هلا بالخاطر اللي لى خطر يرتاح معه البال
هلا باللي إلى جاني يروق لجيته بالي

جفول لى حضرني وانحرج من زحمة الأزوال
أقوم لخاطره من مجلسي واروح بلحالي

أشبه جيته مثل الحبيب اللي فراقه طال
نطحني وابتسم عقب الزعل في مدهل خالي

إلي رد السلام وقال وشلونك وكيف الحال
حسبت أن السعادة كلها ما خلقت إلا لي

أرحبه تراحيب الثرى للصيب الهمال
ألى هل وهطل واجزل وبارك غيثه الوالي

يجيني والحمول ثقال لاتترك ولاتنشال
ويسري والخفوق المبتلى من همها سالي

وانا لولا الخواطر والقلم والشعر والترحال
تسليني عن همومي تلقيت الخلا الخالي

انا شاعر ولا احب المشاعر في الضمير تغال
وراعي الذوق ما يخفى عليه المر والحالي

أفاضلها وأميز بين مايترك وماينقال
واعرف ان السكوت احيان والصدات اجدالي

تمهل يانديمي طالبك لا تجرح الامال
ترى بعض الهموم الغاليه محذور تنقالي

تحملها لعلي بالحوادث والزمان احتال
ترى صرختك في جوفي سببها صاحب غالي

وانا لولا الغلا واخشى يراعي يسحر العذال
حرام إني لا ألبي طلبتك واطف مكيالي

وانا اشوف القوافي شرفت مع هاير منهال
وقفلتها على ذا البيت اولى له واولى لي