ماسك سكان السياره وهو يفكر في ريم شلون كانت مع بنته طول الوقت طول وقتهم في الجمعيه كانت تعاملها بنفس طبعها كانها ياهل
معاها ...واللي استغرب منه ان شهد اطاوعها في كل شي لدرجه انها اقنعتها ماتشتري كوافي وحلويات كالعاده بالهبل اكتفت بكم حبه
..اخ ياريم شنو انتي في حياتي ...
محمد وقف جدام بيتهم ونزلوا غلا وشهد اول شي ..ريم تأخرت لان عبايتها كانت مشيره بين الاسيات ..وقبل لاتنزل ...وقفها صوت
محمد : ريم ..
ريم قعدت مكانها ..: لبيه ..
محمد : ريم لو تقدمت لج بتوافقين ...؟
ريم حست بنبض عرق جنب عينها وكأن الاكسجين انسحب من السياره ...ريم بصوت ضعيف ..: اظن عندي اهل تكلمهم وكانت
بنتزل ..
محمد بهدوء عصبي ..: ادري عندج اهل ترى مب قليل اصل ...اقصد بترضيين بواحد عنده بنت ...
ريم : منهو اللي اللي مايقبل شهد ...
محمد : ريم ...لوتقدمت ...وصار نصيب ...ترى انا ابي اعرس عشان بنتي ...
ريم وهي تحس بقلبها يهبط ..: يصير خير ..
محمد : الله كريم ...ترى اول مايرجع فهد بكلمه ..
ريم نزلت من السياره من غير لاترد عليه ...ريم كانت تحس انها انسان ثاني انسان ماتعرف من اللي رد على محمد هل الريم
ولامشاعرها ...ريم راحت لبيتهم لان مافيه مواجهه ثانيه معاه ...وتبي تعد حسابتها لوفعلا تقدم هل بتوافق على حلمها ...على محمد
على حبها الصامت له ...محمد اللي يبيها عشان بنته وهي تبيه وتبي بنته ...بس شلون بتقدر على الجدار اللي بناه حوالين نفسه ...
كانت تضحك على كفاح نور ..اضاهر هاي حال بنات ال... يعيشون بصعوبه في ظل اللي يحبون ....دخلت البيت وحصلت امها قاعده
في صاله والوجوم على ملامحها ...
ريم قربت من امها وحبت راسها ...: شفيج يمه ..؟
ام فهد : مافيني الا وجع قلبي من عمتج ...
ريم بحزن ..: وانتي شموديج لها يومج عارفه لها ...
ام فهد : ماابي اقطعها ترى بعدنا اهل ...
ريم : داريه ...يمه هي شقالت ...؟
ام فهد: وشلي ماقالته ..عشان فهد ...تقول انه بيندم انه خذ من ذا العيله وانها زعلانه عليه لين اخر يوم في عمرها ...
ريم : يمه ماعليج منها ..عمتي كلها كم يوم وترضى ...ترى ماعندها الا هاللسان ...ترى طيبه ..
ام فهد : داريه عشان كذا رحت لها عشان ماتاخذ في خاطرها وتقول خذوا بنت عبدالله وهملوني ..
ريم : يمه لاتشليين هم ..مصيرها ترضى يوم بتعرف نور ...
ام فهد : انه مابكابي الا نور ...خايفه توجعها بكلمه ...
ريم : ماعليه نور بتعرف لها ...بعدين لاتتعجلين بشي مابعد صار ...
ام فهد : الله كريم .. الافهد كلمني من شوي يقول بيرحون الشاليهات ..وبعد بكره بيرجعون ..
ريم بضحكه : والله مهب هين شاليه ..اظاهر نوري طحنت حبه ...
ام فهد : اذكري ربج غيرالله عليج ..
ريم وهي تضحك : ماشاءالله وانا شقلت لهم ...بل من الحين اشتغل المحاما ...
ام فهد : فديتهم الله يحميهم ...
ريم : اجل بطلع اتوضى وصلي العشا ...وبرجع لج ...
ريم صعدت لغرفتها وهي تفكر في موقف عمتها شبيكون لو وافقت على محمد ...فهد ماقدرت تواجهه برفضها بس هي اكيد بتلعن
خيرها وتزعل ...بس هي ليش خايفه هي للحين ماوفقت ...معقوله في قرارة نفسها موافقه هذا اللي حسته ....ماتعرف بصلي استخاره
قبل كل شي ...وقبل لايصير شي خلى انسى الحين لين يصير كل شي صج ...
تــــــــرى وقــــــــت الـــبـــشـــر قــــاســـــي
جـــــــــــرح قــــلــــبــــي وإحــــســــاســــي
كــــــتــــــم بــــالــــحــــب أنــــفــــاســــي
وســـــــرق غــفـــواتـــي مــــــــن عــيـــنـــي !!
(من اشعار شاعر الغربه محمود الشاهين )
---------------------------
سكرت الجوال من غلا وخالد اللي ضحكوها بسوالفهم خصوصا خالد اللي متحرقص يبي هالاسبوعين ينتهون عشان يعرس ويسافر ..
ابيه للحين فستاني ماخلص مادري الحق عليه ولا لا...
سكرت الشنطه الفاضيه اللي رتبت اغراضها ...طالعت الغرفه اللي مرتبه ...وطلعت الصاله ...حصلته واقف في الصاله وتوه ينزل
اكياس العشا ...
نور بنعومه : يسلم عليك خالد ..
فهد : الله يسلمه ...
نور : كلمت امي منيره ..
فهد : ايه ..تسلم عليج ..
نور : الله يسلمها توني مسكره من عندها ..بس تصدق شكلها تعبانه ...
فهد : داري معاد به صغر وهي ماترحم روحها ..
نور ابتسمت من حنان فهد لامه وكانت تحب هالنقطه فيه وهالشي اللي كان بداية حبها فيه انه يرحم امه ...: فديتها ...زين تعال
نتعشى برى ...
فهد : اوكي ..ابدل ونطلع ...
نور وقفت عند البوابه الزجاجيه وفتحتها وداعبت نسمات الهواء الرطبه برائحه البحر اطراف فستانها الشيفوني الابيض الضيق
الخصر ووسيع من تحت وقصه درابيه من عند الصدر وايدينه قصيره كان فستان صيفي من ضمن الملابس اللي شرتهم عن طريق
الانترنت ...
طلع فهد وهو لابس بنطلون جينز وتي شيرت ابيض ...وقف يطالعها وهي معطيته ظهرها والهوا يطاير اطراف فستانها وخصل
شعرها وعطرها مالي المكان مع ريحه البحر وشكلوا مزيج لذيذ ...وقف جدام هالسحر من هالانسانه صغيرة الحجم وكبيرة المشاعر
..
فهد بصوت متشنج ..: نطلع ..
نور وهي تلتفت له ببتسامه ناعمه سحرته ..: يله ...
شال الاكايس في يد وطلعوا ..وهم طالعين نور قربت منه ودفنت يدها في يده ...فهد حس بمس تيار حار في يده من لمستها الناعمه
فضغط عليها وشبك اصابعه معاها ومشوا لين الطاوله وهم يطالعون بنظرات غائمه ...قعدوا على الطاوله وعيونهم في بعض ...نور
فتحت الاكياس ووزعت العشا على الطاوله تحت نظراته ...قعدوا يتعشون بهدوء ...
نور : فهد متى بداوم ..؟
فهد عقد حواجبه يوم تذكر الشغل المتراكم : بعد بكره ...
نور : مسرع ...
فهد :بعد شغل ماقدر ااجله اكثر من كذا ..
نور : ايه ..من متى وانت تشتغل ...
فهد بجمود : من سنتين ...
نور : حسيت بصعوبه ...
فهد : اكيد في البدايه بعدين صار عادي ...
نور : اكيد واجهت صعوبات ..
فهد : واايد ... بس الحمدالله قدرت عليه ...
نور : فهد شلون كان عمي احس كان غير يعني انت كنت عسكري وهو اقتصادي ...
فهد انكسى ويهه بقناع ابيض ..: افضل انج ماتسالين ..
نور وهي تقرب منه وتمسك زنده بادينها الثنتين ..: ليش فهد ...ابي اعرف كلمني ...
فهد بروود جليدي وهو يوقف ويفك ايدينها منه : هالشي الوحيد اللي ابيج تنسينه ..ولاعاد تتكلمين فيه ..
نور بعناد : فهد ترى بعد هو عمي قلي عنه ..
فهد دزها على الارض بغضب هائل : قلت لا...ماتفهميين ..وذا زيد سمعتج تتكلمين فيه لاتلوميين الانفسج ...ودخل الشاليه وخلاها
تتخبط في احباطها وصدمتها من غضبه المفاجئ من طاري ابوه ...نور قامت وهي تمسح دموع الم من السقطه بقفى ايدينها ودخلت
وراه ونست صندلها جنب الكراسي ..ودخلت وهي منقهره منه ..حصلته واقف في الصاله وماسك خواصره ومعطيها ظهره ورافع
راسه للسقف ...
نور وهي تصارخ ..: عورتني يالسخيف ...
فهد بصوت جهوري : نوووووووور ...
نور صرخت من الخرعه من صراخه وحطت يدها على حلجها وشردت الغرفه وسكرت الباب وسندت ظهرها عليه وقلبها يدق بسرعه
من الخوف ...
فهد ابتسم من شكلها وهي متخرعه وشلون شردت ...طلعت جبانه مب على قوتها ...طلع برى ووقف على شاطي البحر والهوا يداعب
ويهه ...نور نكأت جرووح حاول يداويها من زمان ويتناساها ....بس نور حطت يدها على الجرح وظغت عليه بقوه ...رجع لشاليه بعد
ماحس بالتعب طالع الساعه انصدم ان الساعه 12 معقوله لهدرجه خذته افكاره وصار له ساعه وهو واقف ...رجع داخل بس لفت
نظره صندلها طايح في مكانيين من قو الطيحه ...فهد حس بشعور غريب انه عورها لاشعوريا ..حس بحزن ...بعدين ضحك عليها يوم
تذكر خوفها ...اه ياطفلتي ...شال صندلها ودخل ...
-----------------------------------------
|