::::
الشاعر اللي عارف ٍ وش مرامه
غنى على " آمه " وغنى على " اون"


رحبت به و اعداد وبل الغمامه
و اعداد من حجوا لمكه يلبـّـون


ترحيبة ٍ بأهل الشرف والكرامه
اللي على سلم المواجيب يمشون


خالد يذكـّــرني ولا ادري علامه ؟
بأيام ناسي عهدها قبل ينسون


طرد الهوى خالف نظامي نظامه
من يوم شفت الوضع من دون في دون


ما دام ليلى مثل زرقا اليمامه
ما ألوم ابو نـواس في مدح هارون


ماعاد تطربني لحون الحمامه
لو هي تغنيها مقامات و لحون


درب المحبه صار صعب إنسجامه
ما عاد له منهج ولا فيه قانون


عفت الهوى لو صوبـتـني سهامه
و كفيت نفسي من "أماني و مأمون"


خل الغريم يعيش لذة غرامه
وانا على فرش الكرامه و مصيون


واليوم نبغي العافيه والسلامه
واهل العذل ما همني لو يعذلون


يا خوك دنيانا عجاج و عسامه
والعارفين بحكمها ما يعرفون


كثر الدجل والبعض فعله كلامه
ومن النفاق بذنبهم ما يحسبون


زاد الجهل و أزداد باس و ضرامه
لو صحت بأعلى الصوت ما عاد يوحون


هذي علامات الحشر والقيامه
والله يجير اللي من الوضع محزون
بقلم:

عادل الدوسري
منقول