..

.. ( البارت الثلاثون ) ..
.
. ‏
غدا ألقاك أغنية
‏يحنّ لشدوها.. قلبي
‏وكم سكرت حنايانا
‏وتاه البعد.. في القربِ
‏فلم نعرف سوى النجوى
‏لنحيا الحب.. للحبِّ ‏
" فاروق جويدة "
.
.

تركي جلس ونظر لشقة الصغيرة : مطول بذي الشقة .
سيف جلس امامة وبضجر : بطول ويمكن اموت فيها، لكن رجعة لبيتنا مستحيل .
تركي بملامح كُره وحقد : اذا تذكرت اخوك مدري وش يجيني .
سيف بهدوء ضايق : هذا مهب اخوي اللي اعرفه لكن ايام ، وكل شي بالنهاية بينكشف .
تركي بعدم فهم : وش اللي بينكشف .
سيف بتغيير للحديث : مابي اصدمك واقول محمد طلب هاجر ترجع للبيت .
تركي كشر بقرف : في احلامه ، وانا اقول جات منه زوجني اياها يبي ياخذها بعد .
سيف بملل : نطلع مكان ؟! .
تركي بتسلية : وين يمكن يكون رياض بوقت اجازته ؟! .
ضحك سيف : نسال عنه .
وقف تركي : انا متاكد بمكان يهول .
..
صعد السياره حاملاً ثوبه المكوي : روح اقرب حمامات ع الطريق عشان اللبس .
بملامح اشمئزاز استدار له ماجد : بلعت موضوع انك تكوي عند اي مغسلة فوقها تبي تلبس بحمامات .
ابتسم انس ابتسامة صغيرة فالاحداث الغريبه لاتسمح له بها : اذا مشينا ع هواك تاخرنا .
ماجد قاد السياره بسرعه واتجه ناحية شقته : بنروح لشقتي .
بتر جملته وهو ينظر لنصف وجه انس : الا ليش خليت الحرس يروحون .
انس مسك راسه من الصُداع : وجودهم زي عدمه .
ماجد تنفس بغضب : كيف وجودهم زي عدمه ؟! .
انس بنفاذ صبر: ب اختصار مابي احد وراي .
ماجد بقهر : انت مو عاجبني .
ضحك انس بسُخرية : هو انا عجبت احد من قبل ؟! .
وقفت السياره امام المكان المقصود وترجل ماجد هاتفاً : انزل بس ي عريس .
حمل انس ثيابه وتبعه وبهدوء : رقم الشيخ فلاح عندك ؟! .
وقف ماجد بصدمة : وش تبي فيه ؟! .
انس بملامح جاده تُخبي خلفها الكثير : بتملك اليوم .
ماجد بتلعثم : اهل البنت ردو عليك خبر .
واكمل بتردد : لاتطيح بغلطي .
انس نظر وغمز له ساخراً : يمكن احبها زيك .
بندم هتف ماجد : وانا قلت عقلك بذاك اليوم مو معنا .
انس اشار لراسة ببتسامه مُتعبه : مستحيل انسى كلامك .
واكمل وهو يتبعه : راكان رد علي انهم موافقين برساله لكن يبيني بموضوع .
ماجد بتساؤل : وش الموضوع ؟! .
انس وقف خلفه وعيناه على ظهر ماجد وهو يفتح الباب : اكيد ماغيره .
ماجد نظر له : طيب وشهو؟! .
انس نظر بصدمه وهو ينسى ماكان يُريد ان يقول .
..
تتوسط اريكة الصاله وساقيها مُمدده امامها ونظرها على التلفاز وبتذمر جائع : وهذا مايقول فيه انسانه وراي ماعندها اكل ، يكفي بالع مع ولد عمه البارح وسحبو علي .
وقفت وزفرت انفاسها بخطه خبيثه وتحركت بخطوات واسعه وقفت امام الباب ونطقت بصوت عالٍ بعد ان فُتح : انا بموت من الجوع وانت ماهمك .
سكتت ونظرها لمن خلف ماجد ، ابعد انس نظره وتحرك مُبتعداً بخجل .
تقفل الباب فجاه بقوه ولازال نظرها معلق بالهواء ، شعرت بكف ماجد الضخمة ضاغطاً على ثغرها و بفحيح : فيه احد يوقف قدام الباب .
رفعت يديها محاوله ابعاد كفه عن ثغرها وبلعثمه : مادريت ان احد معك .
ترك ثغرها وسحبها من عضدها وبغضب : وش بيقول انس عن اللي شافه وسمعه .
دفعها داخل الغرفه وبغضب : موتي جوع .
ابرار تحاملت ووقفت قبل ان تسقط وبرجفه : مفروض تقول لي قبل تجيب احد .
بعينان اشتعلت : لاسمع حسك .
وتحرك بسرعه خارجاً و بتهديد : موتي عشان ارتاح ي مصيبه .
جلست بتثاقل وملامح انس تمر عليها اطول واجمل بكثير من ماجد يملك عينان حنونة .
اغلقت عيناها بضيق مُبعده ملامحه عن عقلها ، وتنهدت مُتذكره الموضوع بفشله اكبر .
..
بحث عنه وتنهد وهو يراه يخرج من حمام الفندق .
ماجد اقترب وبتوتر : اللي شفته .
قاطعه انس وبهدوء : ماشفت شي .
وبملامح مُستفزه : اعطيتها شي تاكله ؟! .
عض ماجد شفاهه السُفليه وبغيض : توك تقول ماشفت شي .
ركب انس واغلق الباب مُعدلاً شماغه في المراءه العلوية : ماشفت لكن سمعت .
ماجد اتجه ناحيه الباب الاخر وحاول فتحه هاتفاً : خلها تموت وش عليك .
اغلق انس قفل الباب من جانبه : ماراح تروح معي .
ماجد ركل الباب وبغضب : انس افتح الباب .
انس بغيض : البنت جوعانة ، وانت تبي تروح وتخليها ؟! .
ماجد زفر انفاسه وبهدوء : بروح وبرجع .
هز انس راسه وابتسامة مُتعه علت ثغره همس : وهذا وهو يحبها .
..
ماجد وقف امام موظفين الاستقبال وبهدوء : جناح رقم ** ، وصلو له اكل .
الموظف ابتسم ب احترام : اوك .
دفع النقود وخرج وهو يُغلق محفظته .
اعاد انس ظهره للخلف وابتسم براحة مُغلقاً هاتفه : حسيت اني ابوك وابوها وتوني ارتحت لما اكلتها .
سحب ماجد الباب مُعلناً اغلاقه بغضب : سوق وانت ساكت .
انس التزم الصمت وتفكيره يقوده لامور بعيده .
خرج من دوامت تفكيره على صوت ماجد : من كنت تكلم ؟! .
انس بلل شفاهه وبعينان على الطريق امامه : احمد .
وبتساؤل هادي : ابوي وش عرفه ببيتهم ؟! .
ماجد وملامحه تلين : مدري .
نظر انس لساعة وتافف بضجر : تاخرنا كثير .
..
وقف راكان حاملاً براد القهوة : فنجانك ي عم .
مد ابو انس فنجانه ونظره لابو علي مُخفي خجله : انس عنده شغل ويعتذر منكم .
ابو علي وملامحه المُجعده تُزينها ابتسامه : تكفي وتوفي .
ابو انس بصوت رخيم : ها حنا جايين نطلب القرب .
قاطعه ابو علي : لازم تعرفون شي .
ابو انس بتوتر قبض على اصابعه : حنا عارفين .
راكان وفهد رفعو نظرهم بصدمه .
فهد همس : وش عرفهم .
راكان تنهد براحه : سعود وهو خويي مايدري .
واكمل همسه : احس هم وراح .
ابو انس هتف محاولاً تدارك الحديث : انا بجمعية الحقوق اللي قدمتوها لها .
ابو علي ابتسم : الحمدلله .
قطعو حديثهم على دخول انس وماجد خلفه : السلام عليكم .
اغمض ابو علي عيناه براحه شاعراً بحمل يخف عن ظهره .
ابو انس ابتسم الاخر براحه .
بعد اخذ الاخبار هتف انس بصوت رخيم : دام البنت موافقه فالملكة اليوم .
اتسعت عينان الجميع دهشه ، وهز راسه ابو انس بتاييد : خير ماتسوي ي ولدي .
ابو علي وقف بثقل مُتعب : تعال .
ابو انس انزل راسه بتوتر .
وقف انس بثقه وتبعه بهدوء .
وقف راكان من جديد على صوت طرق الباب .
هتف ماجد : هذا اكيد احمد والشيخ .
..
وقف بمجلس ذا اثاث بسيط وصغير نسبتاً بالمجلس السابق ، اشبه مايكون غرفة طعام .
ابعد نظره عن التجول على صوت ابو علي : انت عارف ان البنت مالها اصل لكن لها اهل .
اخف انس غضبه من هذا الموضوع : ايه .
ابو علي بجدية : دامك عارف ليش خاطبها ؟! .
بعينان مصدومه : كيف ليش خاطبها ؟! .
ابو علي بحده : اذا مفكر ان البنت مالها اصل بتسلئ فيها .
قاطعه انس : تربيتك وهذا يكفي .
وبصوت مبحوح رجولي : ماخطبتها الا ابي القرب منك .
ابو علي انزل نظره على يديه المُتكيه على العصاء امامه وبهدوء : عندي اربع غيرها .
انس قاطعه : مانبي غير اريان .
ابو علي رتب على عضده وبملامح ضايقه ومتعبه ظهرت من بينها شبه ابتسامه : اريان تسوى كل عيالي ، ولا تجيني يوم مضيومه ماعاد تعرف دربها .
انس حبس كلماته الساخره : اللي تامر فيه ي عم حاضر .
ابو علي بوجع سنين هتف : لقيتها عند باب بيتي ومالها شهر ، ولما بكت تبي الحليب ارضعناها مع تركي ، صارت بنتنا واغلى ، ولما طولو اهلها ماسالو عنها وديناها لجمعية كانو بياخذونها منا لكن رفضنا وطالبنا ، وكبرت بينا .
ورفع نظره وبعبره غصة في بلعومه : اريان الشوكة تجرحها ف انتبه لها من اللي اقوى منها ، والله الله ببنت الصايل ي ولد العايد .
انس توتر من حديثه الغريب وبعض جُمله المُبهمه : ابشر .
..
وقف احمد والماذون على دخول ابو علي وانس الذي يتبعه بملامحه شاحبه .
هتف احمد : والله شكله مغصوب .
ماجد هز راسه هاتفاً بخفوت : هذي مايبي لها، لكن كان وجهه طبيعي قبل ياخذه الشايب .
الماذون فتح دفتر عقد القران : بسم الله .
واكمل ونظره يتجول بينهم : العريس يقرب والشهود .
همس راكان لفهد : مارد ؟! .
فهد انزل نظره لهاتفه : جوال تركي مقفل ، وعلي مارد .
رفع نظره على صوت انس : ماجد واحمد الشهود .
الجميع علت ملامحهم الدهشه من اختياره الذي لا مجال للاعتراض فيه .
الماذون تصنمت يده عن الكتابه ورفع نظره ب استغراب : متاكد ي انس ؟! .
الجميع فهم مقصده الا احمد وماجد .
انس نظر لوالده وبعينان غير راضيه هتف : ايه .
الماذون الشرعي بهدوء نظر لابو علي : كم لها معكم ؟! .
ابو علي : ٢٠ سنه .
الماذون ببتسامه وحكمه ونُصح : جزاك الله خير ، خير ماسويتو .
نظر لانس وبعد صمت ثواني : انا اعرفك واعرف اهلك من سنين ، وعارف انك مانت ظالمها ، ولا الظلم يطلع منكم والميزان عند الله هو تقوى الله عز وجل دون الحسب والنسب وقال تعالى في كتابه : {يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَى وَجَعَلْنَاكُمْ شُعُوباً وَقَبَائِلَ لِتَعَارَفُوا إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ} [الحجرات: 13]، وجاء في حديث أبي هريرة رضي الله عنه عن رسول الله صلى الله عليه وسلم قال : "تنكح المرأة لأربع لمالها ولحسبها وجمالها ولدينها فاظفر بذات الدين تربت يداك "، وقال أيضا: " من تزوج امرأة لجمالها ومالها حرم مالها وجمالها, ومن تزوج لدينها رزقه الله مالها وجمالها " .
ومسك ظهر كف انس وبهدوء : الزواج من لقيطه بجتمعنا صعب ، لكن السهل اذا صرت قوي ولاسمعتهم ، وان شاء الله انها بتكون ام عيالك .
ماجد اتسعت عيناه ونظر لانس بصدمه ، احمد انزل نظره محاولاً استيعاب ماقيل امامه .
انس بهدوء وكلام الماذون دخل قلبه قبل عقله : رغبت فيها زياده .
ابتسم الماذون وبدا يكتب الاجراءات الخاصه بعقد النكاح .
وقف ماجد برعب وحرك راسه بعدم رضى لانس وخرج تحت نظرات راكان وفهد .
اعتذر ابو انس وهو الاخر ينهض وصدره يضيق مما يسمع بسبب مافعله للفتاه المسكينه كل هذه السنين .
بلل راكان شفاهه ونهض جالساً بجوار احمد : انا اخوها وودي اكون شاهد .
رفع نظره الماذون وابتسامته زادت : خير ماتسوي ، والله ي وليدي كان فيني فضول اعرف كيف عايشه بينكم .
ابو علي ابتسم من بين ضيقه ناطقاً : راضعه مع واحد من عيالي ، وصارت بنتي .
وقع انس براحه غريب لاول مره يشعر بها في حياته ورفع نظره للماذون .
الماذون الشرعي اشار لاحمد بالتوقيع ثم راكان .
وهمس في اذن انس : ابوك ماهب راضي عن زواجك ؟! .
انس نظر جهة الباب : الا راضي وهو اللي طالبني .
نظر الماذون لتوقيعهم ثم اشار لفهد بحمله : يلا دور اختك توقع .
واعاد الماذون تكرار ماقال في الاجراءات : ماطلبوه اهلها مهر او شروط لازم يتم او يبطل عقد القران .
انس ابتسم : لاتشيل هم .
..
وقف بالمطبخ وتنهد هاتفاً لريما : نادي امي بسرعه .
دخلت والدته بعد دقيقه وبخوف : عسى خير .
رفع فهد دفتر ضبط النكاح : دورك .
ام علي وهي تتعرف ع الدفتر ضربت صدرها : من بتزوج .
فهد ابتسم : اريان بتاخذ انس العايد ، شوفي كيف ربي كتب لها الخير .
شهقت وبضيق : بنتي مانب مزوجتها توها صغيره .
فهد اتسعت عيناه وب استغراب: وش تقولين يمه ؟! .
ام علي : مالها عشرين سنه مسرع بنزوجها .
رفع فهد حاجبه وبُسخرية : شوفي نجلاء متزوجه ام ١٧ .
قاطعتة ام علي هاتفه : اريان غير .
..
اتسعت عينان الطفله لمعه ودخلت تجري ورمت جسدها في حجر اريان الجالسه امام الفتيات بالصاله .
اريان بخوف رفعت راسها مستغربه من بُكاها : ريوم وش فيك .
رفعت راسها وهتفت من بين شهاقات : بتتزوجين انس وبتروحين وامي ماتبي ، وانا بعد مابي .
اسيل فتحت عيناها : من انس اللي تقول ذي .
هاجر صفرت بخبث : تخيلي صديق راكان المزيون .
هند نظرت لهم وبضياع : انتم وش تقولون .
اريان بخوف من كل ماقالت : اكيد تمزح .
ريما بكت وبصُراخ : فهد قاله .
لم تُكمل جملتها ع صوت تنحنح فهد : ي ولد .
وقفت هاجر وبخطوات واسعه خرجت .
دخلت فهد على صوت هند : ادخل ي فهد .
فهد بلل شفاهه وبربكه من الموقف مد الدفتر : ابوي امس قالك ، وانتي رديتي بالموافقه ، والحين وقعي .
اريان تغير وجهها للخجل لم تتوقع سرعة هذا الامر ورفعت عيناها له وهي تتذكر حديث ريما .
اراحها سؤال اسيل الفضول : مين سعيد الحظ ؟! .
ابتسم فهد وانزل الدفتر امامها مُشيراً لاسم انس ، والتوقيع الفخم تحته .
صرخت هند ووقفت تبحث عن هاتفها : لاتكفين لاتوقعين خليني اجيب جوالي .
وقفزت اسيل الاُخرى : وانا بعد .
فهد بحدة : مابقى الا هي .
اسيل فتحت هاتفها وبدون مبالاة : لاتكون معقد كلها صوره .
اريان وملامحها تتجمد وعظامها تبرد والعالم يقف عند هذا الاسم هتفت ببرود غريب : مو موافقه ع الزواج .
ضحك فهد وهو ياخذ الامر بمُزاح : اخلصي بس ماهو وقت مزح .
دخلت والدته من خلفه وبهدوء ضايق : لاحد يجبرها اذا هي ماتبي .
فهد نظر لوالدته : يمه اكيد تمزحين ، هذا ولد العايد كيف ترفضينه .
ونظر لاريان : يلا اخلصي تاخرت .
وقفت اريان وبرجفه : قلت مو موافقه, الوضع غصب ؟! .
ترك الدفتر ارضاً وسحب ذراعها وبفحيح : كيف مو موافقه ؟!.
اريان هزت راسها : يعني مابي الزواج .
فهد بحده : رافضه الزواج ولا الشخص نفسه ؟! .
اريان بتوتر ابعدت وجهها عنه : الزواج .
ضحك فهد وحمل الدفتر : خلاص نعتبره خجل ، يلا وقعي .
اريان بحده : انا قلت مابي اتزوج .
صرخ وهو يُرخي صوته : قلت لك وقعي لا اذبحك ، مابقى الا هي ترفضين , والزواج ماهب الحين يعني ارتاحي .
اريان هتفت بخفوت : وش قصدك مابقى الا هي ترفض .
فهد بغضب وعيناه تشتعل : واضح كلامي ، ووقعي لاتفشلينا برفضك .
ام علي اقتربت وبامر : اطلع بالدفتر ودامها رفضت ماحد بيجبرها .
نظر لوالدته وبراس كاد يُجن : هذا انس العايد مُديري بالشغل ، تبون ترفضونه .
ونظر لاريان : لو انه رفضك كان بنقول ماعليه ، لكن ترفضينه وين كانت .
اسيل وهند وقفو يميناً وملامحهم تضيق ممايحدث امامهم .
اريان مسكت عبرتها وبهدوء مُختنق : قصدك لاني لقيطة .
صفق فهد وهو يُخفي شفقته : ايوه عليك نور ، ويلا ي حلوه وقعي .
اريان سحبت انفاسها محاوله ان لاتنزل دموعها وبهدوء غريب للجميع : مافكرتوا ليش خاطب لقيطه ع قولتك ؟! .
فهد بنفاذ صبر : يبي ياخذ اجر فيك اكيد اذا هذا اللي تبينا نقوله .
ام علي بضيق : بنتنا مافيها اجر اذا يبي الاجر منها .
دخل راكان وب استغراب : وش فيكم تاخرتوا ، فضحتونا في الرجال .
سحبت اريان الدفتر وبحديث صدم الجميع : صدمتوني ي اخواني .
ورمت القلم بعد ان وقعت وخرجت تحمل خيبتها .
راكان وقف وبصدمه : وش فيها ؟! .
فهد ضغط ع اسنانه وبقسوه : تقول ماتبي تتزوج .
راكان استدار لهند وبهدوء : قولي لها ماراح تندم ، لانها ماراح تلقى احسن منه .
وتحرك خارج وتبعه فهد .
مسحت ام علي على وجنتيها وابتعدت لغرفتها .
جلست اسيل وبضيق : ماتوقعت فهد يقول ذا الكلام لاريان .
هند فتحت جوالها وبهدوء : اشوف انه من مصلحتها .
..
رفع انس راسه على دخول راكان وفهد .
فهد مد دفتر ضبط النكاح : الله يبارك بينكم .
ابتسم الماذون ومد وثيقة عقد النكاح لانس : مبروك ي ولدي ، الله يجمع بينكم بخير .
هز انس راسه وهو يصطنع الابتسامه .
..
اريان ارتدت عبائتها وبرجفه بانت في صوتها : تعرفين شقه سيف .
هاجر اقتربت وبخوف : وش فيك ؟! .
اريان احتضنتها بقوه وهي تكتم دموعها عن الهطول : ع الاقل اخذتي واحد تحبينه ، لكن انا .
ابعدتها هاجر وبصدمه : كلام ريما صدق .
اريان سحبت انفاسها وبهدوء : شوفي كيف حظنا تزوجنا نفس الطريقه .
ضحكت هاجر واحتضنتها من جديد : ي زينها من طريقه دمنا زي بعض .
دفعتها اريان وبضيق : مو وقت تنكيتك .
هاجر بضيق سحبت عبائتها وارتدت ع عجله وب استغراب : بنطلع بدون يدرون ؟! .
اريان ب اشمئزاز وغضب يمتلكها من فهد وراكان وبالامس علي : خلاص تزوجنا ماعاد لهم كلمه .
انصدمت هاجر من جُملتها والتزمت الصمت وهي تربط نقابها .
خرجت اريان ولحقتها هاجر .
وقفو على صوت هند : وين رايحين ؟! .
اريان بكذب : تركي ينتظرني برا .
اسيل بملامح استغراب : وليه مادخل .
اريان بسُخريه : رايح يحتفل فيني .
وغادرت من امامهم بروح مكسوره .
..
استاذن انس وتبعه احمد وخرجو بهدوء .
هتف احمد بسكون غريب : مادري وش اقول .
نظر له انس وبعينان مُتسائله : عن ايش ؟! .
بلل احمد شفاهه وتحرك لسيارته .
تجاوزه انس ووقف امامه : ليكون عقلك مثل ماجد .
احمد بسُخريه وحده نظر لعيناه : حنا عارفين من عقله زي ماجد .
وهمس بقسوة : عصبيتك بالمزرعه كانت عشان ذا الموضوع .
وضحك ب استغراب : واليوم تتملك ومبتسم ، ودي اصدقك .
تجمد انس من حديثه .
احمد بهدوء تنهد : مبروك ي ابو عايد .
واكمل مُغادر : بكره عازمك بمناسبه ملكتك ، واليوم مواعد اختي اعشيها ، ولا كان .
قاطعه انس وهو يبتعد لسيارته : خيرك سابق .
ركب احمد سيارته وغادر من امامه .
انحنى على سيارته وفتح ازرار ثوبة فضيق صدره بدا يكتم انفاسه .
استدار على صوت الفتاتان الخارجات من المنزل وصوت نداء احدهم جذب اسماعه : اريان انتي صاحيه ، نروح بذا المغرب مع سواق .
اريان استدارت لها وبحده : ماتبين تروحين انطقي .
هاجر بتافف : وش ذا الاسلوب ، ترى انا ماسويت لك شي .
اريان زفرت غضبها وبتعب مسكت جبينها : مابي اسمع اي شي ، عشانك وعشاني .
هزت هاجر راسها : طيب .
وبعينان تبحث عن سيارة اُجره : ماراح يجينا احد وحنا هنا ، لازم نروح لشارع العام .
شهقت هاجر بخفوت على صوت فتح الباب خلفها .
اريان تماسكت واظهرت قوتها وهي تقبض على اصابعها .
خرج فهد هاتفاً بغضب : وش مطلعك بالشارع .
اريان عضت على شفاهها وبهدوء : بروح لتركي .
راكان من خلفه : تركي مقفل جواله .
اريان بحده : اعرف مكانه .
فهد بغضب : مجنونه ادخلي .
راكان بهدوء سحب فهد : فهد مايحتاج كل ذي العصبيه .
اريان رفعت نظرها لراكان وحركت راسها بعدم رضا لكل هذا .
ابعدتها لتقع في الواقف يميناً ونظره عليهم اشتعلت عيناها بكُره حاقد .
نظر راكان لمن تنظر واتسعت عيناه فشله .
وهتف بهمس : ادخلي اريان .
ابتسمت بشماته وتحركت يساراً .
سحب فهد ذراعها وبفحيح : لاتخليني اسوي شي ، وانا ماودي فيه .
تقدم انس وبهدوء صدم فهد الذي لم يكن يعلم بتواجده : اتركها ي فهد .
فهد تجمدت اطرافه وفك ذراعها وهو يستدير له .
انس نظر لاريان وتحديداً لعيناها : ماقلتو ان البنت مجبوره .
اريان نظرت له وبحده : ومن قال اني مجبوره ؟! .
وتحركت من امامهم مُبتعده ، وتبعتها هاجر بعينان مفتوحه .
راكان نظر لملامح انس المصدومه من وقاحتها وهتفت ب استغراب : وش عرفك انها اريان .
انس بتبرير بلل شفاهه : سمعتكم .
فهد بفشله : كان .
قاطعه انس ونظره لقفا اريان المُبتعد : لاتجبرها على شي ماتبيه .
فهد بحرج مرر اصابعه لشعره القصير : ماكنت ابيها تطلع بذا الوقت .
راكان اعتذر منهم وابتعد ناحيتهم .
انس استاذن وصعد سيارته وكُرهه لها زاد اضعاف وتحرك مُجتازها بسُرعه .
ضرب فهد قبضته بكف يده زافراً غضبه .
..
جلس عبدالرحمن وبتساؤل : وين احمد ؟! .
عبير ابعدت نظرها عن التلفاز : طلع العصر مستعجل .
عبدالرحمن ب استغراب : عسى خير ؟! .
لُجين غمزت له : ماعلموك ي خساره .
عبدالرحمن رفع حاجبه : بوش ؟! .
لُجين تربعت وعضت ثغرها وببطء : انس بيتزوج .
ضحك بعدم تصدقين : لو انك تمزحين قريب ، وش مطيرك لانس .
عبير لفت عليه براسها وببتسامه : والله الموضوع جد .
انزل نظره بتفكير ثم رفعه وابتسم وهو يتذكر : خلونا من انس .
وقف وجلس بين عبير و لُجين وبهدوء : خالتي كم مره كلمتك ي لُجين وقلتي انك رافضه ناصر .
لُجين حبست انفاسها ونبضات قلبها يزيد خفقانها .
اكمل عبدالرحمن : كلمني امس ناصر ، وانا عطيته الموافقه .
انتفضت لُجين واقفه : وانتي ع اي اساس توافق ؟! .
عبير التزمت الصمت وعيناها تُراقب انفعال لُجين الغريب .
عبدالرحمن بطولت بال : ولد خالتي ، وصديقي .
تحركت بغضب صاعده وهي ترمي بكلمات لم تصل لاذنه .
عبدالرحمن استدار لعبير : اقنعيها .
عبير وقفت ببتسامه عريضه : مايحتاج هي موافقه ، بس تدلل .
عبدالرحمن رفع حاجبه : قد قلت لكم البنت ذي وشلتها التؤام لازم يتعالجون .
ضحكت عبير بصوت عالي وغادرت من امامه وصوت ضحكاتها لازال يسمعه .
..
رفع نظارته قليلاً واتكى على الطاوله هامساً بتسليه : يسعد لي جوه .
سيف وهو يعطي الجميع ظهره وبقرف : خلاص شفت وينه خلنا نطلع .
تركي حرك راسه برفض : لا تونا جينا وين نطلع .
سيف تافف ورفع كاس العصير مُرتشفه دفعه واحده .
تركي وكتفيه تهتز مع انغام الموسيقى العاليه : بروح له .
نظر له بسُرعه وبحده : بلا جنون ، يكفي اني سمعت لك وجيت لذا المكان .
تركي بدون مُبالاة ابتسم واتجه ناحية التجمع الكبير .
سيف مسك راسه بكفيه واغمض عيناه بقهر .
..
في جهة اُخرى من الاستراحه .
حرك راسه برفض : كم مره قلت ماشرب .
صديقه ب خيبه امل : قلنا بتتغير .
جابر تافف وتحرك مُبتعد عنه ، وقف امامه وبغيض اخفاه : ماقلت شي يخليك تروح .
جابر امال راسه وبنفاذ صبر : وبعدين ؟! .
اختفى من امامه وهو ينفث قهره في من يتجاوزه .
تنهد جابر ونظره يتامل وشمه الذي طالما كرهه .
نظر لمن وكز كتفه وابتسم هاتفاً : هذا انت رياض .
رياض تامل ملامحه وانزل نظره لجسده المُغطئ بقميص ذا اكمام عاريه : اي نادي تروح له ؟! .
تكتف جابر وبتسليه تُخرجه من الضيق : ماحب سوالف البنات ذي .
رياض بملامح شحبت ابعد وجهه وبحده : صح قريب تعرفنا بس مالك حق تتمادى معي .
ضحك جابر بصخب : اعتذر .
ابتعد رياض بملامح وعيد هاتفاً : الحق ع مازن اللي جايبك .
ابتسم جابر ع قدوم مازن وهتف بصوت عالٍ حتى يصله بسبب صوت الاغاني العاليه : خويك رياض بيذبحك .
مازن بتعابير اصطنع فيها الخوف : لا عاد ليش ؟! .
جابر رفع كتفيه : صراحه مدري .
اقترب مازن هامساً : لاتغلط معه ثم يطيرنا من حفلته ، عاد من نلقى ناس تسوي حفلات كذا .
جابر ضحك بسُخريه : وهو من عشان يطيرني ؟! .
مازن بسُخريه همس في اذنه : رياض هاني الجابر ي حبيبي ، لاتسوي ماتعرفه .
جابر تشنجت ملامحه وثغره يتسع صدمه ونظره يقف على قفا رياض الواقف .
مازن ب استغراب : وش فيك ؟! .
جابر ابتعد وبتوتر اخفاه وريقه جف : بروح اشرب شي .
مازن استدار ع من حاوطت ذراعه هاتفه بضيق : خويك ذا ليش مغرور ؟! .
هتف بخبث وهو يتنهد ب اعجاب : عاليه خلينا منه ، الاهم انتي .
عاليه ونظرها يُراقب جابر : اوك حبيبي .
بدت تتمايل بجسدها بين ذراعيه .

• جنون قصايدليل في التصاميـم
• لآ تسألونيے مـכּ أڪَوכּ •● هُنآ أنفَآسْ وξـشقـہآ כـتى الجنوכּ •●