مافي سماء الاحزان منزل للافـراح
ولاينفع اللـي فـات لـو ندعيبـه
وش حال الامه بعد مامجدهـا راح
ماباقيّـن غيـر الجـروح العطيبـه
اقفى زمان اهل الفتوحـات وانـزاح
اللي لهـم رهبـه وسطـوه وهيبـه
اليا التقى الجيشين بسيوف ورمـاح
منهـم كتيبـه تهـزم اميـة كتيبـه
بفعولهم شبـوا للاسـلام مصبـاح
نور الهـدى كـل البشـر تقتديبـه
الروم بيرقها مـن فعولهـم طـاح
دكـوا مواقعهـا وراحـت حطيبـه
والفرس يوم منادي المعركه صـاح
هانت ولانت واسلمـت بالغصيبـه
هذي فعول اللـي يبيعـون الارواح
مايسكتـون ويقبـلـون الغليـبـه
امّا يجي نصرن له النفـس ترتـاح
والا الشهاده تنكتـب مـن نصيبـه
وقتن مضى نلبس منه تاج ووشـاح
تـاج البطولـه والفعـول الرهيبـه
لكن يبقـى الحـزن للقلـب ذبّـاح
لان الفـرح مافيـه شيّـن يجيبـه
اليوم اشوف صفوفنـا سدهـا بـاح
وتصبر على جمر الزمـان ولهيبـه
قامت جيوش الكفر تمشي وتجتـاح
والمسلميـن جيوشهـم مستصيـبـه
كم في فلسطين الخسايـر والاربـاح
وكم يركزون بكـل ليلـه نصيبـه
والا العراق اللي بـه الـدم فـواح
في كل ليلـه ثايـرن بـه مصيبـه
من بعـد مابغـداد للمجـد مفتـاح
مهد الحضاره كيف تنزف صويبـه
في كل ليله نسمـع صيـاح ونيـاح
حتـى لذيـذ الـنـوم مانهتنيـبـه
الامه بوضعن محـد منـه مرتـاح
وكل النفـوس بوضعهـا مستريبـه
استسلمت وانهـارت وسترهـا زاح
ودموعها مثـل المـزون السكيبـه
مغير هم وضيم وغبـون وجـراح
واتـدور ايّـا مسلمـن تلتجيـبـه
حتى ظهر صوتن ينادي للاصـلاح
منشاه من قلـب الريـاض الحبيبـه
صوت الشجاع القرم كسّاب الامداح
العاهل اللي يعـرف الكـل طيبـه
عبـدالله اللـي لصعيبـات نطّـاح
لاقـام بامـر الله تهـون الصعيبـه
طاريه برقن فوق روس العرب لاح
وكل العرب وقت الـدرك تنتخيبـه
رايه علـى عدواننـا سـمٍ ذحـاح
بندق شجاعـن رميهـا بالضريبـه
ومبادراتـه كنّهـا النـور وضّـاح
من يوم يرسمهـا هدفهـا تصيبـه
دم العروبه فـي شرايينـه انسـاح
وغير النصر مافيه شيّـن رضيبـه
ولنصرة الاسـلام والعـدل طمـاح
ومنه المواقف ذي ماهـي غريبـه
يدعي لعقد القمه بصـدق وانصـاح
ومن شذ عن جمع العرب وش نبيبه
حكام الامه جابهـم عـزم والحـاح
فالمملكـه دار العـقـول اللبيـبـه
وجنّـد جنـودن للمقابيـس قـداح
تحسبـاً لايّـات حاجـه مريـبـه
واستبشروا فيهم وعطر اللقاء فـاح
واستقبلوهـم بالصـدور الرحيبـه
واتجهت انظـار امـةٍ مجدهـا راح
للمملكه والصـوت واللـي يجيبـه
وكل يرجـون لحظـات الايضـاح
من حاكمن كـل الشعـوب تحكيبـه
ومن كلمته عادت على الناس الافراح
وتباشروا بوعـود نصـرن قريبـه
وتذكروا مجدن مثل نور الاصبـاح
في سيرة امجـاد الجـدود العريبـه
ويالله وعدك اللي ذكرتـه بالالـواح
ومن يخذل الاسلام تـردي نصيبـه
وتحفـظ مليـكٍ لصعيبـات نطـاح
وتعـز الامـه والدعـاء تستجيبـه
|