منتديات قصايد ليل - عرض مشاركة واحدة

04-17-2017

قلـت قلبـي قـال بيديـنٍ امينـه
قلت واسمي قال من دونـه رجـال
قلت واهلي قـال مجـدٍ خابرينـه
قلت ربعي قـال ماضيـن الفعـال
قلت عذّالي؟ ضحك، قـال الغبينـه
قلت غيري قـال ماعنـدي مجـال
فتّق ضلوعه وشـرّع لـي يدينـه
وانعطفت اضمـه بصـدر الشمـال
كل ما عزّم يـروح المـح حنينـه
ثم امد يديّ واهمـس لـه تعـااال
ان قلط يقلط على جنـب السمينـه
وان عبر تخضع له خشوم الـدلال
من دواعي فرحتي لاصـك عينـه
واستباح بنشـوة الصمـت المقـال
في فمه كل الحروف تصيـر زينـه
وفي فمي تذبل سواليـف الـدلال..!
حـط ربـي جنـه ونـار بيمينـه
وحطني طفلـة حرامـه والحـلال
والهنوف اللـي سرايرهـا دفينـه
خيّمت غصبٍ على عرش الجمـال
حوّلتهن عنـه واجتاحـت خزينـه
وْلبست بنت الأصل تـاج الجـلال
إيـه ياشعـري تفـرّد بالسفيـنـه
البحـور السـبـع بيديـنـك زلال
كم سهرت احماك عن هتك الحصينه
يوم بنت اللاش تشريك ابْريـال..!
وكم كسيتـك بالجلابيـب الثمينـه
لين صرت بعينهم شمـس الـزوال
علّم اللي بـاح مـن غلـه كنينـه
بإن شعري راسـيٍ مثـل الجبـال
فكـرةٍ عـذرا ومظهرهـا حزينـه
يعتصرها الجرح وضيـاق الليـال
حزنهـا طاهـر ودمعتهـا رزينـه
وخدهابرقٍ كشـف قبلـه.. وسـال
ياقصيـدي والفخـر متوارثيـنـه
من جدود ومن عمام ومـن خـوال
اسمي اسما من ركب فوق السفينـه
دام دونه تفتل اشنـاب الرجـال..!