أوصف جماله أو جمال الصوره =صدفه عظيمه جل من طوعها
كنه بها ليلن يزف بدوره =و كنها به رياحن هبى مطمعها
الليل يبكي من لما ديجوره =دمعه و طاحت راجين مرجعها
يبي يرد الليل منها نوره=مير الشقى هيمان نوره معها
شقول شوصف في عيونه ثوره=تبي تثور و عزته تردعها
ان هو بكى عينه بكت مجبوره=و ان هي بكت أو حاولت روعها
عين المولع بالقمر مغروره =هي ضيعت نوره و هو ظيعها
لله عين بالشقى مغموره =لا جات تفشي سرها برقعها
حبيبتي في روحها بلوره =الضي بجزعها و لا يفزعها
اسطورتن ما مثلها اسطوره =عجايب الدنيا السبع تتبعها
فيها مراكب تايه مهجوره =ذابت قلوب الناس في أشرعها
و فيها حكايات الهوى المأثوره =من دكت الدنيا الى مضجعها
أحلام شاعرها مع جمهوره =ينبوعها مخلوق من ينبعها
شاعر جماله من جمال حظوره =يستثمر الفكره قبل يزرعها
هو مثل ابياتن بدت مكسوره =ابداعها ما حس به مبدعها
أو مثل صحرا بالوهم معموره =تتبع سراب و لالها يتبعها
أو مثل بدرن بالبحر له صوره =الموج من حبه لها قطعها