بس يتني الضحكه : ههههه والله توني دريت
عموتي أم حمد : ترانا ما بنسير بيتكم
نوره : لا لا بنسير بيتنا
عموتي أم حمد : بس أبوج قال تيين ويانا
نوره : بس بيتكم انتو وعمّي فـ دبي وأنا أغراضي كلها اهني
فهد : عادي باجر بتردين بيتكم
عموتي أم حمد : قزري روحج بملابس ميثاني وجوجو
هزيت راسي بمعنى هيه .. وتميت أطالع برا وأنا مستغربه من حياتي .. ليش جذا ..؟
طالعت صوب الشارع الشوارع كلها ماي المطر مغرقنا كل مكان يمطر بس خير انشالله
وصلنا بيت عمتي بعد ما سلمو علي كلهم رحت على طول تسبحت وصليت وصليت ركعتين اشكر بها ربّي لأنه ابوي قام بالسلامه ورقدت بدون ما اتعشى بعد
قمت اليوم الثاني على حشرة ميثاني
رحت تسبحت ولبست وطلعت من الحجره رحت صوبهم الصاله شفت عيال عمتي قاعدين استحيت حتى ريل عمتي
نوره : السلام عليكم
الكل : وعليكم السلام
ميثا : زين ييتي ,, قولي لهم يودوني عند خالي
طالعتها باستغراب لمحت لها يعني شو السالفه
ميثا : ابا اسير عند خالي من ما طاح ما رحت زرته .. دوم أزوره هالمره يقولون لأ
يعني جذا السالفه كلهم يدرون عن أبوي دوم .. بس أنا مثل الأطرش فالزفه
نوره : هي عموتي أبا أسير عند باباتي الحين
سمعت صوت حمد وهو ما يطالع صوبنا : محد يسير الحين سمعتو
خفت وايد خوفني خرعني باسلوبه ليش هالانسان جذا شو ما يعرف نحن بشر ولا عباله نحن مساجين عنده فالسجن
رجت صوب عموتي قعدت يدام ريولها وأنا أتوسل
أتوسل وأصيح : ودوني عند باباتي محد يقدر يمنعني عن زيارته محد
حسيت روحي غمضت كلهم .. حمد شكله ما عيبه كلامي قام وطلع
عموتي أم حمد : انزين حبيبتي بعد الغدا بنروح كلنا
نوره : لا لأأأأ باجي وايد ع الغدا أبا اسير له الحين
عموتي أم حمد : شوووه باجي ..!! وايد!!! الساعه 2 الظهر،، وتقولين باجي وايد
طالعت الساعه تخرعت الساعه هنتين وأنا ما ادري
تذكرت صار لي يومين كنت عايشه ع المغذي وعقب ما كليت
حسيت روحي يوعانه وايد
ريل عمتي بوحمد : بنتي عقب الغدا بوديكم
ابتسمت له وتغدينا عقب الغدا حسيت روحي أحسن وايد .. و نفسيتي تحسنت عن قبل
رحنا المستشفى دشينا حجرة باباتيه وسلمنا عليه
رحت صوبه بسته وقعدت يمبه ع السرير
نوره : سلامات الغالي ما تشوف شر
باباتيه : الشر ما ييج الغاليه
قعدنا نسولف ونسولف مع بابا وكل شوي يطالعني حسيته مستانس بوجودي
مابا افارقه مابا .. لو يستوي به أي شي بروح معاه بسوي اللي يسويه ابا اضل يمبه طول عمري مابا اذوق مرارة الفراق مرتين فـ حياتي
الضربه يوم تيي أول مره نستحملها شوي بس لو ثاني مرّه وايد تتعب وايد
شفت أبوي يمد ايده صوب السلّه
نزلت ركض ورحت صوب السلّه : ماشي هب ناقصه اصيح بعد
ابويه : هههه بس حبّه بس
نوره : ماشي ما نبا السكر يرتفع بعد
عمتي أم حمد : صدقها ... زين تسوي بك ،، محد يعرف لك غيرها
باباتيه : ههههه الله يحفظها
على آذان المغرب الكل رد بيته بس تمينا أنا وعموتي .. عمتي قالت في وحده من ربيعاتها مرقده اهني بتروح تشوفها وترد
قعدت مع بابا روحنا سولفنا ما عاتبته بأنه ما خبرني ... لأنه حالته ما تسمح
شفت ماي زمزم اللي عمتي يايبتنه لـ بابا
نوره : اشرب وادعي بابا
باباتيه : انشالله
وجّه ويهه للقبله وقال : الله يحفظج وييسر لج حياتج كلها انتي وخوانج
نوره : آمييين وقول الله يشفيك
باباتيه : الله يشفيني انشالله
ابتسمت له : فديتك أنا عساني ما خلا منك يالغالي ..
باباتيه : صليتي المغرب
نوره : الحين بروح بصلي
باباتيه : هي روحي صلّي ،، بالمره هاي حزة يغيرون المغذي
نوره : اممم عندك سكر ومغذي كيف جذا
باباتيه : هم أدرى يلا انتي سيري صلّي
رحت صوب مصلى النسا شفت وايد حريم اهناك أكيد كل واحد وعنده أحد اهني محد همّه أحسن عن هم الثاني كلنا سوييه
صليت ودعيت ربّي يشفي أبوي من قلبي دعيت وايـــــــــــــــد لـ أبوي
وطلعت من المصلى رحت بين الممرات
فيه ممرضه يت : ها نوره انشالله أحسن عن البارحه ..؟
ما عرفتها بس قلت : الحمدلله أحسن
ابتسمت لها وابتسمت لي : ديري بالج ع روحج يالحلوه
رحت صوب حجرة باباتيه فتحت الباب وأنا أفكر فـ كلام الممرضه
شفت ابوي راقد ع سريره تجدمت منّه شفته مغمض عيونه
خفت عليه فالبدايه وايد.. لما شفته يوّد ايدي وابتسم لي ،، الحمدلله مرحلة الخطر عدّت خلاص فـ ليش الخوف
ابتسمت له رص ع ايدي وتم يطالعني
هالحزه حسيت بالفعل أنا حلوه وجميله كلهم نظراتهم لي تدل على جيه الحمدلله انّه ربّي خلقني جذا ،، معني أحس روحي وايد عاديه بس الناس كلامهم العكس
صديت سمعت صوت الباب يفتح بس يباله قوّه
سمعت صوت عدولي يقول : بابا افتح بسرعه هههه هذا يسوف قاعد يركض وراي
ابتسمت هذا عدول الشيطون قبل شوي كانو عند ابوي بس شكله شرد وياه صوب بابا
رحت أفتح الباب فتحته وشفت عادل يصارخ ويوسف شايلنه
يوسف : اسكت اسكتت فشلتنا
يوم طالعني نزله وأنا استحيت ودرت الباب ودشيت داخل
نوره : بابا عدول الشيطون رد اشتاق لك وايد
أبويه ما رد عليّه
استغربت وخفت ، تقدمت منه هزيته
قلت وأنا أهزه ومنفعله : بابا رد علي بابا ...
بس ما رد علي ،،،،،،خفت ولصقت فيه بديت أنتفض وأهزه
لأأأأأأأأأأ قبل يومين بابا حالته استقرت يارب ما تتدهور مره ثانيه يارب لأ ، ما أستحمل خلاص
بديت أصيح : بااااااااااااابا رد عليه لا تودرني ,,
ما حسيت الا ويسحبوني سحب ويجروني جر .. ودكاتره وايد حوالين بابا
وقفنا يدام باب الحجره وهالمره قلت بستوي قويه وبدعي ما بصيح ولا بكسر شي
يرو بابا بالسرير هالحزه ما قدرت أزخ دموعي خلاص .. صحت صياح بس بدون صوت بـ سكون وهدوء يالله يالله حد يسمع همسي
رحنا وقفنا يدام باب العنايه المركزه كلنا وأهلنا كلهم موجودين
كنت واقفه في زاويه وأصيح بمراره وأدعي ربّي ربّي يقوم أبوي بالسلامه
ما حسيت الا والدكتور يطلع من الحجره
طلع وعلى ويهه ملامح تشبه ملامح أمس مرتسمه على وجهه علامات الحزن
ركضت صوبه هالمره محد يودني ما ادري ليش
بس الدقيقه اللي وصلت فيها يمبه حسيت بواحد ركض نفسي ووقف يمبي
ما شفته هذا مو وقت هالأفكار بغيت أسأل الدكتور
بس اللي يمبي سبقني جنّه بابا أغلى عنده ويحبه أكثر عنّي سمعت صوت
عموري يصيح ويقطّع القلب : ابوي شو استوا به ..؟
الدكتور طالع صوب عمّي وهو واقف يمبنا
الدكتور قالها نعم قالها وياليته ما نطقها يا ليتني ما سمعتها ليتهم سمعوها فيني ولا أسمعها في حد
الدكتور : البقيه فـ حياتكم
لأأأأأأ أبوي أبوي رد لأأأ أبوي من لي سواك بـ هالدنيا من ،، منو بيتم لي وبيسهر عشان راحتي منو ..؟ ، ابوي لا تودرني وتروح أبوي ......أبــــــوي مابا أفقدك مابا ..
ما حسيت بروحي الا وأنا أقعد على بلاط المستشفى واقول بأعلى صوتي
أصيح بمراره وعمور يمبي حاضنني : عمور بابا ودرنا وراح ،، بابا راح ويا ماما ،،، ودرونا روحنا ليش يابونا دام بيودرونا لييييييش ...؟
حسيت بروحي أكفخ روحي واللي يمبي ،،اللي يهدوني ما يدرون يهدّون روحهم ولا يهدوني أنا
..............................
قمت مفزوعه وأنا أنفث يساري
طالعت عمتي أم حمد يمبي
عمتي ام حمد : نورو نشيتي ..؟
ابتسمت لها : هي عموتي .. وين بابا ..؟
ما لقيت بويهها أي تفسير بس شفت دموعها تهل وتطيح
وقفت حظنتني وصاحت بمراره ،، يعني ما كنت أحلم كل اللي صار صدق لأأأأ أبا أبوي أنا ..
وقفت وجلعت المغذي مثل ما اسوي دوم
هالمره الدم نزل بس ما أثر فيني ولا شي ولا شي
طلعت من الحجره ركض وأنا أصيح رحت صوب العنايه المركزه قعدت يدام بابها
صحت بمراره : أبوي اطلع من اهني اطلع بسرعه نباك نحن محتاجينك .. بابا دخيلك رد
ما حسيت الا وأنا دايخه ما اعرف لأاي دنيا رحت وسافرت
ليت اسافر لدنيا باباتي وماماتي ليـــــــــــت أباهم أنا خلاص ما با هالعيشه شالفايده منها
دامني تيتمّت .. من يعرف اش معنى الواحد يتيتم ها اصعب شي ,, خاصتاً لو يوم أمس سهرنا وتضاربنا وكلينا وشربنا وتزاعلنا وعشنا ويا بعض ونفترق بـ لحظه آآآه الفراق صعب وايد
يقولون ليت ربّي ما كتب لحظة وداااع .. بس لو نودع ناس وهم عايشين بـ هالدنيا نحط أمل نشوفهم يوم من الأيام أهوّن من نودع ناس خلاص ما بنشوفهم واذا شفناهم بنشوفهم فالفردوس الأعلى بس من يدري لو بندش الفردوس ولا لأأأأ ....... يعني على كثر حسناتنا ..!!
حسيت بـ روحي قمت والكل متيمع حولي بس في شخص ناقص .. هو اللي كنت أبا اشوفه يوم أقوم هو .. بس للأسف مو بينهم للأسف رحل لدنياه دنيا خاصّه فيه ..
|