حرف الشعر في غيبتك ما عذرته
وهاجس حروفي باقة من هداياك

كل الظلام اللي بعيني امسحته
شمس الوضوح اللي رسمها محياك

نبع الحنان اللي من الشوق صغته
فيه البيان اللي يترجم نواياك

لي فاض شوقي لك عبيره نزفته
قبل اتنقل بالغلا في حناياك

والشوق واحساس الغلا ما خسرته
من اول حروف الود لحدود رجواك

انت المطر لا من تخيلت نبته
على صحاري خافقي يوم لقياك

نفحة وفا تنعش خفوق غمرته
بالحب واحساس الغلا لا عدمناك

يا كم حلم في غيابك كسرته
ولا تمنيت بغيابك سوى رضاك

انا على عهد الوفا لا ذكرته
طيفن ينام بناظري ويتحراك

هذا شعورن صادقن بك شعرته
نبض الخفوق اللي على نيه اغلاك

انا عزاي ان الغلا لك ذخرته
ولوغابت عيون البشر ما تناساك