البارحـه مـن قبـل لايطلـع النـور
قدامـي الافكـار صـفـن طوابـيـر
واخذتهـن بالـدور طابـور طابـور
وسطرتهن بالقـاف مـن بعـد تفكيـر
ولبستهن من شعري احسـاس وشعـور
حتى غـدن مثـل السيـوف البواتيـر
للشعر والشاعـر مواقيـف وحضـور
ولكـل ماقـف مفـردات وتعابـيـر
بعض الليالـي لـو تعـذرت معـذور
وبعـض الليالـي ماتفيـد المعـاذيـر
انحت حجر واسبـح بغبـات وبحـور
وانظم درر واصخر القـاف تصخيـر
ماروح ادور زور من شاهـد الـزور
ولابيـع ميقافـي بحـمـر الدنانـيـر
لي معجبين ولي مـن النـاس جمهـور
لـو الشعـر ماهـو بكثـر الجماهيـر
كم شاعرن من دون الاعـلام مغمـور
ارهى مـن اللـي واردن جمـة البيـر
بس القصيد اللـي بالاعـلام منشـور
خلى يصير اللـي مهـو لازم يصيـر
لاقاضيـن عـادل ولافيـه دسـتـور
ولو احسـب النقـاد كثـر الصقاقيـر
لـكـن لاســوو ولاجـالـهـم دور
والقافلـه يدهـن لهـا السيـر وتسيـر
والخافي اعظم واكثر النـاس مجبـور
يسايـر العالـم علـى الشـر والخيـر
وش وخر اللي يحكم الـراي والشـور
ذخيـرة اللـي يحتمـون المظاهـيـر
ووش قدم اللـي دايـم يلـف ويـدور
اصبح هو اللي يقطـع الـراي ويشيـر
الشيخ مـن عنـده عمـارت وقصـور
ويملك رصيـدن ماتجيـه المخاسيـر
اصبح يشـب النـار وقـدوره تفـور
ويقول انا عنتـر وانـا سالـم الزيـر
وصكوا عليه اهل الرياء واصبحواسور
وقالوا له انت اطلق شنـب بالمناعيـر
وصدق ومنهـم كـل ماجـاه مطيـور
ماباقـي الا ينفـض الريـش ويطيـر
يصرح ويعلـن وفـي زوده قصـور
عشبـن خضـر لكـن مالـه نواويـر
غادي ومـن نهابـة المـال محصـور
دايـم علـى بيتـه ورود ومصاديـر
ويكـرم ويهـدي وفـي ربعـه يبـور
واهل النفـاق تقـول مامنـك تقصيـر
قدم العـرب بالمـد والجـود مشهـور
واليـا عطـى مـده تعـدى المعاييـر
وان جاله المحتاج يشكي مـن الجـور
عطاه عـذرن مثـل روس المساميـر
ومن شوفته فـي مجلسـه دمـه يفـور
ولاوده بشـوف الجماعـه مسايـيـر
لو انه اقرب لـه مـن الحلـق لـزور
واخيـر لـه مـن عابديـن الدنانيـر
هو يحسب انه فاهقـن كـل مسطـور
لكـن مالـه عنـد الاجـواد تقـديـر
لاقول له صاحـي ولاقـول مسحـور
بـس الاكيـد انـه يسـوق الفواتيـر
وحظي بري ماعـم والعلـم مقصـور
على عظامـن جبـرت عقـب تكسيـر
كم تاجرن ماله علـى النـاس منثـور
ريـف الفقـارى فالليـال المعاسـيـر
ماقصده انه يصبـح انسـان مشهـور
يرجـي جزاهـا مـن ولـي المقاديـر
يالله عسى من يفعـل الخيـر ماجـور
والا المنافـق مـالـه الا زمهـريـر
|