منتديات قصايد ليل - عرض مشاركة واحدة

05-21-2012

(في صاله الحريم):
عهود: نجود وين حطيتي شنطتي.
نجود:فوق في غرفه نوره روحي وخذيها.
عهود:أخاف يطلع لي أحد.
نجود:ههههههه يابنت روحي لغرفه نوره ولاتخافين بندر يتروش ومب طالع بسرعه من الحمام روحي خذي شنطتك قبل لاتنزل نوره.
عهود:أوكيه بروح والله يستر.
عهود رقت الدرج وقلبها يخفق بسرعه ودخلت غرفه نوره وجلست تدور شنطتها فجأه شافت بندر من بعيد يغني قبال المرايه وهو يجفف شعره جلست تراقبه وتتأمل شكله وقلبها كان يخفق كثيرفجأه رن جوالها وكان المتصل خالد.
خالد:هلا عهوده كيفك حبيبتي تمام.
عهود:الحمدالله وش بغيت.
خالد:لابس ترا متنا جوع ياأختي قولي لأمي يحطون الغداء ولاترا بروح أتغدا بالمطعم.
عهود:ههههههههه إنشالله بس بطلبك طلب.
خالد:أمري وش بغيتي.
عهود:أبيك تقنع الشباب يودوننا للبر نبي نخيم فيه.
خالد:نعم وش قلتي أقول أنسي الموضوع.
عهود:خلودي حبيبي تكفى نبي نروح حنا والبنات ونوره بعدبتقول لأخوها يوديهم تكفى ودنا نروح للبر.
خالد:أف خلاص بشوف الشباب وش يقولون.
عهود:يعيش أخوي هههههههه.
خالد: مومن قلبك تقولين هالكلمه عالعموم عجلوا علينا بالغداء.
عهود:أوكيه بروح أصف السفره معهم.
خالد:يالله باي.

أستأذن بندرعشان ينزل تحت لأن الصاله مليانه حريم
بندروهونازل قال:يمه تامريني بشي أناماشي.
أم فهد:بسم الله عليك وأناأمك صاير تهبل يابخت اللي بتاخذك.
أم نايف:إيه والله وأناخالتك صايركنك معرس.
نوره: من شوي كنه طعس جربان والحين كأنه أميرصدق الترويش يلعب دور كبير في هذا التغيير.
أم فهد:تبخروأناأمك.
بندر:إنشالله.
البنات متغطين ويتهامسون مع بعض
ندى:أقول بنات ترا بندر محجوز لي.
غرام:لا أنااللي باخذه شكلي بتميلح قدامه وقدام أمه عشان تخطبني له.
نوف:اقول لايكثرأنتي وياها أنااللي بأخذه.
عهد: أذكروا الله فشلتونا لايسمعكم الحين ويقول أنكم ميتين عليه.
غرام:خليه يدري عشان ينقي أي وحده راح ياخذها.
مشاعل:واثقين أنتوا أنه بياخذكم.
ندى:ليه حنا وش فينا جمال ونسب وأخلاق ومال.
عهد:كل ذولي فيكم إلاشي واحد واللي هوالأخلاق.
ريم:أف ورى ماتسكتون خلونا نسمع وش يقولون.
شوق: ريم أبي حلاو.
ريم:أف ياأختي روحي ألعبي مع بدور في الحوش.
مشاعل:وش فيك ياريم على شوق.
ريم:ياأختي جننتني تسحب الطرحه مني لأنها تبي حلاو.
مشاعل:ماتنلام ترانا جعنا.
عهد:عهود وين سرحتي.
عهود: هاه لاولاشي.
بدوربنت نجود جت مسرعه لخالها بندر وقالت له:خالي تكفى ودنا للبقاله.
نجود: يابنت خلي خالك في حاله.
بدور:أناوشوق نبي حلاو.
بندر: من شوي أناشفت كيسه بالمطبخ مليانه حلويات وينها أكلها القط وأنحاش.
عهودضاقت لأن بندر كان يقصدها
فقالت بينها وبين نفسها:القط أنت صدق واحد مغرور.
نوره: لابس الكيسه مب لنا.
بندر: طيب ليه ماتاخذون منهاوتفكونا ماأعتقد أن صاحبها بياكلها كلها لحاله.
أم فهد:بندروأناأمك أبيك تودي البنيات وتمشيهم.
بندر: أنا مواعد الشباب العصر.
نوره: عهود كلمت أخوها خالد ووافق يوديهم عاد أنت خلك شهم ونبيل وودنا.
أم نايف:إيه وأناخالتك ودهم حرام عليك تكسربخاطرهم.
أنحرج بندرمن كلام خالته وقال لها:إنشالله.
نوره:إذا ماوديتنا بنروح مع السواق.
أم فهد: لاوش تروحون مع السواق والعيال وش كثرهم هنا لابتروحون مع بندر.
بندر:قال بينه وبين نفسه أنشب بيقعدون يقروشون راسي بطلباتهم كالعاده.
فجأه رن جوال بندر والمتصل كان أخوه بدرقال له أن أبوه معصب بالمره عليه ولازم يجي الحين,
بندر:خلاص أجل تامروني بشي قبل لاأطلع برا.
أم فهد:سلامتك وأناأمك.
بندر: نوره تعالي أبيك شوي برا.
نوره:وش تبي؟.
بندربهمس:تعالي ولاترا مافيه تمشيه.
نوره:لا....لالا خلاص بجي بجي بس أنت أطلع ترا البنات طفشوا منك لأنهم متغطين.
بندر:يالله فمان الله.
غرام بهمس:فمان الكريم ياقلبي.
مشاعل:أص فضحتينا لايسمعونك خواته وياخذون عنك فكره شينه.
غرام:من يشوف هالجمال ينسى نفسه ماشاءالله كأنه بنت سوريه.
عهد:أذكري الله.
قاطعتهم نجود: وش فيكم تتساسرون.
مشاعل:لاولاشي.
غرام:ياأختي أخلصوا علينا بالغداء متنا جوع.
نجود:ههههههههه الغداء جاهز بس الشغالات جالسين يصفون السفره.
أم فهد: قوموا يابنات صفوا السفره للرجال وعدلوها زين لأن الشغالات مايعرفون يصفون الأكل زين.
نوره: كل ذا الحوسه عشان صفقه تجاريه أجل لوأنها رابحه وش بتسوون عرس.
ريماس:لاتنسين أن الوزيرجاي معهم.
نوره: أزعجتونا بذا الوزير لاوالمصيبه مايمشي إلا ومعه موكب حرس.
نجود:قومي بس ولاترا مافيه تمشيه.
نوره :لاخلاص.
(في مجلس الرجال):
دخل بندروسلم على المعازيم والشباب يتريقون عليه.
أبوفهدمعصب على بندر ويوم شافه مسكه علا جمب وقال له بهمس:ليه تأخرت كل ذا عشان شويه ذبايح.
بندر:يبه الله يهديك أناطولت لأني نقيت لك أحسن الذبايح عشان أبيض وجهك عند جماعتك.
قاطعهم أبومحمد صديق أبوفهد وقال:ماشالله من ذا السنافي.
أبوفهد:هههههههه هذا ولدي بندر.
أبومحمد:ماشالله هواللي عنده أخوتوأم.
أبوفهد:إيه هذا بندر وذاك بدرأخوه.
أبومحمد:سبحان الله من شبههم ماتقدرتفرق بينهم.
أبوفهد:الشكوه لله.
بندرأستغل الموقف وأنحاش من أبوه وراح للشباب.
محمد:جاء الطعس أخيرآ.
بندر:سلام.
خالد: وعليكم السلام ,ياأخي متنا جوع ماصار غدا.
بندر:خلاص الغداء جاهز والحريم يصفونه بغرفه الطعام.
خالد:وش الغداء.
بندر:مفاطيح كالعاده وفيه لحم ولحم حاشي.
خالد: أخ بس ودي من يطب فوق الصحن ويقعد ياكل ألين يمتلي بطنه.
محمد:الله يشفيك قول أمين.
طلال:ياأخي لاتلومه الرجال ميت جوع.
بدر:ياأخي رح شوف السفره جاهزه ولا لا.
بندر:بروح أشوف كان البنات خلصوا من صف السفره.
مشعل:فاتك من شوي جاء ماجد.
بندر:ياكرهي لهذا الأدمي يالله قد أيش هوغثيث وش يبي جاي.
مشعل:جاء وسلم وبجخ كالعاده وراح.
بندر:الحمدالله أني ماشفته ولاكان ذبحته.
طلال:ليه وش سوا لك الرجال.
بندر: ماسوا لي شي بس أنه يفقع مرارتي إذا قام يتكلم عن نفسه بتبجيخ.
بدر:ماعليك منه.
بندر:بروح أشوف وش صار على الأكل يالله سلام.
(في صاله الطعام):
جهزوا الحريم السفره وطلعوا ماعدا عهود ونوره وميري
نوره: ميري هذا الصحن حطيه هناك وذا جيبيه هنا.
عهود:خلاص ياأختي كل شي جاهزخليها تروح تصف السفره حقتنا متنا جوع.
نوره: خلاص ميري روحي.
عهود: ياأختي مدري وش فيني متضايقه.
نوره:أناملاحظه عليك هذا الشي, بس أنتي وش فيك.
عهود:لاولاشي.
نوره:تدرين أخوي بندروش قال لي يوم طلعت معه.
عهودأرتبكت وقالت: لاهووش قال لك؟.
نوره: قال لي أنه بيجيب الفان الكبيروبيركبنا كلنا فيه وبيودينا العصرللبر.
عهود:يعني بنروح بسياره وحده.
نوره:إيه اللي بيسوق بندر وأخوك خالد بيركب جمبه عشانه محرم لكم, والشباب بيلحقوننا بالجمس كالعاده.
عهود: وأمي وأمك.
نوره:أمي ماتبي تروح تقول جلسه البيت أحسن وأمك تعبانه ونجود بتجلس معهم.
فجأه رن جوال نوره والمتصل كان بندرردت عليه وقالت: هلا بندوره .
بندر:إيه مب حب فيني تناديني بهالأسم .
نوره:أنت بندورتي حبيبي.
بندر:أقول يالمصلحجيه صفيتوا الغداء.
نوره: كل شي جاهزبس بروح أجيب البخوروبحطه عند الباب.
بندر:أوكيه أنابجي الحين أشيك على ترتيبكم قبل لايدخلون الرجال.
نوره:أوكيه باي.
بعد ماسكرت نوره السماعه راحت تركض تجيب البخور أماعهود طلعت ونست جوالها في غرفه الطعام
دخل بندر عشان يشيك على الأكل وشاف جوال عهود وأخذه معه ظن أنه جوال أخته نوره لاكن نوره جت مسرعه وعطته البخور وطلعت وبندربخرالمكان وتوه بيفتح باب الرجال جت نوره مسرعه وقالت:بندر ماشفت جوال طايح هنا.
بندرحب يستغبي: أي جوال.
نوره:يالله عهود نست جوالها هناوتبيني أدوره لها.
بندرمن سمع أسم عهود فز قلبه لاكنه حب يثقل شوي فقال:أي عهود.
نوره:بنت عمي أبونايف.
بندر:ماشفت شي أناشيكت على المكان ولاشفت شي على العموم أدخلي جوا لأني بفتح الباب للرجال.
نوره:أف وش ذا النشبه.
بندر:بسرعه تحركي.
نوره:أف هواش هواش هواش هواش كل يوم هواش خلاص فهمنا.
طلعت نوره من المكان وبندر طلع الجوال من جيبه وحطه صامت وقال: وش بتسوي بجوالها يابندر؟, ليه ماتكلمها وتصارحها باللي تحس فيه تجاههاولاأقول أنسى الموضوع .
بندردخل جوال عهود في جيبه وفتح الباب للرجال عشان يتغدون ودخلوا كلهم وتغدوا كلهم إلابندرلأنه كان يفكربالجوال اللي في جيبه وبصاحبته.
(في صاله الحريم):
الكل تغدا وجلسوا بالصاله يشربون شاي ونعناع
وعهودجالسه وهموم الدنيا كلها براسها وضايق صدرها لأنها ضيعت جوالها ودفتر تحضيرها.
نوره:عهود ليه ماتغديتي والله أن الأكل جنان.
عهودتنهدت وقالت:يأختيي لاتلوميني ضاع جوالي ودفترالتحضير حقي والمصيبه أن فيه صورتي.
نوره شهقت وقالت:الجوال طز فيه والدفترطزفيه أهم شي الصوره طيب أنتي ماشفتيه بالحوش يوم صقعتي في بندر.
عهود:تكفين لاتذكريني كلماتذكرت هذا الموقف ضاق صدري.
نوره: شكل بندر هواللي أخذ الدفتر.
عهود:تكفين لاتضيقين صدري زياده.
نوره:أنالاحظت عليه حاجات غريبه صاير يسرح كثير وغيركذا اليوم جلس يتكلم قدامكم بالصاله وأخذ راحته بعد بالكلام وهوالعاده يطلع بسرعه بدون مايتكلم غريبه وش اللي قلب حاله.
عهود:أف وش بسوي الحين.
نجود:عهود وش فيك ماتغديتي؟.
عهود:ولاشي بس ماأشتهيت.
أم فهد:نوره وأناأمك دقي على بندرشوفي كان الرجال تغدوا.
نوره:إنشالله.
نوره أتصلت على أخوها بندرومارد عليها وأتصلت على بدر ومارد عليها وأتصلت على أخوها محمد ورد عليها
وقال: هلا نواره وش بغيتي.
نوره: لابس حبيت أسألك سؤال, أطلعوا الرجال من صاله الطعام؟.
محمد: من زمان تغدوا وطلعوا وهم الحين يشربون شاي برا.
نوره: ماراح أحد منهم.
محمد: والله ماأدري بس الظاهرأنهم بيمشون مع اذان العصر.
نوره: بقا على الأذان خمس دقايق.
محمد: بروح أجلس معهم قبل لايأذن.
نوره: طيب وين بندر؟.
محمد: طلع من شوي.
نوره: وين راح.
محمد: مدري .
نوره: طيب ليه مايرد؟.
محمد: أقول مصختيهابأسألتك بروح أجلس مع الشباب يالله سلام.
نوره سكرت السماعه وهي معصبه
أم فهد: هاه وأناأمك تغدوا الرجال.
نوره:من زمان تغدوا والحين يشربون الشاي برا.
أم فهد: نجود وأناأمك قولي للخادمه تضف السفره اللي عقب الرجال.
نجود: إنشالله يمه.
(عند قسم الرجال):
جهه الشيبان:
أبوخالد:أكرمك الله ياأبوفهد والله كفيت ووفيت.
أبوفهد:ماعليك زود والله هذي الساعه المباركه اللي شفناكم فيها.
أبونايف: أقول ماودكم تقومون.
أبومهند:وش بلاك علينا يارجال استح على وجهك تبي تطرد الجماعه.
أبونايف: لاوالله بس كني سمعته يأذن العصر.
أبوفهد:إيه والله أذن العصريالله يارجال الصلاه أولى من السوالف.
أبونايف:يالله قوموا للصلاه.
جهه الشباب:
محمد:وش عندهم الشيبان قاموا كلهم مره وحده.
خالد: يمكن ملو من الجلوس.
طلال: لامااعتقد الظاهر اذن العصر.
فهد:قوموا ياشباب للصلاه.
مشعل: محمدالجماعه إذا صلوا بيرجعون لبيتكم.
محمد:لابيروحون كلهم مع الوالدعشان يتممون الصفقه حقه شركتهم مع التجار.
مشعل:ومتى بيرجعون؟.
محمد:يمكن الفجر لأنهم بيروحون للشركه وبيسوون إجتماع مغلق بينتهي الفجر كالعاده.
مشعل:يعني خلاص بنروح نطعس في البر.
محمد:أجل أيش نقعد مثل الحريم في البيت.
خالد:أقول لا تفلونها واجد.
محمد:ليه؟.
خالد:أمي وامك يامحمد احرجوا بندر وقالوا له يودي البنات للبر عشان يمشيهم فيه وأنتوا بتجون مع أخواتكم لأن بندر مومحرم لهم.
مشعل:خالد أنت محرم لخواتي وبماانك خالي سو خير ورح معهم.
خالد: على فكره عهود بتجي معنا.
مشعل: لاأجل بروح معكم.
طلال:بدر وين بندر؟.
بدر: والله مدري لاكن هوقال لي أنه بيجيب الفان الكبير.
محمد:شكله بيقش الكل فيه.
بدر:هوقال أن البنات بيركبون في الفان والشباب في الجمس.
طلال:والعجز بيجون.
بدر:ههههههههه لايقولون الجو بارد.
طلال:أقول ياشباب خلونا نروح مع بندر عشان محد يتهجم على بناتنا.
محمد:فله بتصير الطلعه شبابيه.
مشعل:شبابيه بس لازم كل واحد ينتبه على محارمه.
محمد:من تقصد؟.
مشعل:خواتك وخواتنا يادلخ.
فهد:يالله الصلاه يكفي سوالف.
محمد:ياأخي وش نسوي تحلا السوالف لاجاء وقت الصلاه.
متعب:أقول قم أقام المسجد اللي قبال البيت.
محمد:يالله ياشباب خلاص وقت مستقطع لأداء الصلاه ولنا عوده للسوالف.
بدر:يالله ياشباب قوموا.
طلال:خلاص قمنا بعد بتطردنا من بيتكم.
فهد:لا مب طاردك بس ينبهك للصلاه.
طلال: الله يهديه.
فهد:أمين.
(في سياره بندر):
بندرجالس في سيارته وهويهوجس في صوره عهود وقلبه يخفق بسرعه
حبها بدون مايحس بنفسه , حط جواله صامت وجلس يتأمل ملامح وجهها وهوهايم فيها,
وطلع جوال عهود من جيبه وشاف فيه أكثر من مكالمه لم يرد عليها وكان المتصل أخته نوره
ضاق صدره وقال بينه وبين نفسه المسكينه إلين الحين تدور جوالها.
قرريفتش بجوالها ويقرأ الرسايل اللي فيه ويشوف الأرقام اللي فيه ومالقى شي موزين ,
واتصل من جوالها على جواله وخزن رقمها عنده بأسم عبيد وخزن رقمه عندها بأسم نوره2 وكتب لها رساله بخط يده وحطها بجيبه
وهويغني أغنيه الله ماأكبر غلاك ينبض بحبك فؤادي من يشبهك ياملاك من يشبهك ياودادي انت بشر غير عادي فيك الجمال الرهيب رهيب والله رهيب.
وقال بينه وبين نفسه: لازم اتزوجها بأي طريقه قلبي حبهاغصب عني وان مارضت فيني فاني ماراح أتزوج أحد غيرها.

(في غرفه نوره):
البنات كلهم مجتمعين وعهود جالسه في زاويه ويدها على خدها ومحزنه ماتنلام ضاع جوالها ونوره كل شوي مطلعه لبس تجربه لأنها بتطلع للبر والبنات يتريقون عليها والضحكات واصله لأخرالطريق.
نوره:يالله يابنات خلونا نطلع كل وحده تتصل على أخوها عشان نروح للبر.
نجود:أنا ماأبي أروح الجو بارد برا.
مشاعل:حتى أناماابي أروح.
عهد:الحين من اللي يبي يروح؟.
نوره: أنا وعهود وندى وغرام وريم ونوف و..ااااا.ااااا... من بعد وانتي ياعهد.
عهد:لاوالله الجو بارد وماودي أروح.
نوره: عهود أنتي كلمتي أخوك خالد عشان يقنع العيال.
عهود تهوجس وماهي يمهم
نوره: ألووووو... عهود نحن هنا.
عهود: هاه وش بغيتي.
نوره: أقول كلمتي خالد عشان يقنع الشباب.
عهود بتنهيده: إيه وبتروحون العصر وماأظن أني بروح معكم.
نوره: نعم نعم نعم وش قلتي ماسمعت.
عهود: ماأظن أني بروح معكم.
نوره: كل ذا الحزن لأن جوالك ضاع.
عهد: عهود روحي وغيري جو لأن الجو يهبل برا.
عهود: مالي خلق.
نجود دخلت عليهم وقالت:يالله ألبسوا عباياتكم بندر جاب الفان ودخله بالحوش يالله عشان تروحون للبر.
نوره: أحنا جاهزين بس ننتظرعهود .
نجود: وش فيك ياعهود محزنه.
عهود: لا بس جوالي ضاع في صاله الطعام.
نجود:لاتضيقين صدرك وروحي معهم وانا برسم الخدمه راح أدوره لك.
عهود بإبتسامه: الله يعطيك العافيه بس أنا ماودي أروح.
عهد همست في أذن عهود وقالت: عهود أنتي مسويه شي غلط.
عهودبإرتباك:لا ماسويت شي.
عهدبهمس: من اليوم وأنتي مرتبكه وواضح عليك أنك مسويه جريمه.
عهود:ماسويت شي ليه ماتصدقيني.
عهد: ترا أمي وأم فهد وبناتها يقولون عهود فيها شي موطبيعي.
عهود: من جدك تتكلمين.
عهد:إيه وش تحسبين أقول قومي وألبسي عباتك لأنك بتروحين للبر.
عهود:ياأختي ماودي.
عهد: أقول بتروحين غصب عليك عشان مايتكلمون فيك بكلام موزين.
عهود:وش قصدك؟.
عهد: والله أنتي اللي جبتي الكلام لنفسك بتصرفاتك.
عهود: أناقلت لك أناماسويت شي غلط.
عهد: طيب ليه ماتغديتي؟.
عهود: ماكنت مشتهيه شي.
عهد: مب علينا هالحركات من جلستي وأنتي مرتبكه والكل ملاحظ هذا الشي, عشان كذا قومي وألبسي عباتك عشان ماتجيبين لنفسك الكلام اللي موزين وترا الناس مالهم إلا الظاهر.
عهود: يعني وش تبيني أسوي.
عهد: أضحكي وخلك مرحه كالعاده.
عهود: طيب طيب لاتغثيني خلاص بروح بس وين عباتي.
نجود:عهد عهود وش عندكم تتساسرون.
عهد: لاولاشي, يالله عهود ألبسي عباتك البنات أسبقوك تحت.
عهود: خلاص أناطالعه تبون شي.
عهد:لاسلامتك.
بعد ماطلعت عهود من غرفه البنات قالت نجود: سبحان الله من شوي محزنه وماتبي تروح والحين تضحك ونزلت تحت.
عهد توهقت وحبت تصرف نجود وقالت لها: أنتي تعرفين عهود زين هي مزاجيه تحزن دقيقه وبعد شوي تلاقينها تضحك.
نجود: لابس هذي مب عادتها.
عهد: ياأختي خلك منها وتعالي نسولف من زمان ماسولفنا مع بعض.
نجود:إيه وانتي الصادقه وش علينا منها أنا بروح أجيب القهوه والحلا عشان تحلا السوالف.
عهد: أوكيه.
(في صاله الحريم):
نزلت نوره مسرعه وهي تقول:بنروح للبر....هيه..... هيه بنروح للبر....هيه...... هيه .
أم فهد: بس خلاص يانوره صدع راسي من صراخك خلاص أسكتي ولا ترا مافيه روحه.
نوره أسرعت لأمها وحبت راسها وقالت: لا...لالا..لا خلاص يالغاليه أناأسفه ماقصدت بس لاتلوميني من الفرحه ماقدرت أمسك ألساني.
أم فهد:الله يهديك بس.
عهود أنزلت مسرعه وهي مبتسمه
غرام: شرفت الملكه أخيرآ.
عهود: ألين الحين ماركبتوا السياره .
ندى: لا ننتظرنوره صعبه نركب السياره ألحالنا وفيها بندر.
عهود: الحين خالدمعه بالسياره.
أم نايف: أقول يابنات أركبوا مافي السياره أحد.
نوره طلعت مسرعه وقالت بأسبقكم للسياره.
عهود:الكرسي اللي ورى محجوز لي نوره أحجزي لي الكرسي اللي ورى.
نوره: أوكيه باي.
أتصل خالد على ندى وردت عليه وقالت: هلا بعمي خالد وشلونك تمام.
خالد:الحمدالله , ياأختي وينكم مختفين عنا.
ندى: وش نسوي ياعمي أشغال.
خالد:عهود عندك.
ندى: هي جمبي تبيها؟.
خالد:عطينياها.
ندى: عهود عمي خالد يبيك.
عهود:هلا خالد وش بغيت؟.
خالد: يأختي وينك ليه ماتردين على جوالك؟.
عهودأرتبكت وقالت: كنت مشغوله شوي وماقدرت أرد وش كنت تبي.
خالد: يالله تراكم لطعتونا برا في البرد.
عهود: بالله عليك لطعناكم في البرد.
خالدبضيقه:إيه لطعتونا , الحين بندر دخل الفان بالحوش وطلع برا عشان يخليكم تركبون على راحتكم وأنتم بكل وقاحه تلطعونا برا نص ساعه بسرعه أركبوا ولا رحنا عنكم لأن الشباب أسبقونا بالجمس وأنا كنت بروح معهم بس المشكله أن بندر مب محرم لك ولا لبنات أخوك وخواتك .
عهود: طيب وش المطلوب.
خالد: أطلعوا بسرعه.
عهود: خلاص بنطلع يالله باي.
عهود سكرت السماعه وقالت: يابنات يالله ترا الحوش مافيه أحد بروح أركب السياره قبلكم يالله باي.
ندى وغرام وريم أركضوا وراها.
أم فهد:الله يهدي هالبنات أطلعوا يركضون ولا قالوا مع السلامه.
أم نايف: لاتواخذينهم يبون يمبسطون.
أم فهد: حتى بناتناالكبار الله يهديهم رقو فوق لغرفه نجود وقفلوا الباب عليهم وأتركونا ألحالنا.
أم نايف: هالجيل كلهم كذى ماعليك منهم .
أم فهد: الواحد مايقول غير الله يهديهم.
أم نايف: أمين.
توقعاتكم للبارت الجاي وهالمره انا جاده بكلامي إذا ماشفت ردود ماراح أكمل القصه