ياهاجسي

تحميل


ياهاجسي .. غن طاروق الشعر غنه


الحق على مابقى .. والا العمر فاني


وياصدري اصبر مثل صبري على الونه


ياطول صبرك علي وشين ماجاني


يلج فيك الحزن .. واخفيه واكنه


واذا بغيت اشتكي .. ماطاوع لساني


وانا اللذي لو ظروف الوقت حدنَه


يموت مايشتكي لفلان وافلاني


من سبة اللي عشقته من صغر سنه


اتناه يكبر .. مثل ماكان يتناني


كنه خلق مني .. وكني بعد منه


والله مدري .. من اللي يموت في الثاني


ابيه .. واقدره .. واغليه .. واحنه


مثل ماهو .. يرخص الدنيا على شاني


كم واحدٍ .. ما غدت بقعا على ظنه


لو هو على الكيف .. ماقفى وخلاني


نبغا من الحظ .. والله ماعطا منه


ياما تمنيته .. وياما تمناني


يسوقني خافقي للوصل .. واعنه


ولولا غلا صاحبي .. ماكان عناني


من اول يزورني محدٍ درى عنه


واليوم عذره .. بلاي .. عيال عماني


يابو علي .. صار لامن مرني كنه


يستعجل بخطوته لجل يتعداني


واجيه .. واقدامي اللي كل ماجنه


يردها سلم ابوي .. وسلم جداني


العين في شوفته .. لامر ممتنه


ياجعل يسقى علي قدام يجفاني


الهجر طوَل .. وقدني مبطيِ منه


واخاف اذا زيد جا .. ماعاد يلقاني


القلب يصبر على فرقاه .. لكنه


الى طرالي .. وانا في الليل .. سراني


ان كنت انا غاليٍ في ناظره فإنه


غلاه يجري مع دمي وشرياني


لاصار مابه عشم لإبليس في الجنه


احسن لي اعيش باقي العمر وحداني


ولو سج مني .. عساني ماخلا منه


والله منساه .. كود الموت ينساني