منتديات قصايد ليل - عرض مشاركة واحدة

11-17-2011

الحلقه الثالثه عشر ..

يوسف : شو هالحركه اللي سويتيها ..
حسيت اني يدام أبوي وقاعد يحاسبني .. هذا طبع أبوي ... الله يرحمه ..

قلت له : شووو ..؟
قال لي : ليش سبيتي البنات ..
قلت له : سبّت أبوي تباني أسكت لها بعد ..

يوسف : من الأساس كنتي ما ترابعينها عاد ..
قلت له : هم لاصقين فيني شسوي لهم .. أووف كل شي صار تحقيق .. في هالحياه

وطالعت برا وبدت دموعي تهل بدون سابق انذار .. حسيت روحي ضعيفه يدام يوسف ..

يوسف سكت حتى ما تنازل يقول كلمه .. أو حرف عسب يهديني لـ هالدرجه ما يحس .. حتى الحجر يحس بس هذا قلبه قاسي لا يمكن يحس ...

غروره لـ هالدرجه ما خلاه يتنازل و يواسيني .. بس يعاتب ..

وصلنا البيت ونزلنا ودخلت بدون ما أمر او حتى أسلم رحت الحجره تسبحت وصليت رقدت وأنا ميته صياح على حالي .. كل ما أتخلص من شي يظهر لي شي يديد ومشكله يديده في حياتي شو هذا ...

قمت على صوت الجوهره وهي تهزني تقول نشّي صلّي المغرب .. قمت صليت .. وعقب على طول دراسه

.. نحن نص أربعه مب باقي شي على امتحانات نهاية السنه ... الأيام قاعده تمر بسرعه بسرعه ... حسيت بـ روحي ما أقدر اوفق بين شي وشي .. كل همي فـ الدراسه وبس لازم أييب ذيج النسبه اللي أرفع بها راس أبوي ،، لأني وعدته ولازم أوفي بـ وعدي ..

سويت لي جدول للمذاكره والمراجعه بديت أكل الكتب أكل ... من كثر الدراسه .. وعيوني تكون تحتها هالات من كثر المذاكره والدراسه .. كثر ما أقدر وقت فراغي أقضيه فـ الدراسه وبس .. ابتعدت عن شي اسمه نت وتلفزيون وتلفون .. حتى طلعات ما قمت أطلع خلاااص مليت ... من الحياه ... همي الأكبر الحين نسبتي ...

بديت أخذ دروس تقويه عند مدرسين خصوصين لبعض المواد العلميه الصعبه ...
حسيت روحي في لحظه بطلع الأولى ع الدوله خلاااص ... يا رب أتوفق انشالله ...

قبل الامتحانات بـ يوم نزلت عسب نتغدا ...
عمي .. : حي هـ الويه والله ..

طالعته وابتسمت : السلام عليكم ..
الكل : وعليكم السلام ..

عمي : وينج حتى غدا وعشا ما تنشافين ..
قلت : دراسه انت أدرى عاد عمي ...

مرت عمي : اش كثر أقول لها انزلي غيري جو .. طايحه لي يدام هالمذكرات والكتب ..
عمي : خلوها برايها أدري بها بنت أخوي شاطره

جواهر : يالله أنا عاد كله قاعده وياكم وأييب هذيج النسب ..
ياسر : مبين شكلي أنا اللي يبت 72 هذيج السنه ...

جواهر : عن الفضيحه ...

قعدنا ناكل .. وهاليوم قلت بقعد مع الجوهره نسولف سوالفنا قلّت طول الوقت ملتهين بالدراسه ...
رحنا أنا والجوهره الصاله اللي فوق شفنا جواهر ماشالله مع سماعة التلفون اللي ما تفارقها طق حنك مع ميثاني ...

الله يهديهم انشالله ما يرسبون هع ... لا سمح الله ..

رحنا أنا وجواهر الحجره وتمينا نسولف ثواني الا وجلبناها دراسه ...
مرت أيام الامتحانات تعب علي وايد من امتحان لامتحان ثاني .. لدرجه حسيت عقلي بيشفر من زود الدراسه وبتخبل بس الله ستر .. صح انه كان ارهاق وتعب بس هالتعب ما ييه الا مرة فالعمر .. وهـ النسبه بس مره أييبها ...

ياه آخر يوم امتحانات ظهرت من المدرسه ... متأكده انّه هذا آخر يوم لي فـ المدرسه لأني واثقه بـ روحي .. وداعا للهم والمشاكل خلاص .. بعيش حياتي الحين .. المهم النسبه اللي بييبها ... ودّعت وداد اللي كانت مثل للطيبه والصداقه ,,,

تذكرت للحظه شيخاني
آآآه يا كثر شوقي لها .. شخبارها الحين شو مسويه .. أكيد مشتاقه لي كثر شوقي لها .. يا حلوها أيامنا مع بعض .. حنيت لذيج الأيام الحلوه .. آخر يوم نعبي الدبات ماي ونصب على بعض ... يتني الضحكه على استهبال الطفوله .. وعلى برائتنا ... تمنيت أرجع بعمري كم سنه ,.. عسب أفرح أبوي ... بس هذا اللي مكتوب ومقدر لي ؟؟

وصلت البيت نزلت دشيت الجوهره وجواهر توهم وصلو معاي حسيت بـ الفرحه وأنا أطالع الجوهره وجواهر ... بس طبعا ما باركنا لـ بعض الين النتايج ..

كل وحده راحت غيرت .. رحت تسبحت وصليت عقب بخيته رقاااااد الين العصر .. تعويض
عن التعب مال الأيام اللي طافت حسيت بالسعاده غامرتني اليوم بس فيه أحد ناقصها ...

دوم سعادتي جذا لازم أحد أو شي ناقصها مدري ليش .......؟؟؟
في حياتها سعادتي ما اكتملت ... دومها ناقصه ناقصه ...

..........................

ما حسيت بروحي الا وجواهر وميثاني يمطون اللحاف عني ...
قمت : هاااااااا شو تبون ...

جواهر : نشّي يلا نشّي نبا نظهر ..
قلت لهن : صدق متفيحات تونا أول يوم وتبونا نظهر خلونا نريح ع الأقل ...

رديت بخيته ... ما حسيت بروحي الا وأنا أنش ع الساعه 6 العصر جريب المغرب ..
نشيت تيددت بسرعه ورحت عسب أصلي العصر قبل ما يأذن المغرب ...

عقب نزلت شفت عموتي وبنات عموتي موجودين ..
رحت صوبهم وسلمت .....

عموتي : هااا نواري شو الامتحانات .,.
قلت لها : أوكي الحمدلله ...
عمتي : يلا الحمدلله .. تيبين هذيج النسبه اللي تسكت
قلت لها : انشالله

قمت بدون ما أقول شي مدري شو اللي قومني ...

بدت دموعي تهل شوي شوي الين وصلت جريب الحجره وأنا ماشيه شفت يوسف طالعني شافني استغرب بس أنا ما عطيت لأي أحد فرصه يزقرني بعد؟...

دخلت الحجره وبندت الباب ...

آآآآآآآآآآه يا بوي آآآه والله مشتاقه لك موووت مشتاقه لك شوق الظوامي الى الماي يابوي تعال وشوف بنتك بتتخرج خلاص ...
أمنيتك بتتحقق بنتك كبرت صارت نسخه عنك وعن أمها .. بس وينك وينك ...؟؟؟

يابوي يا أغلى إنسان في الوجــــــــــود رحلت وخليتني في هالدنيا وحيده حزينه يابوي ما عاد لك بـ هالدنيا وجـــــــــــــود ولكنك عايش بوسط قلبي طول سنينــــه يابوي من بعد ما سكنت اللحــــــــــــود عرفت أنا بعدك مر الهــم وشينـــــــــــه ..

بالفعل يابوي من بعدك الدنيا شينه ومره ... مافيه شي اقسى من فراقك ..
قطع علي تفكيري ....

............: نواري شاللي يايبنج اهني
قعدت عدل ومسحت دموعي بسرعه : ماشي
الجوهره تقربت مني وطالعتني : تصيحين ..؟

حضنتها وقلت : تذكرت أبوي .. مشتاقه له وايد
الجوهره : ادعي له بـ الرحمه والمغفره يا نوره
طالعتها : تعالي ننزل ..

الجوهره : هي تراهم سألو عنج توهم
قلت لها : يلا عاد .. عن نتأخر ويبدا تحقيق جوجو وميثاني هههه

الجوهره : تخيلي امنو ياه وسلم علينا ..
قلت لها بنص عين : منووو هاااااااه يلا ارمسي ..؟
الجوهره : حمد .. يا ربيييه نورو يخبل ..

قلت لها : ههه فديتج الله يوفقج معاه
الجوهره : يلا ننزل

نزلنا وقعدنا نسولف مع عمتي ومرت عمي .. الين العشا تعشينا وردينا أنا والجوهره فـ الحجره ..
رحت صوب اللاب توب وقعدت ...

الجوهره : شو تسوين نواري ...
قلت لها : مفاجأة عقب بتعرفين ..
الجوهره : يلا ارمسي ما فيني يلا بليز ارمسي ما أستحمل حرام
قلت لها : نو وي كل شي بوقته حلو ..

الجوهره :برايج انزين .. يلا ندش نور الإمارات
قلت لها : أوكي .. يلا بعد بالمره نشوف يتيمة زايد شو سووت فالامتحانات

الجوهره : أكيد خبصت تخبيص .. هههه شراتنا ..
قلت لها : هههه حلوه هاي ... شكلها من فتره مب كاتبه روايه يديده ..

الجوهره : أكيد لأنه موسم امتحانات يالله يالله الواحد يحج شعره تبينه يكتب روايه اش طولها ويبالها سيناريو وتنسيق وأفكار ..

قلت لها : صدقج والله هههه
الجوهره : تدرين أحس اختيار اسم الروايه أصعب من تنسيق الأفكار والسيناريو ..
قلت لها : يمكن حسب الكاتب ..

الجوهره : صدقج .. تعالي نحمل من محمل الروايات اللي في نور الإمارات
قلت لها : هي هذا اللي نطلب من يتيمة زايد وتلبي لنا طلباتنا ..

الجوهره : حملي من زمان ما قريت
قلت لها : وأنا بعد ..

الجوهره : أنا سايره أسوي نيس كافيه حقنا وانتي حملي ,,
قلت لها : أوكي دير ... بسرعه مشتاقه حق النسكافيه مالج
الجوهره : هههه يالمصلحجيه ...

.........................................

قضينا هالليله بقراءة روايه من أحد الروايات اللي جذبتني وشدتني لها من عنوانها بس العنوان أبد هب متعلق باللي فالروايه .. بس طريقة السيناريو وتنسيقه يخبل بمعني الكلمه حسيت روحي أقرا روايه واقعيه بالفعل ,,, البنت حالتها أشبه بــ حالتي
هذي الدنيا ... حتى نحن حياتنا أشبه بالروايه .. من أحداث ووقائع وحالتنا وكل شي .. صدق الدنيا صغيره ..

.........................................

رقدنا عقب أذان الفير وما حسيت بروحي الا وجواهر تباغم : نشو يلا نشو بنروح الحديقه ..

قمنا حسيت روحي .. منتهيه منهد حيلي ,, رحت تسبحت ولبست .. عقب نزلت أتريق ..
عقب الريوق قالو بنروح الحديقه نحن البنات .. بس نحن رفضنا قلنا مول أحسن لأنه الجو حار وما يساعد أبد ...

يوسف اللي خذانا بـ سيارته ووصلنا ...........
وقبل ما ننزل قال : ديرو بالكن ع رواحكن ...
كلنا : انشالله

عقب ما نزلنا .........جوجو قالت
جواهر : أول مره يوصينا ع رواحنا دوم من البيت بس يوصي اليوم حتى عند باب المول
ميثاني : ما يندرا لهم هـ الأولاد والله يوميا راي

استغربت من موقف يوسف ... كان يطالع صوبي وهو يرمس .. نظراته كانت موجهه لي أنا .. شو يعني حرص .. ولا خوف ... ولا حــــــــــــب ... ؟؟؟???

تميت أفكر ليش يوسف يستعمل هـ الأسلوب .. يوم يبا يقول اللي يقوله يقول .. ويوم ما يبا يتم ساكت حتى صوبي ما يطالع ..

مشينا أنا والجوهره خذينا عادل وعلاوي وعموري ورحنا صوب الألعاب عسب يلعبون أما ميثاني و جواهر أكيد راحن يتدلعن ,,,

قلت : عموري أي لعبه تلعبون
عموري : السيارات ..
قلت له : اوكي يلا

عموري : عطيني الكارد وأنا بلعب علاوي وعدول وياي
قلت له : أكيييييييد
عموري : اكيد ريال طال عمرج ..

ابتسمت له قعدنا أنا وجواهر في صوب نراقب اليهال وهم يلعبون ...
قلت : جوجو تخيلي باجر تعرسين وييي لج عيال
الجوهره : جب لاااه لأافلعج الحين

قلت لها : هههه صدق ما اتمسخر تراني ... هاي سنة الحياه
الجوهره : يالله يا نــوره اش كثر أنا مستانسه مع حمد

قلت لها : الله يحفظكم ويوفقكم
الجوهره : نواري تخيلي يوسف خطبج شو بتسوين

صعقني هالسؤال .. لا في وقته ولا مكانه ..... حسيته شرا الماي البارد ينجب علي ويوعيني من خيالي و عالمي البرئ الطفولي اللي ع قدي ...

ما توقعت هالسؤال أبـــــــــــــــد وخاصتاً من الجوهره ..
قلت لها : كل شي نصيب ..
الجوهره : أدري .. بس انتي شو موقفج

قلت لها : أنا ما أحكم على طول .. لازم أفكر ويوم يخطبني يصير خير ,,
الجوهره : نواري أحس يوسف يباج ...

قلت فخاطري باين يا الجوهره باين .. دامه قال أفكر أكيد بيعيد حساباته وبيشوف اذا يستاهل انه ياخذني ولا لأأأأ .... أو اني هب من مستواه الراقي ...

قلت لها : الجوهره لو سمحتي بليز هالأمور تسبب حساسيه ما بيني وبينج ...
الجوهره : نورو نورو طالعي هاك الصوب ...

شفت أغلى ناسي نعم أغلى ناسي ............
شافتني ويت بسرعه صوبي .........

.................: نواري فديتج
قلت : هلا شواخ علني فدااااااااااااج اشتقت لج وايد وايد

شيخه : أنا أكثر والله شخبارج شو مسويه
قلت لها : تمام ومن صوبج ..؟

شيخه : ماشي الحال ها شو الامتحانات
قلت لها : أوكيه الحمدلله .. هااا أشوفج مع الحبيب رواحكم

شيخه : هيييه .. ملجت من شهرين ...
طالعتها بفرح : صـــدق فديتج والله تستاهلين ...
شيخه : ههههه يالله عقبالج

طالعتها : لأ أبوي .. ابعد عن الشر وغنيله هههه
شيخه : بالعكس ...

شيخه : مبروك الجوهره ..
الجوهره : الله يبارك في حياتج ..

قلت : يلا مناك ما ابا معرسات يخربن عقلي ...
شيخه : ههههه يلا يعل تنخطبين بسرعه هههه
قلت لها : ياااااا حـــــــــــافظ هههه

شيخه : يلا أنا بروح ريلي يترياني ....
قلت لها : مع السلامه فديتج
شيخه : مع السلامه ..

والله وكبرنا يا شيخه .. قمتي تقولين ريلي يترياني باجر ولدي قاعد يصيح ... يوم عن يوم حياتنا تختلف عن اليوم اللي قبله ...

استانسنا وسولفنا وضحكنا مع بعض لدرجه حسيت جواهر وميثاني بيموتوني من سخافتهم وطنازتهم ع الناس ..
الله يعين ياسر وفهد عليهم هالمخبل ههههه

خلصنا من بعد طلعه حلوه ومتعبه في نفس اللحظه ... رجعنا البيت وكلنا تعب ...
رحت تسبحت وصليت .. عقب قلت ارقد أحسن لي أمس ما رقدت عدل ...

قمت اليوم الثاني على صوت جواهر زاعجه الدنيا .,. نشيت بـ كسل وأنا أدعي على جواهر .. حشا عشان لعبة بليستيشن سووت عرس عاد حق خطوبتها شو بتسوي .. الله المستعان ...

رحت تسبحت وغيرت كشخت ع الخفيف .. نزلت تحت اتريق ...
شفت الجوهره توها تتريق رحت قعدت وياها اتريق ...

الجوهره : ها شو طلعة أمس ..؟؟
قلت لها : كشخه وايـــــــد
الجوهره : هههه حلاته شفتي شويخ

قلت لها : هي فديتها وايد أتذكرها هالأيام
الجوهره : عرسها بعد أسبوع سمعت ...
قلت لها : هي طرشت لي مسج بليل .. بس ما بحظر

الجوهره : جيييييييه ..؟؟؟
قلت : أبوي ما صار له شهور متوفي تبيني أروح عرس ...
الجوهره : برايج ...

قلت لها : تدرين أنا وشواخ من نحن يهال مع بعض .. بس القدر فرقنا ... على آخر سنه
الجوهره : يالله عسى خير هـ الشي ...
قلت لها : انشالله يلا عاد متى بتطلع النتيجه أبا اعرف كم يبت

الجوهره : عقب أسبوع عالنت بنشوفها
قلت لها : وايد متشوقه ابا أعرف كم نسبتيه
الجوهره : انشالله فالتسعين كل هالتعب واخر شي تنقصين .. لااا عاد هههه

قلت لها : ها شخبار حمد ..؟
الجوهره : اش دراني بعدني هب حرمته
قلت لها : هههه بس بنات هـ الزمن لازم نبص بص مني ومناك عسب نعرف
الجوهره : هههه استريحي هاي جواهر هب أنا هههه

قلت لها : غربلاتها اليوم ناشه على صراخها .. طرت طبلة أذوني ..
الجوهره : ما أصدق انها خلصت الثانويه ...
قلت لها : صدقج هاك اليوم أقول في خاطري جذا

الجوهره : هااا شو ناويه تدشين ..
قلت لها : والله أنا ميولي أي تي بس يصير خير لما تطلع النسبه ...
الجوهره : انتي علمي حرام لو تدشين شي ادبي ... دشي شي على مجهودج ..

قلت لها : مو شرط .. قاعده أفكر خاليا في شي ادبي هب علمي ,,,
الجوهره : اللي ترتاحين له أحسن لح

قلت لها : يصير خير ... اللي كاتبه الله بيصير انشالله ..
الجوهره : نواري بابا يباج صــح !!
قلت لها : وينه ..؟

الجوهره : في الميلس ...
قلت : ليكون خوالي بعد يو ..
الجوهره : لا استريحي ههههه

طلعت من المطبخ متجهه للميلس وأنا في دربي شفت يوسف .. يوم خطف طالع صوبي حتى ما ابتسم ...
من شو مخلوق هذا الانسان ... لا يحس ولا يبتسم ...

حتى سلام اللي هو ســـــــــــــــلام لوجه الله ما يسلم ...
قلت غصب : وعليكم السلام ...

بس قفطني يوم قال : ما سلمت انزين ...
قلت له : عاد شكلي تخيلت ... انك سلمت ...

وطيران للميلس هب ناقصه قفطات بعد خخ .. بس بعد يوسف جامد وقاسي شوي أحسه ...
حمد اللي هو حمد اللي الكل يقول عنّه ما يرمس وخقاق يوم يشوف الجوهره يبتسم لها ...
دخلت الميلس ..

قلت : السلام عليكم ..
عمي : وعليكم السلام ....

وأنا قاعده أدخل ,,, عمي قال : نواري سكري الباب ...
سكرت الباب ورحت قعد جريب عن عمي شوي ...

عمي : تعالي اقعدي يمبي ...
استغربت منّه ليش وشو السالفه .... رحت قعدت صوبه ... يوّد ايدي هالحركه وايد وترتني ..
عمي : نواري انتي خلاص بنت كبيره صــــــح !!

طالعته باستغراب كمّل كلامه وقال : نوره انتي كبرتي وتعرفين كل شي وتعرفين سنة الحياه البنت تروح لـ بيت ريلها ...

عمي كمّل كلامه : نواري اذا واحد تقدم لج بـ توافقين ولا لأ ...
طالعته وقلت : عمي أنا ابا أكمل دراسه ما اا أفكر في هااالشي خير شر ..

عمي : بس هاي سنة الحياه يا بنتي ... واذا قلت لج ولدي يوسف يباج ...
طالعته مستغربه ::: حسيت روحي مستانسه ... هذا حلم حياتي حلم الطفوله وأخيرا بيتحقق يوسف بيصير لي أنا ... أنا وحدي ...

عمي : ها شو قلتي .....؟
طالعته بغيت أقول هي موافقه بس في شي يودني وقلت : آسفه عمي مابا ... أعرس أنا بعدني صغيره وابا اكمل دراسه أتمنى هالشي ما يزعلك ...

عمي : بنتي فكري عدل ولا تتسرعين .. وولد عمج شارنج ...
طالعته مستغربه وافكر ومحتاره ,,,

عمي قال : مو لأنه ولدي أقول لج خذيه مهما كان أنا أتمنى لج الخير لأنج بنتي ,.. ويوسف الحمدلله ما يعيبه شي ...
طالعته وقلت : بصلي استخاره وبشوف ..

عمي : بارك الله فيج بنتي ... وعندج وقت كثر ما تبين ...

طالعته وابتسمت له : يصير خير عمي ... وطلعت من الميلس وأنا محتاره ,,, وأنا رايحه صوب الصاله ..

شفت يوسف يتكلم في التلفون مندمج في مكالمته ويوم طالعني تم يطالع صوبي ويرمس استحيت منه وايد دشيت الصاله بسرعه ...

يوم يبا شي يسويه برايه أما أنا لأ ، حرام علي ... حتى يوم يغلط أحمّل روحي الغلط ...
دشيت الصاله وانا ساهيه مدري شاللي قاعد يصير حولي ولا شو قاعد يستوي ...

رحت الحجره وأنا محتاره واااااااااااايد ... مابين هي ولأ ..
بس يوسف قال يفكر أكيد ما يباني ... لأأأأأ شو هالأفكار .. كيف أضيع حبي من بين ايديني وهو روحه ياي يطلبني .. أكيد يباني .. هي اكيد ......

حاولت أهدي روحي أكثر وأكثر حاولت اقنع روحي بأنه بالفعل يوسف يباني .. خذيت ثلاث أيام وانا أفكر .. ومحتاره مابين هي ولأ ,,, هذي هب لعبه ... هذي حياتي اللي بعيشها طول عمري .. هذا الشي بيحدد مصيري ومع منو بكمل حياتي ..

بعد هالثلاث أيام ............
رحت عند عمي صوب الحجره دقيت الباب ..
عمي : ادخل ..

دشيت رحت صوب عمي وبست راسه ...
عمي : شخبارج نواري ..
قلت له : تمام الغالي ,,,

قعدت جريب عنه ما عرفت بـ شو بفتح الموضوع معاه ولا من وين ببدا وكيف ببدا ,,
بس هو سهّل علي مسافات وطرق .. وقال : ها فكرتي بنتي ..؟

رديت عليه وأنا احرك راشي بالايجاب : هي ..
عمي : هااا بشري ..؟ ؟؟ ؟؟ ؟
قلت : عمي أنا موافقه ...

عمي طالعني .. وضمني له ,,, ودموعه ملت عيونه بس ما نزلت ,,,
عمي : الله يحفظج حبيبتي ويوفقج ,,

هاللحظه عرفت اش كثر الأخو يحب عيال أخوه .. مستحيل اخ فـ الدنيا يكره عيال أخوه .. وما يتمنا لهم خير ...

عمي مسك ايدي استحيت ع بالي بيوديني صوب يوسف .. استحيت وايد
زخ ايدي ورحنا الصاله كانو جواهر والجوهره ومرت عمي قاعدات ..

عمي : هاي جنتكم خلاااص ..
استحيت تمنيت الأرض تنشق وتبلعني ... هاييل خواته وأنا جذا عاد يدام يوسف شو بسوي الله يعيني ...
جواهر والجوهره يو صوبي ولوو علي ...

جان اروح صوب حرمة عمي وبستها ع راسها .. لوت علي وقامت تصيح ...
مدري حقي هــ الصياح ولا لولدها البكر ... أو يمكن للإثنين كل شي جايز ..,

عقب ثواني الخبر انتشر في كل البيت والعالم بعد جوجو ما تقصر .. بي بي سي لندن هاي .. ما تصدق تسمع خبر وتنشره هي وميثاني ..

بس اللي يهمني الحين يوسف لي أنا لي أنا وحدي ملكي أنا
... وأنا له هو وحده .. لا يمكن يوم من الأيام أستغني عنه أو أترك غيري ياخذه عنّي بعد .. بتمسك فيه عشان ما أفقده لو فقدته بنتهي حياتي كلها بتنتهي كم مره بتتجدد جراحي تعبت ..
الحين يوسف لي أنا يااااا نااااااااس اش كثر أنا مستانسه اليوم ودي لو اليوم قبل باجر أقعد مع يوسف وأسولف معاه أحسه حياتي ودنيتي وكوني .. ومنايه اللي كنت اتمناه طول عمري اللي أحبه
... ولا يمكن أعشق أو أحب سواااااه .... هذا باختصار حبيبي ونصيبي .......
نعم ..}~
حــــــــــــــــــــــبــــــــــــــــــيـــــــ ـــــــــــبـــــــــــــــــي
و
نــــــــــــــــــــــصــــــــــــــــــيـــــــ ـــــــــــبـــــــــــــــــي

لازم أرفع راسي فوق فوق يوسف لي أنا ... علني فدااااااااااه وأتم بتفداه طول عمري ...
منو قدج يا نوره اليوم ... يوسف خلاص صار لج وانتي له ...

حسيت هاليوم يمر ببطئ وأنا أدعي ربي ما اتصادف مع يوسف ... مابا أشوفه قمت استحي منه يا عاااااااااااالم والله أستحي أحط عيني بـ عينه ..

رقدت وهنا لي المنام هالمره ... عدل عدل رقدت وأنا كلّي فرح وأمل باجر أنش مستانسه يارب .. خلاااااااص جمعنا القدر نعم جمعنا ... يعل أيامي كلها افراح وسعاده ...

قمت اليوم الثاني على صوت جواهر شرات كل يوم تباغم ...
رحت تسبحت وكشخت طبعاً الحين أكثر عن قبل .. خطيبي يمكن يشوفني هههه
نزلت شفت جواهر تباغم .. ومستانسه ...

شفت يوسف قاعد وياهم استحيت وايــــــــــــــــد أحم أحم ... مابا أروح أقعد وياهم ..

عمي : نواري تعالي النتايج ...
نسيت يوسف وابو يوسف بعد هههه المهم نسبتيه الحين اللي وعدت بها بابا ..

طالعت نسبة جواهر ... قلت : هاي على هالنسبه مستانسه لو فالتسعين جان شو بتسوي ..
الجوهره : خليها خليها هههه مستانسه بنسبتها وايد عليها ,,,

جواهر : أصلاً المهم تخرجت يعني ...
طالعت الجوهره شفت اسمها فاللاب ونسبتها .. قلت : مبروك جوجو تستاهلين فديتج ..
عمي : ونسبتج ما تبين تشوفينها .,.

قلت : لأ لأا ... لازم أشوفها أول غير والحين غير هههه

عمي لف اللاب صوبي .......... طالعت نسبتي ,,,, ما أصدق والله ما أصدق أنا يايبه هالنسبه أنا ... ما اصدق ..
قلت : عمي متأكد أنا
عمي : هي انتي ... منو بعد ...

طالعته : ما أصدق والله ...
عمي : امبلى صدقي .. هكوووه مكتوب نوره خليفه الــ .....

شفت اسم أبوي يتبع اسمي ومع هالنسبه حسيت بالفرح والفخر ...
على طول عفدت صوب عمي وحضنته ........ : عمي أنا نسبتي جييييييه

عمي : جيه مب مصدقه فديتج
قلت له : وأخيراً حققت حلم ابوي ...

عمي : بارك الله فيج على هـ النسبه ..
طالعته وفيني الغبنه : بس يا ريت أبوي موجود عسب يستانس بـ النسبه ..

عمي : يلا الحمدلله على كل حال وتستاهلين خلاص لازم نييب لج هدايا ..
قلت : والله انت أكبر هديه عندي بالكون ...

عمي : يلا باجر ترا حفلة التخرج بيكرمونكم .. انتي والجوهره ..
جواهر : اصلاً أنا ما با تكريم .. المهم تخرجت ..

ضحكنا على جواهر وسوالفها اللي شرات شكلها هههه
قلت حق عمي .. : وين بيكرمونا ,,,
عمي : الشيخ بيكرمكم .,
الجوهره .. : صدق ..

عمي ... : هي بعد شوووه .. ولا نواري ليش هالنسبه صح جوجو ...
الجوهره : ههههه صدق ...
عمي : بيطلعون التكريم ع التلفزيون ..

جواهر : لا عاااااااااد اهني أنا أغااااااار وايد ...
عمي : محد قال لج لا تذاكرين وطيحي جدام هالبليستيشن شرات الشباب
جواهر : النفس وما تهوا يا أبي ههههه

كنت قاعده أتكلم وأنا ما أحس بوجود يوسف معانا .... من الفرح ما حسيت بالوقت بعد ...

باركو لي عيال عمي ويوسف بعد بس ما طالعت تعابير وييهه تميت منزله راسي يوم ارد عليه
حسيت اليوم راح بسرعه ... وأخيراً حققت حلم أبوي بس ليته موجود ويانا وينه عنّا ... أكيييد كان بيفرح يوم بيطالع نسبتي ..

...........................

اليوم الثاني رحت لتكريم الأوائل ... حسيت بالفخر وهم يكرموني ... المهم عندي أرفع راس ابوي .. وأحقق أمنيته ........

ليته معاي اليوم وهاللحظه .. ليته يمبي ويشجعني .. ويبتسم لي شرات ما كل الأبهات يبتسمون لعيالهم ......

فقدتك يا أعز الناس ... يوم عن يوم أحس بازدياد أهمية وجودك بـ حياتي يا أغلى البشر بس للأسف القدر فرقنا ,.. ما كان مكتوب لنا نكمل مع بعض .. هذي الحياه ببساطه ..

طلعنا من قاعة التكريم ورجعت البيت رقدت وأنا مرتاحه البال ,,, هم وانزاح من على قلبي خلااااص الحمدلله ... صار اللي ابا أسويه ..

مشينا هاليوم بالسوالف ونحر جواهر اللي ما تكرمت شراتنا ,,,, بس هالانساانه مقتنعه بـ حياتها أحلى شي فيها هو هذا .. حلو الواحد يكون عنده قناعه ويكون واثق من روحه ...

....................................

اليوم الثاني اتفقنا نروح صوب البحر حزة المغرب .. يوم الجو يكون حلو ... لأنه صيف ..
حلو البحر .. من زمان ما رحت له .. بشكي له همومي شوي اليوم ...

معني أمس قلت .. بفتح صفحه يديده في حياتي وبنسى شي اسمه هموم وبشيل هالمسمى من قاموسي ... خلاص الحمدلله الهموم بتودعني خلااااص وبتناسني ,,, منو قدي يوسف بيكون معاي .. وبتم معاه طوووول عمري ...

.......

تجهزت ولبست ..جهزت أغراض عموري وعدول لأنهم يمكن يخسون رواحهم بـ ماي البحر ... يا ربييييييييه اش كثر مستانسه اليوم .. وأخيرا يوسف لي وأنا لـ يوسف ..
نزلت بعباتي شفتهم جاهزين .. بس كـ العاده باجي جواهر ..

شفت أولاد عمي محد .. رحت صوب مرت عمي ..
شفت فيه نظاره شمسيه ع الطاوله ..

وقفت يدامها .. ولبست النظاره : شو رايج عموووه ..؟
مرت عمي : اقري ع روحج هههه .. لايق عليج ..

قلت لها : أحم أحم أخجلتيني .. هههه
وطلعت النظاره طالعت وراي .. شفت الجوهره واقفه تباغم : جوجو خلصي ترانا هب متفيجين لج ..

قلت لها : الين باجر صارخي ماشي فايده .. نتريا يعني نتريا ..
الجوهره : وانتي الصاجه .. وين عموري وعدول وعلاوي ..
قلت لها : أونهم يجرجون البي اس بي عشب يلعبون اهناك ..

الجوهره : هاييل من صدقهم الحين .. الواحد يوم يروح البحر يستانس ..
قلت لها : ذكائهم خارق ... هاااااااااي السندريلا وصلت ..

جواهر لابسه نظاره وكاشخه وحالتها حاله جنها في بلاد بره خخخ ... محد يقول انّه نحن في الامارات والجو حار ..

الجوهره : وأخيراً .. يلا مشينا الشباب يتريونا في السياره ..
جواهر ترد ورا : لحظه لحظه .. واقي الشمس نسيته ..

طالعت جواهر قلت : يالغبيه نحن مغرب .. يعني لا يباله واقي شمس ولا هـ النظاره اللي لابستنها ...
جواهر تمّت تطالع وراي وماسكه الضحكه ..

طالعتها وقلت : بلااااج ...
لفيت وراي الا تفاجئت ويوسف واقف مستغرب ويطالعني ... جني أول مره أرمس يدامه ..
استحيت ونزلت راسي رحت صوب الجوهره ..

يوسف : أمايه خلي البنات ييون وياي وانتي والوالد والعيال مع ياسر ...

بغيت أقول لأأأأ أستحي واااااء ..... بس ما قدرت أرمس في شي ربط لساني غصب عني ..
تجدمنا .. وكنا نمشي ورا يوسف .. الين وصلنا جريب السياره ...

الجوهره : نورو اركبي يدام ..
سويت الها طاااااااف وركبت ورا ..
جواهر : ايه اركبي يدام
طالعتها شفت يوسف قريب لو رمست بيسمعني ..
جان أقول : مابا .. لو انتي تبين برايج ...

ركبت الجوهره يدام وجواهر ورا وياي .. قعدنا .. وعقب ثواني من بعد ما يوسف أنهى مكالمته ياه ركب .. بند الباب .. صار ظلام الحمدلله ..

وشغّل المسجل .. طالع ورا صوبي وقال : جواهر طلعت نورو أحسن عنج هااا .. تعرف فالموضه هب شراتج خربطيشن ..

استحيت ... قلت ياليتني ما رمست هذيج الحزة ... حتى يوسف استغربت منه أول مره يتكلم وياي جذا يمكن لأني خطيبته الحين ...

بس هو حسب مزاجه متى يبا يرمسني يرمسني بس أنا لأأأأ ممنوع لي ..
جواهر : أصلا أبا اتخقق أوووووف حرام الواحد يتخقق ..
يوسف : تخققي بعيد عنا .. بتفضحينا بخقتج هاي ..

جواهر : ههههههه والله اني لبستها مصخره بس هب ناويه البسها اهناكي ..
يوسف : اتحرا بعد .....

تميت أعابل في فوني كنت أحس روحي متوتره عكس يوسف اللي مبين عليه الهدوء وبرود أعصابه ...

وصلنا البحر .. نزلنا أنا والجوهره وتمينا نمشي مع بعض .. أما جواهر راحت صوب ميثاني وعلايه ومشو مع بعض ...
قلت : جوجو أنا مستانسه ..
الجوهره : وأنا بعد .. نواري الله يهنيج بـ حياتج

طالعت صوب البحر : تسلمين ... وين حمد...؟
الجوهره : جنّه اهناكي صوب يوسف ..

قلت لها : لا لا عاد ما بطالعه هههه دام يوسف عنده أستحي ههه
الجوهره : حركات يسوف بعد ... اليوم شلنا وياه غريبه ها طلعات يالله يالله بالشحته يطلعنا

قلت لها : أكييييد نواري وياكم .. هههه
الجوهره : شوفي شوفي ...

طالعت صوب ما تأشر الجوهره يتني الضحكه ..
قلت لها : حرام عليهن خرسوها ماي ..
الجوهره : مسكينه علييوووه هههه

قلت لها : والله جواهر و ميثاني ما يرحمون أحد بـ هالدنيا هههه
الجوهره : نروح صوبهم ..

قلت لها : تبينهم يخرسونا هههه
الجوهره : صدقج ... نقعد مكانا وايد أحسن ..

سمعنا صوت عموتي كانت جريبه عنّا رحنا سلمنا عليها وردينا قعدنا ..
الجوهره : نواري تحبين البحر ..
قلت لها : أكييييد .. فيه أحد يكرهه

الجوهره : هههه ياليت لو يوم نروح بحيرة خالد ونركب القارب مالهم ..
قلت لها : بابا الله يرحمه كان مشبعنا من الروحه اهناكي ..

الجوهره : أحيدج أسبوعيا اهناك .. ههه

قلت لها : عاد هب أسبوعيا أسبوعيا ههه تقدرين تقولين شهريا ..
الجوهره : تدرين في خاطري أروح العب بالماي ..

قلت لها : كامي وياي تعالي نروح في صوب بعيد عن هالمغثه ..
الجوهره : هي عن يخيسونا ..

رحنا أنا والجوهره تمينا نتمشى ونحن حافيين طلعنا النعال ...
مشينا ومشينا الين ما ملينا .. تقربنا من السيف وتمينا نمشي ونرمس ..

قلت : جوجو تعتقدين بعيش سعيده مع يوسف ..
الجوهره : أكييييد انشالله .. وبعدين نواري انتي لايقه ع يوسف هع .. ما ترمسون وايد .. وجديين لأبعد الحدود

قلت لها : هههه حلوه هاي لـ هالدرجه جاده أنا
الجوهره : هي نادر ما تمزحين .,.

قلت لها : وهـ الشي يعيبني في روحي هههه
الجوهره : مداح نفسه يباله رفسه ترا .. هههه

قلت لها : انتي اللي مدحتيني هههه
الجوهره : طالعي هاك الصوب ...

لفيت ويهي وطالعت الصوب اللي تأشر عليه الجوهره
قلت لها : أميييييييه يلا نرد مكاننا ,,
الجوهره : لأاأأ مابا

قلت لها : جوجو أنا أخاف ..
الجوهره : ترا أخوي ما بياكلج ...

قلت لها : أوووف أنا راده ..

توني بلف عسب أرد مكاني الا وصوت وقف الدم بـ عروقي .. صوت يهز بي كياني ويلعب بي لعب ...
يوسف : جوهره نواري تعالو ...

حسيت الدم اهني بالفعل وقف بـ عروقي
طالعت الجوهره : أويييييه مابا أسير ..
الجوهره : أنا وياج عادي ما بياكلج ..

طالعتها بأسى .. دامه زقرنا لازم نسير ..
قلت : أوكي يلا نسير بس نرد بسرعه ...

تقدمنا أكيد الأخت والأخو متفقين علي .. هالشي أكيد اميه بالميه .. لو دريت يا الجوهره شوفي شو بسوي بج ...
وصلنا صوب يوسف ..

يوسف يعابل في تلفونه : ها مستانسات ..
الجوهره : أنا عن نفسي هي نورو ما أدري عنها ..
قلت : لأأأ أنا مستانسه ,,,,

يوسف : زين .. نواري أباج شوي .. الجوهره ممكن دقايق ,,,
الجوهره ما علقت ولا قالت ولا كلمه انسحبت راحت بعيد بس نقدر نشوفها ...
حسيت بـ قشعريره .. حتى ولو الجو حار أحسه بارد وايد ...

يوسف : نواري بلاااج ..؟
اهني وعيت من خيالي ورديت للواقع ..

قلت له : هااا لااا ماشي ... أنا بسير ...
يوسف يود ايدي يرجعني .. : قلت لج أباج في سالفه ..

سحبت ايدي بـ هدوووء .. معني كنت أتمنى يا يوسف أيود ايدك طول عمري ولا أودرها .. بس كل شي في وقته حلو يا يوسف ..

طالعت البحر مستحيه : نعم ...
يوسف قعد ع الرمل بطريقه حلوه ...
طالعني هالشي أربكني : نوره اقعدي ..
قلت له : مابا .. ارمس بسير ...

يوسف : بدينا .. قلت لج اقعدي ماباكلج .. هكوهم مبينين ..
طالعت الأرض وقعدت ع الرمل .. حسيت روحي أبا ألعب في الرمل ... بس خلاااص ولت أيام اللعب .. تذكرت انه يوسف يمبي ...

يوسف : نوره ممكن أسألج سؤال وتجاوبيني بـ صراحه ...؟
طالعت صوبه وقلت : حسب السؤال ...

يوسف : لأأأأ عاد أبا الصراحه ..
قلت له : اسأل ..
يوسف : وعد بتقولين الصراحه ...

قلت له : قلت لك حسب ...
يوسف : عاد خلاااص ..
قلت له : خلاص وعد بقول لك الصراحه .. ارمس ..

يوسف : انتي وافقتي علي بـ قناعه ...
طالعت البحر : مدري ...
يوسف : يعني مب مقتنعه ..
قلت له : ما اعرف قلت لك ..

يوسف : عاد ليش وافقتي ..
قلت له : أنا روحي مدري ..

يوسف : يمكن يكون تهرب من ضروفج وحياتج ..؟؟
قلت له : جايز ,,,
يوسف : نوره قولي الصدق لو سمحتي انتي راضيه ولا لأ ..
طالعت البحر .. وقلت : راضيه ...

وقفت نفضت الرمله من على ايدي .. وقلت : خلاص ولا تبا شي ثاني ..
يوسف : لأ خلاااص .. بس أكيد ..
ابتسمت له وقلت : أكيد ...

ابتسم لي ولفيت عسب أرجع صوب الجوهره .. سمعته يقول : ديري بالج ع روحج ..

المتني هالكلمه اش كثرررر ... على معناها الكبير والحلو .. اللي يدل عالحرص .. الا اني أحسها مثل السجاجين ع قلبي ...

دوووم يوسف يقول جذي .. حتى أبوي الله يرحمه دوم كان يقول جذا ... فيه تشابه كبير بينهم ....... يوسف انت دومك تذكرني بـ أبوي .... حرااام عليك .. كل ما أنسى تذكرني به ..

رحت صوب الجوهره وغمزت لي : هاا استانستي مع الحبيب ..
طالعتها وقلت : انجبي لأفلعج الحين

الجوهره : هه خلااااااااص هههه تعالي نروح صوب البنات ..
قلت لها : يلا قمنا ..

مشينا وأنا بس أفكر يوسف ليش سألني هالسؤال يا ترا يحبني ولا لأ ... ولا انه يباني أقول له وافقت عليك غصب .. عسب يفسخ الخطوبه ويشوفها حل والله مدري عنك يا يوسف ..

رحنا صوب السيف وتمينا نلعب ... بالماي وتصورنا صور للذكرى ..
طالعت الصوب الثاني شفت الشباب يلعبون كرة طايره .... آآآه يابوي وينك وينك والله مكانك خالي ... اش كثر مشتاقه لك ...

تذكرت أبوي ويتني الغبنه ... كيف كان مع الكل ومحبوب .. كان لعيب في كرة الطايره دوم فريقه يفوز ,, آه يا بوي ليش تركتنا لحالنا .. تعال الكل مشتاق لك ويبيك محد بـ هالكون يقدر يعوض مكانك ...

جواهر : بنات انا أبا أروح ألعب وياهم ..
الجوهره : هي عسب يسوف يفلعج وتطيرين وياكلج السمج هههه
جواهر : لا لا نواري عندها واسطه يلا نبا نلعب ..

قلت لها : شكلج تبينه يطيرني وياج بعد ههه
ميثاني : لا صدق نواري سيري قولي لهم الكره يسمعون كلامج ..
الجرهره : لأأأ نواري أصلا هم ما يبون لج الخير هههه

قلت لها : لو اني غبيه ومستغنيه عن روحي جان سمعت كلام جوجو وميمي ..
علايه : بنات يلا عن اذنكن ,,

ميثا : ذلنا خلود كل شوي يتصل بها حشا ..
قلت لها : انجبي دامج ما تعرفين هـ السوالف ..
ميثا تكش على روحها : شكلنا عنسنا ,,

جواهر : صدقج ,,, بكتب ع عباتي من باجر ,, للبيع هع يمكن واحد يشفق علي وياخذني ..
ميثا : نواري شو كان شعورج لما يوسف خطبج ..
وقفت ومسكت ايد الجوهره : شي خاااااص ما يخصج ..

ميثا : تريي لما انخطب ما بقول لج عني ..
قلت لها : هذا اذا انخطبتي .. وبعدين ماماتي غبيه أنا أقول لج وأشوف الخبر باجر واصل لـ يوسف بعد ..
ميثا : يلا مناك يلا مناك كش .. نحن ما نحب المؤدبات يقعدن معانا ..
قلت لها : أحسسسسن زين يت منج وتعرفين روحج ومعدنج ههههه

جواهر قامت ومشت مع ميثا وهم يحرونا بايديهم وحركاتهم ..
الجوهره : الحمدلله والشكر ولا جنهن متخرجات من الثانويه البارحه ..
قلت لها : خليهن يعيشن حياتهن ههههه

الجوهره : نورو تعالي نروح صوب قوم ماما ..
قلت لها : أوكي لأني مليت ..

وقفنا وتمينا نتمشى عسب نروح صوب عموتي ومرت عمي ...
الجوهره : طالعي طالعي حمد ..
طالعت صوب ما تأشر الجوهره بس قفطت عن خاااااااااطر ...
قلت : فضحتيني يوسف واقف يمبه وتم يطالع صوبي ..
الجوهره : هههه عادي يلا واسطة خير مبينكم أنا ..

قلت لها : هههه والله استحيت الحين شو بيقول يوسف .. نواري ميته علي كل شوي تطالعني ..
الجوهره بايدها اتنطش : عادي شو فيها خطيبته وتغار عليه ..
قلت لها : لو انتي مكاني .. ؟؟؟
الجوهره : لالا ههه عاد أنا غيييييير أستحي ..

قلت لها : ماااااالت بسير بقول حق حمد الحين ..
الجوهره : هي عسب يسوف يقطع راسج هههه
قلت لها : أونـــج عاد خطيبي مستحيل يسويها ..

الجوهره : تعالي صح انتي ليش هاك اليوم كنتي تصيحين ...؟؟؟

أنا صرخت بـــصوت عالي والجوهره معاي ,... والكل تفاجأ ... شو السالفه شو مستوي ..؟؟
الجوهره : هههههه منو فرها ..
لفيت وراي : شكلها يت من صوبهم ههههه

فهد ياااه صوبنا : السموحه هههه تروعتن هااا
أنا : حشا روعتوني والله .. زين ما تكسرت هههه

الجوهره : شلوها عنّا ولو يت تراني بنقعها ..
فهد : احلمي في حمد عاااد هههه

الجوهره استحت ورصت ع ايدي .. الكل قام يكلمها عن حمد كل ثانيه وكل لحظه حمد وحمد
فهد بصوت واطي : وينها الهبله ..؟

قلت : هههه راحت ويا ميثاني صوب المريحانات
فهد : أنا أقول هبله محد مصدقني ههههه

يوسف يصارخ : فهود قوم عن حرمتيه وأختيه ههههه شكلها السالفه حلت لك
فهد يصارخ شراته : ياااي يااااي .. ما باكلهن تراني ..

روووح فهد .. حسيت روحي مستحيه ... مدري من شووو ..؟؟؟
بس يوسف قال حرمتيه ... هي حرمتيه يعني يحبني ... آه ه ه يا يوسف ما تدري اش كثر متعبني بهواااك ..

الجوهره تأشر يدامي : هللللللللللو ..
قلت لها : هلأأأأ ..

الجوهره : وين رحتي ..؟؟
قلت لها : جوجو شكلي بودع الهموم وبمحيها من قاموسي ,,

الجوهره : يارييييت ع الأقل نفتك ههه
قلت لها : غربلاتج هههه يلا نسير صوب قوم عمو ..

وصلنا صوب قوم عموتي ومرت عمي كانو قاعدات يسولفن ..
الجوهره قعدت .. وأنا رحت صوب الخدامه يوم تقطع السندويتشات وخذيت لي وحد وييت صوبهم ..

الجوهره : ياللحفه ييبي لي ..
قلت لها : هب متفيجه لج ,, عمو وعمو تبون ..؟

عموتي ومرت عمي : لأ ..
عموتي : تونا شربنا جاي حمر ..
مرت عمي تأشر يمبها : حرمة ولدي تعالي اقعدي يمبي ,,,
استحيت وطالعت صوب الجوهره ..

الجوهره : بدينا من الحين هااا حرمة ولدي وحرمة ولدي ونحن وين .. هااا
رحت صوب مرت عمي وقلت : يلا مناك عمو مالي صح عمووو ..؟

مرت عمي : هي مالج هههه
عموتي حفصه : عاد أنا بعد ما أرضى ع حرمة ولدي تعالي صوبي ..
الجوهره استحت مبين عليها .. وقالت : موتي حره نورو هههه

طالعتها وضحكت وياها .. وقعدنا نسولف مع عموتي ومرت عمي عن سوالفهم زمان وكيف عمي خطب مرت عمي ... وووو سوالف أول يا حلاتها .. تفتح النفس أيامهم حلوه غير غييير عن أيامنا هاي .. بس الكل يعيش وقته ويومه .. في نظري زمنا فيه وايد أشيا أحلى .. والحياه حلوه اذا نعيشها حلوه .. حسب الشخص ونيته ..

أدري لازم أنصح روحي أول وعقب أنصح الناس هههه ..
بس هذا طبع الزمن وهذي قسوة الحياه .. أوقات الواحد ينصح غيره ويوعي غيره .. و هو محتاج من ينصحه ويعرفه الدرب الصح ويوعيه ...

عموتي .. : نواري الجوهره سيرو سيارة ياسر شوفو تلفوني هناك ...
أنا والجوهره : انشالله ..
قمنا أنا والجوهره ... مشينا الين صوب الباركنات ..

الجوهره : نواري طالعي الشارع حلو ...
قلت لها : يبالي أصوره صوره وأحط الصوره في نور الامارات ..
الجوهره : انتي لما ييبي موبايل ماماتي ,,, وأنا بصوره .

قلت لها : أوكي ..
فتحت باب السياره .. مسكت الموبايل .. توني سكرت باب السياره .. ولفيت وراي ..
شفت كره بلاستيكيه مال اليهال انرمت ع الشارع ..

لفيت صوب الجوهره .. وكانت ماسكه الكيمره ..
طالعتها وقلت : صوريني مع الشارع ههههه
الجوهره : هههه أوكي عقب انتي صوريني ..
قلت لها : أوكي ..

الجوهره : مسكت الكيمره وحطتها يدام ويهها .. وتوها بتدق على الزوم عسب تعدل الصوره ..
طالعتها وقفت وتمت تطالعني مصدومه ..

استغربت قلت : جوجو بلاااااج ..؟
فجأه طاااااااااااحت الكيمره من ايد الجوهره .. وأنا سمعت صوووووت بريــــــــــــك سياره يطر الأذون من كثر ما هو عالي ....

توقف دمي بـ عروقي يوم سمعت صوت الجوهره أقرب لصوت الواحد يوم يموت .. وهي تصارخ بأعلى صوتها ...
الجوهره : عـــــــــــــــــــــــاااااااااااااااااااااااااا دلـــــــــــــــــــــ ................!!

انتظرو للحلقه القادمه ..
توقعاتكم ..؟؟