-16-


بعد اسبوع مر سريع على بعض ابطالنا وبطيئ على البعض

يوم الاربعاء
ريوف ووجدان والهنوف ومشاعل يكلمون بعض مكالمة جماعيه

مشاعل : احم احم ياليت تفضون الساحه للملكه مشاعل
ريوف بحماس : بتجووون هالويكند ؟
مشاعل : يسسس
وجدان : وش عندكم ؟
مشاعل : زواج رنيم بنت خالتي يوم الخميس الثاني وفستاني مصممته بالرياض ومارضيت انهم يوصلونه لي ابي اجي اخذه بنفسي عشان لو كان مو كويس يتعدل بسرعه
الهنوف : واهلك بيمسكون خط عشان فستانك ؟؟ اخخخ لو قلت لاهلي مصممه فستاني بالشرقيه خنقوني فيه
وجدان : هههههههههههههههههههههههههههههه
مشاعل : لاا بنجي طيران انا وهيوف ومشعل بس لأن هيوف بعد ناقصها اغراض وكذا واساسا ماراح نطول اتوقع نرجع الجمعة
ريوف : اي وقت بتجون ؟
مشاعل : بكره الظهر بنكون بالرياض
وجدان : توصلون بالسلااامه ياعمري
مشاعل : الله يسلمك

الساعه 11

وجدان كانت بغرفتها تستعد للنوم
طق الباب
وجدان : مين ؟
فيصل : انااا
وجدان بملل : مين انت
فيصل بااستهبال : نوره
وجدان : هههههههههههههههههه يا الله على الظرافه ادخل

دخل فيصل
فيصل : يعني من بكون ؟؟
وجدان تضحك : وش عندك بس جايني هالوقت
فيصل جلس عندها : فيه موضوع شاغل بالي وودي اشاور احد فيه وفكرت فكرت فكرت
وجدان تقاطعه : وفكرت وبعدين ؟؟؟؟
فيصل : ومالقيت الا اختي حبيبتي هي اللي بتدلني على الطريق الصح
وجدان : الله اكبر ! انا اللي بدلك ؟ طيب انجز وش السالفه
فيصل بسرعه : افكر اتزوج
وجدان عدلت جلستها وبحماس قوي : اخيييييييرا وميين هي سعيدة الحظ
فيصل : فيه وحدة ببالي
وجدان : من هي ؟ من بنته ؟ وين تعرفت عليها ؟ تكلمها ؟
فيصل : تستهبلين انتي ؟ خليني اكمل
وجدان : طيب اسفه يالله كمل
فيصل : هي وحده تعرفينها
وجدان : الله مين
فيصل : بقولك بس بشرط تكلميني عنها بصراحه لاني ماعرفها زين
وجدان بتفكير : ياربي فيييصل مين !
فيصل : مشاعل بنت عمي
وجدان اتسعت ابتسامتها : والله احسن وحده اخترتها
فيصل ارتاح : كلميني عنها اكثر تعرفين انا ماعرف بنات عمي مره وبالذات مشاعل وهيفاء
وجدان : وش تبيني اقولك عنها ؟
فيصل : يعني شخصيتها ؟ طريقه تفكيرها ؟ والاهم من كذا هل فيه احد ببالها ولالا ؟
وجدان بتفكير : ماتوقع ان في بالها احد
فيصل : طيب جسي النبض متردد انا ماابي اجزم واخطبها بالاخير تصير ماتفكر فيني كـزوج
وجدان : طيب بحاول ( وتغمز ) تراهم بكره بيجون الرياض
فيصل : بالله عليك
وجدان : والله
فيصل ابتسسم بقوه : كويييس

يوم الخميس

في بيت الجده كانو مجتمعين بالصاله

الجده : نادووو عيالي يتقهوون معي
هيفاء : اعمامي ولا عيال اعمامي حددي
الجده : لا وش ابي باعمامك خليهم لك .. ابي عيالهم
وجدان : اووه جدتي سحبت على عيالها
الجده سمعتها : ما اغلى من الولد الا ولد الولد اتصلي عليهم يا ام فيصل
ام فيصل تمسك جوالها : ابشري
مشاعل : خل نقوم تكفون مالي خلق البس حجابي
وجدان وهي تشوف محادثة فيصل وتبتسم وتمسك مشاعل بسرعه : لاااا لاا اجلسي انتي اهمم شي
مشاعل تناظر البنات مصدومه وتجلس

وجدان ترد على فيصل
وجدان : ايه ايه فييه وجالسه يساري الحين
فيصل : طيب اطلعي شوفي شكلي حلو ولالا ؟

وجدان ماتت ضحك
وجدان : على اساس هي اول مره تشوفك

الهنوف تطل بجوالها وبحمااس : من تكلمييين
وجدان لفت جوالها وبصوت واطي : اصبري بعدين بقولك

دخلو العيال وكان فيصل يتبسم وعيونه اتجاه البنات
الجده : هلاوالله بعيالي

جلسو كلهم عندها
الجده : قومي يالهنوف صبي القهوه
الهنوف بصوت واطي : افف جدتي تحب تحرجني
وجدان : الحمدلله اول مره ينسون اسمي بهالمواقف
قبل ماتكمل كلمتها
الجده : وجدان قربي القدوع

مشاعل ضحكت بصوت عالي فيصل فز يوم سمع ضحكه ورفع راسه وشافها وابتسم
مشاعل ارتاعت من نظرته وسكتت على طول

الجده كان جنبها خالد
الجده لفت عليه : ترى مانسيت موضوع الزواج للحين
فيصل : ايييه عليك فيه
الجده : لا تحدني اخلي زواجكم بيوم واحد
فيصل يأشر على عيونه : من عيوني الثنتين انتي بس اشري لي وانا اتزوج لو تبين الحين
الجده انبسطت : والله ؟ يالله تكفى تزوج من زمان مافرحت بزواج احد
فيصل : وبتزوج وحده تعرفينها وتحبينها وتعزينها بعد
الجده : قل لي منهي واخطبها لك الحين
فيصل ناظر جهة البنات وابتسم : هي جالسه هنا

البنات كلهم ارتاعو من جرائته

الهنوف بصوت واطي : يمممه مين يقصد لايكون انا
وجدان تلف عليها ورفعت حاجبها : يامحور الكون مو انتي
رجعت لفت على فيصل وابتسمت

خالد : علمني منهي وانا اشوف هي تنفع لك ولالا
فيصل : ملابس هي ؟
خالد : هههههههههههههههههه والله لاعطيك اياها من بكره بس خل امي تلهى عن طاري زواجي انا
ام فيصل : منهي يافيصل
فيصل : هههههههههههههههه عاد امي ماراح تنسى السالفه
ام فيصل : والله اني انبسطت
فيصل وهو يقوم : بتعرفونها قريب ,, يالله انا استأذن مواعد واحد من الربع

طلع وكلهم يتسائلون

ام فيصل لفت على وجدان وشافتها تضحك : انا عارفه انك تعرفين مين هي يالسوسه
وجدان تتصنع البراءه : انااا ! وش بيعرفني بس اضحك على هبال فيصل

استمرو بالسوواليف

لما جت الساعه 12

ام فيصل : يلا بنات فيصل برا ينتظرنا
وجدان : يمممه بناام هناا اليوم
ام فيصل : ضروري ؟
وجدان : اييييه والله ومابعد شبعت من هيوف وميش
الجده : خليها تنام وتنبسط مع بنات عمها وعمتها
ام فيصل : بس عشان خالتي
وجدان تحب راس جدتها : عاد يمه كملي جميلك وتوسطي للهنوف بليز
الجده توجه نظرتها لأم عبدالله : والهنوف تجلس بعد
الهنوف : يسسس والله كنت شايله هم كيف بقنع امي
ام عبدالله : والله ياخالتي البيت زحمه واخاف يسببون لك ازعاج
الجده : لا مايزعجونا البيت كبير وهم دايم يجلسون بالملحق برا ما نسمع اصواتهم


في بيت ابو تركي
رهف جالسه تاكل وتتابع التلفزيون و تكلم افنان بنت خالتها مكالمة فيديو

رهف : بيجتمعون عند خالتي نوف ؟
افنان : ايييه تعبت وانا اقول لأمي مابي اروح بناتها غثيثات بس رفضت
رهف : الحمدلله امي ماعاد تقول لي شي عنهم وعن جمعاتهم
افنان بحزن : حتى جوجو ماراح تروح عندهم زوارة في بيت عمها المحظوظه
رهف : طيب متى بتروحون ؟
افنان : بكره بدري لانهم بيجتمعون بشاليه
رهف : يووه عاد الله يعينك على النفااق
افنان بحزن : اففف يعععع .. خليينا منهم بس اخبار عبدالعزيز ؟ ماكلمك ؟
رهف وهي تشوف التلفزيون : لا مو كثير وحتى اذا رد علي او رديت عليه يكون كلامنا مختصر
افنان بصدمه : مجنووونه انتي ! حاطته بستوري ؟
رهف ببرود : اذا جيت اصور شي مابيه يشوفه اشيله قبل بس انتي عارفه اني غالبا اصور بغرفتي وش بيعرفه عاد (سكتت شوي بعدين تذكرت وعدلت جلستها وبحماس) : اييه صح قبل امس استغربت من شي
افنان : ايووه
رهف : لما صورت قهوتي وجنبها البخور تذكرين الصوره ؟
افنان : ايووه
رهف : تخيلي رد شقال !
افنان بحمااس : وش قال ؟
رهف : قال انتبهي لايكتمك البخور
افنان بصدمه : رهوووف شكله كاشفك !!!!
رهف بثقه : لااا لاا مستحيييل ماقد صورت شي يوضح
افنان : انتي من بعد ماقلتي لي انه قال روفا ذاك اليوم وانا شاكه
رهف : لا ياغبيه ذاك اليوم سامع البنات بالمستشفى وهم ينادوني وسمعني وانا امدحه الله يااخذه واتوقع انه كان يتميلح بس
افنان : هههههههههههههههه تتوقعين كذا يعني ؟
رهف : اكييييد مستحيل لو كان عارف اني رهف ماراح يخليني عنده دقيقه وحدة
افنان : مادري العيال تفكيرهم غيرنا ترى
رهف بثقه : لالا ماعليك انا متخفييه مره
افنان بااستغراب : انا مدري ليش مااحذفتيه للحين ياغبيه
رهف تحاول تغير الموضوع : ايوه قلتي لي بتروحون لخالتي نوف اجل
افنان رجعت تحزن : خلاص ياتبن انا احاول انسى
رهف : ههههههههههههههههههه مسكينه .. بس اسمعي ترى يمكن يمكن مو اكيد ان وعد تروح مع امي اذا ماكان عندها شغل
افنان : يااارب على الاقل نصبر انفسنا ببعض
رهف : ههههههههههههههههههه تراها مغصوبه مثلك بعد .. الحمدلله على نعمة قوة الشخصيه
افنان : قوة الصياح وانتي صادقه هههههههههههه والله ماانسى وجه خالتي لما انصدمت من صياحك ذاك اليوم
رهف : ههههههههههههههه بس الحمدلله نجحت خطتي
افنان : تدرين عاد حاولت اسوي مثلك بس ماقدرت ابكي ومامشت على امي .. عطيني الطريقه يختي
رهف : هذي قدرات خاصه ياحبيبتي مو اي احد يقدر عليها

كملو مكالمتهم


في بيت الجده
الساعه 5 مشاعل وريوف ووجدان والهنوف بالملحق
والباقي كلهم نايمين

وجدان : تصدقون مشتهيه بيتزا
مشاعل : حامل ؟
ريوف : ههههههههههههههههههههههه
وجدان : لاوالله بس من زمان ما اكلتها
الهنوف : تصدقين اشتهيتها
وجدان : العيال هنا؟
مشاعل : قبل شوي اكلم عمي خالد يقول مافيه الا عزيز وفيصل
الهنوف : غريبه وين الباقي
ريوف : اخواني بالدوام
الهنوف : ياعمري حتى بالويكند يداومون ؟
ريوف : ايه طب يعني وش تبين
مشاعل : يووه اتخيل مافيه ويكند بحياتي والله مااتوقع اني اداوم
ريوف : الا كيف الدوام معك
مشاعل : والله مليت صراحه وافكر اتركه مو جوي
الهنوف : ياشيخه بتجلسين تمشين على جوك عز الله ماراح تفلحين ابد هههههههههههههههه
مشاعل : انتم متخيلين اني اتعامل مع بنات متوسط .. طلعو اسوأ من البزران
الهنوف : وش تقولين عني اجل بتخرج واجلس اقابل البزران
مشاعل : لو تخصصي مثل تخصصك قطعت الوثيقه اول مااتخرج
ريوف : هههههههههههههههههه حرام عليك عاد لا تحطمينها
وجدان تقاطعهم : اسمعو بس خلوكم من هالكلام بقول لعمي خالد يجيب لنا بيتزا
مشاعل : مجنونه انتي؟ بيتزا بهالفجر
دخل خالد عليهم : من المجنون
وجدان : جابك الله
خالد : وش السالفه لاتقولون لي عرس بعد
ريوف : هههههههههههههههههه ياعمري خالي تعقد
خالد : الوالده الله يهديها كل ماشافتني فتحت الموضوع
مشاعل بجديه : طيب انت مافكرت ؟
خالد : انا عادي عندي بس انا مو مستعجل الشي الثاني ابي بنت اناا اختارها بنفسي
وجدان تصفق وبصوت عالي : ياعمرررري يالاوبن مايند
خالد :والله مو مستعد ارتبط بوحده ماعرف عنها الا اسمها
ريوف : طيب السعوديه مليانه بنات انت اشر بس وهي بتجيك تركض
خالد : انا قايل لكم رشحو لي بنت بس محد عطاني وجه
وجدان : اعفيني من هالموضوع الحين انا بلتفت لزوجه اخوي فيصل لازم ندور له وحده
خالد : فيصل غبي وهق نفسه
وجدان باابتسامه خبث : ماتدري انت يمكن حاط بباله وحده وحابها
خالد : والله قهرني شوي .. تعبت احاول اقنعه يعلمني بس رفض يقول بخطبها وبتشوفون
وجدان ضحكت
رن جوال خالد
خالد : الطيب عند ذكره ( ورد عليه وهو قايم بيطلع )
ريوف لفت عليهم وبحماس : بصراااحه فيصل صدمنيي اليوم
الهنوف :اقولكم شي ؟ احس اني عرفت مين يتكلم عنه
ريوف : ميين ؟
الهنوف : احس احسس ريناد يمكن ! كأني لمحت عيونه متجهه عليها
مشاعل اللي كانت تاكل فصفص غصت وجلست تكحكح لين صار وجهها احمر
البنات يطقون ظهرها
وجدان : الله ياخذك يالهنوف
الهنوف بصدمه : خير وش قلت انا !
مشاعل بعد ماشربت مويه : حسبي الله عليكم كلكم ! وش هالفصفص اللي ينشب بالحلق
ريوف : الفصفص ولا سالفه ريناد حددي ؟
وجدان تحاول تضيع السالفه : تدروون بنات من احس تصلح لعمي خالد
الهنوف : مييين !
وجدان : الجازي ال... بنت جيراننا
ريوف : ماعرفها !
وجدان : الا جايه بالمزرعه ويوم عزيمه فيصل اخوي
ريوف : والله ماتذكر اي وحده تقصدين ! اللي جو مره كثير
وجدان : شفتي اللي شفناها اليوم بالجامعة عند ستاربكس ؟
ريوف : اييييه هذي ! ( تذكرت شي ) صح امي لطيفه ذاك اليوم قالت له عنها
الهنوف : لالا ما احس انها تصلح له
مشاعل : الا بالعكس حلوه ترى .. صحيح ماعرف شخصيتها مره بس احس تصلح له
ريوف : الا صصح بنات وش رايكم في رهف
وجدان والهنوف بوقت واحد : لا مستحيييل
ضحكو مشاعل وريوف
ريوف : لييش مستحيل ! بالعكس تجنن مره رهف
وجدان بجديه : رهف صغيره مره على عمي
الهنوف : وانا كذالك مع راي وجدان
مشاعل : ياشيخه انتي وياها ؟ رهف صغيره والجازي لا !
وجدان : اي والله صح نسيت انهم نفس العمر .. بس مدري كيف رهف احسها بنتنا مايصلح تاخذ عمي ههههههههههههههههه
مشاعل : في هذي عاد معك حق حتى انا مافكرت فيها ابد ولا جت في بالي لأنه مايصلح ههههههههههههههه

جلسو البنات يتناقشون
وبهالاثناء مسكت وجدان جوالها وارسلت لفيصل ( اخطبها )

في المجلس

فيصل وعبدالعزيز وخالد كل واحد جالس وماسك جواله

فيصل وصلته رسالة وجدان وابتسم من كلللل قلبه

لف وشاف عبدالعزيز
فيصل بحماس : عبدالعزيييز والله احبك
عبدالعزيز بدون مايلف عليه : كم تبي ؟
فيصل : ابيك انت وحدك وبس
عبدالعزيز : الحمدلله والشكر بس
خالد : اقول وش رايكم تروحون معي للقصيم ؟
عبدالعزيز : وش الطاري ؟
خالد : شريت سيارة وراعيها بالقصيم وودي اخذها اليوم بس لازم يجي احد معي عشان يرجع سيارتي اللي بمشي فيها
فيصل بروقان : قدام كم عندي عم اسمه خالد انا ؟
عبدالعزيز وهي يناظر فيصل : الله يرزقني روقانك بس (ورجع لف على خالد) خلاص تم
خالد : نمشي الحين ؟
فيصل وعبدالعزيز : يالله

عند البنات

الهنوف : الا صح ريووف متى بتسكنون بيتكم ؟
ريوف : للان مابعد وصلو له الكهرب ومابعد اخترنا البويات وكذا يعني اتوقع مطولين
وجدان : هو هنا قريب مره ؟
ريوف : تستهبليين ؟ جدارنا بجدار جدتي
مشاعل بعد تفكير : شرايييكم نروح له ؟
ريوف : يمه يمكن يكون فيه عمال
وجدان : لا مستحيل الحين الساعه 6 مايجون هالوقت
ريوف : شدراك يالمقاول
وجدان : هههههههههههههههه اتوقع كذا من 9 يبدون
ريوف : تتوقعين ولا متأكده
وجدان بكذب : متأكده
مشاعل : عادي خل نروح نشوف وش ورانا
الهنوف : يمه احس خايفه
وجدان : يوه ياشين البزارين
الهنوف : اساسا عمي والعيال بالملحق اللي عند الباب بيشوفون الباب وهو ينفتح وبينشبون لنا
وجدان : خلونا نطلع نشوف

طلعو البنات

ريوف : وجدان طلي عليهم بما ان اخوك فيه
وجدان ترفع حواجبها : خير عزيز فيه (وتلف على مشاعل ) مشاعل انتي روحي شوفي
مشاعل ترفع حواجبها نفس وجدان : وفيصل ياقلبي ؟؟
وجدان : عادي فيصل
مشاعل : احلفي بس
ريوف : ياغبيات اساسا مافيه جزم عند الباب يعني مافيه احد

دخلو البنات وكان فعلا مافيها الا مشعل وعبدالرحمن ونايمين بعد

وجدان : غريبه وينهم
ريوف : يمكن طلعو يفطرون
وجدان : خيانه !!!! دقايق بس اتصل على فيصل
الهنوف : وش عليك من الفطور انتي خل نروح لبيت عمتي الحين
وجدان : ابيه يجيب لي بيتزا
مشاعل : ههههههههههههههههههههه مريضه انتي والله


اتصلت وجدان عليه

فيصل : هلا والله
وجدان : هلا فيصل تقدر تجيب لي بيتزا ؟
فيصل :والله انا مو بالرياض ولاكان من عيوني ,, بس لحظة لحظة وش بيتزا هالحزه ؟
وجدان بخبث : ياليييل جتنا حركات مشاعل

ومشاعل تضرب كتفها : خير وش دخلني

فيصل : ياعيووني انا بس
وجدان : هييه هيييه عيب
فيصل : اوكي اوكي
وجدان : وين رايح له ؟
فيصل : القصيم ومعي العيال ورايحين عشان سياره عمي خالد وبنرجع اليوم .. عطيتك كل التفاصيل خلاص الحين ارتحتي ؟
وجدان : ايييه الحمدلله يالله مع السلامه
فيصل : مع السلامه

مشاعل : ليش قلتي عيب ؟ لايكون يسب ؟؟؟
وجدان : ههههههههههههههه ايييه يقول مشاعل الغثيثه ماغيرها
مشاعل : قطييعه !!!
ريوف : وين رايحين له ؟
وجدان : القصيم
الهنوف بحماس : طيب يالله خلونا نروح
مشاعل : انتي كنتي خايفه وش غير رايك
الهنوف : مدري شجاني فجأه تحمست
ريوف : ناخذ عباياتنا ولامو لازم ؟
مشاعل : سلامات حبيبتي اكيد لازم
وجدان : يالله اجل

دخلو البنات وجابو عباياتهم وطلعو لبيت عمتهم

ريوف وهي تدخل البيت : بسم الله يروع ظلاام
الهنوف بخوف : بنات اسمعو امانه لحد يخوفنا ويطلع صوت وكذا
وجدان : ههههههههههههه هذي حركات مشااعل
مشاعل تشهق : انااا ؟
الهنوف : مشاعل ياتبن لاتشهقييين
ريوف : بنات قصرو اصواتكم الصدى لحاله رعب
وجدان : خلونا نروح الدور الثاني

راحو فوق

وجدان : تعالو السطح
ريوف : لااا يمه احس فيه عمال نايمين
مشاعل : ههههههههههههههههههههه وش ينومهم فيه
الهنوف : يممه لا تكفون انا ماابي
وجدان : وع ياشينكم وانتم خوافين

راحت وجدان لحالها فوق

بعد خمس دقايق

ريوف : وجداان احنا تحت تعالي بنطلع خلاص
وجدان : اووكي دقيقه
مشاعل : وش لقيتيي؟
وجدان : مافيه شي بس فيه حجر يغزز افف
ريوف : يالله تعالي
وجدان : اووكي

وهي تنزل مع الدرج سمعت صوت شي يطيح فوق ومن الخوف لفت رجلها وطااحت على الارض من على جنب
وماكان فيه درابزين وكانت الطيحه قويه

صرخت وجدان بقوه
البنات جو وهم يركضون ومرتاعين .. اول وحده وصلت ريوف شافت وجدان وجهها قالب لونه من الالم وصوتها راح من الصراخ

ريوف صرخت : تعااالو نشيلهااا
الهنوف جت تركض : مشاعل خذي جوالي اتصلي على السواق بسسرررعه
مشاعل خذت جوالها واتصلت وهي تصيح بدون وعي

شالو وجدان اللي اغمى عليها من الالم
ركبو وراحو المستشفى بسرعه وكل مشاعر الخوف والرعب في قلوبهم مايدرون وش تضرر راسها ولارجلها بس

وهم بالطريق اتصلت ريوف على ماجد وهي ميته صياح
ماجد : وش فيك ؟؟؟؟؟ اهلي فيهم شي ؟؟؟ جدتي فيها شيي ؟؟؟
ريوف وهي تشاهق : وجداااان ماتت
ماجد اللي كان واقف جلس بسرعه وهو حاط يده على راسه : ريوف انتي وش قاعده تقولين ؟؟
الهنوف اللي كانت اهدى وحده سحبت الجوال من ريوف
الهنوف : ماجد وجدان بنت عمي طاحت من مكان عالي وماندري بالضبط وش فيها لانه مغمى عليها الحين
ماجد : تعالو مستشفى .... على الطوارئ بسررررعه بكون واقف انتظركم
الهنوف : اييه احنا بالطريق
سكرت منه وهي تدعي


وصلو المستشفى بسرعة البرق نزلو وهم شايلينها
كان ماجد واقف قدام باب الطوارئ لما شافهم ارتاع وقرب السرير ومعه ممرضات
اخذها من يدينهم لانهم شايلينها بشكل غلط وحطها بالسرير

بعد انتظار ساعتين
كانو البنات واقفين ويدعون ويصيحون

طلع ماجد وريوف قربت عنده : ماجد وش اخبارها ؟؟؟
ماجد : ............


انتهى البارت
اتمنى تعطوني رايكم وتوقعاتكم لأبطالنا