مشتاق لك والغـلا قـرب يضيعنـي
والخـاطر اللي صِبر مل وقضى صبـرهـ

بعلمك شـيٍ وإفهـم دام تسمعنـي
من واقع التجربه والوقـت والخبـرهـ

لو الخلايق على حبـك تنازعنـي
يبطون مآحركوآ فينـي مغـز إبـرهـ

ماغيرك أحـد ٍقـوى قلبـي وولعنـي
وغـلاك عندي بوسط القلب ياكبـرهـ

جيتك مشتـت فكـر ودي تجمعنـي
متضايق من البعـاد وشوف لـي دِبْـرهـ

لو بتكلـم غزيـر الشـوق قاطعنـي
مكسور والخاطر المكسور وش جبرهـ

يخونني الوقـت والغيبـه تصارعنـي
أكتب وحتى القلـم خان ونشف حِبرهـ

رجعتلك { والغلا والشـوق } رجعنـي
ياحيّ هالشوف و الضحكه و هالنبـرهـ

غيرك من الناس لو حـاول يطالعنـي
أصد عنـه ولا أشوفـه ولا أعتبـرهـ

إلا أنت يالشـاري اللي منت بايعنـي
نظرة عيونك صفا لـو ليلتـي غبـرهـ

وإن كان ودك لدرب الحب تدفعني
القلـب يعشقـك مايحتـاج تختبـرهـ

وأكبر دليل الخـلايق لـو تنازعنـي
بالحب ماحركـوا فينـي مغـز إبـرهـ