اذا تحبيني لا تجبيبن طاريها ابد ..
لينا : خلاص اوعدك ...
كمل فطوره .... وقام ....قامت وراه ولمن وصل للباب ....
لينا : عزيز ماكنك نسيت شي ..وهي مستحية
عبد العزيز اللي كان لسى مافك العقدة من حجاته : لا وشو .......... ومد يده يتفقد مفاتيح السيارة ..
لينا : عطيني بوسة ..
استناس : لا ياقلبي انت لو صابره علي شوي ... وقرب يبوسها ...
ضحكت : عزيز انتبه على عمرك ..................وتوكل على الله ....
عبد العزيز : اااااه ياقلبي ترى برجع ماني مداوم ....
دفته .... : يلا روح
عبد العزيز : طيب ....مع السلامة
لينا : في امان الله ..... سكرت الباب ....وووقفت وراه...... " اه ياعزيز جعل يومي قبل يومك"
دخلت وجلست تنظف ...... وطبخت ..... وجهزت نفسها علشان جيته .... بس هو دق عليها .. وقال لها انه بيتاخر ....انكسر خاطرها .... بس معليش تستناه ....مابقى على اذان العشاء الا شوي وهو لسى ماجاء مو عادته ... خايفة عليه ...بس شلون تدق عليه جواله مايرد ...
وهي جالسة سرحانة رن الجوال ....وجاء صوته تعبان : لينا ...
لينا : عزيز اشفيك ................
عبد العزيز : لا ابد قلبي بس الشغل اليوم كثير .... عسى ماخفتي لوحدك
لينا : لابس كنت خايفة عليك ...
عبد العزيز: يابعد قلبي يلا انا جاي بالطريق ... سكرت وراحت تجهز له الحمام اكيد بيجي تعبان .... وجهزت له الاكل .....
دخل عبد العزيز .... واستقبلته ... : ياعمري شكلك تعبان ..ياحياتي
عبد العزيز : اي والله ..... تسلمين ياعمري ....
لينا : روح انا مجهزة لك الحمام ..... على بال مااجهز لك الاكل ..... دخل وراحت تجهز له الاكل على الطاولة ..
اخذ له حمام نص ساعة طلع والراحة تشع من وجه مر مبسوط بوجودها في حياته
عبد العزيز : ياقلبي تسلمين والله اني تعبتك معي
لينا : تعبك راحة ...... ... عشته بيدها ولمن خلص راح يتفرج على التي في .... شالت السفرة ولحقته وجلست جنبه ...... يوم شافها جنبه حط راسه في حضنها .....وجلست تلعب في شعره
لينا : عزيز ...
عبد العزيز : امممم
لينا : ماقلت لك .......................طاالعها ... تراني احبك موووووووت
خذ يدها وحطها على فم وجلس يبوس فيها : موقدي ياعمري
لينا : خفت عليك مرة يوم تاخرت ...ياعمري لا تتعب نفسك كذا اهم شي صحتك ...
عبد العزيز : ياحبي ... وش اسوي ...
لينا : يلا عساك على القوة .....
عبد العزيز : ربي يسعدك يالينا كانك مليت علي حياتي .....
لينا : الله يخليك لي ذخر ولا يحرمني منك دوووم يانظر عيني
وقطع جوهم الحلو صوت جايهم من الشخص اللي وقف عند باب الغرفة : ياربي اللهي يهنيكم .... يعني انا كنت ماني متكلمة بس استحيت خفت تقولون شي اعظم
التفتوا مع بعض جهة الصوت ... لقوها نوال اخت عبد العزيز ..اللي كان معها مفتاح البيت من زمان ..
عبد العزيز : حياك هلا والله
نوال : هلا باخوي .............. هلا لينا كيف احوالك ..
لينا : تمام .... استحت تقوم علشان قميصها المكشوف اللي كانت متزينة به علشان عبد العزيز
عبد العزيز : لينا نوال مدت يدها قومي سلمي ..... قامت وهي مستحية ...
نوال ضحكت لانها عرفت ليش هي ماتبي تقوم من اول : شكلي نغصت عليكم ...
عبد العزيز ضحك : بيتك ومحلك وينه بو عاقول (( هو يحب ينكت مع زوج اخته ودايم يسميه بوعاقول بس زوج نوال سلمان طيب مره ويستحي فكان مايسمي عبد العزيز شي ))
نوال : عبد العزيز ....رح تكفى خلي سلمان يصد علشان لينا تدخل داخل ...
راح عبد العزيز .... وراحت لينا تغير ....ماظنت ابد ان نوال كذا طيبة ....تصورت انها بتكون شايله عليها ..بس طلعت زي اخوها مافي اطيب منها ...جلست عندهم يومين ...
نوال : لينا انا الحين اروح وانا متطمنة على اخوي ..
نزلت لينا راسها : عزيز في عيوني ....
نوال : يسلم عيونك .....سلمت عليها وطلعت لزوجها اللي يحتريها في السيارة .... ومشوا للرياض ....
|